1 Ngaa ni̱ guiniꞌīnj niquinꞌ xachij ꞌni̱j chra̱ quij gu̱ꞌnaj Sión. Ni̱ ma̱n nu̱guanꞌan ꞌngo̱ ciento mí táj hui̱j xia ga̱nꞌanj mí ni tsínj nga̱ xachij ꞌni̱j daj. Ni̱ hua ni̱ca nun si-xugüi xachij ꞌni̱j yo ni sij nga̱ si-xugüi chrej xachij ꞌni̱j nej. 2 Ngaa ni̱ gunūnj si gaꞌmi ꞌngo̱ nane̱ gaꞌna̱ꞌ xataꞌ. Ni̱ da̱j rúnꞌ gari̱n rian nicoꞌ nico nnee rian huej, ni̱ hué daj gahuin gari̱n gunūnj. Ni̱ da̱j rúnꞌ aguáj duꞌui, ni̱ hué daj gunūnj nej. Ni̱ nane̱ gunūnj daj huin da̱j rúnꞌ xingaꞌ yánꞌanj nu̱n gaꞌi̱ yaꞌa̱ ngaa aráj gaꞌi̱ ni tsínj aráj yánꞌanj. Ni̱ hué daj gunūnj nane̱ gaꞌmi daj. 3 Ni̱ garáj ni sij ꞌngo̱ chraꞌ na̱ca rian tsínj nne chrun xila sa̱ꞌ nga̱ rian aninꞌ ga̱nꞌanj xucu hua ni̱ꞌnaꞌ nga̱ rian ni tsínj huin achij nej. Ni̱ a̱ ꞌngo̱ tsínj nun ga̱ꞌue na̱riꞌ gara chraꞌ daj. Maan si urin ciento mí táj hui̱j xia ga̱nꞌanj mí ni tsínj ganani scanij ni ngüi̱ ma̱n chruhua xungüi̱ gahuin nucuaj nariꞌ chraꞌ na̱ca daj garáj ni sij. 4 Ni̱ ni tsínj nan nun guiꞌyaj gaquinꞌ nga̱ ni ngüi̱ xa̱na. Daj si nun gaꞌmi ni sij nga̱ ni ngüi̱ xa̱na. Ni̱ hué ni tsínj nan nicoꞌ xachij ꞌni̱j ngaa achéj síꞌ niaj diꞌyaj nga̱ ni sij. Ni̱ nacaj Yanꞌanj ni sij scanij ni ngüi̱ sisi̱ gui̱nicaj dugüiꞌ sini ni sij nga̱ Yanꞌanj nga̱ xachij ꞌni̱j nej. 5 Ni̱ nun gaꞌmi ni sij nuguanꞌ yya̱. Daj si hua sa̱ꞌ niman ni sij niquinꞌ ni sij rian chrun xila sa̱ꞌ rian nne Yanꞌanj.

6 Ngaa ni̱ guiniꞌīnj huaj ango ángel da̱ni xataꞌ. Ni̱ nicaj ángel daj nuguanꞌ sa̱ꞌ huin nuguanꞌ nun ganahuij. Ni̱ na̱taꞌ ángel daj rian ni ngüi̱ ma̱n daranꞌ xungüi̱ nga̱ daranꞌ xiꞌninꞌ ni ngüi̱ nej, daranꞌ snánj aꞌmi ni ngüi̱ nej, daranꞌ xumanꞌ nej. 7 Ni̱ gaꞌmi nucuaj ángel. Ni̱ gataj-áꞌ:

―Gui̱nun yanꞌanj ni é re̱ꞌ rian Yanꞌanj xa̱ngaꞌ. Ni̱ ga̱ꞌmi sa̱ꞌ ni é re̱ꞌ rian Yanꞌanj nej. Daj si guisíj hora na̱guiꞌyaj yya Yanꞌanj nga̱ si-ga̱quinꞌ ni ngüi̱. Ni̱ ga̱ꞌmi ꞌueé ni é re̱ꞌ rian Yanꞌanj si hué Yanꞌanj guiꞌyaj xataꞌ nga̱ yoꞌój nej, nnee yanꞌanj nej, rian ahui nnee nej. ―Daj gataj ángel daj gunūnj.

