1 Ni Jesús jamaqxtoqlhi ixpumakautꞌuykꞌan ixtꞌaltanan. Jalaqxtaqnil lhachimoꞌon kun tapꞌasta para lay katalakmaxtunil tachun aqmoqxnun yu tachꞌapay ni lapanakni. Vachuꞌ katakꞌuchꞌul tachun yu taqanꞌanin. 2 Jamalaqachal para katalaqputeꞌenil ni lapanakni tacha lhachimoꞌonun ni Dios, vachu para katalajkꞌuchꞌul taqanꞌanin. 3 Va jalakjunil:

—Jantu tuꞌuchun kalhipꞌintꞌik para milakatinkꞌan, jantu palik, jantu bolsa, jantu tiyuti, jantu tumin, jantu aqxtaun laqchꞌiti para milamapaxankꞌan. 4 Mas va taꞌayucha chaqaꞌ kachꞌipꞌintꞌik ancha katꞌaulapitikcha tus katꞌaxtꞌuchꞌoꞌoyapitik ni anchanu putaulan. 5 Taꞌan jantu kꞌalaꞌaꞌikꞌanapitik, niman katꞌaxtꞌuchꞌoꞌoyapitik ni anchanu putaulan. Ancha kachꞌankꞌalhakꞌanapitik ni pꞌoqxni la minchꞌajakꞌan. Chuncha katapukꞌatsayaꞌ ni jantu ox yu tamakanin.

6 Ex chuncha taꞌalcha laka putaulanin, ixtalaqputeꞌey tacha lay katapulaqtaxtul. Talakachux ixtalajkꞌuchꞌulhaꞌanta ni taqanꞌanin.

7 Ni gobernador Herodes kꞌatsal tachun ni lhitapatsa yu ixmakay ni Jesús, ex ayaj pastakꞌul. Lati ixtanajun ni Jesús va Juan yu jamaqchajꞌavanaꞌ, ixtanajun va kujchoqol. 8 Alati ixtanajun ni Jesús va Elías yu maqancha ixlaqputeꞌey ixchivinti Dios. Alati ixtanajun va aqayntaun yu ixlaqputeꞌey ixchivinti Dios maqancha yu kujchoqotacha. 9 Pero ni Herodes va naul:

—Ni Juan kitꞌin klhinaul ixchaqxpꞌuxnika ixꞌaqtsul. ¿Ex taꞌayucha kavalcha aniy lapanaki yu ayaj talhichiviniy lhuu axtoqnuꞌ?

Ex ayaj ixlaqtsꞌinputuntacha ni Jesús.

10 Yu ixjamalaqachata ni Jesús taminchoqol, va talaqputeꞌenil yu tamakalcha. Ex ni Jesús laklhaꞌanchoqol ixlaqꞌamankꞌan laka putaulan Betsaida. 11 Pero tejkan takꞌatsal ni lapanakni, yuꞌuncha va tatixkaulhaꞌal. Ex ni Jesús jalaqaꞌil kun achati. Va jalhixaqalal tacha lhachimoꞌonun ni Dios y jalajkꞌuchꞌul yu taqanꞌanin.

12 Tejkan va laycha katoqoxal, yu ixpumakautꞌuykꞌan ixtꞌaltanan talaqꞌal ni Jesús, va tajunil:

—Kꞌalakmastꞌakꞌachꞌoꞌocha ni lapanakni para kataꞌal jastaknan y katalakxkaul ixvaytkꞌan laka putaulanin taꞌan ukstsꞌuniy kaval. Aniy taꞌan alintau va lakakꞌavinan. Jantu tuꞌuchun alin.

13 Ex ni Jesús va jalakjunil:

—Uxiknankꞌan kꞌalaqxtꞌaqnitꞌik ixvaytkꞌan.

Ex tanaul:

—Jantu kaklhitsukuu ni vayti. Klhitꞌaunau vamun aqskis pan kun aqxtꞌuy jatanti. ¿Va naꞌun kajkꞌau inin vayti para katalaqchaꞌanꞌol ixvaytkꞌan tachun ni aniy lapanakni?

14 Ni joꞌakna por tachun ixtaꞌalinta va laqakis mil. Ex ni Jesús lakjunil ixtꞌaltanan:

—Kalakꞌunitꞌik ni lapanakni katataulal por pakltamin ciento lakatamin.

