SULAT PA MANGA TAU PILIPI
PILIPI
Pahāti
Hi Paul in timagnaꞌ nagpaawn sin pagtipun-tipun sin manga Almasihin ha hulaꞌ Pilipi. Saꞌbu hi Paul ha lawm jīl ha waktu kapagsulat niya sin sulat ini. Lāgiꞌ ha lawm susa siya sabab awn manga kaibanan Almasihin in kimuntara kaniya, iban nasusa da isab siya pasal sin awn manga nanghinduꞌ sin hinduꞌ bukun kasabunnalan ha manga Almasihin ha Pilipi. Sagawaꞌ minsan biyaꞌ hādtu masi in kakuyagan hi Paul pasal sin hugut sin pangandul niya kan Isa Almasi. Pasampayan sila hi Paul sin manga hilalaungan makaparayaw sin atay nila minsan sila ha lawm susa. Pangayuun da isab hi Paul ha manga Almasihin sin subay sila magpababaꞌ sin atay nila biyaꞌ kan Isa. Hipatumtum kanila hi Paul sin in sila manga Almasihin ha Pilipi nakapaghambuuk iban hi Isa Almasi bukun pasal sin pagꞌagad nila sin manga saraꞌ daakan sin agama Yahudi, sagawaꞌ dayn ha sabab sin parachaya iban pangandul nila ha Almasi. Lāgiꞌ laung hi Paul in manga tau naghahambuuk iban sin Almasi dihilan sin Tuhan kakuyagan iban kasannyangan sin lawm atay. Hipaingat hi Paul ha manga Almasihin ha Pilipi in kasi-lasa niya kanila.
1
In sulat ini naug dayn kākuꞌ, hi Paul, iban sin iban ku hi Timuti. In kami ini karuwa īpun hi Isa Almasi. Hipasampay namuꞌ in sulat ini mawn kaniyu katān, manga sukuꞌ sin Tuhan nagparachaya kan Isa Almasi, duun ha hulaꞌ Pilipi, sampay da isab pa manga nakuraꞌ niyu iban sin manga kaibanan Almasihin timatabang sin manga hinang duun ha lawman niyu manga jamāa Almasihin.
Muramurahan bang mayan kamu dihilan sin Tuhan, Amaꞌ natuꞌ, iban Panghuꞌ natuꞌ Isa Almasi, tulung-tabang iban kasannyangan sin lawm atay niyu.
In Pagpangayuꞌ Duwaa Hi Paul
Magsarang-sukul aku pa Tuhan, amu in paghulas-sangsaan ku, ha pasal niyu sakahabaꞌ waktu katumtuman ta kamu. Iban makuyag in atay ku ha sakahabaꞌ waktu masabbut ta kamu bang aku mangarap pa Tuhan ha pasal niyu. Iban hangkan aku makuyag, pasal katumtuman ku in kaagi niyu nagtabang kākuꞌ nagpasaplag sin Baytaꞌ Marayaw ha pasal hi Isa Almasi. Lāgiꞌ in pagtabang niyu kākuꞌ dayn ha waktu pa sin tagnaꞌ niyu nagparachaya kan Isa sampay pa bihaun. Iban natatantu ku tuud sin in hinang marayaw, amu in iyukkil sin Tuhan duun ha pamikil niyu, diꞌ niya tuud bugtuun sampay pa adlaw pagbalik hi Isa Almasi mari pa dunya. Gam mayan talusun niya ha waktu sin pagbalik hi Isa. In kamu tattap ha lawm atay ku, hangkan patut da tuud kamu tumtumun ku, pasal in kamu yan miyagad kākuꞌ ha katān hinang kiyatukbal kākuꞌ sin Tuhan. Timabang tuud kamu kākuꞌ minsan aku yari najijīl, iban sin ha waktu ku namawgbug sin kasabunnalan, amu in kapagsambung-laung ku iban sin manga tau simulang sin Baytaꞌ Marayaw pasal hi Isa, iban da isab ha waktu ku nagpamahalayak sin Baytaꞌ Marayaw. Tuhan da in makaingat sin bunnal tuud in landuꞌ sin tumtum ku kaniyu katān. Karnaꞌ in lasa ku kaniyu biyaꞌ da sin lasa hi Isa Almasi kaniyu.
