១ ទី ដារ់ ម៉ោញ ផះ យីស៊ូ អ្វៃ ហះ ហាង តាំងលោ័ កេនេសារែត ទី កាំឡាំង អៀង ពឹះ អង់អ្យេ័ះ គួប អ្វៃ ជុំ អ៊ែ ភឿ សាំយ៉ាំង អ៊ែ ប៉ាំងហៀន ប៉ានឹរ ប‌៉្រ័ះ។ ២ យីស៊ូ ប៉ប័ ទូក ពៀរ អ្វៃ ហះ ហាង កាប៉ាច់ មួត បក់ ណាំង កា ណោះ អន់ឌែ ជឹរ រ៉ាវ អួន ពឹង ទៀក។ ៣ យីស៊ូ ជឹរ អ្វៃ ពឹង ទូក ស៊ីម៉ូន កេះណោះ អ៊ែ ប៉្រើ ស៊ីម៉ូន តោល ទូក អន់ ចាំងហាយ្គ ឡឹង ហាង ប៊ែត អ៊ែ ប៉ាំងហៀន ពូ ឡឹង ទូក ណោះ ហង។ ៤ ប៉ាគ់ អ៊ែ ប៉ាំងហៀន ពូ កេះៗ អ៊ែ រ៉ះ កា ស៊ីម៉ូន ផា «ហគ់ ជែវ ទូក ឡាំ ប៉ាគ់ ចារ ជ្រុ កេះណោះ ប៉ាឡិ អួន ពឹង ទៀក ពិ»។ ៥ ស៊ីម៉ូន តើល យីស៊ូ ផា «ណៃឃូ ! ម៉ាំង ពែ ញឹន ខំ ទុង អួន ពឹង ទៀក ទឹល តារ កេះ ហះកា អូ ទី កាណាគ័ ញ៉ា អុះ ហះកា ញឹន ចឹង ប៉ាឡិ អួន ប៉្រគ័ ពួយ ប៉ានឹរ អីស ឡគ ហៃ»។ ៦ អន់ឌែ កា ប៉ាឡិ អួន ពឹង ទៀក ត្រគ់ កា អៀង ខាក់ ប៊ែត ចឹង តាលៀយ អួន។ ៧ អន់ឌែ កាវ‌៉័ះ តី អើ គួប អ្វៃ ប៉ាគ់ ទូក ម៉ោញ ណាវ្គ តង័ រ៉ុប កា មួត ណោះ កា ឡាំ តង័ តាទឹច អន់ឌែ រ៉ុប ចៃគ ពឹង ទូក ប៉ាញ័ ទិ ទូក ពៀរ ទូក ណោះ ប៊ែត ចឹង ក្រាំ។ ៨ ផះ ស៊ីម៉ូន ពេត្រុះ ប៉ប័ នីណោ័ះ អ៊ែ កាដាប ហះ ជុង យីស៊ូ កេះណោះ កាប ផា «អឺ ពឹ តាំងឡា ប៉រ់ អីស ចាក ឡាច់ អន់ ចាំងហាយ្គ ឡឹង អាញ់ ពិ ខង អាញ់ ឡាក់ ប៉ាណូស បឺគ អ៊ក»។ ៩ ស៊ីម៉ូន កាប នីណោ័ះ ខង អ៊ែ លូ គួប អ៊ែ អន់ឌែ ញម ខាក់ ញន កា រ៉ុប កា អៀង នែវ អា។ ១០ កាប៉ាច់ យ៉ាកុប លូ យូហាន គន វគ័ សេបេដេ ឡាក់ អ្វៃ ណាំង កា អន់ឌូ លូ ស៊ីម៉ូន អន់ឌែ កា ឃឹត និះទៅ ដេល។ ហះកា យីស៊ូ រ៉ះ កា ស៊ីម៉ូន ផា «អីស ជែ អ្យូគ ! គឹត អៀ គែង ម៉ាត់ អីស ចឹង ណាំង អើ ប៉ាណូស ឡគ»។ ១១ ប៉ាគ់ ទូក ចាក ទឹល ប៉ាគ់ ហាង កេះ អន់ឌែ កា អ្លាត ឃឿង ខង ទិណោ័ះ កេះណោះ ប៉ាណាំ គួប ចាក ពួយ យីស៊ូ ឡគ។

