1 Ni̱ güi daj, ni̱ huaj nico ni ngüi̱ nga̱ Jesús. Ni̱ nitaj si nicaj ni sij si xa ni sij. Ngaa ni̱ gaquínj Jesús ga̱ꞌnaꞌ ni tsínj nicoꞌ sij. Ni̱ gataj sij:

2 ―Nahuin ꞌi̱ ruhuāj niꞌyā daranꞌ ni ngüi̱ ma̱n nan. Daj si síj hua̱ꞌnij güi mán ni sij ngāj aj. Ni̱ nitaj si nicaj ni sij si xa ni sij mánj. 3 Sisi̱ na̱ꞌnī ni sij na̱nꞌ ni sij ducuá ni sij ngaa nitaj si xa ni sij, ni̱ gui̱nichre ni sij huaj ni sij chruhua chrej, ruhuāj aj. Daj si hua daꞌaj ni sij ꞌna̱ꞌ ga̱nꞌ anj. ―Daj gataj Jesús gunun ni tsínj nicoꞌ sij.

4 Ni̱ gataj ni sij gunun síꞌ:

―Da̱j u̱n sin gui̱ꞌyóꞌ gui̱riꞌ ga̱ꞌuiꞌ xa̱ ni ngüi̱ ꞌngo̱ yuꞌuj nitaj mán nan únj. ―Daj gataj ni sij.

5 Ngaa ni̱ nachínj snanꞌanj Jesús ni sij. Ni̱ gataj síꞌ:

―Ni̱ u̱ndaj chrachrúnj nicaj a ni é re̱ꞌ únj. ―Gataj Jesús.

―Ichij chrachrúnj nicaj ni únj. ―Gataj ni sij.

6 Ngaa ni̱ gaꞌninꞌ Jesús sun sisi̱ ga̱nꞌanj ga̱ne ni ngüi̱ rian yoꞌój. Ngaa ni̱ guidaꞌa sij ichij chrachrúnj raꞌa sij. Ni̱ nagoꞌ sij si guruhua Yanꞌanj. Ngaa ni̱ guraꞌ daꞌaj sij chrachrúnj daj gaꞌuiꞌ sij raꞌa ni tsínj nicoꞌ sij. Ni̱ daꞌngaꞌ ni síꞌ raꞌa ni ngüi̱ ma̱n anj. 7 Ni̱ nicaj ni sij ꞌngo̱ si hui̱j xucuaj le. Ngaa ni̱ nagoꞌ Jesús si guruhua Yanꞌanj. Ni̱ gaꞌninꞌ sij sun rian ni síꞌ sisi̱ da̱ꞌngaꞌ ni síꞌ xucuaj daj rian ni ngüi̱. 8 Ni̱ xa daranꞌ ni sij. Ni̱ gara ran riqui ni sij. Ngaa ni̱ gara ichij xuguti, guiꞌyaj si xitinꞌ gunáj aj. 9 Ni̱ guisíj ꞌngo̱ si ga̱nꞌanj mí ni tsínj xa aj.

Ngaa ni naꞌníj Jesús na̱nꞌ ni sij. 10 Ngaa ni̱ ꞌngo̱ hora gatúj Jesús nga̱ ni tsínj nicoꞌ sij chruhua rio̱ chéj rian nnee ganꞌanj ni sij ꞌngo̱ yuꞌuj gu̱ꞌnaj Dalmanuta.

11 Ngaa ni̱ gaꞌna̱ꞌ ni tsínj fariseo. Ni̱ gaxi̱ꞌi ni sij gani dugüiꞌ ni sij nga̱ Jesús. Ni̱ chruhua ni sij gui̱ꞌyaj ni sij ꞌngo̱ xi̱ꞌ ga̱tu Jesús. Ngaa ni̱ gachínj ni sij rian Jesús sisi̱ gui̱ꞌyaj síꞌ ꞌngo̱ si sa̱ꞌ ꞌna̱ꞌ rian Yanꞌanj. Ngaa ni̱ gui̱niꞌi ni sij sisi̱ ꞌna̱ꞌ síꞌ rian Yanꞌanj, ruhua ni sij.

