5
Sɛʋɛ ɓiligi ta Baala Ziʋoi
1 Naa ʋolu gè sɛʋɛ ɓiligi ɠaani é zoni naa yeezai ya, nii é ɠɛni zeini masa kpɔkpɔgi ɠa, sɛʋɛi ɠɛai ná felegɔ pɛ, koozuʋɛ ta poluʋɛ, daaɠulugai poogi zei ba ga dɔfela. 2 Gè geezuɠeela ɠila kaani, zɛbɛi ba, é ɗa ɓɔɛ ga woo wola, é ɗa ɠɛ ma: «Ɓɛ ɠa é kula ɠɛai su ga é poogiti kpezeɠele sɛʋɛ ɓiligi tɛi ma, é daalao?» 3 Kɛlɛ nu nɔpɛ ge la ɠɛni zɔlɔɔni, anɛɛ geeɠɔlɔgi zu, anɛɛ zooi ma, anɛɛ zooi wu, nii a la zoo é daalao, ɓaa é wɛlɛ su. 4 Gè wɔlɔi woni gola, tɔɔzei nu nɔpɛ ge la ɠɛni zɔlɔɔni nii maanɛai é sɛʋɛ ɓiligi laalao, ɓaa é wɛlɛ su. 5 Názu ɠa kɛwola wɔlɔi gila ge ɠɛni mà la: «Mina wɔlɔ! Wɛlɛ, Zuda ná-bolodai zu, zalai é ga masagi Davide mavofodai, naa ɠa é pilɛgi zɔlɔɔga, toɠa zoo deɠɛmu é poo dɔfelaiti kpezeɠele, é sɛʋɛ ɓiligi laalao.»
6 Gè Baala Ziʋoi ɠaani, é loni masa kpɔkpɔgi ɠoba, zɛnvu su ani naanigɔiti kooliai ma ta kɛwola wɔlɔiti. Kɛai eɠɛ kɔdaaleʋeni. Minɛi ɠɛni ba lɔfela, gaazuɠɛzɛi ɠɛni ba lɔfela, naati ta ga GALA ná-zɛnvu lɔfelaiti, a ɗa ti leʋe eteai zu ná pɛ. 7 Baala Ziʋoi liini ga é sɛʋɛ ɓiligi zo, é kula naa yeezai ya, nii é ɠɛni zeini masa kpɔkpɔgi ɠa. 8 Siɛgi zu Baala Ziʋoi sɛʋɛ ɓiligi zoni da, zɛnvu su ani naanigɔiti ta kɛwola wɔlɔ ʋuufelegɔ maazu naanigɔiti (24) ti ʋilɛni ɲiibiɠa kakalaʋɛ, ti nɔkɔ bu. Kɔnigi ɠɛni ti ɠilagilagi pɛ zea, ta zanu aniɲakai ti laavegai ga ansansegi, naati ka ti ga GALA ná-nuiti ta-ƓALA fali wooiti. 9 Ti ɠɛni guye niinɛi loozu, ti ɗa ɠɛ ma:
«È zoloogɛ su mɛtu, è sɛʋɛ ɓiligi zeɠe,
è poogiti kpezeɠele ma.
Mazɔlɔɔ ti è ʋaani,
è nuiti unmɔɔ GALA bɛ ga è-ma ɲamai,
ti ɠula bolodai pɛ su, ta zii wooi pɛ su,
ta nuɓusɛi pɛ, ta zooi pɛ su.
10 È ti ɠɛ ga zalaɠa ɠula nuiti, è ti ʋilɛ ɗa-masadai zu, è ti ɠɛ ga ada-ƓALAGI nɔnɔiti,
ta masadai ɠɛ zooi nii ma.»
11 Gè wɛlɛni, gè geezuɠeela mɔinmɔingiti goomɛni masa kpɔkpɔgi maaɠoolii zu, ti ɠɛni ga waa mɔinmɔin seizu waa mɔinmɔin, ti ɠooliai zɛnvu su aniiti ma ta kɛwola wɔlɔiti, 12 ti ɠɛni bosu, ti ɗa wooɠula la, ti ɗa ɠɛ ma:
«Baala Ziʋoi nii ti paani, soloogɛ é zɛbɛi zɔlɔɔ,
ta naavoloi, ta ɠimalai, ta gaaɓaai, ta bɔɔlɔi, ta lɛbiyai, ta maamusɛi!»
13 Gè kpɛtɛaniiti pɛ goomɛnini ɓalaa, niiti ti geeɠɔlɔgi zu, niiti ti zooi ma, niiti ti zooi wu, niiti ti kpoloɗɛi wu, fuluanii kpein é ná, ti ɗa ɠɛ ma:
«Nii é zeini masa kpɔkpɔgi ɠa, ta Baala Ziʋoi,
maamusɛi, ta bɔɔlɔi, ta lɛbiyai, ta zobogi ɠa ga tɔnɔ, eyɛsu ɠɔ!»
14 Zɛnvu su ani naanigɔiti ti ɠɛni daazosu, ti ɗa ɠɛ ma: «Amina!» Kɛwola wɔlɔiti ti ɠɛni ʋilɛsu ɲiibiɠa, ti ɗa nɔkɔ bu.