15 Chuncha tamakal, ni lapanakni tus tachun tataulꞌol. 16 Ex ni Jesús chꞌapal ni aqskis pan kun ni aqxtꞌuy jatanti. Talaqstꞌal laktꞌiyan, va xtaqnil lhimalaqpuchuncha ni Dios. Aqtaylcha laqcheꞌey ex jaxtaqlhaꞌanilcha ixtꞌaltanan. Yu ixtꞌaltanan taꞌaqtaylcha talakmapitsiniy ni lapanakni. 17 Chuncha tachun ni lapanakni tavaynꞌol, tus ox taꞌotsal. Ex yu ixtꞌaltanan ni Jesús tapusakchoqol yu xajchal. Va laqakautꞌuy canasta yu xajchal.

18 Taun julchan ni Jesús va ixtꞌajun skꞌiniꞌ Dios xꞌaman. Yu ixtꞌaltanan vachu ancha ixtatꞌaꞌalinta. Ex ni Jesús va laklhisakmil:

—¿Tas tanajuncha ni lapanakni? ¿Taꞌayucha kintalhilaycha ni kitꞌin?

19 Ex yuꞌuncha taqaltayl:

—Lati tanajun va Juan kꞌatꞌi yu jamaqchajꞌavanaꞌ. Alati tanajun va Elías kꞌatꞌi. Alati tanajun ni uxintꞌi va aqayntaun yu kujchoqotacha yu maqancha ixlaqputeꞌey ixchivinti Dios.

20 Ex naul ni Jesús:

—Chavay klalhisakmiyau yu uxiknankꞌan, ¿tas ayucha kilalhilayaucha ni kitꞌin?

Ex yu Pedro va junil:

—Uxintꞌi ni Cristo kꞌatꞌi yu ixtanajun kamalaqachayaꞌ ni Dios.

21 Pero Jesús jalakachivitijlal ixtꞌaltanan para jantu matichun katajunil ni va yu Cristo junita.

22 Ex lakjunil ni Jesús:

—Ni kitꞌin yu kval Sasꞌatꞌa Lapanaki va ayaj kakmaqanlqajnanaꞌ. Ni lajꞌay lapanakni ali yu xaꞌukxtinin kuras ali yu tamasuy kilhachimoꞌonkꞌan, yuꞌuncha kintalaktanchaniyaꞌ. Va kintamaqniyaꞌ pero yu laꞌatꞌutunuꞌ julchan kajkujchoqoyaꞌ.

23 Ex ni Jesús lakjunil tachun ni lapanakni:

—Incha matichun kintꞌatiꞌukxuntayaputun, yucha jantucha lay makay yu makaputun. Kaval tacha lhilhiy kalhaꞌal ixkurus, ex chuncha lay kintꞌatiꞌukxuntayalcha. 24 Chavay ni lapanaki yu ayaj lhitsukuputun ixjatsukunti va kamaqatsꞌanqayaꞌ. Yu kamaqatsꞌanqayaꞌ ixjatsukunti por kitꞌin, yucha kalhitsukuchoqoyaꞌ. 25 ¿Tisuncha lhajaycha qayntaun lapanaki incha kalhitsukuꞌol tachun yu alin lakamunukpaꞌ pero va maqatsꞌanqay ixjatsukunti? 26 Incha matichun kilhimaxaniy ni kitꞌin kun kinchivinti, ex kitꞌin yu kval Sasꞌatꞌa Lapanaki, vachuꞌ kaklhimaxaniyaꞌ ni yucha, tejkan kakminchoqoyaꞌ kun kintapꞌasta vachu kun ixtapꞌasta ni kimPay kun ixmayulnin. 27 Laqsaval klajunau ni alin lati yu chavay aniy tatꞌajun yu jantu kataniyaꞌ tus katalaqtsꞌinꞌelayaꞌ ni Dios lhachimoꞌonun.