8 Ni̱ guinicoꞌ ango ángel ru̱cu ángel daj. Ni̱ gataj ango ángel daj:

―Guereꞌ xumanꞌ Babilonia. Guereꞌ xumanꞌ Babilonia huin xumanꞌ xxi. Daj si da̱j rúnꞌ digyán ꞌngo̱ tsínj daj goꞌo dugüiꞌ sij rente sisi̱ ga̱xini síꞌ, ni̱ hué daj digyán ni tsínj ma̱n Babilonia ꞌngo̱ chrej quij rian daranꞌ xungüi̱. ―Daj gataj ango ángel daj.

9 Ngaa ni̱ guinicoꞌ ango ángel guisíj hua̱ꞌnij ángel. Ni̱ gaꞌmi nucuaj ángel daj. Ni̱ hué nan huin nuguanꞌ gataj ángel daj:

―Sisi̱ hua ꞌngo̱ tsínj nun yanꞌanj xucu huee daj xucu huin yanꞌanj guiꞌyaj raꞌa ni sij, ni̱ sisi̱ ga̱ꞌuej ruhua sij sisi̱ ga̱nun daꞌngaꞌ daj yo sij, asi̱ raꞌa sij, 10 ngaa ni̱ ga̱huin nico castigo sij, gui̱ꞌyaj Yanꞌanj. Daj si da̱j rúnꞌ huin ꞌngo̱ nnee xunánj ngaa naꞌue go̱ꞌo néꞌ, ni̱ hué daj huin castigo ga̱huin sij, gui̱ꞌyaj Yanꞌanj. Ni̱ nun jnachej Yanꞌanj ango nnee sa̱ꞌ nga̱ nnee xunánj daj sisi̱ ga̱ꞌue go̱ꞌo ni sij. Daj si ducu gaꞌman ruhua Yanꞌanj niꞌya ni sij. Ni̱ ducu gui̱ranꞌ ni sij sayun gu̱nun ni sij rian yanꞌa̱n ga̱ca ni sij nga̱ yoꞌój sufre. Ni̱ gui̱niꞌyaj ni ángel hua sa̱ꞌ niman nga̱ xachij ꞌni̱j nej. 11 Ni̱ ni̱ganj ga̱hui gatseꞌ rian gui̱ranꞌ ni sij sayun. Ni̱ naꞌue ga̱hui ni sij na̱ran ruhua ni sij rian gui̱ranꞌ ni sij sayun. Daj si nugüi ni̱ganꞌ nu̱n ni sij. Ni̱ hué daj gui̱ranꞌ ni tsínj nicoꞌ xucu huee nga̱ xucu huin yanꞌanj guiꞌyaj raꞌa ni sij. Ni̱ daꞌngaꞌ daj gui̱ranꞌ ni tsínj ga̱ꞌuej ruhua sisi̱ ga̱nun daꞌngaꞌ si-xugüi xucu daj nej. ―Daj gataj ángel daj.

12 Ngaa ni̱ ruhuaj si ꞌngo̱ ga̱ nucuaj niman ni tsínj hua sa̱ꞌ rian Yanꞌanj rian sayun huin ni tsínj dagahuin nuguanꞌ gaꞌninꞌ Yanꞌanj sun rian ni sij. Ni̱ xuman ruhua ni sij niꞌyaj ni sij Jesús.

13 Ngaa ni̱ gunūnj ꞌngo̱ nane̱ gaꞌmi xataꞌ. Ni̱ gataj nane̱ daj gunūnj:

―Ga̱run re̱ꞌ nuguanꞌ nan rian yanj: “Asi̱j yya̱j nga̱ ni güi ga̱ꞌnaꞌ ne̱ꞌ rian, ni̱ hua ꞌueé rian ni ngüi̱ nicoꞌ Señor ngaa ga̱huiꞌ ni sij.” ―Daj gataj nane̱ daj gunūnj.

