១ ប៉ាណូស ទិឌូ ត្រគ់ រ៉ាប់ សឿ មួត អុងកាន ខង សារ រ៉ាំងហៃ ទិណោ័ះ ស៊ុត កា ឡាច់ ឡឹង ប‌៉្រ័ះ ប៊កកាតយ័ ឃឺ ប‌៉្រ័ះ អន់ អន់ឌែ រ៉ាំងហៃ។ ២ ទឹល នីណោ័ះ បក់ ប៉ាសាំង លូ មួត អុងកាន ឡាក់ កា ប៉ាសាំង លូ សារ រ៉ាំងហៃ ឡាក់ ប‌៉្រ័ះ ប៊កកាតយ័ អន់ ណោះ ដេល ប៉ាណូស បក់ ប៉ាសាំង ចឹង ប៉្រគ័ អន់ ឡាកោ ទី ថូត ហង។ ៣ បក់ ប៉្រគ័ ដាគ់ អូ អ្យូគ កា មួត អុងកាន អុះ ទី ដឹង មួត បក់ ប៉្រគ័ យច អ្យូគ។ ផា អូ ប៉ិច អ្យូគ កា មួត អុងកាន ហគ់ ប៉្រគ័ ដាគ់ ពិ ណោះ មួត អុងកាន ចឹង ប៉ានេ អន់ដីស ហង ៤ ខង អន់ឌែ ណោះ ប៉ាណូស ប៉្រគ័ ង៉ារ កា ប‌៉្រ័ះ ប៊កកាតយ័ សាំរ៉ាប់ សារ ដាគ់ កា អន់ដីស ហះកា ផា អន់ដីស ប៉្រគ័ យច ហគ់ អ្យូគ ពិ ខង អន់ឌែ ចឹក ដាវ អូ ត្រគ់ អូ ទី ខា អុះ ឃឺ អន់ឌែ ប៉្រគ័ ង៉ារ កា ប‌៉្រ័ះ ប៊កកាតយ័ ភឿ ចៃគ ថូត ប៉ាតាង ប‌៉្រ័ះ កា មួត បក់ ប៉្រគ័ យច។ ៥ ទឹល នីណោ័ះ ត្រគ់ រ៉ាប់ សឿ មួត អុងកាន អូ ត្រគ់ រ៉ាប់ សឿ ញន ដឹង កា អ្យូគ កា ពូ ចៃគ ថូត ណោះ អុះ ឃឺ ញន កា ពុត ប៉ិច ប៉្រគ័ ដាគ់។ ៦ ខ អា ហង បះ អន់ដីស ត្រគ់ ស៊ង រ៉ាបៃ ខង អន់ឌែ ណោះ ឡាក់ ប៉ាណូស ប៉្រគ័ ង៉ារ កា ប‌៉្រ័ះ ប៊កកាតយ័ ឡាក់ អ្យក់ ពុត ចៃគ ប៉្រគ័ ង៉ារ អា ហង។ ៧ ទឹល នីណោ័ះ ត្រគ់ អន់ កា អន់ឌែ ណោះ កាណាគ័ ញ៉ា ឡាក់ អន់ដីស ត្រគ់ អន់ ស៊ង រ៉ាបៃ កា បក់ ចំ ឡាក់ អន់ដីស ត្រគ់ ស៊ង អ្យិល កូត័ អ្យូគ កា បក់ ចំ ឡាក់ ត្រគ់ អ្យិល កូត័។

៨ អូ អន់ ទួម ពឿ ឡឹង សារ ញ៉ា អុះ ឃឺ ត្រគ់ ទួម ដឹង សារ ប៉ិច ចៃ កា គួប សោប ណោះ ហង ខង ពឿ ប៉ិច ចៃ កា ពូ បក់ ណោះ ប៉្រគ័ ពួយ ចាបាប់ ប‌៉្រ័ះ ទិណោ័ះ ហង ៩ ខង ទី សារ ពូ ច្រាគ់ រ៉ះ ផា «អូ អន់ រ៉ាលង កល់ ក្លោ កាម៉ាញ់ អូ អន់ ប៉ាន់តោ័ ប៉ាណូស អូ អន់ អន់តុង ម៉ះ ពូ អូ អន់ ទី ពុត ខ្វាម»*១៣:៩ សារ អា ឡាច់ ឡឹង សារ ឡាច់ (និក្ខមនំ)២០:១៣-១៥,១៧។ ទឹប ទី ចាបាប់ អន់ទៀគៗ ណាវ្គ កា ប៉ាតុំ ដឹង ម៉ោញ នឹរ ផា «ត្រគ់ ប៉ិច ចៃ កា អុះ ម៉ី ឡីង គែង ឡាក់ កា ប៉ិច ចៃ កា ឡាកោ ទៅ ដេល»†១៣:៩ សារ អា ឡាច់ ឡឹង ចាបាប់ មួត លេវី (លេវីវិន័យ) ១៩:១៨។។ ១០ ប៉ាណូស បក់ ទី ពុត ប៉ិច ចៃ អ៊ែ អូ ឃើយ ប៉្រគ័ សារ អូ ដាគ់ កា អុះ ម៉ី ឡីង គែង អុះ ទឹល នីណោ័ះ បក់ ប៉ិច ចៃ ណោះ អ៊ែ ប៉្រគ័ ពួយ ចាបាប់ ប‌៉្រ័ះ ទិណោ័ះ កេះ។

១១ អន់ដីស ត្រគ់ អ្លុ អន់តគ់ ផា ទឹល មង ពិន អ្យូវ ឡឹង តៃប កេះ ខង កិញអៀ អា សារ ប‌៉្រ័ះ តង័ ពឹះ ក្យាម័ ពិន ខាក់ កេះ ក្វា ឡឹង ពិន អញ់ចាប័ សឿ ពែ។ ១២ ម៉ាំង ក្យាម័ ចឹង តារ កេះ ដារ់ កា ក្យាម័ ចឹង ឡាច់ កេះ ដេល ទឹល នីណោ័ះ ពិន ត្រគ់ អ្លាត ង៉ារ អូ ដាគ់ ឡាក់ ពូ ប៉្រគ័ ពឹង ចារ ម៉ាម៉ាំង កេះណោះ ប៉្រគ័ ង៉ារ ដាគ់ ពៀប ឡាក់ កា ទ្រុង ដាវ ទ្រុង ខៃល ឡាំ តាកូះ លូ សារ ម៉ាម៉ាំង ឡគ។ ១៣ ត្រគ់ អ្វៃ អន់ ដាគ់ ត្រង់ ឡាក់ កា ចាក ផះ កាដារ់ ឃឺ ជែ អៃត ប៉ាញឹល ជែ ប៉្រគ័ លូ អង់កាន់ លូ កាម៉ាក័ ជែ តាប៉ុញ តាប៉ាក់ ជែ សាណីង សាណើស កា គួប សោប ១៤ ឃឺ ត្រគ់ អន់ យីស៊ូ គ្រិះ ឡាក់ ពឹ តាំងឡា អ្វៃ តាំ ពុត ពៀក ពិន ជែ ទឹមវ៉ៃរ ឡាកោ អន់ ប៉្រគ័ ពួយ ពុត ប៉ាណូស ប៉ិច ប៉្រគ័ ណោះ ដៃ។