Pangayuun ku duwaa pa Tuhan bang mayan sumūng in kasi-lasa niyu ha pagkahi niyu. Damikkiyan bang mayan isab sumūng da in ingat niyu pasal pa Tuhan iban sin pagsilang niyu sin mangīꞌ iban marayaw, 10 ha supaya niyu kaingatan iban mahinang bang unu tuud in marayaw. Na, amuna yan in makatabang kaniyu, ha supaya ha adlaw pagbalik sin Almasi mari pa dunya, malanuꞌ in atay niyu. Wayruun tamak-tawktuk kabākan niya duun kaniyu. 11 Lāgiꞌ tattap da kamu huminang sin unuunu marayaw iban mabuntul kaagi sin tabang hi Isa Almasi kaniyu, ha supaya pudjihun sin tau iban sanglitun sin tau in Tuhan.
Simaplag in Baytaꞌ Marayaw dayn Ha Hinang Hi Paul
12 Manga taymanghud ku, mabayaꞌ ku hipaingat kaniyu sin marayaw sadja in guwaan sin unuunu katān pakaradjaan kimugdan kākuꞌ, sabab nakatabang kākuꞌ nagpasaplag sin Baytaꞌ Marayaw. 13 Minsan in manga sundalu amu in nagjajaga sin astanaꞌ sin sultan, in sila katān iban na sin kaibanan tau dī, kaingatan nila sin in aku najīl pasal sin pagbawgbug ku ha Almasi. 14 Iban kiyarayaw da isab in pagjīl kākuꞌ pasal nakarihil kusug ha pangandul sin kamatauran sin manga taymanghud natuꞌ ha Panghuꞌ, hangkan simūng na in tawakkal nila iban nalawaꞌ in bugaꞌ nila magnasīhat sin Parman sin Tuhan.
15 Bunnal awn kaibanan manga Almasihin, mangīꞌ in maksud nila sin pagpasaplag sin panghinduꞌ sin Almasi, pasal in sila ini maakig kākuꞌ iban mabayaꞌ sila tumaas dayn kākuꞌ. Sumagawaꞌ in kaibanan, bang sila magpasaplag sin panghinduꞌ sin Almasi, marayaw in maksud sin atay nila. 16 Iban in hikaruwa niya hangkan sila naghinang bihān, pasal sin malasa sila kākuꞌ. Kiyaiingatan nila sin in aku napīꞌ sin Tuhan mamawgbug sin Baytaꞌ Marayaw. 17 Sumagawaꞌ in kaibanan tau, amu in nasabbut ku nakauna, bukun marayaw in maksud nila nagpasampay sin panghinduꞌ sin Almasi. Mabayaꞌ sila dumayaw iban tumaas in hinang nila dayn kākuꞌ pasal in pangannal nila in hinang nila makarihil iban makaruhun sin kasusahan ku dī ha lawm jīl.