Ngaa ni̱ gataj Espíritu:

―Xa̱ngaꞌ ni̱ na̱ran ruhua ni sij nga̱ sun ꞌyaj ni sij. Daj si niꞌi Yanꞌanj sun sa̱ꞌ guiꞌyaj sun ni sij chruhua xungüi̱. ―Gataj Espíritu.

14 Ngaa ni̱ guiniꞌīnj ꞌngo̱ nga ga̱tsi xataꞌ. Ni̱ rúnꞌ hua ꞌngo̱ daꞌníj ni ngüi̱, ni̱ hué daj hua ꞌngo̱ tsínj nne rian nga daj. Ni̱ nu̱n chra̱ sij ꞌngo̱ corona huin oro. Ni̱ nicaj sij ꞌngo̱ gagaꞌ cera hua̱. 15 Ngaa ni̱ gahui ango ángel chruhua nuhui nico. Ni̱ gaguáj nucuaj ángel daj rian tsínj nne rian nga daj. Ni̱ gataj ángel daj:

―Ga̱xiꞌi re̱ꞌ ga̱ꞌninꞌ re̱ꞌ ni rasu̱n ma̱n rian yoꞌój nga̱ gagaꞌ cera nicáj re̱ꞌ. Daj si hua guisíj hora ga̱ꞌninꞌ re̱ꞌ ni rasu̱n. Ni̱ hua gachij ni̱nꞌ si ma̱n rian yoꞌój nan. ―Daj gataj ángel daj.

16 Ngaa ni̱ gaxi̱ꞌi tsínj nne rian nga daj gaꞌninꞌ sij ni rasu̱n nga̱ cera daj. Ni̱ naranꞌ sij ni rasu̱n gahui rian yoꞌój.

17 Ngaa ni̱ gahui ango ángel chruhua nuhui nico nne xataꞌ. Ni̱ hué daj nicaj ango ángel daj ꞌngo̱ cera hua̱ nej. 18 Ni̱ rian altar gahui ango ángel. Ni̱ nicaj ángel daj sun rian yanꞌa̱n. Ngaa ni̱ gaguáj nucuaj ango ángel daj rian ángel nicaj gagaꞌ cera hua̱ daj. Ni̱ gataj ángel daj:

―Ga̱xiꞌi re̱ꞌ nga̱ cera hua̱ nicáj re̱ꞌ daj, ngaa ni̱ ga̱ꞌninꞌ re̱ꞌ ni rasu̱n ma̱n rian yoꞌój. Ni̱ gu̱ta re̱ꞌ ni uva gachij rian yoꞌój. Daj si hua guisíj gane uva daj. ―Daj gataj ángel daj.

19 Ngaa ni̱ gaꞌninꞌ ango ángel daj ni rasu̱n ma̱n rian yoꞌój nga̱ gagaꞌ cera. Ni̱ guta ángel daj uva gachij ma̱n rian yoꞌój. Ni̱ gara ángel daj uva chruhua ꞌngo̱ gagaꞌ xxi sisi̱ ga̱ni gagaꞌ daj uva, ni̱ ga̱hui nnee uva, gui̱ꞌyaj gagaꞌ daj. Ni̱ hué nuguanꞌ daj digyán da̱j aꞌman ruhua Yanꞌanj niꞌya ni ngüi̱ daꞌui gaquinꞌ. 20 Ni̱ ne̱ꞌ chrej xe̱ꞌ xumanꞌ daj gani ni sij uva. Ni̱ gahui nico tun chruhua gagaꞌ daj. Ni̱ guisíj ganun tun daj da gagaꞌ nu̱n duꞌua guayo. Ni̱ hua̱ꞌnij ciento kilómetro gachéj tun ganꞌan.