១២ ផះ យីស៊ូ អ្វៃ ពឹង មឿង ម៉ោញ ណាវ្គ កា ទី ប៉ាណូស ម៉ោញ ដូវ ត្រគ់ រ៉ោះ ប៉ាញ័ ឡាកោ។ អ៊ែ ប៉ប័ យីស៊ូ កេះណោះ អ៊ែ ម៉ុត កាដាប សាំប‌៉័ះ មូប កល់ ទឹះ តេះ លូ កាប ឡោម ផា «អឺ ពឹ តាំងឡា អីស ទី អំរ៉ាញ តាគ់ អន់ដាគ់ អាញ់ ផា អីស ចៃ»។ ១៣ យីស៊ូ សាប៉ាគ់ អ៊ែ លូ កាប ផា «អាញ់ ចៃ ដេល ហគ់ ព្រេះ ដាគ់ ពិ»។ ផាឌី រ៉ោះ អ៊ែ ណោះ កា ព្រេះ ដាគ់ ឡូត។ ១៤ កេះណោះ យីស៊ូ រ៉ះ កា អ៊ែ ផា «អីស ជែ រ៉ះ សារ អា អន់ ពូ អ្លុ ដៃ។ ហះកា អីស ត្រគ់ ឡាំ តាំបាង ឡាកោ អន់ ក្រាគ់ រ៉ាម៉ះ ប‌៉្រ័ះ តោ ហៃ កេះណោះ អ្យក់ កាណាគ័ ពុះ សៃន ប‌៉្រ័ះ ប៊កកាតយ័ ឡាក់ កា ម៉ូសេ ទី រ៉ះ ភឿ អន់ ពូ អ្លុ អន់តគ់ ផា អីស ដាគ់ ប៉្រាល់ តាទឹច»។ ១៥ សារ យីស៊ូ ហ៊ែង លៅ ៗ ទី ប៉ាណូស អៀង ពឹះ សាំយ៉ាំង អ៊ែ ទឹប ពូ ប៉្រើ អ៊ែ តាគ់ អន់ដាគ់ អន់ឌែ អីគ ព្លុ អន់ទៀគៗ ដេល។ ១៦ ហះកា យីស៊ូ ឃើយ ឡាំ ប៉ាគ់ ចារ ឡាង៉ាន់ ភឿ ម៉ន់។

១៧ ទី ដារ់ ម៉ោញ ផះ យីស៊ូ អ្វៃ ប៉ាំងហៀន កាំឡាំង ទី មួត ផារ៉ាស៊ី លូ មួត ណៃឃូ ប៉ាំងហៀន ចាបាប់ ឡាំ អ្វៃ សាំយ៉ាំង អ៊ែ ដេល។ អន់ឌែ ណោះ ពឹះ ឡឹង គ្រឹប ស្រុក អន់ទៀគៗ ខេត កាលីឡេ ខេត យូដា លូ ឡឹង មឿង យេរូសាឡឹម។ អំរ៉ាញ អឺញ ម៉ះ ប‌៉្រ័ះ ប៊កកាតយ័ អ្វៃ កាណុង យីស៊ូ ភឿ តាគ់ អន់ដាគ់ ពូ អីគ ព្លុ ដេល។ ១៨ ផាឌី ប៉ប័ ពូ តូង័ ប៉ាណូស តោ័ ជុង តី ម៉ោញ ដូវ ពឹង ត្រិ អន់ឌែ ឃឹត ម៉ុត ជឹន ប៉ាណូស ណោះ ប៉ាគ់ យីស៊ូ។ ១៩ ហះកា អន់ឌែ អូ ទី ទ្រង ម៉ុត ប៉ាគ់ ចារ យីស៊ូ អុះ ខង ប៉ាណូស អៀង តាឡាម័។ ទឹល នីណោ័ះ អន់ឌែ កា ហាវ យ៉ះ អន់តល័ ហី *៥:១៩ ហី ពូ ណោះ អន់តល័ សាម៉ើ ទឹប ពូ ប៉្រគ័ ជុង កឺង គែង ឡីង សាំរ៉ាប់ ហាវ ពឹង អន់តល័។ អ្យក់ ឡាច់ អិត។ កេះណោះ ប៉ាហ្រូ ជឹរ ប៉ាណូស តោ័ ជុង តី ណោះ ទ្រង តាវ៉ាង័ អន់ឌែ យ៉ះ ណោះ ហង ត្រង់ ពឹង អន់តិគ័ កាំឡាំង ហះ ង៉ីរ យីស៊ូ។ ២០ ផះ យីស៊ូ ប៉ប័ អន់ឌែ សឿ អ៊ែ តាទឹច ណោះ អ៊ែ កាប ផា «អឺ ចាង័ សារ យច អីស អាញ់ អូ អ្យក់ យ៉ូ អុះ អ្លាត ដោះ កេះ»។ ២១ ផះ មួត ណៃឃូ ប៉ាំងហៀន ចាបាប់ លូ មួត ផារ៉ាស៊ី កាតាំង នីណោ័ះ អន់ឌែ ឃឹត ផា «ពឿ អា បះ ខឹន កាប ផាម៉ាត ប‌៉្រ័ះ នែវ អា ? វិត ឡឹង ប‌៉្រ័ះ ប៊កកាតយ័ អូ ទី ពឿ អ្លុ អ្លាត ដោះ សារ យច ប៉ាណូស អុះ»។ ២២ ហះកា យីស៊ូ អ្លុ ឡឹង សារ អន់ឌែ ឃឹត កាណុង ពុត ណោះ បះ អ៊ែ កាប លូ មួត ណោះ ផា «ញ៉ា ត្រគ់ អន់ដីស ឃឹត នីណោ័ះ ? ២៣ ផា អាញ់ រ៉ះ ផា "អាញ់ អូ អ្យក់ យ៉ូ សារ យច អីស កេះ" លើ កាប ផា "អ្យូវ ចាក ពិ" កាប នីចម័ ឡាម៉គ់ លឺន ? ២៤ ហះកា អាញ់ ប៉ិច អន់ អន់ដីស អ្លុ ហ្លង់ ផា ពឹង អង់កក់ តេះ អា ប៉ាណូស អាញ់ អ្លុ អ្លាត ដោះ សារ យច»។ កេះណោះ យីស៊ូ កាលែង ហៃ ប៉ាណូស តោ័ ជុង តី ទឹប កាប ផា «អ្យូវ អ្យក់ ត្រិ អីស ចាក សឹត ប៉ាគ់ ហី អីស ទៅ ពិ»។ ២៥ បក់ កាជក កា តាឡូះ អ្យូវ ហះ ម៉ាត់ កាំឡាំង ទិណោ័ះ ប៉្រោហ តាទឹច លូ អ្យក់ ត្រិ អ៊ែ តៃប ចាក សឹត ប៉ាគ់ ហី ទឹប ប៉ានេ ប‌៉្រ័ះ ប៊កកាតយ័ អន់ដើរ។ ២៦ ទិ កាំឡាំង បក់ អ្វៃ ហះ ណោះ ពូ ញម កេង ខាក់ លូ ប៉ានេ ប‌៉្រ័ះ ប៊កកាតយ័។ អន់ឌែ អ្យូគ កាខាក់ ទឹប កាប ផា «ដារ់ អា ពិន ប៉ប័ សារ តាង ខាក់ តាទឹច»។

២៧ កេះណោះ យីស៊ូ ចាក ឡាច់ ឡឹង ចារ ណោះ ផាឌី ប៉ប័ បក់ អ្យក់ រ៉ាបៃ ម៉ោញ ដូវ សិច អ៊ែ លេវី អង់អ្វៃ ហះ ចារ ពូ ស៊ង រ៉ាបៃ។ យីស៊ូ កាប លូ អ៊ែ ផា «ចុ ឡាំ ពួយ អាញ់»។ ២៨ លេវី កា អ្លាត កាណាគ័ ញ៉ាៗ ទិណោ័ះ អ្យូវ ចាក ពួយ យីស៊ូ ឡូត។ ២៩ លេវី ប៉្រគ័ សាណា អៃត សា សាំរ៉ាប់ កា យីស៊ូ ប៉ាគ់ ហី អ៊ែ តុត រ៉គ់ សើម។ ទី មួត អ្យក់ រ៉ាបៃ អៀង ដូវ លូ កាំឡាំង អន់ទៀគៗ ឡាំ អៃត សា អន់ឌូ លូ អន់ឌែ ដេល។ ៣០ មួត ណៃឃូ ប៉ាំងហៀន ចាបាប់ លូ មួត ផារ៉ាស៊ី អន់ឌែ កាប កា មួត សឹះ យីស៊ូ ផា «ញ៉ា ត្រគ់ អន់ដីស អៃត សា អន់ឌូ លូ មួត អ្យក់ រ៉ាបៃ លូ ប៉ាណូស អូ ដាគ់ នែវ អា ?» ៣១ យីស៊ូ តើល អន់ឌែ ផា «ប៉ាណូស បក់ ដាគ់ ឡាកោ ប៉ាំងឡៃ អូ តងកាន ម៉ូអ្យា អុះ ទី ដឹង មួត អីគ ព្លុ តងកាន ម៉ូអ្យា។ ៣២ អាញ់ អូ ជឹរ ជៀក ប៉ាណូស ដាគ់ ត្រង់ អុះ ឃឺ អាញ់ ជឹរ ជៀក ប៉ាណូស អូ ដាគ់ ភឿ អន់ អន់ឌែ ប៉ិនពែង ពុត ពៀក»។

