19
Pilɛ sɔlɔɔ guyei
1 Naa ʋoluma, gè woo wolai mɛnini geeɠɔlɔgi zu, eɠɛ bɛbɛ wolai wooi, é ɗa ɠɛ ma:
«Aleluya!
Kizogi, ta lɛbiyai, ta zɛbɛi ta ga ada-ƓALAGI nɔnɔ!
2 Tɔɔzei ná-tukpɔɠaaleʋeaiti ta ga gaamai, ti zɔlegɛ.
É koloɠolo anzanu wolai ʋeelala,
nii é ɠɛa eteai ɠoloɠolosu ga ná-koloɠologi.
GALA ná-botiɠɛ nuiti é ti ʋaani,
é ti-ma ɲamai ʋotokula ma.»
3 Ti ɠɛni ma mɔnɔ:
«Aleluya!
Taa wolai ɠala luului ɗa lɛ eyɛsu ɠɔ!»
4 Kɛwola wɔlɔ ʋuufelegɔ maazu naanigɔiti (24) ta zɛnvu su ani naanigɔiti ti laani GALA bu, nii é zeini masa kpɔkpɔgi ɠa, ti nɔkɔ bu, ti ɠɛ ma:
«Amina! Aleluya!»
5 Wooi ta ɠulani masa kpɔkpɔgi ʋɔ bɛ, é ɠɛ ma:
«À ada-ƓALAGI maamusɛ, wo pɛ ná-botiɠɛ nuiti,
wɔiti wo luazu ba, ɓolomadɔɠɔiti ta seizumaanɛgiti!»
6 Gè wooi ta mɛnini, eɠɛ bɛbɛ wolai wooi, ti ɗa zɔɔlɛ, eɠɛ ziɛ wolai zulu gooi, eɠɛ nɔ geeɓadɛ lu golai, ti ɗa ɠɛ ma:
«Aleluya!
Mazɔlɔɔ Maliɠii, ada-ƓALAGI, Zɛbɛi-Pɛ-Maliɠii, ná-masadai zeɠea.
7 Ade ɠoozunɛ, ade ɠɔkɔ, ade lɛbiyai ve tɔun bɛ!
Mazɔlɔɔ Baala Ziʋoi anza ɓeai maazaa kui zeelia,
Anza Ɓeai ɓɔɠɔ ɓɛtɛa.
8 Ma zobogi veeʋɛ bɛ ga é ɓɔɠɔ maaɠili ga geze ʋagɔ zeɠei, koleai, é ɗa volo.»
(Geze ʋagɔ zeɠei naa ɠa é ga GALA ná-nuiti ta-lelebogi ma ɠɛɛwotiiti.)
9 Geezuɠeelai ɠɛni mà: «Sɛʋɛ ga: Undaanɛ nu ɠa ga naama nuiti, niiti ti loligai Baala Ziʋoi ná-anza ɓea maazaa kui ma laamii wosuʋɛ!» Naa ʋolu é ɠɛni mà: «Wooi niiti ta ga GALA ná-gaama ɓɔɛiti.» 10 Gè laani kɔɠɔwu ga gè nɔkɔ bu, kɛlɛ é ɠɛni mà: «Mina naa ɠɛ! Nà ga botiɠɛ nui ga ɗɔun è ɠɛʋele, ta è-ɠɛɛleaiti kɛʋele, niiti ti ɠiliai gaamai ʋa, nii Yesu ga ma zeelei. Nɔkɔ GALA bu!»
Mazɔlɔɔ gaamai nii Yesu kulaai kɛlɛma, naa ɠa é feai GALA goo wo nuiti zea.
Soo ɓizɛ nui é soo ɠolegi ɠɔma
11 Naa ʋolu gè geeɠɔlɔgi laalaogai ɠaani. Soo ɠolegi ɠulani kɛlɛma. Zɔi é zeini kɔma, daaseigi ɠɛni ga «Wooɠɛɠila Nui ta Gaama Nui». Toɠa tukpɔi ɠaaleʋezu, é kɔɔi ɠɔ ga telebodai. 12 Gaazuɠɛzɛiti ti ɠɛni volozu eɠɛ abuzogi, masa bɔɔlɔ mɔinmɔingiti ti ɠɛni unba. Daaseigi zɛʋɛai maaʋɛ, nii nu nɔpɛ ge la kwɛɛ, kɛni tɔ ɠila nɔ. 13 Maaɠilini ga seɠei nii zɛɓɛai ga ɲamai. Daaseigi ɠa ga: «GALA daawooi». 14 Geeɠɔlɔgi zu ɠɔɔɠɔ nuɓusɛiti ti ʋilɛni polu, ti zeini soo ɠolegiti kɔma, ti maaɠiliai ga geze ʋagɔ zeɠeiti, ti ɠoleai, ti ɲadegai. 15 Boɠa zɔkpɔ ɠaaligi ɠulani daaʋɛ, naa ɠa é ziiti doɠazu la. Toɠa lo ti luɠɔ ga kɔlu lukpɔi. Toɠa leezɛin ziɠa GALA Zɛbɛi-Pɛ-Maliɠii ná-ziiɠula golai ma lɔɔ ɓɛtɛzuʋɛ. 16 Daaseigi zɛʋɛʋɛ ná-seɠeun golai ma, ta kpalai ma ga: «Masagiti ta-Masagi, maliɠiiti ti-Maliɠii».
17 Naa ʋoluma gè geezuɠeelai ɠaani, é loni foloi zu. É ɓɔɛni wɔniiti pɔ, ti ɠoʋesu geezuʋɛ, é wooɠula la gola, é ɠɛ ma: «À ʋa, wo ɠaalɛ ba GALA ná-fɛti wolai zu, 18 naa ɠa a kɛ wo masagiti ma zuaiti mi, ta kɔɔɠɔ ɠundiɠiiti ma zuaiti, ta kɔɔɠɔ nuiti ma zuaiti, ta sooiti ma zuaiti, ta ti ɠɔma nuiti ma zuaiti, nuɓusɛiti pɛ ti-ma zuaiti, wɔɔlɔiti ta duɔiti, ɓolomadɔɠɔiti ta seizumaanɛgiti.»
19 Gè filɛ zuai ɠaani ta etea masagiti. Ti ta-ɠɔɔɠɔ nu ʋɛbɛi ɠaalɛɛni ba, ti ʋa kɔɔi ʋɛɛ soo ɠɔma nui ʋa ta ná-kɔɔʋɛbɛi. 20 Filɛ zuai zoni, é ɓɔ zɛɛ ɠala goo wo nui ʋa, nii é ɠɛni laavɔɔ vaa wolaiti kɛɛzu suai ʋɛ. Naama laavɔɔ vaiti maaʋele ma, é zooni é nuɓusɛiti yaava, niiti suai ná-poogi ɠɛni ti ʋa, ti ɗa nɔkɔ baaɠulabai wu. Filɛ zuai ta zɛɛ ɠala goo wo nui ti felegɔ ti ma vului ʋilini abu ɓoigi zu, nii é ɠalazu ga timinigi. 21 Kɔɔɠɔ nui mɔtaiti ti zaani ga boɠa zɔkpɔi nii é ɠulani naa laaʋɛ, nii é zeini sooi ɠɔma, wɔniiti pɛ ti yiɠoni ga ti-ma zuai.