1 Pero an Jesús alhcha an a'stitawk'a tan junkan Laka Olivojnin. 2 Wats'isin chincho'olhcha an laka tajtan, pus ta lhichux tacha an wilakalh an la'achan tala'cha'alhcha, chi yucha tawilhcha, tsukulhcha jamasuniy. 3 Wa chuncha an xamaestrojnin lhamap'a'sin chi an fariseojnin talhicha'anilh pumatam t'aku', yu ta'a'taymalh tan ixa'alat'ajun yu jantu yu ixt'apapa', ixtan'ajnicha tayawlh an tan lhilhuw ixlakyakalh, 4 chi tajuniy an Jesús:

―Maestro, ani t'aku a'taymakalh tan ixa'alat'ajun lapanak, 5 chi an la ixlamap'a'sin Moisés kintajunan li yu chuncha lay t'aku aklakat'alhmayaw sta kaniya'. ¿Uxint'i t'asich'a na'uni?

6 Chunchacha ixtajuniy wa ixtalhila'ts'intanuycha, para li ka'alilhcha yu katapu'alhtasulh. Pero an Jesús ix'antawilh chi ixjats'o'nuncha la ixmaka an lakaat'un. 7 Walh ali ixtalhisakmiy, pus tats'awalatawilh chi jajuniy:

―Yu jantu tu'u ixtala'alhin yuchacha p'ulhnaj kamakat'alh'anilh.

8 Chi a'tam ta'antatawlhpalh, tsukunipalh jats'o'nuni an lakaat'un. 9 Pus an lapanakni mu ta'alha'asmatlhicha tacha an jajunilh an Jesús, tapastaklhi li wachu talhit'ajuni ixtala'alhink'an, pus talak'ancho'olhcha. P'ulhnajcha yucha an yu laktatanincha talak'alh, chi ixli'astan yucha an yu palayka lakts'alanin. Xli'astan wa yucha an t'akucha chi an Jesuscha tatamakawlh. 10 Pus tats'awalatawilhcha an Jesús chi mu jantucha xamati la'ts'in wa yucha an t'akucha, pus juniy:

―¿Tanischa tat'ajun yu ixta'alhtasuyani? ¿Jantu xamati lakat'alhman?

11 An t'aku alhtaylh:

―Jantu, jantu xamati kilakat'alhmalh.

Wa chuncha an Jesús juniy:

―Kit'in wachu jantu aktilakat'alhman, k'ap'inch'o'ochicha pero jant'uch'a ali k'a'ilht'u mintala'alhin.]

12 An Jesús a'tam jaxa'alapalhi an lapanakni, jajuniy:

―Kit'ini xajatapulhkunu an lakamunulhpa', yu akinch'a'o'aya jantu wa lakaputs'isni katitsukulh, kalhitsukuya an jatapulhkunu yu xt'a'a jatsukunti.

13 Wa chuncha an fariseojnin tajuniy:

―Uxint'i wa mi'akst'uch'a lhich'iwink'an, aminchiwinti jantu lhitapalay.

14 An Jesús jajuniy:

―Masi wa ki'akstucha iklhichiwinkan, an kinchiwinti lhitapalay, mu ijk'atsayi tanchuncha ikmintachalh chi tanchuncha ikti'an. Pero uxitnan jant'u k'ats'ayat tanchuncha ikmintachalh chi tanchuncha ikti'an. 15 Uxitnan ch'unch'ach'a lhich'iwinat t'anisch'a la'ts'inat lay an lapanak, pero kit'in jantu xamati iklhichiwiniy. 16 Chi li iknajuni tani laycha xamati, an yu iknajun yucha sawalh, mu jantu wa ki'akstucha iknajun, ali an kimPay yu kimakmintachalhi iknawnaw. 17 An la milhamap'a'sink'an ts'o'muk'akanta li akxni ixt'uyunk'an yu tala'ts'ilh tu'u wa tami tanajun, an ixchiwintik'an lhitapalay. 18 Kit'in iklhichiwinkani wa ki'akstucha, pero an kimPay yu kimakmintachalh wachu kilhichiwiniy.

19 Yu'uncha tajuniy:

―¿Tanischa t'ajun mimpayi?

An Jesús jajuniy:

―Uxitnan jantu kilamispayaw chi an kimPay wach'u jant'u misp'ayat. Li xakilamispaw, an kimPay wach'u k'a'ixmisp'at'it.

