1 A̱vu a ama a Zif a̱ 'ya̱wa̱ uba̱ta̱ wa Shawulu ɗe Gibiya a̱vu a damma yi, <<Da̱wuda ta̱ ɗe uva̱pu agaɗi a Hakila, za na a̱ ka̱lyuwusa̱ Jeshimon.>>*26:1 Ka̱lyuwa̱: Ica 54 Aciya adanshi e ishipa.

2 Ɗaɗa Shawulu ka̱ra̱i a̱cipa̱ a̱ tyo A̱tsumona a Zif oɓolo na ali o uvon ukpakukupa uta'atsu (3,000) aza a Isra'ila a na u ɗangulai, adama a zami ɗe Da̱wuda. 3 A̱vu Shawulu yuwan uva̱la̱ta̱ wa̱ yi zuzu nu ure zuva va aagaɗi a Hakila a̱ ka̱lyuwusa̱ Jeshimon, amma Da̱wuda da̱na̱ ta̱ nden a̱tsumona'a. Ana wu uwwai ana Shawulu ta̱wa̱ ta̱ izami ya̱ yi, 4 a̱vu u lyungu aza a na aa tawa utyo, a̱vu gba e ene amayun a ɗa Shawulu ta̱ lo oɓolo na ali o uvon yi.

5 Reve Da̱wuda 'yon u 'ya̱wa̱ uba̱ta̱ u na Shawulu va̱la̱i, a̱vu we ene uba̱ta̱ u na Shawulu na̱ Abna ulobo wa Ner, yali ya̱ a̱soja a̱ yi, o voyin. Shawulu da̱na̱ ta̱ pe nven e memere mo uva̱la̱ta̱, reve ali o uvo'on o von uka̱nda̱ruwu na̱ a̱yi a nlavu.

6 Reve Da̱wuda damma Ahimele za va Hitiya, na̱ Abishai mawun ma̱ a̱na̱wu ma Yowab za na mma le ɗa Zeruya, <<Zane ɗa a̱ kuru mu a̱ 'ya̱wa̱ o uva̱la̱ta̱ uba̱ta̱ wa Shawulu?>>

A̱vu Abishai usu, <<N ta̱ 'ya̱wa̱ oɓolo na̱ a̱vu.>>

7 Ɗaɗa Da̱wuda na̱ Abishai a̱ 'ya̱wa̱i o uva̱la̱ta̱ wa Shawulu na ayin, a̱vu a cina yi a nlavu, ni ibata ya̱ yi usapu e iɗa zuzu na aaci a̱ yi. Abna gba oɓolo na akapi ali o uvo'on a̱ da̱na̱ ta̱ nven uka̱nda̱ruwa̱ na̱ a̱ yi.

8 Reve Abishai damma Da̱wuda, <<Ana'an A̱sula̱ a ca ta̱ ma'yuwatan ma̱ wu o ukere wa̱ wu. Gogo lyawa mu n ya̱wa̱ n sapa yi usapu u ta̱ ni ibata ya̱ yi n ɓolo yi ni iɗa, n ciga n sapa yi ure shi.>>

9 Amma a̱vu Da̱wuda damma Abishai, <<She vu una yi wan! Zane ɗa a̱a̱ 'ya̱sa̱n ukere u ju'wa̱n vuma na A̱sulazuva a tawai a̱vu u da̱na̱ babu unusu?>> 10 A̱vu Da̱wuda damma, <<N kucuna ta̱ na̱ A̱sulazuva a na a̱ ri wuma, A̱sulazuva na aciya̱yi a̱yi ɗa woo kototo yi, ko urana wa̱ yi u ta̱wa̱ a na wa̱a̱ kuwa̱, ko u 'ya̱wa̱ uba̱ta̱ o uvon a̱vu u kuwa̱ ɗe. 11 Amma A̱sulazuva a paraa mu n 'ya̱sa̱n ukere u va̱ n ju'wa̱n za na A̱sulazuva a̱ tsuwa̱yin mani'in. Gogo vu tara ibata i na i ri uba̱ta̱ a aaci a̱ yi na̱ medele ma̱ mini a̱vu vu ta̱wa̱ tsu wala.>>

12 Ɗaɗa Da̱wuda tarai ibata na̱ medele ma̱ mini ma na ma̱ ri zuzu na aaci a Shawulu, reve a̱ ka̱ra̱. Babu za na ene nle ko revei ili i na i farai, ko za ro juwan, adama a na suru nle nlavu ma̱ a̱ru'un diga uba̱ta̱ wa̱ A̱sulazuva ma̱pura̱ le ta̱.