28 Tejkan paqtsajin val, ni Jesús al skꞌiniꞌ Dios laka aspajun. Yu Pedro ali Juan ali Jacobo vachu jalaklhaankal. 29 Tejkan Jesús ixtꞌajun skꞌiniꞌ Dios va tapaxal ixꞌukxpu, vachu ixlaqchꞌiti tus ayaj yaqaq val, tus kꞌuliksnaꞌ val. 30 Ex tatꞌatasul pumatꞌuy xapaynin, ixtatꞌachiviniy ni Jesús. Ni yuꞌuncha va Moisés ali Elías yu la maqancha ixtalaqputeꞌey ixchivinti Dios. 31 Yuꞌuncha tus ixlaqmalaqachoqoxnukanta kun yu kꞌuliksnaꞌ jatunkunaꞌ. Ixtatꞌajun lhichivinin tejkan kaniyaꞌ ni Jesús, yu katapasayaꞌ laka putaulan Jerusalén. 32 Ni Pedro kun ixtꞌaltanan va ayaj ixtachꞌapata ltatati. Talaqtsꞌinil tacha ixjunita ixꞌoxixtu ni Jesús y talaqtsꞌil ni pumatꞌuy lapanakni yu ixlaktꞌatayal. 33 Tejkan ni Moisés ali Elías ixtatꞌaunchoqoycha makaunan ni Jesús, ex ni Pedro va junil ni Jesús:

—Jamalaniniꞌ, la ox kꞌalintau aniy. Ka la ox kakmakau aqatꞌutu moqltaꞌ. Aqataun para uxintꞌi, aqataun para Moisés vachuꞌ aqataun para Elías.

34 Tejkan chuncha ixchiviniy, chil laqataun taputsꞌi, va laqꞌoqxtꞌaqyaukal. Va ayaj tatalhanal tejkan ixtayanal ixpulaknacha laka taputsꞌi. 35 Va chivinkal laka taputsꞌi:

—Yucha aniy kesꞌatꞌa yu kꞌachaniy. Ox kꞌaꞌalasmaktꞌik.

36 Tejkan miꞌol ni chivinti, ni Jesús tasuchoqolcha, va xꞌamancha. Yuꞌuncha tus saq taval y paqlhuucha val jantu matichun katajunil yu ixtalaqtsꞌinta.

37 Ataun julchan val, va tataꞌeltajul ni aspajun. Ancha qaynlhuvaj lapanakni tapaxtoqlhi ni Jesús. 38 Ixꞌalinta qayntaun lapanaki yu tꞌasal, va junil:

—Jamalaniniꞌ, ktapayniniyan kaꞌaqtꞌayꞌutꞌi kintsꞌal, vamun yuꞌ klhitꞌajun. 39 Va chꞌapay taun jantu ox espíritu, niman maqantꞌasay, maxkapꞌikniy tus maqalpupuy, va ayaj malakaxkayay y jantu makaunputun. 40 Klaktapayninitacha katamaxtul ni jantu ox espíritu ni mintꞌaltanan pero jantu kalal.

41 Ex ni Jesús qaltayanal, va naul:

—¡Yu uxiknan jantu lay lhakꞌapꞌupꞌinatꞌik, va jalaktuꞌunun untꞌatꞌik! ¿Tus tavanancha kaktamakaunaꞌ kun uxiknan? ¿Tus tavanancha kaklatayaniyaucha? Kꞌalhitꞌantꞌikcha aniy ni mintsꞌal.

42 Tejkan ni tsꞌal talakanunil ni Jesús ni aqmoqxnuꞌ va niman tanqalhul, va maxkapꞌiknil. Ex ni Jesús laqꞌaymal ni aqmoqxnuꞌ, va palay makal ni tsꞌal, va maqxtaqnichoqol ni ixpay. 43 Ex tus vak takꞌatsal tachun ni lapanakni por ixꞌayaxtu Dios.

Tejkan chuncha tus vak ixtakꞌatsan ni lapanakni por yu makal ni Jesús, va lakjunil ixtꞌaltanan:

44 —Oxi kaꞌasmaktꞌikcha ni inchine, jantu aqtaun kakꞌauktꞌik. Kitꞌin yu kval Sasꞌatꞌa Lapanaki va laycha kakmaqxtaqkal la ixtamakakꞌan ni lapanakni.

45 Pero ixtꞌaltanan jantu katamalaqasil, jantu kalaqxtaqnikal lakatin para katamalaqasil. Va tatalhanal xlhiyucha jantu katalhisakmil.

