1 Ngaa ni̱ naxu̱man daranꞌ ni sij. Ni̱ nicaj ni sij Jesús ganꞌanj ni sij rian Pilato. 2 Ngaa ni̱ gaxi̱ꞌi ni sij gaꞌmi gaquinꞌ ni sij xiꞌí Jesús. Ni̱ gataj ni sij:

―Hué tsínj nan huin ꞌngo̱ tsínj quij hua. Daj si ataj sij gunun ni ngüi̱ sisi̱ si̱ gaꞌuiꞌ néꞌ pesto rian rey César. Ni̱ ataj sij sisi̱ hué sij huin Cristo ꞌngo̱ rey, ataj sij. ―Daj gataj ni sij xiꞌí Jesús.

3 Ngaa ni̱ nachínj snanꞌanj Pilato Jesús. Ni̱ gataj sij:

―Hué re̱ꞌ huin rey rian ni tsínj israelita níꞌ. ―Daj gataj Pilato.

―Hué re̱ꞌ ataj nánj. ―Daj gataj Jesús.

4 Ngaa ni̱ gataj Pilato rian ni tsínj aꞌninꞌ rian ni chrej nga̱ rian ni ngüi̱ nej:

―Güendāj ni̱ a̱ ꞌngo̱ gaquinꞌ nitaj daꞌui tsínj nan mánj. ―Daj gataj Pilato.

5 Sani̱ ducu guiꞌyaj ni sij fuerza, ni̱ gataj ni sij:

―Ngaa digyán tsínj nan rian ni ngüi̱, ni̱ ga̱huin xaꞌue duꞌua daranꞌ ni ngüi̱. Ni̱ huaj sij digyán sij si-nu̱guanꞌ sij ni̱nꞌ ga̱chraꞌ estado Judea. Ni̱ gaxi̱ꞌi sij digyán sij estado Galilea. Ni̱ ꞌna̱ꞌ sij yuꞌuj nan digyán sij rian ni ngüi̱ nej. ―Daj gataj ni sij gunun Pilato.

6 Ni̱ ngaa gunun Pilato si gataj ni sij, ni̱ nachínj snanꞌanj síꞌ sisi̱ Jesús huin tsínj ꞌna̱ꞌ estado Galilea. 7 Ni̱ ngaa guiniꞌi Pilato sisi̱ ꞌna̱ꞌ Jesús estado Galilea, ni̱ gaꞌníj sij ga̱nꞌanj síꞌ rian rey gu̱ꞌnaj Herodes huin síꞌ gobernado nicaj sun ne̱ꞌ estado Galilea. Daj si nne síꞌ xumanꞌ Jerusalén ni güi daj.

8 Ni̱ ngaa guiniꞌi Herodes Jesús, ni̱ gahuin nia̱ꞌ ruhua sij si guisíj gaꞌi̱ güi huin ruhua sij gui̱niꞌi sij Jesús. Daj si gunun sij gaꞌmi ni ngüi̱ da̱j guiꞌyaj Jesús. Ni̱ gahuin ruhua sij sisi̱ gui̱ꞌyaj Jesús ꞌngo̱ si sa̱ꞌ nico gui̱niꞌi sij. 9 Ni̱ ducu nachínj snanꞌanj sij Jesús. Sani̱ ni̱ a̱ ꞌngo̱ nuguanꞌ nun danica̱j Jesús rian sij mánj. 10 Ni̱ ma̱n ni tsínj aꞌninꞌ rian ni chrej nga̱ ni tsínj digyán ley nej. Ni̱ ducu garun gaquinꞌ ni síꞌ Jesús. 11 Ngaa ni̱ gaꞌmi quij Herodes rian Jesús. Ni̱ hué daj gaꞌmi ni snado niquinꞌ nga̱ sij nej. Ni̱ gaꞌníj ni sij atsij nia̱ꞌ xá Jesús gunu̱n síꞌ güenda gahuin ducu ruhua ni sij niꞌyaj ni sij síꞌ. Ni̱ rúnꞌ si-ganꞌ rey hua-áꞌ. Ngaa ni̱ gaꞌníj Herodes ru̱huaꞌ yún Jesús rian Pilato. 12 Xiꞌí daj ni̱ naꞌmi Pilato nga̱ Herodes güi daj si asi̱j sini, ni̱ gununꞌ nu̱ngüej sij.

13 Ngaa ni̱ nahuin yuꞌ ni tsínj aꞌninꞌ rian ni chrej nga̱ ni tsínj nicaj sun nga̱ ni ngüi̱ nej, guiꞌyaj Pilato. 14 Ni̱ gataj síꞌ gunun ni sij:

―Nicaj á re̱ꞌ tsínj nan gaꞌna̱ꞌ á re̱ꞌ nánj. Ni̱ ataj á re̱ꞌ sisi̱ digyán sij ꞌngo̱ chrej xi̱ꞌi rian ni ngüi̱. Ni̱ natāj rian án re̱ꞌ sisi̱ hua nachínj snanꞌān sij. Sani̱ nitaj ꞌngo̱ gaquinꞌ guiꞌyaj sij nariꞌīj xiꞌí si aꞌuiꞌ a ni é re̱ꞌ gaquinꞌ sij mánj. 15 Ni̱ gaꞌnī Jesús ga̱nꞌanj sij rian nne rey Herodes. Ni̱ nun nariꞌ Herodes gaquinꞌ daꞌui sij mánj. Nitaj nu̱nj guiꞌyaj sij si ga̱huiꞌ sij mánj. 16 Ngaa ni̱ gui̱ꞌyā castigo sij, asíj ni̱ na̱ꞌnij raꞌāj sij ga̱nꞌanj sij aj. ―Daj gataj Pilato.

17 Ni̱ hua nia̱n si gui̱ri Pilato ꞌngo̱ tsínj nu̱n ducuaga̱ꞌ go̱ꞌngo guiꞌyanj pascua si da̱j hua si-costumbre ni sij.

18 Sani̱ gaxi̱ꞌi ni sij gaguáj nucuaj nu̱guanꞌan daranꞌ ni sij. Ni̱ gataj ni sij:

―Da̱gahuíꞌ re̱ꞌ tsínj nan. Ni̱ na̱ꞌnij raꞌá re̱ꞌ tsínj gu̱ꞌnaj Barrabás aj. ―Daj gataj ni sij gaguáj ni sij.

19 Ni̱ hué Barrabás huin ꞌngo̱ tsínj nu̱n ducuaga̱ꞌ si gununꞌ ni du̱güiꞌ síꞌ nga̱ ni tsínj nicaj sun chruhua xumanꞌ daj. Ni̱ dagahuiꞌ síꞌ ꞌngo̱ níman nej.

20 Ni̱ huin ruhua Pilato gui̱ri sij Jesús ga̱nꞌanj síꞌ. Xiꞌí daj ni̱ gaꞌmi ru̱huaꞌ yún sij rian ni síꞌ.

21 Sani̱ gaguáj nucuaj ni sij. Ni̱ gataj ni sij:

―Ga̱ri re̱ꞌ gaquíj Jesús gui̱nicoꞌ sij rian rugutsi̱. Ga̱ri re̱ꞌ gaquíj Jesús gui̱nicoꞌ sij rian rugutsi̱. ―Daj gataj ni sij.

22 Ngaa ni̱ gataj Pilato guisíj hua̱ꞌnij:

―Da̱j hua gaquinꞌ guiꞌyaj sij únj. Nitaj gaquinꞌ guiꞌyaj sij nariꞌīj sisi̱ ga̱huiꞌ sij mánj. Gui̱ꞌyā castigo sij, asíj ni̱ na̱ꞌnij raꞌāj sij ga̱nꞌanj sij aj. ―Daj gataj Pilato.

