1 Ngaa ni̱ digyán ángel daj ꞌngo̱ xinéj nnee hua sa̱ꞌ riānj. Ni̱ nnee daj ꞌyaj si ga̱ne ni̱ganj ni ngüi̱ nga̱ Yanꞌanj. Ni̱ ran nnee daj da̱j rúnꞌ ran pidrio sa̱ꞌ. Ni̱ ahui nnee daj rian chrun xila sa̱ꞌ rian nne Yanꞌanj nga̱ xachij ꞌni̱j. 2 Ni̱ dani cayu xa̱chij ta̱j chruhua xumanꞌ daj niquinꞌ chrun ꞌyaj si ga̱ne ni̱ganj ni ngüi̱ nga̱ Yanꞌanj. Ni̱ niquinꞌ chrun da go̱ꞌngo duꞌua xinéj nnee daj. Ni̱ da yahui̱, ni̱ ayu go̱ꞌngo rian chruj. Ni̱ huin ruhuaj gata sisi̱ guisíj xu̱huij rian chruj ga̱yu chra̱ chrun daj guisíj ꞌngo̱ yoꞌ. Ni̱ níꞌyanj coj raꞌa chrun daj sisi̱ ga̱nahuin ni ngüi̱ ma̱n chruhua xungüi̱. 3 Ni̱ nitaj nuguanꞌ quij ga̱ chruhua xumanꞌ da ga̱ mánj. Ni̱ niquinꞌ chrun xila sa̱ꞌ rian nne Yanꞌanj nga̱ xachij ꞌni̱j xumanꞌ daj. Ni tsínj ꞌyaj sun rian Yanꞌanj, ni̱ gui̱ꞌyaj sun ni sij rian Yanꞌanj. 4 Ni̱ gui̱niꞌi ni sij rian manꞌan Yanꞌanj. Ni̱ gui̱nun si-xugüi Yanꞌanj yo ni sij. 5 Ni̱ si̱ guini̱ xumanꞌ daj. Ni̱ nitaj si ruhuaj sisi̱ gui̱xiguin yanꞌa̱n xumanꞌ daj. Ni̱ nitaj si ruhuaj sisi̱ gui̱xiguin, gui̱ꞌyaj güi. Daj si gui̱xiguin rian ni sij, gui̱ꞌyaj Yanꞌanj huin Señor. Ni̱ ni̱ganj ni̱nꞌ gui̱nicaj sun ni sij nga̱ Yanꞌanj.

6 Ngaa ni̱ gataj ángel daj gunūnj:

―Ni nuguanꞌ nan huin nuguanꞌ xa̱ngaꞌ yya. Ni̱ hué Señor huin Yanꞌanj huin achij niman ni tsínj aꞌmi si-nu̱guanꞌ Yanꞌanj. Ni̱ gaꞌníj Yanꞌanj ángel gaꞌna̱ꞌ sisi̱ di̱gyán ángel daj da̱j ga̱huin ráꞌyanj rian ni tsínj ꞌyaj sun rian Yanꞌanj. ―Daj gataj ángel daj.

7 Hue dan ni̱:

―Ráꞌyanj gui̱sī rian ma̱n án re̱ꞌ. ―Daj gataj Jesucristo gunun néꞌ.

Ni̱ hua ꞌueé rian tsínj unun sa̱ꞌ ni nuguanꞌ nun rian yanj libro nan huin nuguanꞌ ataj snanꞌanj da̱j ga̱huin nga̱ ni ngüi̱. 8 Huēj huin Juan. Ni̱ gunūnj ni nuguanꞌ nan. Ni̱ guiniꞌīnj ni rasu̱n nan. Ni̱ ngaa guisíj gunūnj, ni̱ guiniꞌīnj, ngaa ni̱ ganiquinꞌ ráj dacō rian ángel digyán ni rasu̱n daj riānj sisi̱ ga̱ꞌmi sa̱ꞌāj rian ángel daj. 9 Sani̱ gataj ángel daj gunūnj:

―Si̱ guiꞌyáj re̱ꞌ daj si huēj huin si ꞌyaj sun rian Yanꞌanj nga̱ re̱ꞌ nga̱ ni jnánj re̱ꞌ huin ni tsínj aꞌmi si-nu̱guanꞌ Yanꞌanj nga̱ ni tsínj dagahuin si ataj ni nuguanꞌ ꞌna̱ꞌ rian libro nan. Ga̱ꞌmi sa̱ꞌ re̱ꞌ rian urin manꞌan Yanꞌanj. ―Daj gataj ángel daj.

10 Ngaa ni̱ gataj ru̱huaꞌ yún ángel daj:

―Ni̱ si̱ garij hui̱ re̱ꞌ ni nuguanꞌ nu̱n rian yanj libro nan huin si-nu̱guanꞌ Yanꞌanj. Daj si ga̱huin ni̱chrunꞌ güi ga̱ꞌnaꞌ Jesucristo. 11 Xiꞌí daj ni̱ tsínj ꞌyaj gaquinꞌ, ni̱ ga̱ gue̱ gui̱ꞌyaj gaquinꞌ sij. Ni̱ tsínj ani quij ruhua, ni̱ ga̱ gue̱ ga̱ni quij ruhua sij. Sani̱ tsínj ꞌyaj ni̱ca, ni̱ ga̱ gue̱ gui̱ꞌyaj ni̱ca sij. Ni̱ tsínj hua sa̱ꞌ rian Yanꞌanj, ni̱ ga̱ gue̱ ga̱ sa̱ꞌ sij rian Yanꞌanj anj. ―Daj gataj ángel daj.