12 Ngaa ni̱ guchej ni̱nꞌ ruhua Jesús, ni̱ gataj sij:

―Ni̱ u̱n sin huin ni̱ achínj ni ngüi̱ ma̱n yya̱j ꞌngo̱ si sa̱ꞌ ꞌna̱ꞌ rian Yanꞌanj riānj únj. Xa̱ngaꞌ yya atā gu̱nun a ni é re̱ꞌ sisi̱ si̱ guiꞌyā ꞌngo̱ si sa̱ꞌ ꞌna̱ꞌ rian Yanꞌanj gui̱niꞌi ni é re̱ꞌ mánj. ―Daj gataj Jesús.

13 Ngaa ni̱ dunáj Jesús ni tsínj daj. Ni̱ gatúj ru̱huaꞌ yún sij chruhua rio̱ ganꞌanj sij anéj chrej duꞌua laguna xa̱chij da aj.

14 Ni̱ guiniꞌyun ni tsínj nicoꞌ Jesús guinicaj ni sij chrachrúnj xa̱ ni sij. Ni̱ urin chrachrúnj nicaj ni sij huaj ni sij chruhua rio̱ aj. 15 Ngaa ni̱ gaꞌninꞌ Jesús sun rian ni sij. Ni̱ gataj síꞌ:

―Ga̱ cuidado a ni é re̱ꞌ nga̱ manꞌan án re̱ꞌ. Ni̱ gu̱ruj a ni é re̱ꞌ nga̱ si-levadura ni tsínj fariseo nga̱ rey Herodes nej aj. ―Daj gataj Jesús.

16 Ni̱ gaꞌmi manꞌan ni sij gunun dugüiꞌ ni sij. Ni̱ gataj ni sij:

―Daꞌngaꞌ daj gaꞌmi Jesús xiꞌí si nitaj chrachrúnj nicaj únj. ―Daj gataj ni sij.

17 Sani̱ gunun Jesús si gataj ni sij. Ngaa ni̱ gataj síꞌ:

―Ni̱ u̱n sin huin ataj á re̱ꞌ sisi̱ nitaj chrachrúnj nicaj á re̱ꞌ gaꞌna̱ꞌ á re̱ꞌ únj. Hua gue̱ naꞌue gu̱nun a ni é re̱ꞌ ga̱ꞌ. Ni̱ nitaj si acaj á re̱ꞌ cuenta da ga̱ míꞌ. Hua ránj laquinj chra̱ ni é re̱ꞌ nan níꞌ. 18 Nu̱n rundij rian án re̱ꞌ, sani̱ nun xigui̱n niꞌyaj á re̱ꞌ mánj. Nu̱n chraquij a ni é re̱ꞌ, sani̱ nunun a ni é re̱ꞌ mánj. Nitaj si nu̱n ruhua ni é re̱ꞌ ga̱ míꞌ. 19 Ngaa daꞌngāj u̱nꞌunꞌ gue̱ chrachrúnj xa u̱nꞌunꞌ mí ni tsínj daj, ngaa ni̱ u̱ndaj xuguti gara si xitinꞌ nacaj ni é re̱ꞌ únj. ―Daj gataj Jesús.

Ngaa ni̱:

―Xu̱huij gahuin anj. ―Gataj ni sij.

20 Ngaa ni̱ gataj ru̱huaꞌ yún Jesús:

―Ni̱ ngaa daꞌngāj ichij gue̱ chrachrúnj xa ga̱nꞌanj mí ni tsínj daj, ngaa ni̱ u̱ndaj xuguti gara nacaj ni é re̱ꞌ únj. ―Gataj Jesús.

Ngaa ni:

―Ichij gahuin anj. ―Gataj ni sij.

21 Hué dan ni̱ gataj Jesús:

―Hua nunun ni é re̱ꞌ ga̱ míꞌ. ―Daj gataj Jesús gunun ni tsínj nicoꞌ sij.