23 Sani̱ ni tsínj daj nga̱ ni chrej aꞌninꞌ guiꞌyaj fuerza ni sij gaguáj ni sij sisi̱ ga̱ri Pilato gaquíj Jesús gui̱nicoꞌ síꞌ rian rugutsi̱. Ni̱ ri̱an gaguáj nucuaj ni sij, ni̱ guiriꞌ ni sij si huin ruhua ni sij. 24 Ni̱ gataj Pilato sisi̱ gui̱ꞌyaj ni sij si huin ruhua ni sij. 25 Ngaa ni̱ guiri Pilato tsínj nu̱n ducuaga̱ꞌ daj huin síꞌ tsínj gununꞌ nga̱ ni tsínj nicaj sun. Ni̱ huin síꞌ tsínj dagahuiꞌ níman nej. Ngaa ni̱ nagaꞌuiꞌ Pilato manꞌan Jesús rian ni sij sisi̱ gui̱ꞌyaj ni sij si huin ruhua ni sij.

26 Ni̱ ngaa nicaj ni sij Jesús ganꞌanj ni sij, ni̱ guidaꞌa ni sij ꞌngo̱ tsínj ꞌna̱ꞌ xumanꞌ Cirene gu̱ꞌnaj síꞌ Simón. Ni̱ ꞌna̱ꞌ niqui síꞌ ganꞌanj síꞌ rian sun. Ni̱ guiꞌyaj ni sij ga̱ta síꞌ rugutsi̱ gui̱nicoꞌ síꞌ rucú Jesús. 27 Ni̱ nicoꞌ nico ni ngüi̱ huaj ni sij rucú Jesús. Ni̱ ducu aco ni yunꞌunj xa̱na nicoꞌ huaj rucú sij. Ni̱ nani ruhua ne niꞌyaj ne xiꞌí sij. 28 Sani̱ nanica̱j Jesús ni̱ gataj sij gunun ni yunꞌunj xa̱na daj:

―Gu̱nun ni é re̱ꞌ huin a ni é re̱ꞌ ni ngüi̱ ꞌna̱ꞌ xumanꞌ Jerusalén. Si̱ gaco ni é re̱ꞌ xiꞌīj mánj. Sani̱ ga̱co ni é re̱ꞌ xiꞌí manꞌan ni é re̱ꞌ nga̱ xiꞌí ni daꞌníj ni é re̱ꞌ nej. 29 Daj si ga̱ꞌnaꞌ ni güi gui̱ranꞌ ni é re̱ꞌ sayun. Ni̱ ga̱taj ni ngüi̱: “Hua ꞌueé rian ni ngüi̱ yatin nga̱ ni ngüi̱ nun riꞌ lij nej, ni ngüi̱ nun guinicoꞌ lij xíꞌyanj nej.” Daj ga̱taj ni ngüi̱. 30 Daj si güi daj ni̱ ga̱xiꞌi ni ngüi̱ ga̱taj sisi̱ ga̱ne ni quij, ni̱ na̱xij ni sij riqui quij gane daj, ga̱taj ni sij. 31 Ni̱ sisi̱ ranꞌ manꞌānj nico sayun ꞌyaj ni sij acuanꞌ, sani̱ ni güi ga̱ꞌnaꞌ, ni̱ ducu ga̱ꞌnaꞌ doj sayun rian ni sij aj. ―Daj gataj Jesús rian ni yunꞌunj daj.

32 Ni̱ hué daj nicaj ni sij hui̱j tsínj daꞌui gaquinꞌ ganꞌanj ni sij sisi̱ ga̱huiꞌ nu̱guanꞌan nu̱ngüej síꞌ nga̱ Jesús. 33 Ni̱ ngaa guisíj ni sij ꞌngo̱ yuꞌuj gu̱ꞌnaj cúj chra̱ níman, ni̱ gari ni sij gaquíj Jesús doco̱ꞌ ni sij rian rugutsi̱ síꞌ yuꞌuj daj. Ni̱ hué daj doco̱ꞌ ni sij hui̱j tsínj daꞌui gaquinꞌ daj rian yahuij rugutsi̱. Ni̱ nicoꞌ ꞌngo̱j raꞌa sa̱ꞌ Jesús, ni̱ angoj raꞌa ro̱tsi sij. 34 Hué dan ni̱ gataj Jesús gunun Yanꞌanj:

―Tata chréꞌ, ni̱caj re̱ꞌ ꞌngo̱ niman nico nga̱ ni sij. Daj si nun niꞌi ni sij si ꞌyaj ni sij. ―Daj gataj Jesús gunun Yanꞌanj.

