១ ផះ ណោះ ទី មួត អ្យក់ រ៉ាបៃ លូ ប៉ាណូស អូ ដាគ់ អន់ឌែ ទិឌូ ម៉ុត ក្យាម័ យីស៊ូ ភឿ សាំយ៉ាំង ប៉ានឹរ អ៊ែ។ ២ ហះកា មួត ផារ៉ាស៊ី លូ មួត ណៃឃូ ប៉ាំងហៀន ចាបាប់ អន់ឌែ កាប រ៉ាបឹក រ៉ាចប់ ផា «ហៃ ប៉ាណូស អា អ៊ែ រ៉ាំពង លូ ប៉ាណូស អូ ដាគ់ ទឹប សា សាណា អន់ឌូ លូ ពូ ដេល»។ ៣ ហះកា យីស៊ូ តើល អន់ឌែ កាប ប៉ាន់ដឹប ឡាក់ កា សារ អា ផា ៤ «ផា កាណុង កាំឡាំង អន់ដីស អា ទី ប៉ាណូស ម៉ោញ ដូវ អ៊ែ ទី ចៀម ១០០ កល់ ហះកា ចៀម អ៊ែ ម៉ោញ ហ៊្យង ហ្យើត ឡឹង គួប អ៊ែ ញ៉ា អ៊ែ អូ អ្លាត ចៀម ៩៩ កល់ ណោះ ពឹង ស៊្រែ កេះណោះ ឡាំ ណាំង ចៀម ម៉ោញ ណោះ ទឹល ប៉ប័ ប ? ៥ ប៉ាគ់ ណាំង ប៉ប័ កេះ អ៊ែ ហោក ខាក់ ទឹប លឺក ចៀម ណោះ គយ ពឹង កាពែង អ៊ែ ឡូត។ ៦ ប៉ាគ់ អ៊ែ សឹត ទឹល ប៉ាគ់ ហី កេះ អ៊ែ ចឹង អើ គួប ចាង័ លូ មួត បក់ អ្វៃ រក្យាម័ អ៊ែ កេះណោះ កាប ផា "ចុ ហោក រ៉គ់ លូ អាញ់ ខង ចៀម អាញ់ បក់ ហ៊្យង ពែ អាញ់ ណាំង ប៉ប័ កេះ"។ ៧ អាញ់ ប៉រ់ រ៉ះ កា អន់ដីស ផា ពឹង ប៉្លៃង កា ចឹង ទី សារ ហោក រ៉គ់ និះទៅ ដេល ញន កា ប៉ាណូស អូ ដាគ់ ម៉ោញ ដូវ ទី ប៉ិនពែង ពុត ពៀក។ ប‌៉្រ័ះ ហោក កាខាក់ ក្វា ឡឹង អ៊ែ ហោក កា ប៉ាណូស ដាគ់ ត្រង់ ៩៩ ដូវ ឡាក់ អូ តងកាន ប៉ិនពែង ពុត ពៀក ណោះ ណាវ្គ។

៨ «ម៉ោញ ណាវ្គ ប៉ាន់ដឹប ផា ទី អង់កាន់ ម៉ោញ ដូវ អ៊ែ ទី លៀន កាក់ អញ់ជឹត កាក់ កេះណោះ ឡិ ហ៊្យង ម៉ោញ កាក់ *១៥:៨ កាក់ ពៀគ គុល «ដ្រាក់ម៉ា»។ ម៉ោញ ដ្រាក់ម៉ា ឃឺ ខា តាច់ ចៀម ម៉ោញ កាតុ ប៉ាតាម័ ដ្រាក់ម៉ា ឃឺ ខា តាច់ រ៉ក់ ម៉ោញ កាតុ។  ញ៉ា អ៊ែ អូ សុះ តាគៀង សាប៉ូះ ហី រស៊្វែន រជួច ណាំង កាខាក់ ទឹល ប៉ប័ ប ? ៩ ប៉ាគ់ អ៊ែ ប៉ប័ កេះ អ៊ែ ចឹង អើ គួប ចាង័ លូ មួត បក់ អ្វៃ រក្យាម័ អ៊ែ កេះណោះ កាប ផា "ចុ ហោក រ៉គ់ លូ អាញ់ ខង លៀន អាញ់ ហ៊្យង ពែ អាញ់ ណាំង ប៉ប័ កេះ"។ ១០ អាញ់ ប៉រ់ រ៉ះ កា អន់ដីស ផា មួត ប៊យ ប‌៉្រ័ះ អ្វៃ ពឹង ប៉្លៃង កា ហោក រ៉គ់ និះទៅ ដេល ញន កា ប៉ាណូស អូ ដាគ់ ម៉ោញ ដូវ អ៊ែ ទី ប៉ិនពែង ពុត ពៀក»។

