១ អា ឡាក់ ប៉ានឹរ នេហេមៀ គន វគ័ ហាកាលៀ។

ពឹង ខៃ ៩ សាណាំ ២០ រ៉ាំងវ៉ាង សាដាច់ អាថាស៊ើកសេះ រ៉ាំងហៃ ឃឺ ផះ អាញ់ អ្វៃ ពឹង ហី សាដាច់ ប៉ាគ់ មឿង ស៊ូសាន ២ អុះ អាញ់ សិច ហាណានី លូ បក់ អន់ដា ណាវ្គ ពឹះ ឡឹង ខេត យូដា ឡាំ ប៉ាគ់ ណោះ ដេល។ អាញ់ អំប៉ញ់ អន់ឌែ ឡឹង សារ សុនសាត អ៊ីស្រាអ៊ែល ឡាក់ រ៉ាវ៉ាច់ ឡឹង ប៉្រគ័ ទុច ណោះ ពែ ឡាក់ សឹត ប៉ាគ់ ប៉ាថេត ទៅ ណាវ្គ លូ អំប៉ញ់ ឡឹង សារ មឿង យេរូសាឡឹម ដេល។ ៣ អន់ឌែ រ៉ះ កា អាញ់ ផា «មួត បក់ ពូ អ្យក់ ប៉្រគ័ ទុច ឡាក់ សឹត ប៉ាគ់ ខេត យូដា កេះ អន់ឌែ ទី សារ ប៉ាណាប ប៉ាបប៉ុន លូ តាយួស ខាក់។ កាប៉ាច់ មឿង យេរូសាឡឹម ទ្រួក កា សាដះ ព្លូក អំប៉ារ មឿង កា ពូ សុះ ទិ ដេល»។

៤ ប៉ាគ់ អាញ់ កាតាំង សារ ទិណោ័ះ អាញ់ អង់អ្វៃ ញ៉ាំ សោក ទុញ ដារ់ អាញ់ កា កំ អូ សា សាណា លូ ម៉ន់ អើ ប‌៉្រ័ះ ពឹង ប៉្លៃង ផា ៥ «អឺ ប‌៉្រ័ះ ប៊កកាតយ័ ឡាក់ អ្វៃ ពឹង ប៉្លៃង អីស ប‌៉្រ័ះ តីស កាខាក់ ឡាក់ ត្រគ់ អ្យូគ អ្យិល កូត័ អីស អូ ពឹល អុះ សារ សាញ៉ា រែវ ពុត  អីស កា តាប៉ាប តាប៉ុន លើយ កា បក់ ចំ ឡាក់ ប៉ិច ចៃ កា អីស លូ ប៉្រគ័ ពួយ ប៉ានឹរ អីស ប៉្រើ។ ៦ ប៉រ់ អីស សាំយ៉ាំង លូ ហៃ គែង អាញ់ ឡាក់ ទុច អីស ផះ អាញ់ ម៉ន់ ឡោម អីស ទឹប កាម៉ាំង ទឹប កាដារ់ រ៉ះ ឡឹង សារ មួត ប៉ាសុន អ៊ីស្រាអ៊ែល អាញ់ ឡាប់ ញម សារ យច ប៉ាសុន អ៊ីស្រាអ៊ែល ខង ញឹន ទិឌូ ប៉្រគ័ យច លូ អីស ឡាកោ អាញ់ ទៅ លូ ផូង័ វ៉ាច់ វគ័ យ៉ាគ់ អាញ់ កា ប៉្រគ័ យច ដេល។ ៧ ញឹន ប៉្រគ័ អូ ដាគ់ កាខាក់ ប៉ាសាំង លូ អីស ឃឺ ញឹន អូ ប៉្រគ័ ពួយ ចាបាប់ លូ សារ អន់តគ់ ប៉ាតោ ប៉្រោ ទឹប ទិណោ័ះ ឡាក់ អីស រ៉ះ កា វគ័ ម៉ូសេ ឡាក់ ទុច អីស ពែ។ ៨ ប៉រ់ អីស កាចាំង ឡឹង ប៉ានឹរ ឡាក់ អីស រ៉ះ កា វគ័ ម៉ូសេ "ផា អន់ដីស អូ ត្រង់ កា អាញ់ ណោះ អាញ់ ចឹង ប៉ាក្លះ ប៉ាក្លាយ អន់ដីស អន់ អ្វៃ ពឹង អន់តិគ័ សុនសាត អន់ទៀគ ៩ ហះកា ផា អន់ដីស វ៉ីល ប៉ាគ់ អាញ់ លូ ប៉្រគ័ ពួយ ប៉ានឹរ អាញ់ ប៉្រើ យ‌៉័ះ ពូ អ្យក់ អន់ដីស ឡាំ អ្វៃ ប៉ាគ់ ឡាណុច ប៉្លៃង កាតាម កា អាញ់ ចឹង ប៉ាតុំ លូ ប៉ាណាំ អន់ដីស សឹត ប៉ាគ់ ចារ ទៅ ឡាក់ អាញ់ រ៉ើស សាំរ៉ាប់ ចារ អាញ់ អ្វៃ ដេល"*១:៩ ប៉រ់ ហៃ សារ អន់ ចាបាប់ លឺក ទី ពៀរ (ចោទិយ​កថា) ៣០:១-៤។។ ១០ មួត បក់ សឹត ប៉ាគ់ ខេត យូដា អន់ឌែ ឡាក់ ទុច អីស ឃឺ ប៉ាសុន ឡាក់ អីស ហ្វាយ លូ អំរ៉ាញ អឺញ កេង ខាក់។ ១១ អឺ ប‌៉្រ័ះ ប៊កកាតយ័ ប៉រ់ អីស សាំយ៉ាំង ប៉ានឹរ អាញ់ ម៉ន់ ឡោម លូ ប៉ានឹរ ទុច អីស អន់ទៀគៗ ណាវ្គ ឡាក់ ប៉ិច ប៉្រគ័ ពួយ អ្យិល កូត័ អ្យូគ កា អីស។ អន់ សារ អាញ់ ចឹង ប៉្រគ័ ដារ់ អា កើត ទី លូ អន់ សាដាច់ តាប៉ាប តាប៉ុន កា អាញ់ ណើ»។

ផះ រ៉ាំងវ៉ាង ណោះ អាញ់ ប៉្រគ័ ង៉ារ អន់ទឺប ចក តាពែ កា សាដាច់។