Sofoni
Ná-Sɛʋɛi
Sɛʋɛi lɔɔzeizuʋɛ ma woo mɔungiti
GALA gooiti Sofoni ti woni, naati ka ti sɛʋɛi nii zu. Sofoni ɠɛni ga masagi Ezekiase vofodai ta. É GALA gooi woni masagi Zoziase ná-masadai ma ziɛgi zu, kona undɔzita puunaanigɔiti zɔɠɔzuʋɛ ta undɔzita taaʋuugɔi (640-609), aisa Yesu Kilista ʋa zɔlɔɔ. Naama ziɛgi zu nɔ ɠa Zelemini ta Naɠuume ti ta-eteai ziɛni la. Naa ɠɛɛni ɓalaa aisa Asiili yooi ʋa zo (2:13). Sofoni ná-keela wooi ɠɛni liizu Zuda yooi ʋɔ, naazu Izilayɛle yooi ɓegai ma ga zo.
Sofoni ɠɛni ɓɔɛzu é lo tukpɔɠaaleʋe voloi ʋa é ʋaazu, yeeɠɛɠalai GALA ge ʋaazu faa zeizu la Zuda ta zɔɔma yooiti ma, ti eteai zu ná pɛ. Naama vaa zeimai ɠa ʋaazu nuɓusɛiti ɲadesu (3:9), ta GALA ka ʋaazu nuɓusɛi ɠilazuʋɛ zei ʋele ɓɛtɛzu ʋolu ga niina, niiti ti ga ɓɔɠɔmaayei nuiti ta tuʋa ʋele ʋagɔ nuiti.
Unsosuʋɛ
1. Sofoni lɛɛ vai (1:1).
2. GALA ka ʋaazu faa zeizu Zuda ma (1:2—2:3).
3. GALA ka ʋaazu faa zeizu eteai zu yooi zɔiti ma (2:4-15).
4. GALA ka ʋaazu nuɓusɛi ɠilazuʋɛ zei ʋele ɓɛtɛzu ʋolu ga niina, niiti ta yɛ ga ɓɔɠɔmaayei nuiti ta tuʋa ʋele ʋagɔ nuiti (3:1-20).
1
1 Wooi niiti ka Ɠɔoɠɔ GALAGI ti woni Sofoni ma, Zuda masagi Zoziase, Amon ná-doun zunui, ná-yeeɠɛɠalai zu. Sofoni ɠɛni ga Kusi ná-doun zunui, naa kɛɛɠɛ ɠɛ ga Gedalia, naa kɛɛɠɛ ɠɛ ga Amalia, naa kɛɛɠɛ ɠɛ ga Ezekiase.
Eteai pɛ tukpɔɠaaleʋe vai
2 Ɠɔoɠɔ GALAGI wooi ɠaa:
«Nà ʋaazu anii kpein suwuɠaaleʋezu,
niiti ti yɛnvuzu eteai zu.
3 Nà nuɓusɛi pɛ koloɠolosu ta suaiti,
gè wɔniiti pɛ koloɠolo ta kaleiti pɛ,
gè naa ɠoloɠolo, nii é nu ɲɔiti kɔɠɔziɠazu.
Nà nu vului ma zuwu ɠaaleʋezu eteai zu,»
Ɠɔoɠɔ GALAGI wooi ɠana.
Fai é kɔɔɠɔ gani kɔɔ nuiti daalɔɠɔma
4 «Nà yeewuzeɠezu Zuda nuɓusɛiti daalɔɠɔma,
Zeluzalɛme nuiti kpein daalɔɠɔma,
gè Ɓaale lɛbi nui mɔtaiti pɛ suwuɠaaleʋe adaʋɛ tɔna ba,
ta zɔiti ti botii ɠɛɛzu bɛ,
ti pɛ ʋɔɔma ta zalaɠa ɠula nuiti.
5 Nà naati pɛ koloɠolo, niiti ti lɛɛzu pɛlɛ ɠɔmaʋɛ,
ti ɗa nɔkɔ ná aniiti pɛ bu, ti volozu geeɠɔlɔgi zu,
ta zɔiti ti nɔkɔsu bù, ti ɗa ɠona mà, nɛ̀i gè ga Ɠɔoɠɔ GALAGI,
ti lati ti ɗa minazeɠegiti bo ta-ɠalagi Mɔlɔke ʋɛ.
6 Nà naati koloɠolo, zɔiti ti ʋoluavegai bà, nɛ̀i gè ga Ɠɔoɠɔ GALAGI,
ta zɔiti ti la gàiziɛzu,
ti la wɔinni ti ʋa nà-kpɔba zɔlɔɔ, ɓaa ti ʋa gàazaɠa.»
Fai é nu wolaiti daalɔɠɔma
7 À maaɠɛ kpɔ, Maliɠii Ɠɔoɠɔ GALAGI ɠaazu,
mazɔlɔɔ Ɠɔoɠɔ GALAGI ná-foloi maaɓuɠaa!
