1 Reve adanshi a Sama'ila a̱ ta̱wa̱ e ekere a aza a Isra'ila suru.

A mantsa mo ndolo, aza a Isra'ila o foɓo o uta̱ tsa̱ra̱ a̱ ꞌya̱wa̱a̱ aza a Filistiya nu uvon. Reve aza a Isra'ila a̱ va̱la̱ Ebeniza, reve aza a Filistiya a̱ va̱la̱ a Afe. 2 Reve aza a Filistiya e gere adama o uvon. Ana a yuwain uvon wu usuɗuwu, reve a lyuwa aza a Isra'ila nu uvon, reve o una ama ukpakukupa una̱shi (4,000) uba̱ta̱ wu uvon. 3 Ana a̱soja a Isra'ila a̱ ka̱mba̱i o uva̱la̱ta̱, reve mbara ma aza a Isra'ila e ece, <<Nye i zuwai A̱sulazuva a lyawai aza a Filistiya a lyuwa ntsu ana'an? Lyawai tsu ta̱wa̱ na Akpati a Nzuwulai a̱ A̱sulazuva pa nda za na ri Shilo, adama u 'ya̱wa̱ oɓolo na̱ a̱ tsu waru u wawa tsu e ekere a n'yuwatan n tsu.>>

4 Reve a̱ lyungu ama a̱ 'ya̱wa̱ Shilo, a̱vu a̱ ta̱wa̱ na̱ Akpati a Nzuwulai a̱ A̱sulazuva o oɓolo a̱ a̱soja a̱ zuva, za na ri nden a̱ memere me ikerobobi. Olobo e re a Eli, Hofini na̱ Finiha, a̱ shi ta̱ oɓolo na Akpati a Nzuwulai a̱ A̱sula̱'a̱.

5 Ana Akpati a Nzuwulai a̱ A̱sulazuva a̱ ta̱wa̱i a̱tsuma̱ o uva̱la̱ta̱, reve aza a Isra'ila suru o oruwo lon adama a̱ ma̱za̱nga̱ hali iɗa i jinga̱ɗa̱. 6 Ana aza a Filistiya a uwwai yorori a̱vu a damma, <<Nye i ɗa i ta̱wa̱i na̱ yorori i nda lon o uva̱la̱ta̱ wu mmaci ma Ibrahim?*4:6 Mmaci ma Ibrahim ala a ɗa ana n'yuwatan ma aza a Isra'ila e ɗewe yi nle a mantsa ma a nda.>> Ana a uwwai a na Akpati a̱ A̱sulazuva a ɗa a̱ ta̱wa̱i a̱tsuma̱ o uva̱la̱ta̱, 7 reve wovon u reme aza a Filistiya'a. Reve a damma, <<Musula̱ a̱ ta̱wa̱ ta̱ a̱tsuma̱ o uva̱la̱ta̱'a̱.>>

A̱vu a damma, <<Addama a cina tsu ta̱, adama a na koto a yuwan cu'un vi ili tsunda shi. 8 A̱tsuma̱lima̱ a cina tsu ta̱, zane ɗa aa wawa tsu e ekere a̱ musula̱ mu ucira n nda? Ele ɗa musula̱ n na n lapai aza a Masar na̱ cu'un vu mɓa̱la̱ suru a̱tsumona. 9 A̱ɗu aza a Filistiya, gbamai okolo yo o ali adama yo o'wo agbashi a mmaci ma Ibrahim a nda cine a̱ shi agbashi a̱ ɗu wan. Yuwain ali, i yuwan uvon!>>

10 Reve gba aza a Filistiya a yuwan uvon lon, reve a lyuwa aza a Isra'ila. A̱vu vuma suru suma a̱ ka̱mba̱ o oogodo a̱ yi. O una ta̱ ama a̱bunda̱ lon. Aza a Isra'ila a lamba ta̱ a̱soja a ana a na a̱ da̱na̱i a ana ukpakukupa mataꞌatsu (30,000) o urana u ndolo. 11 A usa ta̱ Akpati a Nzuwulai a̱ A̱sula̱. Reve waru o una olobo e re a̱ Eli, Hofini na̱ Finiha.