18 Malayngkan minsan biyaꞌ ha yan in hinang nila, diꞌ da aku maghaatay. Gam mayan makuyag aku sin hīhinang nila, minsan da mangīꞌ, atawa marayaw in maksud nila, minsan biyaꞌ diin, bang mayan in hipagnasīhat nila wayruun da dugaing dayn kan Isa Almasi. Lāgiꞌ magsusūng in kakuyagan ku 19 pasal kiyaiingatan ku sin in aku malappas da pasal sin pagpangayuꞌ niyu kākuꞌ duwaa pa Tuhan iban dayn ha tulung-tabang kākuꞌ sin Rū sin Tuhan, amu in piyatulun kaniyu pasal hi Isa Almasi. 20 Iban in kabayaan ku tuud iban piyapangayuꞌ suhud pa Tuhan bang mayan aku diꞌ masipug ha pangitaꞌ sin Tuhan. Iban bang mayan diꞌ mabugtuꞌ in tawakkal ku magnasīhat ha unuunu waktu, awla na ha waktu bihaun. Iban diꞌ aku maghaatay minsan aku mabuhiꞌ atawa mapatay bang mayan karihilan ku kalagguan in Almasi, pasal asal ku siya liyalagguꞌ dayn sin tagnaꞌ. 21 Karnaꞌ bang dīhun kākuꞌ, marayaw da isab in buhiꞌ aku, pasal mahinang ku in unuunu katān, amu in makarihil kalagguan ha Almasi. Sumagawaꞌ labi pa isab marayaw bang aku mapatay. 22 Malayngkan, bang mataud in mahinang ku marayaw kan Isa ha salugay ku buhiꞌ, na, diꞌ ku na kaingatan bang unu tuud in marayaw pīun ku, kabuhiꞌ ka atawa kamatay. 23 Na, nagꞌuutung-bisud in pikilan ku ini. Mabayaꞌ na tuud aku mamutawan dayn ha dunya ini pasal amuna tuud ini in labi marayaw, karnaꞌ magtuy na aku kaukuman sin Almasi. 24 Sumagawaꞌ dayn ha pasal niyu, marayaw pa isab hātiku in dimī na muna aku ha dunya, ha supaya aku makatabang kaniyu. 25 Na, sabab sin kagunahan niyu aku, hangkan bihaun tantu na tuud in pikilan ku sin dimī na muna aku kaniyu, ha supaya aku makatabang kaniyu magpasūng sin pagparachaya niyu, iban makatabang dumugang sin kakuyagan niyu, amu in bunga sin pagparachaya niyu. 26 Hangkan bang aku makabalik na mawn kaniyu, sumūng in pagsanglit niyu kan Isa Almasi, sabab dayn ha pasalan sin manga nahinang niya kākuꞌ.
27 Sumagawaꞌ in labi awla marayaw hinangun niyu bihaun, subay kamu sumangun sin palangay iban addat-tabīat, amu in matūp ha manga tau amu in agad ha Baytaꞌ Marayaw pasal sin Almasi, ha supaya makakawn na ka aku magbalik kaniyu atawa diꞌ, karungugan ku da mayan sin masi niyu giyugunggungan in Īman niyu. Sartaꞌ karungugan ku da isab in kamu hangka atay iban hangka pikilan ha maksud niyu mamawgbug sin Baytaꞌ Marayaw pasal sin Almasi. 28 Ayaw kamu mabugaꞌ ha manga tau simusulang kaniyu. Pataptapa niyu in atay niyu, pasal bang niyu mahinang in biyaꞌ ha ini, na amuna yan in magpakitaꞌ ha manga tau simusulang kaniyu sin masiksaꞌ sila ha waktu susūngun. Ampa in kamu malappas dayn ha kasiksaan, pasal Tuhan in lumappas kaniyu. 29 Karnaꞌ in kamu yan dihilan sin Tuhan kalagguan maghulas-sangsaꞌ ha Almasi. Hangkan in pagꞌagad niyu ha Almasi bukun sadja ha magparachaya kaniya, sagawaꞌ magad isab kamu numanam kabinsanaan dayn ha pasal niya. 30 Lāgiꞌ, in kamu iban aku sama-sibuꞌ limabay kabinsanaan pasal sin pagbawgbug natuꞌ ha Almasi. Iban biyaꞌ na sin kiyarungugan niyu in kabinsanaan kimugdan kākuꞌ sin nakalabay amu in kītaꞌ niyu, amura isab in kabinsanaan niyananam ku bihaun.