13 Reve Da̱wuda ka̱ra̱ a̱ tyo mavada mo uka̱ri ma̱ ndeɗe, a̱vu u kumba aagaɗi o ro za na ri akasu nu uba̱ta̱ u na Shawulu no oɓolo ali o uvon a̱ yi ri. A̱ba̱jini agalaci a̱ da̱na̱ ta̱ e memere me ele. 14 A̱vu Da̱wuda salaa ali o uvon na̱ Abna ulobo wa Ner, a̱vu u damma, <<Vu ta uwusa mu Abna?>>

Reve Abna usu, <<Zane ɗa a̱vu za na e ɗesu a damatosun mogono tsun nda?>>

15 Reve Da̱wuda damma Abna, <<A̱vu vali ɗa, ko ne ɗa shi? Zane ɗa ri tsa̱ wu a̱tsuma̱ ali o uvon a Isra'ila? Nye i zuwai vu piriyi zagbain va̱ wu mogono ulobonu shi? Adama a na za ro ta̱wa̱ ta̱ adama wu una mogono zagbain va̱ wu. 16 Ili i na vu yuwain u lobono shi. N kucuna ta̱ na̱ A̱sulazuva a na a̱ ri wuma, a̱vu na ali o uvon a̱ wu i 'yuwan i kuwa̱, adama a na i piriyi zagbain ɗu ulobonu shi, za na A̱sulazuva a̱ tsuwa̱yin mani'in. Ka̱lyuwa̱i a̱ te ɗa ibata i mogono na̱ medele ma̱ mini ma na ma̱ ri zuzu na aaci a̱ yi?>>

17 Shawulu reve ta̱ uɗyo wa̱ Da̱wuda a̱vu u damma, <<Uɗyo wa̱ wu u ɗa nda'a ulobo u va̱ Da̱wuda?>>

A̱vu Da̱wuda usu, <<Ee a̱mu ɗa zagbain va̱ mogono.>> 18 A̱vu Da̱wuda lyuwa elime na adanshi u damma, <<Nye i zuwai zagbain va̱ a gbagbusa aagbashi a̱ yi? Nye i ɗa n yuwain, waru iwuya i ne ɗa i ri e ekere a̱ va̱? 19 Gogo lyawa zagbain va̱ mogono ma uwwa adanshi a aagbashi a̱ yi. Ko na̱ shi A̱sulazuva a ɗa a zuwa nuwu vu yuwan upan adama a̱ va̱, to lyawa u ushi kucci. Amma na ama ɗa a zuwai, lyawa a yuwaan le una̱ a̱ ma̱ka̱ka̱n ma̱ a̱ A̱sulazuva! Adama a na a̱ gba̱ra̱ mu ta̱ ana'an adama a na ma̱ tsura̱ akunda a̱tsuma̱ agadu A̱sulazuva, a dansaa, <Ya̱wa̱ vu yuwaan musula̱ n ro a̱ga̱nda̱.> 20 Gogo she vu lyawa mpasa n va̱ mo oco e iɗa alanga na̱ ma̱ka̱ka̱n ma̱ A̱sulazuva wan. Nye i zuwai mogono ma Isra'ila ma̱ ri ya̱ izami i na wo una aakupa tsa a̱ va̱? Cine tsu ɗa va yuwan ugenge u va̱ tsa matsulu a nsasan?>>

21 Ɗaɗa Shawulu dammai, <<N yuwan ta̱ unusu, ka̱mba̱ Da̱wuda ulobo u va̱, ma yuwan wu iwiya waru shi, adama a na vu tara ta̱ wuma u va̱ na̱ a̱ɓula̱ ana'an. Amayun n yuwan ta̱ tsulo, waru ni ili yu uwuyanu lon!>>

22 A̱vu Da̱wuda usu, <<Apa nda ibata i mogono, lyawa za ta̱ a̱tsuma̱ ali o uvon a̱ wu u ta̱wa̱ u ushi yi. 23 A̱sulazuva a tsu zuwaa ta̱ koyan aba'un o una̱ wa̱ a̱ɓula̱ a̱ yi na amayun a̱ yi. A̱sulazuva a ca wu ta̱ e ekere a̱ va̱ ana'an, amma ma̱a̱ 'ya̱sa̱n ukere n ju'wa̱n za na A̱sulazuva a̱ tsuwa̱yin mani'in shi. 24 A̱yi ɗa nda, cine wuma wa̱ wu u ri ulobonu ana'an e esu a̱ va̱, ne ɗa lyawa wuma u va̱ u da̱na̱ ulobonu o urewesu wa̱ A̱sulazuva, waru lyawa u wawa mu a̱tsuma̱ a addama suru!>>

25 Ɗaɗa Shawulu dammai Da̱wuda, <<Lyawa vu da̱na̱ na aba'un ulobo u va̱ Da̱wuda, vu ta yuwan ili na̱ a̱bunda̱ waru na amayun vu ta lyuwa aci e le.>>

Ɗaɗa Da̱wuda remei ure wa̱ yi, a̱vu Shawulu ka̱mba̱ o u'wa.