20 An Jesús chuncha nawlh akxni ixmasut'ajun an laka tajtan, tan ixlakwilh yu pumujukan tumin yu ixla'ulanankan, chi jantu xamati ch'apayawlh mu jantuka' ixcha'ani ixpanch'e'ex.

21 A'tam jajumpalhi an Jesús:

―Kit'in ikti'ancha, chi uxitnan akilapuxkawyaw, pero uxitnan la mintala'alhink'ani k'alakniya'it. Tan ikti'an kit'in, uxitnan jant'u lay k'at'ip'it'it.

22 Pus an judiojnin ixtanajun:

―¿Tasu li chunchacha najuni li tan ti'an kitnan jantu lay kati'awi? ¿Sna wa ka'akstuma'nikanacha?

23 An Jesús jajuniy:

―Uxitnan ani talaktsini mincha'ak'an, pero kit'in awint'i talhman. Uxitnan ani lakamunulhpa k'at'amak'awna'it, pero kit'in jantu ikde ani. 24 Xliyu iklalhijunaw li la mintala'alhink'ani k'alakniya'it'it, mu li jantu kilakiklaka'iyawi li kit'in, la mintala'alhink'ani k'alakniya'it'it.

25 Wa chuncha tajuniy:

―¿Tisu uxint'ichak'at'i?

An Jesús jajuniy:

―Yu p'ulhnajcha iklajuntaw. 26 Wanaj lhuwi yu aknawna chi yu aklajunaw t'ani layatcha, pero an yu kimakmintachalh yucha sawalhi an yu najun, chi kit'in, wanajcha yu iklajunaw ani lakamunulhpa an yu ik'alha'asmat'a an yu kimakminta.

27 Pero yu'uncha jantu talhimacha'xalhi li yucha an ixPayi ixjalhixa'alat'ajun. 28 Pus an Jesús jajuniy:

―Akxni talhmancha k'amuk'aya'it an yu isTs'alh Lapanak kijunchilh, akxnich'a k'ak'ats'aya'it li kit'in, chi li jantu tu'u ik'ilhtuy yu wa kit'incha iknajun, kit'in ikchiwiniy tacha kimasuniy an kimPay. 29 Mu an yu kimakminta aniya kint'a'aklat'ajun, jantu wa ki'akstucha kimakajunta an kimPay, mu kit'in lhilhiji ik'ilhtuy yu oxi lhiwilay.

30 Akxni chunchacha naw'olh an Jesús, ixluwk'ani takiklaka'ilh.

31 An Jesús jajunilh an judiojnin an yu ixtakiklaka'itacha:

―Li k'iklak'a'iyat sawalhi an kinchiwinti, kint'alhtanan sawalhi k'a'una'it'it. 32 K'amisp'aya'it'iti an yu sawalh, chi an yu sawalh katama'alhtaxtuniyan chi k'amak'awk'ana'it'itcha.

33 Yu'uncha ta'alhtaylh:

―Kitnan yucha an Abrami ikpu'a'p'unmintacha'aw, chi jantu a'tam xamati la ixmaka akintalhitsukun, ¿t'asu li na'uncha li akmakawkanawcha?

34 An Jesús jajuniy:

―Sawalhi an yu iklajunaw, wa tichicha yu ilhtuy tala'alhin, la ixmaka an tala'alhini t'ajun. 35 Chi an yu wa putapatsakancha lapanak, jantu ma'tawlh'alhiya an laka cha'a tan putapatsakan, pero yu ancha xajas'at'a yucha tawlh'alhiy. 36 Xliyu li an yu isTs'alh Lapanak kijunchilh ta'ilhtuyancha li k'amak'awk'ant'itcha, uxitnan k'amak'awk'ana'itcha sawalh. 37 Ijk'atsaycha li yucha an Abrami p'u'a'p'unt'anchi'it pero kilama'niputunaw, mu jantu kilakiklaka'iyawi an kinchiwinti. 38 Kit'in iklhichiwiniy yu an kimPay kimasunita, ch'unch'ach'a wach'u ilht'uyat yu alha'asmat'at mimpayk'an.

39 Yu'uncha ta'alhtaylh tajuniy:

―¡Kitnan kimpayk'an yucha an Abram!

Pero an Jesús jajuniy:

―Li ixjas'at'an Abram sawalhi uxitnan, k'a'ix'ilht'ut'iti tacha an ilhtulh yucha. 40 Pero chaway uxitnan kilama'niputunawi li iklalhixa'alayaw yu sawalh, yu ik'alha'asmatta an Dios. An Abram jantu a'tam chuncha lalh. 41 Uxitnan wanajch'a ch'uni layat tacha lay mimpayk'an.