១១ កេះណោះ អ៊ែ រ៉ះ ណាវ្គ ផា «ទី កាម៉ាក័ ម៉ោញ ដូវ អ៊ែ ទី គន កាម៉ាក័ ពៀរ ដូវ។ ១២ គន ស្រុច អ៊ែ កាប ផា "អឺ ពឹ ប៉រ់ អីស មប ប៉ាដក់ ប៉ាជៀ ឡាក់ អីស ចឹង ត្រគ់ ជែក អន់ កា អាញ់ ណោះ"។ ពឹ អ៊ែ កា ជែក ប៉ាដក់ ប៉ាជៀ ណោះ អន់ តាទឹច។ ១៣ ប៉ៃង ប៉្វាន់ ដារ់ ឡឹង ណោះ គន ស្រុច ណោះ អ៊ែ ប៉ាតុំ អ្យក់ រ៉ាស អំប៉ាស ប៉ាដក់ ប៉ាជៀ ចាក ឡាំ ប៉ាគ់ ស្រុក ចាំងហាយ្គ។ អ៊ែ អ្វៃ ពឹង ស្រុក ណោះ អ៊ែ ប៉្រគ័ រ៉ាយ រ៉ាស អំប៉ាស ប៉ាដក់ ប៉ាជៀ ណោះ ទិ ប៉្យើះ ញន កា អៃត សា អៀង តាឡាម័។ ១៤ ប៉ាគ់ រ៉ាស អំប៉ាស ប៉ាដក់ ប៉ាជៀ អ៊ែ តាច់ តូរ័ ទិ កេះ ពឹង ស្រុក ណោះ កើត ឡាយ៉ិត ឡាំងវ៉ាញ់ កាខាក់ ឡូត គន ស្រុច ណោះ អ៊ែ កា អូ ទី ញ៉ា និះទៅ ដេល។ ១៥ អ៊ែ កា ណាំង ប៉្រគ័ គូលី ពូ ពឹង ស្រុក ណោះ ហង ពូ កា ប៉្រើ អ៊ែ អ្វៃ រង សាគែ ប៉ាគ់ ម៉ីរ ប៉ាគ់ ស៊្រែ។ ១៦ អ៊ែ ប៉ិច សា ខាក់ សាណា ពូ អន់ កា សាគែ សា ណោះ ហះកា អូ ទី ពឿ អន់ សាណា ញ៉ា កា អ៊ែ អុះ។ †១៥:១៦ ខ អា ពិន ព្រែ នីអៀ កា ត្រគ់ ដេល៖ អ៊ែ កា សា សាណា ពូ អន់ កា សាគែ សា ណោះ ហះកា សា អូ ផីគ អូ ទី ពឿ អន់ សាណា ញ៉ា ណាវ្គ អុះ។ ១៧ ប៉ាគ់ គន ស្រុច ណោះ សាទឹរ ឡាកោ កេះ អ៊ែ ឃឹត ផា "មួត បក់ ប៉្រគ័ គូលី ពឹ អាញ់ អន់ឌែ ទី សាណា សា ផីគ ទិឌូ ហះកា កាប៉ាច់ អាញ់ អ្វៃ ហះ អា ឡាយ៉ិត កាតាច់ វ៉ាច់ ប៊ែត ចឹង តោ័។ ១៨ ទឹល នីណោ័ះ អាញ់ ត្រគ់ សឹត ប៉ាគ់ ពឹ អាញ់ ណាវ្គ កេះណោះ រ៉ះ កា អ៊ែ ផា 'អឺ ពឹ អាញ់ ប៉្រគ័ យច ពុត ប‌៉្រ័ះ ប៊កកាតយ័ កេះ លូ អាញ់ ប៉្រគ័ យច ពុត អីស ដេល។ ១៩ អាញ់ អា អូ ឃឺ ចឹង អន់ អីស ផា គន អីស ណាវ្គ អុះ ប៉រ់ អន់ អាញ់ ប៉្រគ័ គូលី អីស ឡគ ពិ' "។ ២០ ប៉ាគ់ អ៊ែ ឃឹត នីណោ័ះ កេះៗ អ៊ែ កា សឹត ប៉ាគ់ ពឹ អ៊ែ ណាវ្គ។ ផះ ពឹ អ៊ែ ប៉ប័ គន អ៊ែ ឡឹង ចាំងហាយ្គ ពឹ អ៊ែ កា ទី ពុត តាប៉ាប តាប៉ុន លូ តាយ៉ិប ឡាំ ហាប់ គ្វែត ចុំ ឡូត។ ២១ ណោះ អ៊ែ កាប ផា "អឺ ពឹ អាញ់ ប៉្រគ័ យច ពុត ប‌៉្រ័ះ ប៊កកាតយ័ កេះ លូ អាញ់ ប៉្រគ័ យច ពុត អីស ដេល អាញ់ អា អូ ឃឺ ចឹង អន់ អីស អើ ផា គន អីស ណាវ្គ អុះ"។ ២២ ហះកា ពឹ អ៊ែ រ៉ះ កា មួត ទុច ផា "ហគ់ អន់ដីស អ្យក់ អាវ ដាគ់ ឡាយ៉ាម័ លឺន ឡឹង ពូ តាគ់ អំពៀត គន អាញ់ ប៉្រាល់ លូ អ្យក់ អញ់ចិន ចៃគ ពឹង តី អ៊ែ លូ អ្យក់ កឺប តាគ់ អញ់ជិះ អ៊ែ ដេល។ ២៣ ហគ់ អ្យក់ គន រ៉ក់ បក់ ដាគ់ តីស តង់ កោះ ប៉្រគ័ សាអ៊្លង ពិ កេះណោះ ពិន សា អៃត អន់ រ៉គ់ សើម ២៤ ខង គន អាញ់ អា អ៊ែ តោ័ កេះ ហះកា កិញអៀ អា អ៊ែ រ៉ីស សឹត ណាវ្គ អ៊ែ ហ៊្យង ហ្យើត កេះ ហះកា កិញអៀ អា អាញ់ ណាំង ប៉ប័ ណាវ្គ"។ អន់ឌែ កា អៃត សា តិម រ៉គ់ សើម កាខាក់។

២៥ «កាប៉ាច់ គន ឡោងទ្រៀ ឡាក់ អ្វៃ ប៉ាគ់ ម៉ីរ ប៉ាគ់ អ៊ែ សឹត ក្យាម័ ចឹង ទឹល ហី កេះ អ៊ែ កាតាំង ពូ ចំ គួង អន់ទួង សាគឹរ លូ ពូ ចាជែ អញ់ស៊ែ យ៉ិល កាតាប័ រ៉ល់។ ២៦ អ៊ែ កា អើ មួត ទុច ម៉ោញ ដូវ កេះណោះ អំប៉ញ់ ផា "ទី សារ ញ៉ា ប៉ាគ់ ហី ណោះ ?" ២៧ ទុច ណោះ រ៉ះ កា អ៊ែ ផា "អុះ អីស សឹត ប៉ាគ់ អា កេះ ពឹ អីស ប៉្រើ ពូ កោះ គន រ៉ក់ បក់ ដាគ់ តីស តង់ សា អៃត អន់ រ៉គ់ សើម ខង គន អ៊ែ សឹត ប៉ាគ់ អា ដាគ់ ឡាកោ ប៉ាំងឡៃ"។ ២៨ គន ឡោងទ្រៀ អឺក ខាក់ អូ ចៃ ម៉ុត កាណុង ហី អុះ ពឹ អ៊ែ កា ឡាំ ឡោម ជៀក ម៉ុត កាណុង ហី។ ២៩ ហះកា អ៊ែ តើល ពឹ អ៊ែ ផា "ហៃ អាញ់ អ្វៃ ប៉្រគ័ ង៉ារ កា អីស ទុញ សាណាំ កេះ អាញ់ អូ ទី ឌឺ ឡឹង ប៉ានឹរ អីស ប៉្រើ ណោះ អុះ ហះកា គន ប៉ារ់ពេ ម៉ោញ កា អីស អូ អន់ កា អាញ់ កោះ សា អៃត អន់ឌូ លូ គួប ចាង័ អន់ រ៉គ់ សើម ណោះ អុះ។ ៣០ ហះកា គន អីស ឡាក់ ថាំឡាយ រ៉ាស អំប៉ាស អីស ទិ ប៉្រគ័ លូ អង់កាន់ ម៉ាលេង ណោះ សាគ់ អ៊ែ សឹត អីស កា អ្យក់ គន រ៉ក់ បក់ ដាគ់ តីស តង់ កោះ អន់ កា អ៊ែ ឡូត"។ ៣១ ពឹ អ៊ែ តើល ផា "អឺ គន អីស អ្វៃ លូ អាញ់ លើយ កាណាគ័ ញ៉ា ឡាក់ រ៉ាស អំប៉ាស អាញ់ ណោះ កា រ៉ាស អំប៉ាស ម៉ះ អីស ដេល ហង។ ៣២ ហះកា ពិន ត្រគ់ ហោក រ៉គ់ ខង អុះ អីស អា អ៊ែ តោ័ កេះ កិញអៀ អា អ៊ែ រ៉ីស សឹត ណាវ្គ លូ អ៊ែ ហ៊្យង ហ្យើត កេះ កិញអៀ ពិន ណាំង ប៉ប័ ណាវ្គ កេះ"»។