GALA Daawoo Zɛʋɛi Kulakɛlɛmai 1

Yesu Kilista

Ná-Kulakɛlɛmai

Zan Ʋɛ

Sɛʋɛi lɔɔzeizuʋɛ ma woo mɔungiti

Kulakɛlɛma Zɛʋɛi ɠa é ga Minazeɠe Niinɛi ma zɛʋɛ ɠaaɓelagi. Tɔ ɠa ɓalaa keelai Zan sɛʋɛni ga gaaɓela (1:1), kona ʋuutaaʋuugɔ maazu lɔɔlugɔ (95) ɠɛɠala leʋegai ma, Kilista zɔlɔɔga ʋoluma. Zan naa nɔ ɠa é Woo Niinɛ Ʋagɔi zɛʋɛai, nii daaseigi ba, ta sɛʋɛ saʋagɔi zɔiti, niiti daaseigi ti ʋa. Nui ti ɠɛni Zan ɠwɛɛ ɓalaa ga «Kaladopoi nii Yesu nɛɛni ʋɛ» (Zan 13:23). É Kulakɛlɛma Zɛʋɛi ɠɛɛni ziɛ zaama yooi zu, daa ga Patemɔse, mazɔlɔɔ ti soni, ti lii la miná, é Woo Niinɛ Ʋagɔi laazeelini, nii pilɛgai Yesu Kilista ʋa (1:9).

Kulakɛlɛma Zɛʋɛi ɠɛɛ ungi Zan ʋɛ, naa ɠa ga é kala nuiti iɲɔdɔ ga ti ɠɛ ga wooɠɛɠila nua Yesu Yesu Kilista ʋɛ, ta é kitogi ve tiya, mazɔlɔɔ Yesu ɠaaɠalema vai ma yeeɠɛɠalai maaɓuɠaa (1:3; 22:7). É sɛʋɛi leʋeni keletiɛinti pɛ ma, ma un ge daa ma mɛɛ ga Egilisi lɔfelaiti ma (2:1—3:22). Zan ɓɔɠɔi ɠɛ ná-sɛʋɛi ɠa ga kulakɛlɛma ɓɔɛiti (1:3), é maaniini mɔinmɔin seɠeʋɛ ná-sɛʋɛi zu ná pɛ, nii a kɛ fai niiti é ti ɠaai, é ti zuɠula. Sɛʋɛi nii ɠulaʋɛ ga Minazeɠe Pɔlɔmai ná tanigaani, ma un ge daa ma mɛɛ ga Zakali 6:1-8. Puʋu dɔfelaiti ta ziawɔ lɔfelaiti kulaʋɛ ga ʋe ta nimiza vaiti GALA ge ti zeini Ezipete ma ga maaɠolo ɓakɔi (Ɛgz 7:1—9:35). Kulakɛlɛmai ɠa ɓɔɛzu é ʋilɛ yeeɠɛɠala ɠaaɓelagi ʋa, é ɠɛ Yesu ɠa ɠɛɛzu ga pilɛ sɔlɔɔ nui, ta zɔiti kpein ti laazu tɔun da, naati ta ɠɔoɠɔ zɛnvui zɔlɔɔ. Sɛʋɛi nii wo loo ɠisu faan, ta é kitogi ve wo ya ga Yesu ɠa ʋaazu ʋolu fala.

Unsosuʋɛ

1. Zan tɔɔzeiʋɛ ga é dɛɛ ɓɛ ɠa é ga tɔun, ta ʋele é kulakɛlɛmai zɔlɔɔgai la (1:1-20).

2. É keela wooi laazeelini, nii é zɔlɔɔni Yesu ɓɔɠɔi ya, Egilisi lɔfelaiti faa ma (2:1—3:22).

3. Naa ʋoluma é poo dɔfelaiti ta-vai zuɠula (4:1—8:5), ta puʋu dɔfelaiti (8:6—11:19).

4. Naa pɛ poluma Zan ɓɔɛʋɛ é lo anzanui ʋa, nii Vamɔɠɔgi ɠɛni kpɛɛzu, ta sua felegɔiti, naa ʋɛɛ baala ziʋoi ʋa (12:1—14:20).

5. É zɛba é ziiɠaawana ɗaawɔ dɔfelaiti ta-vai zuɠula (15:1—16:21).

6. Naa ʋoluma ʋelei GALA ge pilɛ sɔlɔɔsu da sili nuiti geeɠɔlɔgi zu, Zan naa ɓalaa suɠulaʋɛ (17:1—20:15).

7. É ná-sɛʋɛi ɠaaɓelagɛ ga, geeɠɔlɔ niinɛiti ta zou niinɛi niiti ti ʋaazu folo ɠaaɓelagi, é naati kɛʋelei zuɠula (21:1—22:21).

Woo lɔɔzeigi

1 Sɛʋɛi nii zu vai ɠa ga kulakɛlɛmai nii Yesu Kilista sɔlɔɔni, nii GALA ge feeni zea ga é dɛɛ ga ná-botiɠɛ nuiti, fai niiti ti ʋaazu ɠɛɛzu fala. Kilista ná-geezuɠeelai leʋeni, é ti lɛ ga ná-botiɠɛ nui Zan. 2 Zan ɠɛni ga zeelei, ga é GALA daawooi ta Yesu Kilista ná-zeele wooi ta nii kpein é kaani, é naati daazeeli. 3 Undaanɛ nu ɠa ga naama nui, zɔi é niima zɛʋɛi zu ɠulakɛlɛma ɓɔɛiti kalasu, ta naati ti woilosu ma, naa ʋɛɛ niiti ti ziɛzu ga niiti ti zɛʋɛai su! Mazɔlɔɔ su vaiti kɛ yeei maaɓuɠaa.

