Yesu Keriso Tuyeghana Ahiꞌahina Mark Vivireina i Girugirumiya
Babani Vikarenana
Weꞌi yana aunaona Yesu i vobagibagi ma i hanahanapu aubaina hi amgiruma. Rava we bukana taugirumiya wavana egha ita riweta, ma ekalesiya aunaona babadahi ahi vihanahanapu yana Mark i girumi. Ma Yesu a tauvotagho vinevinehi maghauhi 12 auhinenihi yana egha Mark, ma tauvihanahanapu maghamaghauhi hi vitumaghanei da tauna yana Peter maiteni au Rome hi maꞌae, ma Yesu a bagibagi po a vihanahanapu maghamaghauhi auwarina i dedei. Anima we dededehi yana Mark i giruma hopunehi po tauvitumaghana au Rome ita vohaguhi, po Yesu aiyaꞌi ma aiwaꞌi i dewadewai au nuwanuwahi ita raughadaghadari.
We amgirumana auhinenina i riweta da babani wainaona yana Yesu Keriso tuyeghana ahiꞌahina, tauna Maimaituwa Natuna. We bukana auhinenina ta inana yana Yesu kajijira auwarina po ginauri maghamaghuhi i dewadewahi. Wate ta inanai maranai rava i hanahanapuhi, ma aruwa apoꞌapoehi rava auwarihi i raukaiwenihi, ma rava doridoriꞌahi i yawahanihi ma ahi dewaboꞌa i nuwanuwaꞌaharehi. Mark Yesu a bagibagi aubaina i amgiruma duma, ma egha a vihanahanapu. Ma ei hanahanaputa da me Yesu au korosi i hiraghenei da rava atapuhi hita yawahana, ma wate hiraghe auwarina menanaꞌarena Maimaituwa i vovaimahirinanei.
1
John Taubabataito* Yesu a Tayaha i Ghadari
(Matthew 3:1-12; Luke 3:1-18; John 1:19-28)
1 Weꞌi yana Maimaituwa Natuna Yesu Keriso* tuyeghana ahiꞌahina anivikarenana.
2 Peroveta Isaiah ana au buka i amgiruma ma i riwa ipa,
“Ma rautanighana, aꞌu tauvituyetuyegha apo a ai pariꞌahareiyaꞌi,
po am tayaha ina ghadari.✡Malachi 3:1
3 Tauna yana pona au dobu kwakwava ei ghoreghore ipa,
‘Tayaha ona ghadari Bada aubaina,
ana aninae ona raidumarui.’ ” ✡Isaiah 40:3
4 We au marana John i neꞌi po au dobu kwakwava rava i babataitohi, ma Maimaituwa tuyeghana i rauguguyei rava auwarihi ma ipa, “Ona amꞌohe* ma Maimaituwa ina nuwaꞌaharemi. Anima a babataitomi po ina vihegha da taumi ami dewaboꞌa auwarina o amꞌohe.” 5 Ma rava atapuhi au Judea ma au Jerusalem ma auririvahi taumaꞌae, hi neꞌi po John hi rautanighanei, ma ahi dewaboꞌa au habuhabuna hi viheghei, ma Jordan au wairana i babataitohi.
6 Ma John ana gara yana me peroveta ahi gara hi oteꞌoteniya camel bo ghamoghamo opinei hi hirahiramiya i oteni, ma a dagiroro ghamoghamo opina ausiporina i raukwaviviroi, ma ana yam i aniꞌanihi yana kapau ma taꞌwaya. 7 Ma i rauguguya rava auwarihi ipa, “Muriꞌuwei rava e neneꞌi yana i ghe vavahagha ma apoma taꞌu. Taꞌu yana egha emoꞌemosiꞌu po a kururu ma a aehuma a ohei.*Mai Judea* ahi au mumuga we bagibagi yana taupaura yababa* bo rava yabayababa egha maihahi apo hina dewai. 8 Taꞌu wairei a babataitomi* ma tauna yana Aruwa Vivireinei ina babataitomi.”
John, Yesu i Babataitoi*
(Matthew 3:13-17; Luke 3:21-22)
9 Na au marana Yesu Nazareth meyagaina Galilee autupona i hopu aharei ma i neꞌi John auwarina, John, Yesu i babataitoi Jordan au wairana. 10 Ma maranai wairei i hurahura gheꞌetaꞌi yana mara i wanakaiweni, ma Aruwa me gabubu i ghaꞌiraꞌi po Yesu autepana i rauwei. 11 Ma pona marei i riwa hopuꞌi ipa, “Tam yana natuꞌu aꞌu rauhoghara babana tam aꞌu anikaoha.”
Taumodurere,* Yesu i Raudadani
(Matthew 4:1-11; Luke 4:1-13)
12 Na aumurina yaghiyaghinaꞌava Maimaituwa Aruwana Yesu i himira naiyei au dobu kwakwava. 13 Maratom 40 Yesu au dobu kwakwava i maꞌae ma Taumodurere* i raudadani po apoꞌapoe ita dewai. Tauna yana ghamoghamo hiyohiyohi maitehi hi maꞌae na au dobuna, ma Maimaituwa ana aneya* hi inaꞌinana vaitetei.