22 Hué dan ni̱ guisíj ni sij xumanꞌ gu̱ꞌnaj Betsaida. Ni̱ nicaj ni ngüi̱ ꞌngo̱ tsínj duri gaꞌna̱ꞌ ni sij rian Jesús. Ni̱ gaꞌmi yaco ni sij sisi̱ ga̱nun raꞌa Jesús tsínj daj. 23 Ngaa ni̱ guidaꞌa Jesús raꞌa tsínj duri daj. Ni̱ guiri sij síꞌ ne̱ꞌ chrej xe̱ꞌ xumanꞌ daj. Ni̱ gutaꞌ sij dane staꞌnunj sij rundij rian síꞌ. Ngaa ni̱ gutaꞌ sij raꞌa sij rian manꞌan tsínj daj. Ni̱ nachínj snanꞌanj sij síꞌ sisi̱ xigui̱n niꞌyaj síꞌ do̱j aj.

24 Ngaa ni̱ niꞌyaj síꞌ. Ni̱ gataj síꞌ:

―Niꞌīnj ni tsínj. Ni̱ da̱j rúnꞌ hua ni chrun hua ni sij. Sani̱ chéj ni sij niꞌyā aj. ―Daj gataj tsínj duri daj gunun Jesús.

25 Hué dan ni̱ gutaꞌ ru̱huaꞌ yún Jesús raꞌa sij rundij rian tsínj daj. Ni̱ niꞌyaj sa̱ꞌ sij. Ni̱ ganahuin sij. Ni̱ rugüiꞌ sa̱ꞌ daranꞌ si niꞌyaj sij nej aj. 26 Ngaa ni̱ naꞌníj Jesús na̱nꞌ sij ducuá sij. Ni̱ gataj síꞌ gunun sij:

―Si̱ gatúj re̱ꞌ chruhua xumanꞌ. Ni̱ si̱ gatáj re̱ꞌ rian ni̱ a̱ ꞌngo̱ ni ngüi̱ ma̱n xumanꞌ mánj. ―Daj gataj Jesús.

27 Ngaa ni̱ gahui Jesús nga̱ ni tsínj nicoꞌ sij ganꞌanj ni sij ni xumanꞌ le yuꞌuj gu̱ꞌnaj Cesarea de Filipo.

Ni̱ chéj ni sij huaj ni sij, ni̱ nachínj snanꞌanj Jesús ni sij. Ni̱ gataj síꞌ:

―Ni̱ u̱n tsínj huīnj ataj ni ngüi̱, ruhua á re̱ꞌ únj. ―Daj gataj Jesús nachínj snanꞌanj sij aj.

28 Ngaa ni̱ gataj ni tsínj nicoꞌ sij:

―Ataj ꞌngo̱ ni sij sisi̱ hué re̱ꞌ huin tsínj gu̱ꞌnaj Elías. Ni̱ ataj ango ni sij sisi̱ hué re̱ꞌ huin ango tsínj gaꞌmi si-nu̱guanꞌ Yanꞌanj. ―Daj gataj ni sij.

29 Ngaa ni̱ nachínj snanꞌanj Jesús ni sij. Ni̱ gataj sij:

―Ni̱ u̱n tsínj huīnj, ruhua manꞌan án re̱ꞌ únj. ―Gataj Jesús.

Ngaa ni̱ gataj Pedro:

―Hué re̱ꞌ huin Cristo aj. ―Daj gataj Pedro.

