1 Naa ʋoluma gè filɛ zuai ɠaani, é ɗa ɠula kpoloɗɛi wu. Minɛi ɠɛni ba puu, nɔungi ɠɛ ba lɔfela, masa bɔɔlɔ puugɔi ɠɛni minɛ puugɔiti pɛ ba, woo ɲɔu wo fai GALA daalɔɠɔma, naa ma laaseigi ɠɛni nɔungiti maaʋɛ. 2 Filɛ zuai gè kaani, é ɠulani ga kɔii, kɔɠɔiti ti ɠɛni eɠɛ filɛ zuai taɠili kɔɠɔ, daaʋɛ ɠɛni eɠɛ zalai laaʋɛ. Vamɔɠɔgi ná-zɛbɛi veeni zea, ta ná-masa kpɔkpɔgi, ta ná-zobo golai. 3 Gè nɔungi gilagi ɠaani, eɠɛ maa a wana, é za, kɛlɛ maawanazuʋɛ a la paa, miná ɠɛdɛni. Eteai pɛ daavɔɔni, ti ʋilɛ filɛ zuai ʋolu. 4 Nuɓusɛi pɛ ge nɔkɔni vamɔɠɔgi wu, tɔɔzei zobogi ʋa é feeni filɛ zuai ya. Ti nɔkɔni filɛ zuai wu, ti ɗa ɠɛ ma: «Ɓɛ ɠa kulaai ga filɛ zuai tɛi? Ɓɛ ɠa a zoo é sakpe?»

5 Daaʋɛ veeni filɛ zuai ʋɛ, nii é ɠɛni waso kpɔɛiti bosu la, ta woo ɲɔiti GALA daalɔɠɔma. Zobogi veeni bɛ alu ʋuunaanigɔ maazu felegɔ (42) laawu. 6 É laalaoni, é ɗa woo ɲɔiti bo GALA daalɔɠɔma, ga é woo ɲɔi wo GALA daaseigi laalɔɠɔma, ta ʋɛ é zeini ná, ta naati daalɔɠɔma, niiti kpein ti zeini geeɠɔlɔgi zu. 7 É veeni bɛ ga é kɔɔ ʋɛɛ GALA ná-nuiti ba, é vɔni ti ma. Zobogi veeni bɛ bolodaiti pɛ unda, ta nuɓusɛiti pɛ, ta zii wooi pɛ, ta ziiti pɛ. 8 Etea nuɓusɛiti pɛ ta nɔkɔ bu, niiti ti laaseigi la ɠɛni zɛʋɛni kaipa eteai ɓɛtɛ yee ma zɛnvu zɛʋɛi zu, nii é ga Baala Ziʋoi nɔnɔi nii ti paani.

9 Zɔi nɔpɛ goiyeɠe ba, naa woilo naa ma ga pagɔ.

11 Naa ʋolu gè filɛ zuai taɠili kaani, é ɗa ɠula zooi wu. Minɛi ɠɛni ba ga felegɔ, ti ɠulaai ga baala ziʋoi minɛiti, é ɠɛni ɓɔɛzu eɠɛ vamɔɠɔgi. 12 Zobogi é ɠɛni filɛ zua mɔungi ya, é ɠɛni naa pɛ kɛɛzu naa ɠaazu. É daani eteai ta su nuɓusɛiti pɛ ma ga maaɓaai ga ti nɔkɔ sua mɔungi wu, nii maawanani é ɠɛ a za, kɛlɛ é ɠɛdɛni. 13 Filɛ zuai velesiɛi naa ɠɛni laavɔɔ vaa wolaiti kɛɛzu, eyɛsu é ɗa abui yei zooi ma, é ɠula geezuʋɛ, nuɓusɛiti pɛ ti ka. 14 É eteai zu nuɓusɛiti yaavani ga laavɔɔ vaiti ti ɠɛɛ zobogi veeni bɛ, é ɗa kɛ sua mɔungi ɠakala. É ɓɔini etea nuɓusɛiti da ga ti filɛ zuai ʋaaɠulabai ɓɛtɛ, nii maawanani ga boɠa zɔkpɔi, é ʋalo ʋolu. 15 Ma zobogi veeni bɛ ga é zɛnvui ʋu filɛ zuai ʋaaɠulabai zu ti kpɛtɛni, nii a kɛ filɛ zuai ʋaaɠulabai zoo é ɓɔɛ, ta é naati pɛ paa, niiti ti la nɔkɔni filɛ zuai ʋaaɠulabai wu. 16 É daani ɛsɛ pɛ ma ga maaɓaai, ɓolomadɔɠɔiti ta seizumaanɛgiti, naavolo nuiti ta bala nuiti, naa ʋɛɛ wɔɔlɔiti ta duɔiti ba, ga ti poogi ta zɔlɔɔ ti-yeezai ʋa, ɓaa ti-loʋalaʋɛ. 17 Nu nɔpɛ ge la zooga é ʋa ani ɠeya, ɓaa é ʋa ani ʋɔdi, ni é la poogi zɔlɔɔni, ga filɛ zuai laaseigi, ɓaa daaseigi liegɔi.

18 Kɛni ɠimalai ɠɛ nu ya ʋɛ. Zɔi keleɠelegai, naa filɛ zuai laaseigi liegɔi wo. Mazɔlɔɔ nuɓusɛ liegɔi ʋe, tiegɔi ɠa ga undɔzita puulɔzita maazu lɔzita (666).