៣
សារ ប៉្រ័ះ ប៊កកាតយ័ អើ សាំយូអ៊ែល
១ សាស្វា សាំយូអ៊ែល ប៉្រគ័ ង៉ារ ប៉្រ័ះ ប៊កកាតយ័ អន់ឌូ លូ វគ័ អេលី។ ផះ រ៉ាំងវ៉ាង ណោះ ប៉្រ័ះ ប៊កកាតយ័ អូ ង៉ាយ ចឹង កាប លូ ប៉ាណូស អុះ កា អូ សូវ តាំបាង ឡាកោ អន់ ពូ ប៉ប័ ដេល។ ២ រ៉ាំងវ៉ាង ណោះ ម៉ាត់ វគ័ អេលី កា ចឹង ម៉ាម៉ាំង ហៃ អូ សូវ ប៉ប័ កេះ។ ផះ វគ័ អេលី តៃប ពឹង កាណុង អ៊ែ ទៅ ៣ តាគៀង ពូ សុះ ពឹង កាណុង ដាគ់ បើ ប៉ាត់ អុះ សាស្វា សាំយូអ៊ែល តៃប ពឹង ចារ រ៉ាម៉ះ ប៉្រ័ះ ប៊កកាតយ័ ក្យាម័ ចារ ពូ ចៃគ ហ៊ីប សារ សាញ៉ា រែវ ពុត ។ ៤ ផាឌី ប៉្រ័ះ ប៊កកាតយ័ អើ សាំយូអ៊ែល អ៊ែ កា តើល ផា «ញ៉ា ?» ៥ កេះណោះ អ៊ែ សាតាក់ ឡាំ ប៉ាគ់ ចារ វគ័ អេលី អ៊ែ អំប៉ញ់ ផា «អើ អាញ់ ទី កាន ញ៉ា ?» វគ័ អេលី តើល ផា «អាញ់ អូ ទី អើ អីស អុះ អីស ឡាំ តៃប ណាវ្គ ពិ»។ សាំយូអ៊ែល កា ឡាំ តៃប ណាវ្គ។
៦ ប៉្រ័ះ ប៊កកាតយ័ កា អើ សាំយូអ៊ែល ម៉ោញ ទង ណាវ្គ សាំយូអ៊ែល កា អ្យូវ ឡាំ ប៉ាគ់ ចារ វគ័ អេលី លូ អំប៉ញ់ ផា «អីស អើ អាញ់ ទី កាន ញ៉ា ?» វគ័ អេលី តើល ផា «អាញ់ អូ ទី អើ អីស អុះ ឡាំ តៃប ណាវ្គ ពិ សោ»។ ៧ សាំយូអ៊ែល អូ អន់ហ្នាល់ ប៉ានឹរ ប៉្រ័ះ ប៊កកាតយ័ អុះ ខង ប៉្រ័ះ ប៊កកាតយ័ បើ កាកាប លូ អ៊ែ។
៨ ប៉្រ័ះ ប៊កកាតយ័ អើ សាំយូអ៊ែល លឺក ទី ប៉ៃង។ សាំយូអ៊ែល កា អ្យូវ ឡាំ ប៉ាគ់ ចារ វគ័ អេលី លូ អំប៉ញ់ ផា «អីស អើ អាញ់ ទី កាន ញ៉ា ?» វគ័ អេលី កា អ្លុ អន់តគ់ ផា ប៉្រ័ះ ប៊កកាតយ័ ហង អើ សាំយូអ៊ែល ៩ ទឹល នីណោ័ះ វគ័ អេលី រ៉ះ កា សាំយូអ៊ែល ផា «ឡាំ តៃប ណាវ្គ ពិ។ ផា កាតាំង ប៉ានឹរ ពូ អើ ម៉ោញ ទង ណាវ្គ អីស ត្រគ់ កាប ផា "អឺ ប៉្រ័ះ ប៊កកាតយ័ ប៉រ់ អីស រ៉ះ កា អាញ់ ពិ អាញ់ ឡាក់ ទុច អីស ក្យាគ់ សាំយ៉ាំង អីស កេះ"»។ កេះណោះ សាំយូអ៊ែល កា ឡាំ តៃប ប៉ាគ់ ចារ ទៅ ណាវ្គ។ ១០ ផះ ណោះ ប៉្រ័ះ ប៊កកាតយ័ កា ជឹរ អន់តាវ ក្យាម័ ហះ ណោះ អ៊ែ អើ ឡាក់ កា អ៊ែ អើ អន់ទ្រួល ពែ ដេល «សាំយូអ៊ែល សាំយូអ៊ែល !» សាំយូអ៊ែល តើល ផា «ប៉រ់ អីស រ៉ះ កា អាញ់ ពិ អាញ់ ឡាក់ ទុច អីស ក្យាគ់ សាំយ៉ាំង អីស កេះ»។ ១១ ប៉្រ័ះ ប៊កកាតយ័ រ៉ះ កា អ៊ែ ផា «ហៃ អាញ់ ចឹង ប៉្រគ័ អន់ ទី សារ ប៉ាណាប ម៉ោញ កើត ពឹះ ពឹង ប៉ាថេត អ៊ីស្រាអ៊ែល។ ពឿ កាតាំង សារ អា បក់ ណោះ ចឹង កាខរ់ ណូស ខាក់។ ១២ ប៉ាគ់ ដារ់ អន់តីគ អាញ់ ចឹង ប៉្រគ័ កា ខាប់ខួ អេលី អន់ ត្រគ់ ពួយ គ្រឹប សារ អាញ់ រ៉ះ កា អ៊ែ ពែ ឡឹង គុល ទឹល ឡុច។ *៣:១២ អន់ទ្រួល ពែ រ៉ាគឹយ ប៉្រ័ះ រ៉ះ កា វគ័ អេលី ផា គន សោ អ៊ែ ចឹង តោ័ ទិ។ ប៉រ់ ហៃ ២:២៧-៣៦។ ១៣ អាញ់ រ៉ះ កា អ៊ែ ផា អាញ់ ចឹង ចៃគ ថូត ខាប់ខួ អ៊ែ លើយ ញន កា សារ គន អ៊ែ ទិ ពៀរ ប៉្រគ័ យច ណោះ ខង អ៊ែ អ្លុ អន់តគ់ ផា គន អ៊ែ បឺង៉ាយ អាញ់ ហះកា អ៊ែ អូ ប៉្រគ័ តាគ់ អញ់ចាល អន់ឌែ អុះ។ ១៤ ញន ណោះ ហង បះ អាញ់ ម៉ត់ លូ ខាប់ខួ អ៊ែ ផា អាញ់ អូ អ្លាត ដោះ សារ អន់ឌែ ប៉្រគ័ យច ណោះ អុះ យ៉័ះ អន់ឌែ ពុះ កាណាគ័ ញ៉ា រ៉ាម៉ះ អាញ់ កាតាម»។
១៥ សាំយូអ៊ែល កា តៃប ទឹល តារ ប៉ាគ់ តារ កាំលឺ អ៊ែ កា បើក អំប៉ារ ចារ រ៉ាម៉ះ ប៉្រ័ះ ប៊កកាតយ័ ។ សាំយូអ៊ែល អូ ខឹន រ៉ះ កា វគ័ អេលី ឡឹង សារ ប៉្រ័ះ ប៊កកាតយ័ អន់ អ៊ែ កាតាំង លូ ប៉ប័ ណោះ អុះ។ ១៦ វគ័ អេលី អើ សាំយូអ៊ែល ផា «អឺ សោ»។ សាំយូអ៊ែល តើល ផា «ញ៉ា ?» ១៧ វគ័ អេលី អំប៉ញ់ ផា «ប៉្រ័ះ ប៊កកាតយ័ រ៉ះ សារ ញ៉ា អន់ដា កា អីស ? អីស ជែ អោន សារ ញ៉ា កា អាញ់ ដៃ។ ផា អីស អោន សារ ញ៉ា ឡាក់ ប៉្រ័ះ ប៊កកាតយ័ រ៉ះ ណោះ អន់ ប៉្រ័ះ ប៊កកាតយ័ ចៃគ ថូត អីស ក្លាំង ខាក់»។ ១៨ សាំយូអ៊ែល កា រ៉ះ កា វគ័ អេលី ឡឹង សារ ប៉្រ័ះ ប៊កកាតយ័ រ៉ះ កា អ៊ែ ទិណោ័ះ អូ ទី អោន សារ ញ៉ា អុះ។ វគ័ អេលី កាប ផា «អ៊ែ ឡាក់ ប៉្រ័ះ ប៊កកាតយ័ អន់ អ៊ែ ប៉្រគ័ ឡាក់ កា ពុត អ៊ែ ប៉ិច ពិ»។
១៩ សាំយូអ៊ែល កា ហ៊ែង តីស ៗ ប៉្រ័ះ ប៊កកាតយ័ កា អ្វៃ អន់ឌូ លូ អ៊ែ ទិ សារ អ៊ែ រ៉ះ ប៉្រ័ះ កា ប៉្រគ័ អន់ កើត ពឹះ តាទឹច។ ២០ ពឹង ប៉ាថេត អ៊ីស្រាអ៊ែល ទិណោ័ះ ឡឹង មឿង ដាន់ លើយ ទឹល មឿង បៀសេបា ប៉ាសុន ទិឌូ ឃឹត ផា សាំយូអ៊ែល ឡាក់ រ៉ាគឹយប៉្រ័ះ ប៊កកាតយ័ តាទឹច។ ២១ ប៉្រ័ះ ប៊កកាតយ័ តាំបាង ឡាកោ អន់ សាំយូអ៊ែល ប៉ប័ លើយៗ ប៉ាគ់ មឿង ស៊ីឡូ។ អ្វៃ ប៉ាគ់ មឿង ណោះ ប៉្រ័ះ ឃើយ រ៉ះ អន់ សាំយូអ៊ែល សាំយ៉ាំង សាំយូអ៊ែល កា រ៉ះ តូ កា ប៉ាសុន អ៊ីស្រាអ៊ែល ទិឌូ។
…