46 Ixtꞌaltanan ixtalhilakchiviniy taꞌayucha yu apalay ay ixjunita siya yuꞌuncha. 47 Ni Jesús kꞌatsal yu ixtapastakꞌa. Ex chꞌapal qayntaun jasꞌatꞌa va tamaqayaul, 48 jalakjunil:

—Yu laqaꞌiy ni aniy jasꞌatꞌa por chuncha klhinajun ni kitꞌin, yucha vachu kilaqaꞌiy ni kitꞌin. Yu kilaqaꞌiy ni kitꞌin vachu laqaꞌiy yu kimalaqachata. Yu lakatꞌuniy kꞌatsꞌan yucha va yu apalay ay.

49 Ex chuncha ni Juan va naul:

—Jamalaniniꞌ, klaqtsꞌiu qayntaun lapanaki yu maxtuy aqmoqxnun tejkan mapaqaꞌuy mintaqaꞌuti. Pero jantu kintꞌaltanan kaval, xlhiyucha klaktanchaniu.

50 Pero ni Jesús lakjunil:

—Jantu kꞌalaktꞌanchꞌanitꞌik. Yu jantu kintaxkayyan, va kintaꞌaqtayjuyan.

51 Ixlakamintacha julchan tejkan kalaqaꞌikanaꞌ ni Jesús laktꞌiyan. Ex naul mas va tichichun katapasal ni kaꞌanacha laka putaulan Jerusalén. 52 Ex jamalaqachal lapanakni katapꞌulꞌal. Yuꞌuncha tatanuchal taun putaulan taꞌan ixtavilanal yu samaritanos para katapuxkaul taꞌan kataloqojlhi. 53 Pero yu ancha machaqan jantu katalaqaꞌil tejkan takꞌatsal ni Jesús ixꞌuxaꞌan Jerusalén. 54 Tejkan chuncha takꞌatsal ni Jacobo ali Juan, va talhisakmil ni Jesús:

—Jalhachimoꞌonu, ¿tas naꞌuncha? ¿Kaskꞌiu ni kataꞌeltajul jikmi laktꞌiyan para katalaqxauꞌol, [chuncha tacha skꞌil ni Elías]?

55 Ex taspꞌiklhi ni Jesús, va jalaqꞌaymal, [va lakjunil:

—Jantu kꞌatsꞌayatꞌik tisuncha espíritu lhitꞌaunatꞌik. 56 Kitꞌin yu Sasꞌatꞌa Lapanaki jantu kakmil para kakmaꞌakxal ixjatsukuntikꞌan ni lapanakni, va kminta para klaqmalaqtaxtul.]

Ex taꞌanchoqol ataun putaulan.

57 Tejkan ixtaꞌanta lakatin, qayntaun lapanaki naul, va junkal ni Jesús:

—Kitꞌin kaktꞌaꞌanan mas va toꞌoxtaychacha kapꞌineꞌe.

58 Ex ni Jesús junil:

—Yu xanixꞌoyun, yuꞌuncha tamaqalin ixchaqakꞌan taꞌan poqapaj laktalpa. Yu tsꞌoꞌon, yuꞌuncha tamaqalin ixpaqtamankꞌan. Pero ni kitꞌin yu kval Sasꞌatꞌa Lapanaki, jantu kakmaqalil toꞌoxtaycha kakmastaknil kiꞌaqtsul.

59 Ex ni Jesús junil aqayntaun:

—Kꞌintꞌatꞌatꞌicha.

Pero ni lapanaki va naul:

—Jalhachimoꞌonuꞌ, kꞌimakꞌaunꞌel kajkꞌanꞌelayaꞌ maknunuꞌ kimpay.

60 Ex va junil ni Jesús:

—Kꞌalakmakꞌaucha ni janinin katalamaknulcha siya yuꞌuncha ni janinin. Pero uxintꞌi kapiti jalaqputeꞌeniꞌ tacha lhachimoꞌonun ni Dios.

61 Ex naul aqayntaun, va junkal ni Jesús:

—Vachu ktꞌaꞌuxanan, Jalhachimoꞌonuꞌ. Pero kꞌimakꞌaunꞌel klakmastakꞌaꞌelayaꞌ kilapanakni la kinchaqaꞌ.

62 Ni Jesús junil:

—Chuncha va tacha qayntaun yu chꞌapay ixpuchꞌa pero tejkan chꞌan si laqtsꞌilhaꞌan ixpulakan. Yucha jantu paxtoqniy katanul taꞌan lhachimoꞌonun ni Dios.