៣៣ មួត ផារ៉ាស៊ី អំប៉ញ់ លូ យីស៊ូ ផា «ញ៉ា មួត សឹះ វគ័ យូហាន កំ អូ សា សាណា លើយៗ ទឹប ម៉ន់ អើ ប‌៉្រ័ះ មួត សឹះ ផារ៉ាស៊ី កា ប៉្រគ័ និះទៅ ដេល ហះកា សឹះ អីស អៃត សា នីអៀ ?» ៣៤ យីស៊ូ តើល អន់ឌែ ផា «ផះ ប៉ាញ់សង់ ក្លោ កាម៉ាញ់ អ្វៃ អន់ឌូ លូ គួប នីចម័ អ្លុ ដេល ប អន់ គួប ចាង័ អ៊ែ កំ អូ សា សាណា ? ៣៥ ហះកា ចឹង ទី ដារ់ ម៉ោញ ពូ ចឹង រ៉ុប អ្យក់ ឡាច់ ក្លោ ណោះ ដារ់ ណោះ អន់ឌែ ចឹង កំ»†៥:៣៤-៣៥ យីស៊ូ កាប នីអៀ ឃឺ កាប ប៉ាន់ដឹប ឡឹង ឡាកោ អ៊ែ ទៅ ផះ អ៊ែ អ្វៃ រ៉ីស ប៉្រគ័ អន់ ពូ ហោក រ៉គ់ ហះកា ប៉ាគ់ ពូ រ៉ុប ប៉ាន់តោ័ អ៊ែ ទៀ ណោះ ពូ ចឹង សាម៉ុក សាម៉ាញ ទឹប កំ អូ សា សាណា។ ។ ៣៦ យីស៊ូ កាប ប៉ាន់ដឹប ផា «អូ ទី ពឿ ហ៊ែក អាវ ណាវ អ្យក់ ជឹង ក្លោប អាវ រ៉ោះ អុះ។ ផា ប៉្រគ័ នីណោ័ះ អាវ ណាវ កា តាហ៊ែក កាណាត់ ឡាក់ ជឹង ក្លោប ឡឹង អាវ ណាវ កា អូ ត្រគ់ លូ អាវ រ៉ោះ ដេល។ ៣៧ កា អូ ទី បក់ ពឿ អ្យក់ តាពែ ប៉្លៃ អង់កាច បើ ងំ ចៃគ ពឹង ស្រោ អង់ការ សាន់ដាប់ អុះ។ ផា ប៉្រគ័ នីណោ័ះ តាពែ ប៉្លៃ អង់កាច ណោះ ចឹង ប៉្រគ័ អន់ កា ស្រោ អង់ការ សាន់ដាប់ ណោះ តារ៉ាយ្គ ណោះ អ៊ែ ចឹង តាហ្រីស តាពែ កា ចឹង សីគ ទិ ឡូត ស្រោ អង់ការ ណោះ កា អូ អ្លុ អ្យក់ ហង។ ៣៨ ត្រគ់ ចៃគ តាពែ ណាវ ពឹង ស្រោ អង់ការ ណាវ។ ‡៥:៣៨ អ៊ែ កាប ប៉ាន់ដឹប ប៉ិច ទី ណី ផា អ៊ែ អន់ សារ ដាគ់ ឡាក់ ណាវ កាខាក់ អូ ត្រគ់ ក្រាន័ កា ប៉ាយ៉ាម័ សារ សាន់ដាប់ អុះ។ ៣៩ ផា ពូ ឃើយ អៃត តាពែ ទុញ កេះ អូ ទី ពឿ ចឹង ប៉ិច អៃត តាពែ ណាវ អុះ ខង ពូ ផា "តាពែ ទុញ ប៉ាអាំ"»។