30 Sani̱ gaꞌninꞌ Jesús sun rian ni sij sisi̱ si̱ nataꞌ ni sij rian ni̱ a̱ ꞌngo̱ ni ngüi̱ u̱n tsínj huin síꞌ mánj.

31 Ngaa ni̱ gaxi̱ꞌi Jesús digyán sij rian ni tsínj nicoꞌ sij. Ni̱ gataj sij sisi̱ hua nia̱n gui̱ranꞌ nico sij sayun huin sij daꞌníj ni ngüi̱. Ni̱ gataj Jesús sisi̱ da̱nicaj ni tsínj huin achij manꞌan sij. Ni̱ daꞌngaꞌ daj gui̱ꞌyaj ni chrej huin rian nga̱ ni tsínj digyán ley nej. Ni̱ da̱gahuiꞌ ni síꞌ manꞌan sij nej. Sani̱ xiráj hua̱ꞌnij güi, ni̱ ga̱naꞌnij sij, gataj sij. 32 Ni̱ nataꞌ ni̱ca Jesús nuguanꞌ daj rian ni tsínj nicoꞌ sij. Ngaa ni̱ nicaj Pedro Jesús ganꞌanj anéj sij do̱j. Ni̱ gaxi̱ꞌi Pedro chranꞌ sij síꞌ. 33 Sani̱ nanica̱j Jesús niꞌyaj sij ni tsínj nicoꞌ sij. Ni̱ gahuin huee Jesús gataj sij rian Pedro:

―Gu̱xun re̱ꞌ manꞌán re̱ꞌ riānj, Satanás. Nitaj si huin ruhuá re̱ꞌ rúnꞌ huin ruhua Yanꞌanj mánj. Rúnꞌ huin ruhua ni ngüi̱ huin ruhuá re̱ꞌ nánj. ―Daj gataj Jesús.

34 Ngaa ni̱ gaquínj Jesús ni ngüi̱ ga̱ꞌnaꞌ ni sij rian niquinꞌ síꞌ nga̱ ni tsínj nicoꞌ síꞌ nej. Ni̱ gataj Jesús:

―Sisi̱ hua ꞌngo̱ tsínj ruhua ni̱coꞌ yūnj, ngaa ni̱ du̱naj tsínj daj si-chrej manꞌan sij. Ngaa síj ni̱ ga̱ta sij rugutsi̱ gui̱nicoꞌ sij yūnj gui̱ranꞌ sij sayun ngāj aj. 35 Tsínj naꞌuej ruhua ga̱huiꞌ sij ngāj, ni̱ ga̱ niꞌya sij. Sani̱ tsínj ga̱ꞌue ga̱huiꞌ xiꞌí manꞌānj nga̱ xiꞌí nuguanꞌ sa̱ꞌ aꞌmi manꞌānj, ngaa ni̱ ga̱ne ni̱ganj sij aj. 36 Ni̱ sisi̱ gui̱ꞌyaj gana ꞌngo̱ tsínj daj daranꞌ si ma̱n chruhua xungüi̱ gahuin siꞌyaj sij, ngaa ni̱ u̱n sin huin-ínꞌ sisi̱ ga̱ niꞌya niman sij, ruhua á re̱ꞌ únj. Nitaj si guiꞌyaj gana sij mánj. 37 Ni̱ nu̱nj si gue̱reꞌ siꞌyaj ꞌngo̱ tsínj daj chruhua xungüi̱ nan, sani̱ ga̱ꞌue ga̱huin nia̱ꞌ ruhua sij sisi̱ ga̱ ni̱ꞌnaꞌ ni̱ganj ni̱nꞌ sij.

38 ’Ni̱ xungüi̱ nan ma̱n ni ngüi̱ dunáj Yanꞌanj. Ni̱ ma̱n ni ngüi̱ ꞌyaj gaquinꞌ nej. Ni̱ sisi̱ hua ꞌngo̱ tsínj na̱ꞌaj niꞌyaj yūnj nga̱ si-nu̱guanꞌānj rian ni ngüi̱ daj, ngaa ni̱ ga̱huin na̱ꞌā nga̱ sij ngaa ga̱ꞌnaꞌ yūnj nga̱ ni ángel sa̱ꞌ chruhua xungüi̱ nan. Ni̱ güi ga̱ꞌnaꞌ yūnj daj, ni̱ ga̱huin ꞌuēj ni̱nꞌ ruhua, gui̱ꞌyaj chrē huīnj daꞌníj ni ngüi̱ aj. ―Daj gataj Jesús gunun ni sij.