KO E TOHI
ʻOE NGAAHI
SAAME
TOHI 1
1
(Saame 1—41)
1 Ko e monūʻia ʻoe māʻoniʻoni, 4 Mo e malaʻia ʻoe angakovi.
‌ʻOku monūʻia ʻae tangata ʻoku ʻikai ʻeveʻeva ʻi he fakakaukau ʻae angakovi,
pe tuʻu ʻi he hala ʻoe kau angahala,
pe nofo ʻi he nofoʻa ʻoe manuki.
Ka ko ʻene fiefia ʻoku ʻi he fono ʻa Sihova;
pea ko ʻene fono ʻoku ne fakalaulauloto ai ʻi he ʻaho mo e pō.
Pea ʻe tatau ia mo e ʻakau kuo tō ki he veʻe vaitafe,
ʻaia ʻoku ʻomi hono fua ʻi hono faʻahitaʻu;
pea ko hono lau foki ʻe ʻikai mae;
pea ko ia kotoa pē ʻoku ne fai ʻe monūʻia.
‌ʻOku ʻikai pehē ʻae angakovi:
ka ʻoku tatau ia mo e kafukafu ʻaia ʻoku vilingia, ʻi he matangi.
Ko ia ʻe ʻikai tuʻu ʻae angakovi ʻi he fakamaau,
pe ko e angahala ʻi he fakataha ʻoe māʻoniʻoni.
He ʻoku ʻilo ʻe Sihova ʻae hala ʻoe māʻoniʻoni:
ka ko e hala ʻoe angakovi ʻe ʻauha ia.