12 Hué dan ni̱ gataj Jesucristo:

―Ráꞌyanj gui̱sī rian ma̱n án re̱ꞌ. Ni̱ nicā si na̱ruꞌuē rian án re̱ꞌ. Ngaa ni̱ na̱ruꞌuē rian da go̱ꞌngo a ni é re̱ꞌ da̱j rúnꞌ guiꞌyaj go̱ꞌngo a ni é re̱ꞌ. 13 Huēj huin tsínj gu̱ꞌnaj Alfa nga̱ Omega. Daj si Alfa huin letra gaxi̱ꞌi asi̱j sini ya̱n. Ni̱ Omega huin letra nicoꞌ da ru̱cu. Ni̱ huēj huin tsínj niquinꞌ asi̱j sini ya̱n. Ni̱ huēj huin tsínj gui̱niquinꞌ ni̱ganj anj.

14 ’Ni̱ hua ꞌueé rian ni ngüi̱ naruꞌui si-ganꞌ sisi̱ ga̱ꞌue xa̱ ni sij chruj ayu chra̱ chrun ꞌyaj si ga̱ne ni̱ganj ni sij nga̱ Yanꞌanj. Ni̱ ga̱ꞌue ga̱tu ni sij rian hueꞌ duꞌua xumanꞌ daj. 15 Sani̱ ne̱ꞌ chrej xe̱ꞌ gu̱na ni tsínj ꞌyaj da̱j rúnꞌ ꞌyaj ni xuhue nga̱ ni tsínj ꞌyaj stuꞌuaj nej, ni tsínj ꞌyaj squi̱raꞌ nej, ni tsínj dagahuiꞌ níman nej, ni tsínj nicoꞌ yanꞌanj ꞌyaj raꞌa ni sij nga̱ daranꞌ ni tsínj nia̱ꞌ ruhua ga̱ꞌmi nuguanꞌ yya̱ nej.

16 ’Huēj huin Jesús. Ni̱ gaꞌnī ꞌngo̱ ángel niquinꞌ riānj gaꞌna̱ꞌ nataꞌ ni nuguanꞌ nan rian án re̱ꞌ huin ín re̱ꞌ ni ngüi̱ nicoꞌ manꞌānj ma̱n go̱ꞌngo xumanꞌ. Ni̱ da̱j rúnꞌ huin ꞌngo̱ yaꞌa̱ siu̱ coj, ni̱ hué daj huīnj rian rey David. Daj si huēj huin daꞌni̱ siꞌni̱ síꞌ. Ni̱ da̱j rúnꞌ huin ꞌngo̱ yatiꞌ sta̱nga niquinꞌ xigui̱n ngaa ruhua gue̱rengaꞌ, ni̱ hué daj xiguīnj rian xungüi̱. ―Daj gataj Jesús.

17 Hué dan ni̱ ataj Espíritu Santo nga̱ yunꞌunj xa̱na ga̱huin nica̱ Jesucristo:

―Ga̱huaꞌ re̱ꞌ aj. ―Gataj nu̱ngüej-éꞌ.

Ni̱ tsínj unun nuguanꞌ nan, ni̱ ga̱taj síꞌ:

―Ga̱huaꞌ re̱ꞌ aj. ―Ga̱taj síꞌ.

Tsínj nagoꞌo nnee, ni̱ ga̱ꞌnaꞌ sij. Ni̱ sisi̱ huin ruhua sij, ni̱ go̱ꞌo yu̱n sij nnee ꞌyaj si ga̱ne ni̱ganj sij nga̱ Yanꞌanj.

18 Ni̱ ataj chrūnj rian daranꞌ ni tsínj unun ni nuguanꞌ nu̱n rian yanj libro nan huin si-nu̱guanꞌ Yanꞌanj sisi̱ si̱ gutaꞌ ni sij chra̱ ni nuguanꞌ nan mánj. Daj si sisi̱ hué daj gui̱ꞌyaj ni sij, ngaa ni̱ ga̱ꞌnij Yanꞌanj sayun ga̱ꞌnaꞌ rian ni sij da̱j rúnꞌ hua ni̱ca rian libro nan. 19 Ni̱ sisi̱ hua ꞌngo̱ tsínj gaꞌnej ni nuguanꞌ nun rian yanj libro nan huin nuguanꞌ ataj da̱j ga̱huin ni güi ga̱ꞌnaꞌ, ngaa ni̱ ga̱ꞌne Yanꞌanj si-xugüi sij rian yanj libro ta̱j si-xugüi ni ngüi̱ ga̱ne ni̱ganj nga̱ Yanꞌanj. Ni̱ si̱ gaꞌue ga̱tu sij chruhua xumanꞌ hua sa̱ꞌ daj da̱j rúnꞌ hua ni̱ca rian libro nan mánj.

20 Hué dan ni̱ gataj Jesucristo huin tsínj aꞌmi ni nuguanꞌ nan:

―Xa̱ngaꞌ ni̱ ráꞌyanj gui̱sī rian ma̱n án re̱ꞌ. ―Daj gataj Jesús.

Ni̱:

―Amén. Ga̱huaꞌ re̱ꞌ Señor Jesús, ―ataj néꞌ.

21 Hué dan ni̱ huin ruhuāj sisi̱ Señor Jesús gui̱ꞌyaj sinduj rian án re̱ꞌ. Amén.