Mazɔlɔɔ Ɠɔoɠɔ GALAGI zalaɠai ɠɛʋele ɓɛtɛʋɛ,
é naati gba, zɔiti é ti loligai.
8 Ɠɔoɠɔ GALAGI ɠɛ ma: «Tama, nà-zalaɠa ɠula voloi,
nà laalɛ kundiɠiiti bu, ta masa dointi,
ta niiti kpein ti wɛɛinti ta-maaɠilii ma zii wosu.
9 Naama volo ná, nà vɔɔɠu naati ba,
zɔiti ti ɓudɛzu GALA sei ʋɛlɛi ma ɓofalagi maazu, eɠɛ zii ɠiligiti,*1:9 zɔiti ti ɓudɛzu GALA sei ʋɛlɛi ma ɓofalagi maazu, eɠɛ zii ɠiligiti: Wɛlɛ ʋɛ: 1Sa 5:5.
ti ti-maliɠii ná-pɛlɛi wuulaave ga naavoloi, sɔlɔɔgai toomai zu ta yaavai.»
Fai é wosu yaaɠoiti daalɔɠɔma
10 «Tama, naama volo ná,
ta kpee woo wolai mɛni Kale Ziɠidaʋɛ,
ta zɔngɔ wooi Koi Niinɛi zu ʋele,
ta ani ɠolo lu golai gizeiti ma,»
Ɠɔoɠɔ GALAGI wooi ɠana.
11 «À kpeei loo, Buu Ʋele Ɠoizu nuiti,†1:11 Buu Ʋele Ɠoizu nuiti: Tati pelei taɠili ɓalaa ka ga nii: Koda Ɠoizu nuiti
mazɔlɔɔ yaaɠoiti pɛ ta zaazu,
wali ɠaiziɛ nuiti pɛ ti zuwuɠaa ɠa leʋezu.»
Fai é wosu kibɔɔlɔma nuiti daalɔɠɔma
12 «Naa zu, nà Zeluzalɛme zuvɛɠɛlɛfɛɠɛlɛ ga fitinai,
nà vɔɔɠu zunuiti pɛ ba,
ti zeini su kpɛ, eɠɛ dɔɔi buuʋɛai,
ti ɗa bo yiimaʋɛ ga:
‹Ɠɔoɠɔ GALAGI la faa nɔpɛ kɛa,
ma ʋagɔ ɓaa ma ɲɔu!›
13 Toosui ɠa wo ga ta-naavoloiti,
ta-ʋɛlɛiti ta ɠoloɠolo.
Ta pɛlɛiti to, kɛlɛ ti la ɲia ti wu,
ti leezɛn ɓeleiti da, kɛlɛ ti la ma lɔɔi ta ɓɔlea.»
Ɠɔoɠɔ GALAGI ná-foloi
14 Ɠɔoɠɔ GALAGI ná-folo wolai maaɓuɠaa,
maaɓuɠaa, gaazuvilɛʋɛ é ɗa ʋa,
kpee ɲɔi ɠa é loozu Ɠɔoɠɔ GALAGI ná-foloi,
salaʋusui ziilogai ti pɛ ba, naa ɓɔɠɔi ɠa kpee wolai loo.
15 Toɠa ɠɛ ga ziiɠaawana voloi,
kidaaʋili foloi ta koozuʋiligi,
faa zuɠoloɠolo foloi ta faaɠaaʋalabai.
Foloi naa ɠa ɠɛ ga kpidii, é ɠɛ ga kpidi ɓɔii,
foloi naa ɠa ɠɛ ga tonaɓiingi ta ɓumugi.
16 Naama volo ná, salaʋusuiti ta puʋugi vɛ,
ti kɔɔ ɓeei loo taa wolaiti daalɔɠɔma siɠigi ti ma,
ta ti zu ʋɛlɛ ɠaaɠoozagiti daalɔɠɔma.
17 «Nà nuɓusɛiti dɔ kidaaʋiligi zu,
ta ziɛ eɠɛ gaazuɠole nuiti, ti ɗa yeeʋɛɛ mɛmɛ,
mazɔlɔɔ ti kotoi ɠɛa dàalɔɠɔma, nɛ̀i gè ga Ɠɔoɠɔ GALAGI.
Ti-ma ɲamai ɠa ʋu adaʋɛ pɛ eɠɛ fufiligi,
ti-ma ʋoomaiti ta luula eɠɛ kaʋai.»
18 Ta-waliiti ta zanugi ti ti ya
naati ti la zooga ti ʋa ti ɠizo
Ɠɔoɠɔ GALAGI ná-ziiɠaawana voloi.
Ná-ziiɠaawana abui ɠa eteai pɛ koloɠolo.
Gaamazu, naa maa ɠa yiki,
toɠa eteai zu nuɓusɛiti pɛ suwuɠaaleʋe.