1 Geezuɠeelai lɔɔlusiɛi puʋugi vɛɛni. Gè somideɠai ɠaani, nii é zeɠeni geezuʋɛ, é loo zooi ma. Zeɠezaɠa ɓokulagi ma ɓaɠui veeni zea. 2 É zeɠezaɠa ɓokulagi laalaoni. Duului ɠulani zeɠei naa zu, eɠɛ abuzulu golai ma luului. Foloi ta fiilɛi ti lɛini ga zeɠei naa ma luului. 3 Kotogiti ti ɠulani duului naa zu, ti vaza eteai zu ná pɛ. Zobogi veeni ti ya, eɠɛ nɔ akuɠɔtɔkaalii é zooi ma, naa ná-zobogi. 4 Tɔgi zeini ti ma ga ti mina faa ɲɔu nɔpɛ kɛ ga zou ɠa lufai tanɔpɛ, ta gului tanɔpɛ, kɛni nɔ nuɓusɛiti niiti ti la GALA ná-poogi zɔlɔɔni ti-loʋalaʋɛ. 5 É woni ti ma ga ti mina ti ʋaa, kɛlɛ ti ti ɓɔlɔ alu dɔɔlugɔ laawu. Kpɔlɔi naa é ɠɛni zeizu nuiti ma eɠɛʋelei akuɠɔtɔkaalii a nui wona da. 6 Naama voloiti su, nuiti ta ɗa saai ɠaiziɛ, ti la sɔlɔɔga ɲɛgɛlɛin. Wɔin ɠa ɠɛ ti ma ga ti za, kɛlɛ saai ɗa ʋela ti ʋa, é maaɠooza.

7 Kotogi naati kulaʋɛ ga sooiti ti maaɠiliai, ti ɠɛʋele ɓɛtɛai kɔɔɠɔ vai ma. Anii ta ɠɛni ti unmaʋɛti, kulaai ga zanu masa bɔɔlɔgi, ti-ɠaazuʋɛti kɛɛʋɛ eɠɛ nuɓusɛi ɠaazuʋɛ. 8 Tɔun deɠaiti kɛɛʋɛ eɠɛ anzanuiti tɔun deɠaiti, ti-ɲiigaiti ti ɠɛ eɠɛ zalai nɔnɔiti. 9 Anii ta ɠa ti-ɠakai ma, eɠɛ kɔlu ɠɔɔɠɔ zɛpɛgi, ti-ɠoʋegiti tugi ɠɛɛʋɛ eɠɛ wotoloiti tugi ti soo ɓulugiti ba, ti ɓizɛzu kɔɔmaʋɛ. 10 Wɔɔngiti ta ti-lologiti ti ti ʋa eɠɛ akuɠɔtɔkaaliiti, ti-wɔɔngi naati ka zobogi ti ʋɛ, ti ɗa faa ɲɔi ɠɛ la ga nuɓusɛiti alu dɔɔlugɔ laawu. 11 Geezuɠeelai é zeini zeɠezaɠa ɓokulagi unda, naa ɠa é ti unda ga masagi. Daasei ka Eɓulu wooi zu ga, Aɓadɔn, é ɠɛ Gɛlɛke wooi zu ga Apoliyɔn (nii poluʋɛ ga «faa zuɠoloɠolo nui»).

12 Nimiza vaa mɔungi leʋega. Wɛlɛ nimiza vaa felegɔiti ta ʋaazu mɔnɔ naa ʋoluma.

13 Geezuɠeelai lɔzitasiɛi puʋugi vɛɛni. Gè wooi mɛnini, é ɠula minɛ naanigɔiti su niiti ti zalaɠa ɠulazuʋɛ ʋa nii zanugi ziɛni maaʋɛ, é GALA kakalaʋɛ. 14 Wooi woni geezuɠeelai lɔzitasiɛi ma, nii puʋugi ɠɛni zea ga: «Geezuɠeela naanigɔiti fie, ti ɠiliai ziɛ wolai Efelate laaʋɛ.» 15 Ti geezuɠeela naanigɔi naati fieni, ti ɠɛʋele ɓɛtɛa ɠɛni de niima lɛlɛi vaa ma, ta niima voloi, ta niima alugi, ta niima ɠonagi, nii a kɛ ti etea nuɓusɛi zeizu saʋagɔi ɠilazuʋɛ ʋaa. 16 Salaʋusuiti ti ɠɛni sooiti kɔma, ti-liegɔi ɠɛni ga miliyɔn unfelegɔ (200.000.000). Gè ti-liegɔi mɛnini. 17 Zekana nà-kulakɛlɛmai zu, gè sooiti kaani la ta zɔiti ti zeini ti ɠɔma, ti-ɠakai makɛ kɔɔɠɔ zɔɔlai ɓɔini eɠɛ abui, é ɓiini eɠɛ kɔtu zɔngɔ ɓaagi daa ga safiilegi, é ʋazi eɠɛ timinigi. Sooiti tɔungi ɠɛni eɠɛ zalai ungi, abui ta duului ta timinigi ɠɛni ɠulazu ti-laaʋɛti. 18 Etea nuɓusɛi zeizu saʋagɔi ɠilazuʋɛ zaani ga niima maanɔɠɔ saʋagɔiti, abui, duului, ta timinigi, niiti ti ɠɛni ɠulazu ti-laaʋɛti. 19 Mazɔlɔɔ sooi niiti ta-zobogi ɠa ti-laaʋɛti ta ti-wɔɔngiti su. Ti-wɔɔngiti kulaʋɛ ga kaalii, tɔungiti ta ti ʋa, naati ka ta ɗa faa ɲɔi ɠɛ la ga nuɓusɛiti.

20 Nuɓusɛi mɔtaiti, niiti ti la ɠɛni zaani ga niima maanɔɠɔi, naati ti la ɠɛni ti-ziɛ ʋelei maavaliboni, ti ʋa ɓe ta-ɠɛɛwoti ɲɔiti ba, ti la ɓeni nɔkɔsu inɛgiti bu, ta kɔɔɠɔ ganigiti bu, ti ɓɛtɛai ga zanugi, ta walii, ta kɔlu ɓɔigiti, ta kɔtuiti, ta guluiti, niiti ti la zooga ti ʋa wozaɠa, ɓaa ti ʋa faa mɛni, ɓaa ti ʋa ziɛ. 21 Nuɓusɛi niiti ti la ti-ziɛ ʋelei maavaliboni, ti ʋa ɓe ta-nu ʋaa vai ʋa pɛ, ta ta-zoɠo vaiti, ta ta-ɠoloɠologiti, ta ta-unma wo faiti.