Tuʋɔgi ta maamusɛi

4 Nɛ̀i gè ga Zan, nà niima zɛʋɛi leʋesu Azi yooi zu Egilisi lɔfelaiti ma. Zaalai la wo ma, ziilɛigi ve wo ʋɛ, naa ya, nii é ná, nii é ɠɛni ná, nii é ʋaazu, é ve wo ya, zɛnvu lɔfelaiti zea, ti ná-masa kpɔkpɔgi ɠakalaʋɛ, 5 é ve wo ʋɛ, Yesu Kilista ya, nii é ga wooɠɛɠila zeelei ta Doun Zunu mɔungi, é wuzeɠeni, é ɠula saai ya, etea masagiti ta-ɠundiɠii.

Tɔ ɠa é ade nɛa ʋɛ, é de unmɔɔni, é de ɠula da-ɠotoiti su ga ma ɲamai, 6 é de ɠɛ ga ná-masadai zu nuiti, zalaɠa ɠula nuiti Kɛɛɠɛ GALA ná-botii zu. Deɠɛmu, lɛbiyai ta zobogi ta ga nɔnɔ eyɛsu ɠɔ! Amina!

7 Wɛlɛ, toɠa yɛsu tonaɓiingi zaama, é ʋa! Ɛsɛ pɛ ka ka, anɛɛ zɔiti ti bɔɔni. Etea nuɓusɛi pɛ ka wɔlɔ ná-faa zu. Ungo, zekana a ɠɛ la! Amina!

8 Maliɠii GALA ge ɠɛ ma: «Nà ga Alefa ta Womega,»* zɔi é ná, é ɠɛni ná, é ʋaazu, Zɛbɛi-Pɛ-Maliɠii.

Zan Kilista ná-kulakɛlɛmai ɠaa vai

9 Nɔ̀un nà Zan, nà ga wo-ɠɛɛloin, nà nɔ̀nɔ zɔlɔɔsu wo zaama kidaaʋili fai zu, ta GALA ná-masadai zu, ta ziilɔɔi zu, ada-ɠilibalai zu da Kilista, nuiti ti liini ga ze ziɛ zaama yooi zu, daa ga Patemɔse, tɔɔzei GALA daawooi ʋa gè daazeelini, ta Yesu ná-zeele wooi nii gè boni. 10 Maliɠii ná-dooɠo foloi, GALA Zɛnvui yeini mà, gè woo wolai ta mɛnini pòluʋelei, eɠɛ puʋu fɛɛ wooi, 11 é ɗa ɠɛ ma: «Niiti è ti ɠaazu, ti zɛʋɛ sɛʋɛi zu, è teʋe Egilisii lɔfelai niiti ma: Efɛze, ta Simiiline, ta Pɛɛlegame, naa ʋɛɛ Tiyatiil, ta Saalede ʋa, é ʋɛɛ Filadɛlɛfi, ta Laodisé ʋa.»

12 Gè latini, gè ɠɛ gè wooi naa ɠwɛɛ, é ɠɛni ɓɔɛzu pɔ̀. Tàtigai ma, gè fitina zei ani lɔfelaiti kaani, ti ga zanugi. 13 Gè nui ta ɠaani loni zanu fitina zei aniiti saamaʋɛ, eɠɛ nu ná-doun zunui, maaɠilini ga kwɛpele seɠezuɠoozagi, zanu saamaɠiligi ɓesagai kakai wu. 14 Nɔungi ta nɔundeɠaiti ti ɠoleni eɠɛ baala deɠa ɠolegi, ti ɠole eɠɛ kobe kolegi, gaazuɠɛzɛiti ti volozu eɠɛ abuzogi, 15 kɔɠɔiti ti ɠɛni eɠɛ kɔlu ɓɔigi, kpɔiɗai abuzulugi zu, gooi ɠɛni eɠɛ ziɛ wolai zulu gooi. 16 É somideɠa lɔfelaiti soni yeezai ya, gaavele boɠa zɔkpɔ ɠaaligi, naa ɠɛni ɠulazu daaʋɛ, gaazuʋɛ ɠɛni volozu eɠɛ foloi, siɛgi zu é toozu la ga zɛbɛi pɛ.

17 Siɛgi zu gè kaani la, gè looni kɔɠɔi wu, eɠɛ nà za. É yeezai ʋɛɛni mà, é ɠɛ mà: «Mina lua pa! Nà ɠa gè ga ma mɔungi ta ma ɠaaɓelagi, 18 nii é vulua. Gè zaani, kɛlɛ wɛlɛ, nà vulua eyɛsu ɠɔ, nà ɠa saai ma ɓaɠuiti ti zèa ta gɔvɛalaazu ɓaɠui. 19 Naa ɠa é ba, naa zɛʋɛ, niiti è ti ɠaa: niizu vaiti, ta niiti ti ʋaazu ɠɛɛzu naa ʋolu. 20 Wɛlɛ, somideɠa lɔfelaiti è ti ɠaazu, ti zoni zèezai ɠa, ta zanu fitina zei ani lɔfelaiti, dɔɔɠuzu vai naa ʋoluʋɛ ɠa é ga nii: Somideɠa lɔfelaiti ta ga Egilisi lɔfelaiti ta-ɠeezuɠeelaiti, zanu fitina zei ani lɔfelaiti ta ga Egilisi lɔfelaiti.

*1:8 1:8 Alefa ta Womega: Gɛlɛke zɛʋɛ ɠaei ma mɔungi ta ma ɠaaɓelagi. Naama wooi ʋoluʋɛ ɠa ga «ma mɔungi ta ma ɠaaɓelagi», ɓaa «tɔɔzeizuʋɛ ta gaaɓelasuʋɛ».