1 Anzanu loun lɔɔlugɔ ɠɛni ná, ti-laaseigi ga: Maala, Noa, Wogela, Milika, ta Tiilesa. Ti-ɠɛɛ laaseigi ɠɛni ga Selofeɠade, Ɠefɛɛl ná-doun zunui, nii mɛmɛwolani ti ɠɛni ga Galaade, ta Makiil, ta Manasé, ta Zozɛfe. Anzanui naati ka ti ʋaani, 2 ti lo Moize ɠakala, ta Eleazaal, ta kundiɠiiti, ta bɛbɛi kpein, GALA daaɠomi seɠe ʋɛlɛi laaʋɛ, ti ɠɛ ma: 3 «Gi-ɠɛɛ zaaʋɛ teʋebai zu, kɛlɛ é la ɠɛni naati ta-ɓɔgi zu, niiti ti wuzeɠeni Ɠɔoɠɔ GALAGI laalɔɠɔma, Kolé ná-nu ɓulugiti, kɛlɛ é zaani ga kpɔɠɔ ɠotoi maaʋele, doun zunu la ɠɛni zea. 4 Leeni vaa zu gi-ɠɛɛ laaseigi a ɠula ná-bolodai zaama, tɔɔzei doun zunu ʋalagi maaʋele ma? Gi-ʋɔɔda ve, gi-ɠɛɛ kɛɛɠɛlointi saama.»

5 Moize liini ga ti-maavai Ɠɔoɠɔ GALAGI ɠakala. 6 Ɠɔoɠɔ GALAGI ɠɛni Moize ma: 7 «Gaamai ɠa Selofeɠade ná-doun anzanuiti ti bosu. Ɗa zooi ve ti ya, é ɠɛ ga tɔnɔi, ti-ɠɛɛ kɛɛɠɛlointi saama. Tiya ɠa ɗa ti-ɠɛɛ nɔnɔi leʋe ti ʋɔ. 8 Ɗa ɓɔɛ Izilayɛle nuiti pɔ, è ɠɛ ti ma: Siɛgi zu zunui ta zaazu la, é la doun zunu yɛni, wa ná-poganii ve ná-doun anzanui ya. 9 Ni doun anzanu la zea, wa ná-poganii ve kɛɛɠɛlointi zea. 10 Ni kɛɛɠɛlounɠa ti la bɛ, wa ná-poganii ve kɛɛɠɛ kɛɛɠɛlointi zea. 11 Ni kɛɛɠɛlounɠa ti la kɛɛɠɛ ʋɛ, wa ná-poganii leʋe ná-nu ɠiteɠitegi ta ʋɔ bolodai zu, naa ɠa a yɛ zea. Toɠa ɠɛ ga devei ta tɔgi Izilayɛle nuiti bɛ, eɠɛʋelei Ɠɔoɠɔ GALAGI ma levei veeni la Moize ya.»

12 Ɠɔoɠɔ GALAGI ɠɛni Moize ma: «Lɛ Aɓalime ɠizei nii ma, è wɛlɛ zooi ʋa, gè feezu Izilayɛle nuiti bɛ. 13 Ɗa wɛlɛzu ba, kɛlɛ ɗa ɓalaagi ɗa zaazu, è li è-mɛmɛwolani pɔ, ti zaai, eɠɛʋelei è-ɠɛɛloin Aalɔn zaani la, é li mɛmɛwolani pɔ ti zaai. 14 Mazɔlɔɔ wo ɠɛɛʋɛ ga kololala nuiti nà-devei laalɔɠɔma, Sin teʋebai zu, siɛgi zu bɛbɛi zu nuɓusɛiti ti maaɠaalii ɠɛɛni la, ti kpɔɛi ʋɛɛ bà. Wo la ɠɛni nà-ɲadedai maawuini nuɓusɛiti gaazu, é lo ziɛi vai ʋa, ti ɠɛni maalolisu.» (Naa ɠɛni ga Meliɓa ɗɛi ná-fai é ɠɛni Kadɛse, Sin teʋebai zu.)

15 Moize ɓɔɛni Ɠɔoɠɔ GALAGI ʋɔ, é ɠɛ ma: 16 «Ɠɔoɠɔ GALAGI é ga kpusɛi kpein ta-zɛnvuiti ta-ƓALAGI, ɗa ɓɔɠɔi yiimazeɠe ga nu, è sei bɛbɛi unda, é ɠɛ ga kundiɠii, 17 nui nii a ɠɛ losu ti untuɠɔ kɔɔɠɔzuʋɛti, é ɗa li ga tiye, é ɗa ʋa ga tiye, nii a kɛ Ɠɔoɠɔ GALAGI ná-nuɓusɛiti ti mina ɠɛ eɠɛʋelei baalagiti ti la, ti makɛ nu la ná.»

18 Ɠɔoɠɔ GALAGI ɠɛni Moize ma: «Nun ná-doun zunui Zozuwe zeɠe, zunu ʋe nii zɛnvui zeini su, ɗa yeela ma. 19 Ɗa lii la, è sei zalaɠa ɠula nui Eleazaal ɠakala, ta bɛbɛi kpein, è deveiti fe zea ti ɠaazu. 20 Ɗa ɗa-ɠundiɠilai ma zobogi ta ve zea, naa ɠa a kɛ Izilayɛle ʋɛbɛi ɠolo bɛ. 21 Toɠa zei zalaɠa ɠula nui Eleazaal ɠakala, naa ɠa ɗa gàazaɠa tɔun bɛ, ga anii nii daaseigi ga wuulimegi. Nii nɔpɛ a bona, ʋele ɠana Zozuwe ta Izilayɛle nuɓusɛiti ta ta-ɠɔɔɠɔ vaiti so da.»

22 Moize kɛɛni, eɠɛʋelei Ɠɔoɠɔ GALAGI ma levei veeni la zea. É Zozuwe zeini zalaɠa ɠula nui Eleazaal ɠakala, ta bɛbɛi kpein. 23 É yeeiti daani ma, é deveiti fe zea, eɠɛʋelei Ɠɔoɠɔ GALAGI boni la ma.