Song 99
God em i namba wan king
1 Bikpela Kis 25.22 i stap king.
Ol manmeri i save pret
na guria.
Em i sindaun long sia king bilong en
antap long ol ensel,
na graun i guria.
2 Long Saion Bikpela i gat
bikpela strong tru,
na em i bosim olgeta lain pipel.
3 Olgeta manmeri i mas tingting
long em i nambawan king
na em i gat biknem.
Na ol i mas litimapim
biknem bilong en.
Em God bilong mekim
gutpela na stretpela pasin olgeta.
4 Strongpela king,
yu save laikim tumas
stretpela pasin tasol.
Yu bin givim mipela
ol manmeri bilong Israel
stretpela na gutpela pasin,
na mipela i bihainim.
Na yu mekim mipela i skelim stret
pasin bilong ol arapela manmeri.
5 Yupela i mas litimapim
nem bilong Bikpela,
em i God bilong yumi.
Yupela go klostu na lotu long em.
Em God bilong mekim
gutpela na stretpela pasin olgeta.
6 Moses wantaim Aron,
tupela i bin i stap pris
bilong Bikpela,
na Samuel tu em i wanpela
bilong ol lain i bin lotu long God.
Ol i bin prea long Bikpela
na em i harim beten bilong ol.
7 Em Kis 33.9 i stap long bikpela klaut
na givim lo long ol.
Na ol i bihainim olgeta lo
God i givim long ol.
8 God,Nam 14.20, Lo 9.20, Jer 46.28, Sef 3.7 Bikpela bilong mipela,
yu bin harim prea
bilong ol manmeri bilong yu.
Yu bin soim ol, yu yet yu God
na yu save rausim sin bilong ol,
tasol yu mekim save long ol
bilong bekim rong bilong ol.
9 Litimapim nem bilong God,
Bikpela bilong yumi,
na lotu long em
long maunten bilong en.
God, Bikpela bilong yumi,
em God bilong mekim
gutpela na stretpela pasin olgeta.