Yesu, Tauvikaimo Wahepari i Ghorehi po hi Votaghoi
(Matthew 4:12-22; Luke 4:14-15, 5:1-11)
14 Muriyai po Guyauna Herod, John Taubabataito* au deri i tereruiyei,✡Mark 6:14-29 yana Yesu i nae Galilee autupona, po Maimaituwa tuyeghana ahiꞌahina rava auwarihi i rauguguyei. 15 I ririwehi ipa, “Maimaituwa a hipohipo i teretereiya i raimoinai! Maimaituwa a vitaniwaga vouna ana rava auwarihi* i vighereghere. Ami dewaboꞌei ona amꞌohe* ma tuyeghana ahiꞌahina ona vitumaghanei.”
16 Maratom emosi Yesu Galilee hagahagana ririvanei i nene, po tauvikaimo ruwagha i inanahi, Simon ma a tevera Andrew maiteni au hagahaga hi rauhagihagida. 17 Ma auwarihi i riwa ipa, “Taumi ona neꞌi ma ona votaghoꞌu. Po marina me oi kaimonei, nanaꞌarena a vihanahanapumi po rava ona taravainihi po hina vitumaghaneꞌu.” 18 Mara emosi ahi hagida hi voterei ma hi vimuritaghoi.
19 Wate mara haburuna gerahei hi veraunae yana Zebedee natunatuna, James ma John i inanahi au wam, ahi hagida wanawana rorona hi hemohemohi. 20 Me marana i inanahi yana i raughorehi ipa, “Ona votaghoꞌu.” Yamna aubaina amahi ma a taubagibagi au wam hi voterehi ma tauna hi votaghoi.
Yesu, Aruwa Apoꞌapoena* Rava Auwarina i Raukaiweni
(Luke 4:31-37)
21 Yesu, a tauvotagho maitehi hi gheꞌeta dobu ana wava Caponiam auwarina, ma maranai viyagohina maratomna* i gheꞌeta yana Yesu i nae, po aniviꞌemosi numana* auhinenina vihanahanapu i taraiwawari. 22 A vihanahanapu yana vibadana maiteni, ma egha me raugagayo†Warihagha Maimaituwa raugagayo Moses i verei po rava mai Israel hita viponavowei. tauvihanahanapuweina, aubaina rava hi amhuna duma a vihanahanapu auwarina.
23 Ma maranai aniviꞌemosi numana auhinenina i hanahanapu, yana rava aruwa apoꞌapoena* i taniwageiya i otu 24 ma i riwa ipa, “Tam auwariꞌai aiwa u ghohei, Yesu rava Nazarethei? U ne wehidana po ma viꞌapoꞌapoeniꞌai? A hanapuwem tam aiyaꞌi! Tam yana Maimaituwa a Vinevine! Vivireina.” 25 Ma Yesu i eni‡i rahai ma ipa, “Ma genuwana, ma na ravana ma hopu aharei!” 26 Anima aruwa apoꞌapoena* ravana i guhui yamoyamonei, ma a otuna i hopu aharei.
27 Ma rava atapuhi ahi amhuna i raꞌata, ma hi deedei hipa, “We yana aiwaꞌi? Weꞌi yana vihanahanapu vouna vibadana maiteni. We ravana yana vibadana auwarina, emoꞌemosina po aruwa apoꞌapoehi ina riwehi ma hina viponavowei.” 28 Ma yaghiyaghinaꞌava Yesu tuyeghana hi nohai yabayababai,§i dabarara po Galilee hinenina i vihowai.
Yesu, Rava Maghamaghauhi i Viyawahanihi
(Matthew 8:14-17; Luke 4:38-41)
29 Nahidana ma aniviꞌemosi numana* hi neꞌaharei po hi nae Simon ma Andrew ahi au numa, James ma John maitehi. 30 Simon pohiyana wavinena boyaboya i vaini po i enoꞌeno ma aubaina Yesu hi pariverei. 31 Po i rui auwarina ma au nimana i vowa ma i vovai mahirini. Anima mara emosi boyaboya i hopu aharei ma i vomahiri yana ahi yam i dewai.