Yu'uncha tajuniy:

―¡Kitnan jantu wa a'chunancha! ¡Wa pumatami kimPayk'an, Dios!

42 Wa chuncha an Jesús jajuniy:

―Li mimPayk'ani Dios ixwalh, xakilamapayniw, mu kit'in tan wilhchalh Diosi ikminchalh chi anicha ikt'ajun, jantu wa ki'akstucha ijk'uxamilh, Diosi kimala'achatachalh. 43 ¿Tasucha li jantu lay kilalhimacha'xaniyaw an kinchiwinti? Wa xliyu jantu kila'asmatniputunaw. 44 Uxitnan mimpayk'an yucha an xapay makxkay'un, ch'i yuch'ach'a ach'aniyat ilht'unip'ut'unat yu lhinajun. Yucha sta akxni ilhtukanchalh an lakamunulhpa, sta akxnicha jama'ninilh, chi jantu a'tam najunta yu sawalh, mu jantu tu'u yu sawalh kanawlh yucha. Akxni maslakatinin, najuncha tanischa yucha, mu yucha maslakatini', chi xapay maslakatinti. 45 Pero kit'in, mu iknajun yu sawalh, jantu kilakiklaka'iyaw. 46 Uxitnan, ¿tisiyuchacha lay kanawna li iklhit'ajun tu'u tala'alhini? Chi li iknajun yu sawalh, ¿tasu li jantu kilakiklaka'iyawi? 47 Yu ixjas'at'a Dios, an ixchiwinti Dios asmat'a pero uxitnan jant'u asmat'at'iti mu jantu ixjas'at'an Dios.

48 An judiojnin tajuniy an Jesús:

―Sawalhcha tacha an iknawnaw li jamacha'ak'at'i Samaria chi li makxkay'uni lakpach'apatan.

49 An Jesús jajuniy:

―Kit'in jantu tu'u kilakpach'apata makxkay'un. Kit'in ijkiklaka'iy an kimPay, yucha yu ik'ilhtuy, pero uxitnan wa kilamamaxaniyaw. 50 Kit'in jantu kit'ini yu ikpuxkajuy kinta'ayaxtu, alini yu yucha puxkajuy, chi yucha yu kanawna li oxi u jantu yu ilhtuy atam. 51 Sawalhi ani yu iklajunaw, yu kiklaka'iya an kinchiwinti, jantu a'tam katinilh.

52 An judiojnin tajuniy:

―Chaway oxicha ijk'atsaw li wa lakpach'apatan makxkay'un sawalh. An Abraham chi an ali'in yu ixtalhichiwiniy ixchiwinti Dios talaknilh, chi uxint'i na'un: “Yu kinkiklaka'iy jantu a'tam katinilh.” 53 ¿Chu sna palay ayk'at'i, palay wa lakat'ikt'i an kimpayk'an Abraham? Yucha nilh, chi an yu ixtalhichiwiniy ixchiwinti Dios wachu talaknilh. ¿Tisu milhijunt'ich'a na'uni?

54 An Jesús jajuniy:

―Li wa kit'incha ikla'ayakan, an kinta'ayat jantu tu'u lhitapalay. Pero yu kila'ayay yucha an kimPay, an yu unat li miDiosk'an. 55 Pero uxitnan jant'u misp'ayat. Kit'in ikmispay, chi li aknawlh li jantu ikmispay, wa ikmaslakatinincha tacha uxitnan. Kit'in ikmispay sawalh, chi ijkiklaka'iya tacha an najun. 56 An Abraham, yu p'u'a'p'unt'anchi'it lhi'achalhi li kala'ts'ina kiwilhchan, chi la'ts'ilh, pus achalhcha.

57 Wa chuncha tajuniy an judiojnin:

―Jant'uk'a' lhit'a'uni t'up'uxamkaw (50) k'ata, ch'i na'un li la'ts'int'acha an Abram.

58 An Jesús jajuniy:

―Sawalhi ani yu iklajunaw, akxni jantuka' istsukuy an Abraham, kit'in xakt'ajuncha.

59 Pus wa chuncha talaksaklhicha chiwx ixtalakat'alhmaputuncha. Pero an Jesús tats'e'lhi chi taxtulhcha an laka tajtan chi japujataxtu'olh, alhcha.