Ni̱ ducu ni snado sisi̱ u̱n tsínj ga̱hui sa̱ꞌ ni̱caj ni sij si-ganꞌ Jesús ga̱nꞌanj sij.

35 Ni̱ niquinꞌ ni ngüi̱ niꞌyaj ni sij. Sani̱ guiꞌyaj ducu ni tsínj nicaj sun. Ni̱ gataj ni sij:

―Nacaj sij ango ni ngüi̱. Ngaa ni̱ sisi̱ hué sij huin Cristo tsínj nacui Yanꞌanj, ngaa ni̱ ga̱nacaj sij manꞌan sij nánj. ―Daj gataj ni sij.

36 Ni̱ hué daj gaꞌmi ducu ni snado nej. Ni̱ gahuin ni̱chrunꞌ ni sij. Ni̱ reque̱ ni sij nnee yu̱ go̱ꞌo síꞌ. 37 Ni̱ gataj ni sij:

―Sisi̱ hué re̱ꞌ huin si-rey ni tsínj israelita, ni̱ ga̱nacaj re̱ꞌ manꞌán re̱ꞌ aj. ―Gataj ni sij.

38 Ni̱ garun ni sij letra chra̱ rugutsi̱. Ni̱ letra daj huin griego nga̱ latín nej, hebreo nej. Ni̱ letra daj gataj: “tsínj nan huin si-rey ni tsínj judíos.” Daj garun ni sij. 39 Ngaa ni̱ gaꞌmi quij ꞌngo̱ tsínj daꞌui gaquinꞌ daj gunun Jesús. Ni̱ gataj síꞌ:

―Sisi̱ hué re̱ꞌ huin Cristo, ni̱ ga̱nacaj re̱ꞌ manꞌán re̱ꞌ nga̱ nu̱ngüej únj nej. ―Daj gataj síꞌ gunun Jesús.

40 Sani̱ chranꞌ yunꞌunj ango tsínj nicoꞌ yuꞌuj daj dugüiꞌ sij huin sij ꞌngo̱ tsínj daꞌui gaquinꞌ nej. Ni̱ gataj sij:

―Uyan huin si-castigo manꞌán re̱ꞌ nga̱ si-castigo tsínj nan nej. Ni̱ u̱n sin huin ni̱ nitaj si xuꞌuíꞌ re̱ꞌ niꞌyáj re̱ꞌ Yanꞌanj únj. 41 Ni̱ hua nia̱n xa̱ngaꞌ ranꞌ nu̱ngüej únj sayun xiꞌí si daꞌui nu̱ngüej únj gaquinꞌ. Sani̱ nitaj si daꞌui tsínj nan gaquinꞌ mánj. ―Daj gataj ango tsínj daꞌui gaquinꞌ gunun dugüiꞌ sij.

42 Ngaa ni̱ gataj sij rian Jesús:

―Ga̱nanun ruhuá re̱ꞌ ni̱ꞌyaj re̱ꞌ yūnj ngaa ga̱xiꞌi gui̱nicaj sún re̱ꞌ. ―Daj gataj sij.

43 Ngaa ni̱:

―Xa̱ngaꞌ ataj yyāj gu̱nun re̱ꞌ sisi̱ asi̱j yya̱j, ni̱ hua nné re̱ꞌ ngāj xánj Yanꞌanj. ―Gataj Jesús gunun tsínj daꞌui gaquinꞌ daj.