32 Ma aubigai madegha i yoriyori yana rava ahi rava doridoriꞌahi, po aruwa apoꞌapoehi hi taniwagehi hi nehima Yesu auwarina.*Maranai madegha i yori yana viyagohina marana i kwaha. Mai Judea ahi viyagohina marana e amtaraiwawara maratom nima emosi ma nimagigi emosi (6th) aubigaina ma maratom nima emosi ma nimagigi ruwagha (7th) aubigaina. 33 Meyagaina ghaeghaenana ravahi hi ne po numa mataꞌetana hi vihowai. 34 Ma Yesu rava maghamaghauhi, ahi doriꞌa tapuna ma tapuna i viyawahanihi. Ma aruwa apoꞌapoehi rava auwarihi i raukaiwenihi, ma aruwa apoꞌapoehi egha ita viꞌaninehi po hita vibabani, babana hi hanapuwei da tauna ayaꞌi.†Yesu i haramanei inapa aruwa apoꞌapoehi ina viꞌaninehi po hinapa tauna Maimaituwa a Vinevine* yana apo rava hina hegari po ghaviya ina vibadei me Maimaituwa a Vinevine hi paꞌipaꞌiniya nanaꞌarena. Ona inana John 6:15
Yesu au Galilee i Rauguguya
(Luke 4:42-44)
35 Hubahubanai boiboghi yohora i waguwaguvarei ma Yesu i eno vomahiri, po numa i hopu aharei ma i nae au dobu kwakwava raupari aubaina. 36 Ma muriyai Simon ana rava maitehi hi veraveraubaihei. 37 Ma maranai hi tuhaghai yana hi riwei hipa, “Rava maghamaghauhi he baibaihem!”
38 Ma Yesu i pariverehi ipa, “Tana nae we au meyagaihi aughereghereta po Maimaituwa tuyeghana auwarihi a rauguguyei. Babana yamna aubaina a neꞌi.” 39 Yamna aubaina Galilee i kwaviviroi ma Maimaituwa tuyeghana i rauguguyei, aniviꞌemosi au numahi ma aruwa apoꞌapoehi i raukaiwenihi rava auwarihi.
Yesu, Rava Opina Waikamakamana* i Viyawahani
(Matthew 8:1-4; Luke 5:12-16)
40 Maratom emosi rava opina waikamakamana* i neꞌi, yana Yesu aunaona i raudune ma ipa, “Inapa ma ghohei yana ma dewaꞌu po a raughadaghadariꞌu.” ‡Mai Judea ahi au raugagayo,* rava opina waikamakamana tauna yana miramirana ma taumaiꞌuputa. Egha hita viꞌaninei po rava waikamakamana hina vodadani. Rava egha hita viꞌaninehi po Maimaituwa a au Numa hina vohepahepa bo au meyagai hina maꞌae. Hinapa rava doridoriꞌana ina yawahana, yana i raughadaghadarameei ma Maimaituwa ina vainameei ma wate rava maitehi hina maꞌe gogona ma ina vohepahepa Maimaituwa a au Numa.
41 Anima Yesu we ravana nuwanuwana i boyai, ma i voꞌayaya po i vodadani ma i riwei ipa, “Ee, a ghohei. Po tam ma raughadaghadarim!” 42 Po mara emosi ravana kamakamana i yababa ma opina i raughadaghadari. 43 Anima i vighaꞌena dumei ipa, 44 “Marina ma nae, ma egha aiya mai heghei da taꞌu a viyawahanim. Dumaruwei ma nae gudutaupuyoweina* auwarina po ma viheghanamem, ma ina raudadanim po rava hina inanam da tam u yawahana, ma gudu* ma amverenei Moses a raugagayo* i ririweiya nanaꞌarena.”
45 Ma we ravana egha ita viponavowa ma i nae, yana tuyeghana i nohai po na dobuna atapunana i vihowai. Yamna aubaina po Yesu egha emoꞌemosina, habuhabunei ita nae au meyagai, ma au dobu kwakwava i maꞌae ma dobu atapuna ravahi hi nene auwarina.
✡1:2: Malachi 3:1
✡1:3: Isaiah 40:3
*1:7: Mai Judea* ahi au mumuga we bagibagi yana taupaura yababa* bo rava yabayababa egha maihahi apo hina dewai.
†1:22: Warihagha Maimaituwa raugagayo Moses i verei po rava mai Israel hita viponavowei.
‡1:25: i rahai
§1:28: i dabarara
*1:32: Maranai madegha i yori yana viyagohina marana i kwaha. Mai Judea ahi viyagohina marana e amtaraiwawara maratom nima emosi ma nimagigi emosi (6th) aubigaina ma maratom nima emosi ma nimagigi ruwagha (7th) aubigaina.
†1:34: Yesu i haramanei inapa aruwa apoꞌapoehi ina viꞌaninehi po hinapa tauna Maimaituwa a Vinevine* yana apo rava hina hegari po ghaviya ina vibadei me Maimaituwa a Vinevine hi paꞌipaꞌiniya nanaꞌarena. Ona inana John 6:15
‡1:40: Mai Judea ahi au raugagayo,* rava opina waikamakamana tauna yana miramirana ma taumaiꞌuputa. Egha hita viꞌaninei po rava waikamakamana hina vodadani. Rava egha hita viꞌaninehi po Maimaituwa a au Numa hina vohepahepa bo au meyagai hina maꞌae. Hinapa rava doridoriꞌana ina yawahana, yana i raughadaghadarameei ma Maimaituwa ina vainameei ma wate rava maitehi hina maꞌe gogona ma ina vohepahepa Maimaituwa a au Numa.