1 Ex ni Pablo jalaqtsꞌil tachun ni lhachimoꞌonun, va lakjunil:

—Ketꞌalaqaunin, va tacha oxicha oxamaktaun kꞌatsan la kijatapastakꞌati porke jantu kaꞌalil kilaqtaqal la ixlakaꞌukxpuꞌ Dios mas chavaycha.

2 Ex yu xaꞌukxtin ni kuras yu ixjunkan Ananías va laklhijunil katapukiksal ni Pablo yu ancha ixtayanal. 3 Ex naul ni Pablo:

—Uxintꞌi Dios kasayan, va tꞌuy ukxpuꞌ makꞌay. Uxintꞌi viltꞌi para kimpꞌuxkꞌaulaqtsꞌinin incha alin kilaqtaqal tacha najun ixlhachimoꞌon Moisés. ¿Ex valiꞌiycha lhinaꞌuncha kintasal mas jantu xtaqkan lakatin la ixlhachimoꞌon Moisés?

4 Ex yu ancha ixtayanal va tajunil ni Pablo:

—Chuncha tacha naꞌun ni uxintꞌi akchꞌintꞌamay yu xaꞌukxtin ni kuras yu laksakta Dios.

5 Ex ni Pablo naul:

—Ketꞌalaqaunin, kitꞌin jantu xajkꞌatsay incha xaꞌukxtin kura ixjunita. La ixchivinti Dios tsꞌoqkanta yu najun inchine: “Jantu aqtaun kaꞌakchꞌintꞌamatꞌi ixjalhachimoꞌonukꞌan milapanakni.”

6 Ex ni Pablo xtaqnil kuenta ni lapanakni yu ancha ixtaꞌaqxtoqnun lati va saduceos y alati va fariseos ixtajunita. Ex pꞌays naul:

—Ketꞌalaqaunin, kitꞌin va kfariseo kunita, y kimpay vachuꞌ va fariseo ixjunita. Kilatꞌaunau puxkaulaqtsꞌininin kilaqtaqal porke klhakapuꞌan ni janinin katakujchoqoyaꞌ.

7 Tejkan chuncha naul, ex ni fariseos ali saduceos aqtayl talakiltsakꞌastukꞌa kun lakchivinti. Ex chuncha tatalaqlvaqlicha taꞌan ixtaꞌaqxtoqnun. 8 Yu saduceos tanajun ni janinin jantu katakujchoqoyaꞌ vachuꞌ tanajun jantu alin angeles nisin espíritus, pero yu fariseos yuꞌuncha talhakapuꞌan tachun. 9 Tus tachun ni lapanakni pꞌays talaktꞌasal kun ixchivintikꞌan. Ex yu ixtamasuy ixlhachimoꞌonkꞌan ni israelitas yu talhiyal ni fariseos va taꞌostayal y tanaul:

—Aniy lapanaki jantu kalhitsukul laqtaqal. Incha va xaqalal taun espíritu u angel jantu lay laktanchaniyau kun Dios.

10 Ex apalay pꞌays val ni lhilukuj tus talhanal ni komandante porke ixlhilay katamaqniyaꞌ ni Pablo. Xlhiyucha jamalaqachanal iniꞌ ni tropas para katamaxtul laqatapꞌasta y katalhaꞌanchoqol la ixchaqakꞌan ni tropas.

11 Ex yu ataun julchan val tejkan putsꞌisni, ni Jalhachimoꞌonuꞌ Jesús tasunil ni Pablo, va junil:

—Jantu katꞌalhan Pablo, chuncha tacha ixkꞌilhichꞌiviniy aniy Jerusalén vachu chun kꞌilhichꞌivinaneꞌe laka putaulan Roma.

12 Ex yu ataun julchan val tataqxtoqlhi lati yu israelitas. Va chꞌantaun tamakal ixjatapastakꞌatkꞌan para katamaqnil ni Pablo. Tanaul ni tsꞌanqay laqsaval jantu katavayl y jantu kataꞌoqnul tus katamaqniꞌelal ni Pablo. 13 Va ixtapasata cuarenta joꞌakna yu chꞌantaun ixtajunita. 14 Yuꞌuncha talaqꞌal ni xaꞌukxtinin kuras kun yu xalajꞌaynin israelitas, va tajunil:

—Kijnankꞌan va chꞌantaun kmakau kijatapastakꞌatkꞌan para jantu kakvajiu incha jantu kakmaqniꞌelau ni Pablo. 15 Chavay uxiknan kun yu alati kilhachimoꞌonunkꞌan israelitas kaskꞌinitꞌik ni komandante para lhiy katalhiminin ni Pablo. Kaꞌunitꞌik ni uxiknan va lhisakmipꞌutꞌunatꞌik alati chivinti. Tejkan kaminaꞌ lakatin ex kakmaqniyaucha kijnan.

16 Pero yu istsꞌal ixtꞌalapanaki ni Pablo va kꞌatsal tacha tanaul. Ex niman chuncha al juniniꞌ ni Pablo la ixchaqakꞌan ni tropas. 17 Ex ni Pablo tꞌasaꞌil qayntaun kapitan, va junil:

—Ni aniy tsꞌal kalhipꞌinichiy ni komandante para kajunil laqataun chivinti.