44 Ni̱ ngaa guisíj gaxu̱j, ni̱ gahuin ru̱miꞌ rian daranꞌ xungüi̱. Ni̱ gahuin ru̱miꞌ daꞌ ga hua̱ꞌnij diꞌni̱. 45 Ni̱ gahuin ru̱miꞌ rian güi. Ni̱ tsitsiꞌ daꞌaj atsij nicoꞌ chruhua nuhui nico. 46 Ngaa ni̱ gaguáj nucuaj Jesús. Ni̱ gataj sij:

―Tata chréꞌ, nariquīj nimānj na̱huin raꞌá re̱ꞌ. ―Gataj Jesús.

Ni̱ ngaa daꞌngaꞌ daj gataj sij, ni̱ gahuiꞌ sij.

47 Ni̱ ngaa guiniꞌi snado centurión si gahuin, ni̱ gaꞌmi sa̱ꞌ sij rian Yanꞌanj. Ni̱ gataj sij:

―Xa̱ngaꞌ hua ni̱ca niman tsínj nan anj. ―Daj gataj sij.

48 Ni̱ ngaa guiniꞌi daranꞌ ni ngüi̱ mán yuꞌuj daj da̱j gahuin, ni̱ nanica̱j ni sij na̱nꞌ ni sij ducuá ni sij. Ni̱ guita raꞌa ni sij niman ni sij si nun nariꞌ ruhua ni sij si gui̱ꞌyaj ni sij. 49 Ni̱ daranꞌ ni tsínj nicaj dugüiꞌ nga̱ Jesús nga̱ ni yunꞌunj xa̱na nicoꞌ Jesús asi̱j estado Galilea, ni̱ guna ga̱nꞌ ni sij niꞌyaj ni sij daranꞌ si gahuin.

50 Ni̱ hua ꞌngo̱ tsínj nne rian junta nico daj. Ni̱ gu̱ꞌnaj síꞌ José. Ni̱ ꞌna̱ꞌ sij xumanꞌ Arimatea xumanꞌ ngaj estado Judea. Ni̱ hua sa̱ꞌ niman sij. Ni̱ ꞌyaj ni̱ca sij nej. 51 Ni̱ anaꞌuij sij si ga̱ꞌnaꞌ gui̱nicaj sun Yanꞌanj rian néꞌ. Ni̱ nun ga̱ranꞌ ruhua sij si gaꞌmi ni tsínj ma̱n junta daj xiꞌí Jesús. Ni̱ hué daj nun ga̱ranꞌ ruhua sij si guiꞌyaj ni sij nga̱ síꞌ nej.

52 Ni̱ ganꞌanj sij rian Pilato. Ni̱ gachínj sij níman Jesús. 53 Ngaa ni̱ nanij sij níman Jesús rian rugutsi̱. Ni̱ chriꞌyanj sij atsij xiráj níman daj. Ni̱ gurúj sij níman chruhua ꞌngo̱ huej. Sani̱ ni̱ a̱ ꞌngo̱ ni níman nun gachinꞌ ni sij riqui yuꞌuj da mánj.

54 Ni̱ güi daj huin güi ꞌyaj xugüi ni sij güi naránj ruhua ni sij. Ni̱ achin do̱j si gui̱sij güi naránj ruhua ni sij daj. 55 Ni̱ nicoꞌ ni yunꞌunj xa̱na gahui estado Galilea nga̱ Jesús rucú tsínj gu̱ꞌnaj José. Ni̱ guiniꞌi ne rian gachinꞌ ni sij níman Jesús. Ni̱ guiniꞌi ne da̱j gurúj ni sij níman daj chruhua yuꞌuj nej. 56 Ni̱ ngaa nanica̱j ne na̱nꞌ ne ducuá ne, ni̱ nachej ne gasiti guinꞌ da̱j nga̱ gonoꞌó guinꞌ da̱j. Ni̱ naránj ruhua ne güi naránj ruhua ni ngüi̱ israelita da̱j rúnꞌ aꞌninꞌ ley rian ni sij.