4
La adoración celestial
1 Ngaa guisíj ni̱ guiniꞌyā, ni̱ guiniꞌīnj ꞌngo̱ rian hueꞌ hua níꞌnij xataꞌ. Ni̱ gunun ru̱huaꞌ yūnj nane̱ gaꞌmi sini ngāj. Ni̱ da̱j rúnꞌ aꞌyanj trompeta hué daj gaꞌmi nane̱ daj. Ni̱ gataj nane̱ daj gunūnj:
―Ga̱hui re̱ꞌ ga̱ꞌnaꞌ re̱ꞌ xataꞌ. Ni̱ di̱gyānj rián re̱ꞌ ni nuguanꞌ sisi̱ hua nia̱n ga̱huin da ru̱cu. ―Daj gataj nane̱ daj.
2 Ni̱ ráꞌyanj guiniꞌi nimānj ꞌngo̱ nuguanꞌ sa̱ꞌ, guiꞌyaj Espíritu Santo. Ni̱ guiniꞌīnj niquinꞌ ꞌngo̱ chrun xila sa̱ꞌ xataꞌ. Ni̱ nne ꞌngo̱ si mán xataꞌ rian chrun xila sa̱ꞌ daj. 3 Ni̱ da̱j rúnꞌ hua ꞌngo̱ yej ran sa̱ꞌ gu̱ꞌnaj jaspe, asi̱ ꞌngo̱ yej gu̱ꞌnaj cornalina, ni̱ hué daj hua si nne rian chrun xila sa̱ꞌ daj. Ni̱ xiꞌníj chrun xila daj ganica̱j xucuáj guꞌluj. Ni̱ xigui̱n xucuáj daj da̱j rúnꞌ ran ꞌngo̱ yej gu̱ꞌnaj esmeralda. 4 Ni̱ guiniꞌīnj ango ico̱ ga̱nꞌanj chrun xila sa̱ꞌ ganica̱j xiꞌníj chrun xila sa̱ꞌ daj. Ni̱ nne ico̱ ga̱nꞌanj ni tsínj huin achij rian ni chrun xila sa̱ꞌ daj. Ni̱ nu̱n ni sij atsij ga̱tsi. Ni̱ nu̱n chra̱ ni sij ꞌngo̱ corona huin gagaꞌ oro. 5 Ni̱ ran rian chrun xila sa̱ꞌ niquinꞌ da̱ni daj. Ni̱ gahuin gari̱n ngaa gaguáj duꞌui. Ni̱ ne̱ꞌ rian chrun xila sa̱ꞌ daj aca ichij yanꞌa̱n huin ichij Espíritu Santo ꞌna̱ꞌ rian Yanꞌanj. 6 Ni̱ ne̱ꞌ rian chrun xila sa̱ꞌ niquinꞌ da̱ni daj, ni̱ da̱j rúnꞌ hua ꞌngo̱ nnee yanꞌanj, ni̱ hué daj hua nnee gurugüiꞌ rian chrun xila daj. Ni̱ da̱j rúnꞌ hua pidrio sa̱ꞌ, ni̱ hué daj xigui̱n sa̱ꞌ rian nnee daj.
Ni̱ da̱ni rian niquinꞌ chrun xila sa̱ꞌ daj, ni̱ ganica̱j ga̱nꞌanj ni si hua ni̱ꞌnaꞌ mán xataꞌ xiꞌníj chrun xila daj. Ni̱ ga̱nꞌanj si mán xataꞌ daj, ni̱ hua gaꞌi̱ rundij rianj ne̱ꞌ chrej ru̱cu nga̱ ne̱ꞌ chrej rianj nej. 7 Ni̱ da̱j rúnꞌ hua ꞌngo̱ sigueꞌej xxi, ni̱ hué daj hua ꞌngo̱j. Ni̱ da̱j rúnꞌ hua cero, ni̱ hué daj hua angoj. Ni̱ da̱j rúnꞌ hua rian ꞌngo̱ tsínj, ni̱ hué daj hua ángoj. Ni̱ da̱j rúnꞌ hua xata achéj xataꞌ, ni̱ hué daj hua ángoj. 8 Ni̱ aninꞌ ga̱nꞌanj ni xucu hua ni̱ꞌnaꞌ mán xataꞌ, ni̱ hua hua̱tanꞌ si-gachi da go̱ꞌngoj. Ni̱ ni̱nꞌ ga̱chraꞌ nnee̱ cúj aninꞌ ga̱nꞌanj xucu daj, ni̱ hua gaꞌi̱ ni̱nꞌ ruhua rundij rian xuj. Ni̱ hua rundij rian riqui si-gachi nej. Ni̱ nu̱n güi ni̱ganꞌ, ni̱ nun aꞌninꞌ ruhua aninꞌ xucu si ga̱ꞌmi. Ni̱ ataj aninꞌ ga̱nꞌanj xuj:
Hua sa̱ꞌ ni̱nꞌ ruhua Yanꞌanj.
Hua sa̱ꞌ ni̱nꞌ ruhua Yanꞌanj.
Hua sa̱ꞌ ni̱nꞌ ruhua Señor huin Yanꞌanj.
Ni̱ nucuaj ni̱nꞌ ruhua Yanꞌanj.
Ni̱ hué Yanꞌanj huin si gane asi̱j sini.
Ni̱ Yanꞌanj huin si nne acuanꞌ.
Ni̱ Yanꞌanj huin si ga̱ꞌnaꞌ ru̱huaꞌ yún.
Ataj aninꞌ ga̱nꞌanj xucu mán xataꞌ daj. 9 Ni̱ gaꞌmi sa̱ꞌ aninꞌ ga̱nꞌanj xuj rian si nne rian chrun xila sa̱ꞌ daj. Ni̱ nu̱n yanꞌanj aninꞌ ga̱nꞌan. Ni̱ aꞌuiꞌ aninꞌ ga̱nꞌan si guruhua si nne rian chrun xila sa̱ꞌ huin si nne ni̱ganj. Ni̱ da yu̱n yu̱n hué daj ꞌyaj aninꞌ ga̱nꞌanj daj ngaa aꞌmi sa̱ꞌ aninꞌ-inj. 10 Ngaa ni̱ guiniquinꞌ ráj da̱coj ico̱ ga̱nꞌanj ni tsínj huin achij rian si nne rian chrun xila sa̱ꞌ daj. Ni̱ aꞌmi sa̱ꞌ ni sij. Ni̱ dugüéj ni sij si-corona ni sij rian si nne rian chrun xila sa̱ꞌ daj. Ni̱ ataj ni sij:
11 Hué re̱ꞌ huin Señor.
Ni̱ duguꞌna̱j huin sisi̱ ga̱ꞌmi sa̱ꞌ ni ngüi̱ xiꞌí re̱ꞌ.
Ni̱ duguꞌna̱j huin sisi̱ gui̱nun yanꞌanj ni ngüi̱ manꞌán re̱ꞌ nej.
Ni̱ duguꞌna̱j huin sisi̱ gui̱nicaj re̱ꞌ daranꞌ fuerza.
Daj si hué re̱ꞌ guiꞌyaj daranꞌ ni rasu̱n.
Ni̱ ma̱n ni rasu̱n daj xiꞌí si hué daj garanꞌ ruhuá re̱ꞌ.
Ataj ico̱ ga̱nꞌanj ni tsínj huin achij daj.