18 Ex lhaꞌanil, tejkan lhachaꞌal ex junil ni komandante ni kapitan:

—Ni Pablo yu vil tachꞌin kilhijunil kaklhiminin ni aniy tsꞌal porke va tꞌachivinputunan.

19 Ex ni komandante maqchꞌapalhaꞌal taꞌan xꞌaman ni tsꞌal, va lhisakmil:

—¿Tisuncha kꞌiꞌunpꞌutꞌuncha?

20 Ex qaltayl ni tsꞌal, va junil:

—Ni israelitas va chꞌantaun tajunita. Tanajun ni yuꞌuncha kataskꞌiniyan para lhiy kꞌalhipꞌi ni Pablo taꞌan tavilanal yu xalhachimoꞌonun ni israelitas, va katajunan para katalhisakmil alati chivinti. 21 Pero jantu kalhakꞌapꞌupꞌi porke tapasata cuarenta joꞌakna tapakxan ni Pablo para katamaqnil. Va chꞌantaun tamakal ixjatapastakꞌatkꞌan para jantu katalhivayl y jantu kataꞌoqnul tus kaniꞌelal ni Pablo. Chavaycha oxicha tapakxanꞌita minchivinti yu kꞌanauneꞌe uxintꞌi.

22 Ex ni komandante mastakꞌachoqolcha ni tsꞌal, va lhijunil para jantu matichun kalhitaulnil ni anchanu chivinti.

23 Ex ni komandante jalakjuntaꞌil pumatꞌuy kapitanes, va laklhijunil para listujcha katamakal tꞌuy ciento tropas yu taꞌan laka chꞌajaꞌ ali setenta tropas yu tapuꞌan laka juki ali tꞌuy ciento tropas yu talhaꞌan lanzas para kataꞌal laka putaulan Cesarea tejkan lakaputsꞌisni laqanajatsi hora ixjunita. 24 Vachuꞌ laklhijunil para listujcha katamakanil ixjukin para kataukꞌal ni Pablo para ox kalaqchaꞌal ni gobernador Félix y jantu tuꞌuchun kalhitapasal.

25 Ni komandante vachuꞌ malaqachal aqxtaun jalhiki yu inchine najun:

26 “Kitꞌin yu Claudio Lisias kunita, kmastakꞌayan ni uxintꞌi, Félix. Uxintꞌi ayaj ox gobernador unitꞌa. 27 Ni israelitas tachꞌapal ni aniy lapanaki, va laycha ixtamaqnil pero kitꞌin kꞌaqtayjul, klakmaxtunil la ixtamakakꞌan kun kintropas porke ijkꞌatsal ni yucha va jatsꞌoqꞌulakantacha tacha xalapanaki Roma. 28 Xajkꞌatsaputun suncha ixlhiꞌatal tamukꞌaniy laqtaqal. Xlhiyucha klhaꞌal taꞌan ixtaꞌaqxtoqnun yu xalajꞌaynin israelitas. 29 Chuncha kpukꞌatsal ni lapanakni ixtamukꞌaniy laqtaqal va por ixlhachimoꞌonkꞌan pero jantu kalhitsukul tuꞌuchun laqtaqal y jantu ixpaxtoqniy katanul laka pachꞌin u kamaqnikal. 30 Ex astan vachuꞌ kꞌatsal ni israelitas va chꞌantaun tamakal ixjatapastakꞌatkꞌan para katamaqnil ni aniy lapanaki, va xlhiyucha kmalaqachaniyan uxintꞌi. Vachuꞌ klaklhijunil katalaqmin laqlaꞌoxinin kun uxintꞌi ni lapanakni yu tamukꞌaniputun laqtaqal. Vamun yuꞌ ni aniy yu ktsꞌoqniyan.”

31 Ex chuncha ni tropas tamakal tacha laklhijunkal, talhaꞌalcha ni Pablo laka tatsꞌisin tus laka putaulan Antípatris. 32 Ex yu ataun julchan val, ni tropas yu ixtaꞌanta laka chꞌajaꞌ tataspꞌikchoqolcha la ixchaqakꞌan, pero yu ixtapuꞌanta juki yuꞌuncha tataylhaꞌal ixlakatinkꞌan kun Pablo. 33 Tejkan tachaꞌal laka putaulan Cesarea va tamaqxtaqnil ni jalhiki ni gobernador y vachuꞌ tamaqxtaqlhicha ni Pablo. 34 Ni gobernador puteꞌel ni chivinti ex lhisakmil ni Pablo incha toꞌoxtaycha machaqaꞌ ixjunita. Tejkan kꞌatsal ni va machaqaꞌ Cilicia ixjunita 35 ex va junil:

—Kajqasmakniyan minchivinti tejkan katachinaꞌ yu taxkayyan.

Ex lhinaul kalhistakkal laqa ay chaqaꞌ yu makal Herodes.