1 Ixli'astan an Jesús jatalakasunipalhcha a'tami an ixt'alhtanan waniy an lakxkan tan junkan Tiberias. Chunchuniycha tapasalh: 2 Wa lakatami ixtat'aw'ojoy, ancha ixt'ajun an Simón Pedro, chi an Tomás, yu ixtajuniy lhist'uy, chi Natanael, jamacha'a Caná xalakaat'un Galilea, chi an ists'alan Zebedeo chi ixt'uyunk'an ali'in ixt'alhtanan an Jesús. 3 An Simón Pedro jajuniy:

―Ikti'an jach'apayawna jatanti.

Yu'uncha ta'alhtaylh:

―Wachu aklat'a'anaw.

Pus ta'alhcha chi taputajulhcha la'atam barco. Pero anchunu jatats'isni akxni jantu tu'u tach'apayawlh jatanti. 4 Akxni tsukulhcha tunkuncho'oy, an Jesús talakasulhcha an japiktu', pero an ixt'alhtanan jantu ixtak'atsay li yucha. 5 An Jesús jajuniy:

―Ts'alan, ¿jant'u t'u'u lhit'awnat jatanti?

Yu'uncha tajuniy:

―Jantu.

6 Pus jajuniy:

―An lhitan'oxi ixpa'xti an barcojo k'amu'ut an mimpaxo'tank'an, anch'a k'ach'ap'ayawya'it'it.

Pus chunchacha ta'ilhtulh, walh ixli'astan jantucha lay ixtamakutuyi an ixpaxo'tank'an mu wanajcha lhuw jatanti ixtama'alhilata. 7 Wa chuncha an ixt'alhtana an Jesús an yu sawalh ixmapayniy, juniy an Pedro:

―¡Yucha an Jamach'alhkat Jesús!

Wa yucha asmatlhi an Simón Pedro li yucha an Jamach'alhkat Jesús, las mala'ch'inilh, mu wa alhalha ixjunita, chi chamancha alhi an lakxkan, para li kacha'alh an la ixpiktu'. 8 An ali'in ixt'alhtanan an Jesús tacha'alhcha an la ixpiktu an lakxkan, an laka barco, katacha cien metrojo ixlitamakajun tan ixtat'awnachalh, taxa'amalhicha'alhcha an paxo'tan la'stu jatanti ix'a'tsamanta. 9 Akxni tatayachalhcha lakaat'un, tala'ts'in ulakantacha jikmi chi ukxmuk'akantacha la'atam jatanti chi pan. 10 An Jesús jajuniy:

―K'alhit'at la'atam la'at'uyi an jatanti yu wa jach'ap'aya'utka'.

11 An Simón Pedro tawk'alhi an laka barco chi xa'alhicha'alhcha an paxo'tan an la ixpiktu an lakxkan, la'stu laj'ay jatanti ixtaputajumanalh, ciento cincuenta y tres, chi masi lhuw, an paxo'tan jantu ta'exli. 12 An Jesús jajuniy:

―K'at'atcha lakwaynin.

Jantu k'is xamati an ixt'alhtanan katapujulh kalhisakmilh tichini yuchacha, mu ixtak'atsayi li yucha an Jamach'alhkat Jesús. 13 An Jesús stalh alh chi xa'a'ilhcha an pan chi jaxta'nilhcha, chi an jatanti wanajcha chun.

14 Ani ixli'a't'utucha ixjatalakasuniy an ixt'alhtanan an Jesús akxni ixla'awcho'otacha.

15 Akxni talakway'olhcha, an Jesús lhisakmiycha an Simón Pedro, juniy:

―Simón, ists'alh Jonás, ¿k'imap'ayniy palayi kit'in, palay jantu ani tayanalh?

An Pedro alhtaylh juniy:

―Chuni, Jamach'alhkat Jesús, uxint'i k'ats'ayi li ikmapayniyan.

An Jesús juniy:

―K'ajalhist'akt'i an kiborregojnin.

16 A'tam lhisakmipalh:

―Simón, ists'alh Jonás, ¿k'imap'ayniy?

An Pedro juniy:

―Chuni, Jamach'alhkat Jesús, uxint'i k'ats'ayi li ikmapayniyan.

An Jesús juniy:

―K'ajalhist'akt'i an kiborregojnin.

17 Ixlipu'a't'utucha lhisakmilh juniy:

―Simón, ists'alh Jonás, ¿k'imap'ayniy?

An Pedro ixta'oxila'alhiycha mu a't'utucha lhisakmilh li sna mapayniy, pus juniy:

―Jamach'alhkat Jesús, uxint'i k'ats'a'o'oy, uxint'i k'ats'ayi li ikmapayniyan.

An Jesús juniy:

―K'ajalhist'akt'i an kiborregojnin. 18 Sawalhi an yu ijkunan, akxni palayka ts'alhk'at'i ix'unit'a, ixmala'ch'inini para li k'ap'it'icha t'anch'unch'a ixk'uxap'in. Pero akxni k'at'ap'ap'aya'acha, k'alaklats'awalaya'a amimaka chi pumatami kamala'ch'iniyan chi kalhi'anani t'an jant'u k'a'ixk'uxap'i.

19 Akxni chunchacha nawlh an Jesús, ixnawt'ajun tani kapuniyacha an Pedro, chi li chuncha kapumasuya an Pedro li an Dios yucha ay. Ixli'astan juniy:

―¡Ak'inch'a'o'a!

20 Tala'asp'itlhi an Pedro la'ts'in li an yu sawalh ixmapayniy an ixt'alhtana an Jesús, ixjach'a'o'ata, an yu akxni ixtalakwajinta puts'ista an Jesús ixpiktumalh chi ixlisakmita: “Jamach'alhkat, ¿tisiyuchacha yu kama'axt'a'an?”

21 Akxni la'ts'ilh an Pedro juniy an Jesús:

―Jamach'alhkat, chi anu ¿tasu kalayacha?

22 An Jesús alhtaylh:

―Li iknajuni li katsukulhi sta akxni akmincho'oya, yucha jantucha mincuenta, uxint'i wa ak'inch'a'o'acha.

23 Wa chuncha, tacha ani nawlh an Jesús, wanaj talamak'atsaani'olhi an ixlapanakni an Jesús li ma jantu katinilhi anchunu ixt'alhtana'. Pero an Jesús jantu chuni juniy li jantu katinilh, an Jesús yucha najun: “Li kit'ini iknajun li katsukulhi sta akxni akmincho'oya, yucha jantucha mincuenta.”

24 Wanaj kit'in, ixt'alhtana an Jesusi yu iknajun tacha an laktapasalh, chi kit'ini ikts'o'lhi, chi k'atsayawi li an yu iknajun, sawalh.

25 Chi wanaj lhuw tanlhuni yu ilhtupalh an Jesús, li wa ka'ists'o'muk'a'okalhcha la'atamj la'atamj tacha an lak'ilhtulh, kit'in iknajun ka jantucha inta ka'ixlitamalh ani lakamunulhpa an libro tacha an ists'o'kalh.