12 A̱vu vuma ro o ugundo wa Banyami suma diga uba̱ta̱ wu uvon, a̱vu u ta̱wa̱ Shilo o urana u ndolo'o na̱ a̱tugu a̱ yi wu karu na̱ ma̱buta̱ aaci a̱ yi, adama u roco wo a̱tsuma̱la̱ngu. 13 Ana u rawai, Eli da̱na̱ ta̱ lo nden o ootogu a̱ yi a̱ nge'en mu ure a̱ ka̱lyuwusa̱, adama a na okolo a̱ yi a̱ da̱na̱ ta̱ e meje'en adama a gbaga va Akpati a Nzuwulai a̱ A̱sula̱. Ana vuma'a u uwai a̱ lyuci'i, a̱vu u ca aalabari'i. A̱vu lyuci'i suru gidu'wa̱ na̱ mesun.

14 Ana Eli uwwai uɗyo u mesun, a̱vu we ece, <<Nye i ɗa i zuwai mesun ma̱ 'yoyin ne tsunda?>>

Reve vuma'a u jika̱ u 'ya̱wa̱ ya̱ Eli, 15 za na da̱na̱i na a'wan kupakucci na̱ kunla̱, waru esu a̱ yi o o'woi ga̱nda̱ ga̱nda̱ u tse ene shi. 16 A̱vu vuma'a u damma Eli, <<Gogo nda ɗa n ka̱mba̱i diga uba̱ta̱ wu uvon, waru ana'an n suma ta̱ diga ɗe.>>

Reve Eli ece yi, <<Nye i ɗa i farai, ulobo u va̱?>>

17 Reve malingata'a ma̱ usu, <<Aza a Isra'ila a sumaa ta̱ aza a Filistiya, o una ta̱ a̱za̱ o uvon na̱ a̱bunda̱. Waru olobo e re a̱ wu Hofini na̱ Finiha a̱ kuwa̱ ta̱. Waru a usa ta̱ Akpati a Nzuwulai a̱ A̱sula̱.>>

18 Ana wu uwwai a̱ ɗeyi aala a Akpati a Nzuwulai a̱ A̱sula̱, a̱vu Eli riya̱ melene diga o ootogu a̱ yi uba̱ta̱ u na u da̱na̱i nden e nge'en mo una̱ntsutsu u lyuci. A̱vu yinlu ya̱ yi i kuɗa reve u kuwa̱, adama a na u kutsa ta̱ waru u ta̱ mgbain. U yuwan ta̱ tsugbain tsa aza a Isra'ila a'wan amunga.

19 Jene va̱ yi, ka va Finiha da̱na̱ ta̱ na̱ a̱tsuma̱ ukotu azama limatan. Ana wu uwwai alabari a na a usa ta̱ Akpati a Nzuwulai a̱ A̱sula̱ na alabari a̱ a̱sha̱wa̱le na̱ vali va̱ yi a̱ kuwa̱ ta̱, ɗaɗa mɓa̱la̱ m limatan n reme niyi, reve u da̱nu teri a̱vu u matsan. 20 A̱yi azama u kuwa̱, a̱vu a̱ma̱ci a na a̱ ri uɓa̱nu na̱ a̱yi a damma yi, <<She vu uwwa wovon wan, vu matsan ta̱ ulobo.>> Agba u usu ko u ka̱mbuwa̱ ugbozu shi.

21 Reve u ca ulobo'o aala Ikabo†4:21 Urevu wi idanshi i nda na̱ Tsuyahuda a̱ yi ɗa <<Tsugbain tsa lo shi.>>, a dansa, <<Tsugbain tsa kasa ta̱ na̱ Isra'ila.>> Adama a na a usa ta̱ Akpati a Nzuwulai a̱ A̱sula̱ a̱ tyo we e iɗa yo omocin nu ukwa̱ wa̱ a̱sha̱wa̱le na̱ vali va̱ yi. 22 A̱vu u damma, <<Tsugbain tsa kasa ta̱ na̱ Isra'ila, adama a na a usa ta̱ Akpati a Nzuwulai a̱ A̱sula̱ a̱ tyo we e iɗa yo omocin.>>