8
El mediador de un nuevo pacto
1 Hué dan ni̱ nuguanꞌ huin rian scanij ni nuguanꞌ aꞌmī rian án re̱ꞌ huin nuguanꞌ xiꞌí chrej aꞌninꞌ niquinꞌ rian Yanꞌanj xiꞌí néꞌ. Ni̱ nne sij ne̱ꞌ chrej raꞌa sa̱ꞌ Yanꞌanj nucuaj nne xataꞌ. 2 Ni̱ hué Jesús unánj guitsi rian Yanꞌanj chruhua nuhui nne xataꞌ. Ni̱ hué nuhui daj huin nuhui xa̱ngaꞌ, guiꞌyaj manꞌan Señor. Ni̱ sé ni tsínj ma̱n chruhua xungüi̱ nan guiꞌyaj mánj. 3 Ni̱ niquinꞌ daranꞌ chrej aꞌninꞌ nagaꞌuiꞌ ni sij ni rasu̱n nga̱ ni xucu gaca rian Yanꞌanj. Xiꞌí daj ni̱ hua nia̱n si gui̱nicaj Jesús si na̱gaꞌuiꞌ sij rian Yanꞌanj nej. 4 Ni̱ sisi̱ nne Jesús chruhua xungüi̱ nan, ni̱ si̱ gahuin sij chrej mánj. Daj si ma̱n ni chrej nagaꞌuiꞌ ni rasu̱n rian Yanꞌanj da̱j rúnꞌ aꞌninꞌ si-ley Moisés sun. 5 Sani̱ unánj guitsi ni chrej daj rian Yanꞌanj nga̱ rasu̱n ma̱n chruhua xungüi̱ nan. Ni̱ ni rasu̱n daj huin ꞌngo̱ daꞌngaꞌ si mán xataꞌ. Asi̱ da̱j rúnꞌ huin si-ga̱xunꞌ ni rasu̱n mán xataꞌ huin ni rasu̱n da nej. Daj si ngaa gaxi̱ꞌi Moisés guiꞌyaj sij ducuá Yanꞌanj, ni̱ gataj Yanꞌanj gunun sij: “Ga̱ cuidadó re̱ꞌ sisi̱ gui̱ꞌyáj re̱ꞌ daranꞌanj da̱j rúnꞌ digyānj rián re̱ꞌ ngaa gané re̱ꞌ chra̱ quij daj.” Daj gataj Yanꞌanj gunun Moisés. 6 Sani̱ yya̱j ni̱ niquinꞌ Jesús unánj guitsi sij rian Yanꞌanj. Ni̱ hua sa̱ꞌ doj si-sun sij daj nga̱ si-sun ni chrej guimán asi̱j ná. Ni̱ da̱j rúnꞌ hua sa̱ꞌ doj si-sun Jesús daj nga̱ si-sun ni chrej daj, ni̱ hué daj hua sa̱ꞌ nuguanꞌ na̱ca riqui Yanꞌanj rian néꞌ daj nga̱ si-ley Moisés. Ni̱ hua sa̱ꞌ doj nuguanꞌ gataj yya Yanꞌanj rian néꞌ yya̱j rian nuguanꞌ gaꞌmi sini Yanꞌanj anj.
7 Ni̱ sisi̱ ga sa̱ꞌ ni̱nꞌ nuguanꞌ guiꞌyaj yya sini Yanꞌanj nga̱ ni tsínj israelita, ni̱ nitaj si huaj sisi̱ gui̱ꞌyaj yya ru̱huaꞌ yún Yanꞌanj nga̱ néꞌ mánj. Sani̱ hua yya guiꞌyaj yya ru̱huaꞌ yún Yanꞌanj nga̱ néꞌ. 8 Hué dan ni̱ gaꞌmi Yanꞌanj gaquinꞌ rian ni ngüi̱ guimán asi̱j ná. Ni̱ gataj Yanꞌanj:
Hua ꞌngo̱ güi, ni̱ gui̱ꞌyaj yyāj ango nuguanꞌ na̱ca nga̱ ni du̱güiꞌ tsínj gu̱ꞌnaj Israel nga̱ ni du̱güiꞌ tsínj gu̱ꞌnaj Judá, ataj manꞌan Señor.
9 Ni̱ sé da̱j rúnꞌ guiꞌyaj yyāj nga̱ ni xi ni sij huin ni tsínj guimán asi̱j ná, ni̱ sé daj gui̱ꞌyaj yya ru̱huaꞌ yūnj nga̱ ni sij mánj.
Ni̱ asi̱j ná ngaa guimán ni sij yuꞌuj gu̱ꞌnaj Egipto, ni̱ guidaꞌā raꞌa ni sij, ni̱ guirīj ganꞌanj ni sij.
Sani̱ ri̱an nun dagahuin ni sij nuguanꞌ guiꞌyaj yyāj nga̱ ni sij, ni̱ gahuin anē rian ni sij, ataj manꞌan Señor.
10 Hué dan ni̱ nan huin nuguanꞌ na̱ca gui̱ꞌyaj yyāj nga̱ ni du̱güiꞌ Israel xiráj gaꞌi̱ yoꞌ, ataj manꞌan Señor.
Gui̱ꞌyā sisi̱ gu̱nun si-nu̱guanꞌānj chruhua niman ni sij.
Ni̱ ga̱rūnj nuguanꞌ daj chruhua niman ni sij nej.
Ni̱ ga̱huin Danꞌanj ni sij manꞌānj.
Ni̱ ga̱huin ni sij ni tsínj gui̱nicoꞌ manꞌānj.
11 Ni̱ güi daj ni̱ nitaj si hua nia̱n sisi̱ ga̱taj ni sij rian dugüiꞌ ni sij nga̱ jnánj ni sij:
“Gui̱niꞌí re̱ꞌ Señor.”
Sé daj ga̱taj ni sij mánj.
Daj si gui̱niꞌi daranꞌ ni sij manꞌānj.
Ni̱ asi̱j ni tsínj hua lij nga̱ ni tsínj achij, ni̱ gui̱niꞌi daranꞌ ni sij manꞌānj.
12 Ni̱ gui̱nicā ꞌngo̱ niman nico rian si quij guiꞌyaj ni sij.
Ni̱ nitaj a̱man na̱nun ruhuāj gui̱niꞌīnj si-ga̱quinꞌ ni sij mánj.
Daj gataj Yanꞌanj gunun ni ngüi̱ guimán asi̱j ná.
13 Ni̱ ngaa aꞌmi Yanꞌanj xiꞌí nuguanꞌ na̱ca gui̱ꞌyaj yya nga̱ néꞌ, ni̱ huin ruhuaj gata sisi̱ nuguanꞌ hua gachin huin nuguanꞌ guiꞌyaj yya sini Yanꞌanj nga̱ ni ngüi̱ guimán asi̱j ná. Do̱j hua ni̱ ꞌngo̱ ga̱nahuij nuguanꞌ daj.