Aatagada a vumava̱sula̱
Haba̱ku
Ucuɗuwu wa aatagada a nda
Babu za na revei mantsa ma na a ɗanai aatagada a nda. Haba̱ku yuwan ta̱ alajiya a a'wan ukpakucindere (700) kafu a matsan Yesu, a rana vu ukosu u tsugono tsa Yahuda babu na u riya̱i e ekere o mogono ma Babila.
Mantsa suru a ama a̱ ta̱ yeci nye i zuwai A̱sula̱ a lyawusa ama a vama a lyuwa aci ama a̱ɓula̱. Ili'i u ɓa̱la̱ ta̱ Haba̱ku lon, hali we ece A̱sulazuva adama a̱ nye ɗa tsugono tsi iwuya ya Babila a lyuwusa elime, hali o kototosu aza a na a la'a nle a̱ɓula̱. U dama ta̱ lon adama wu uwwa usuwu u yeci'i. Agba A̱sulazuva a̱ usu yi ta̱ u damma, n ta̱ ge'eto za suru, amma a̱za̱ a̱ a̱ɓula̱ a ta la'a o una̱ wu ucawu wo okolo e le. U'usuwu u nda u kamba ta̱ Haba̱ku o una̱ wa amayun a na u ri na̱ yi e ifoɓi i na A̱sulazuva a yuwain adama a rana vi iwuya na we enei lo a̱ ta̱wa̱.
Akapi adanshi e ikaka i na i ri pe a̱tsuma̱ a aatagada'a u ta̱ adama o uge'etosu wa̱ a̱za̱ o ulambu wa̱ a̱ɓula̱. O ukosu vumava̱sula̱ Haba̱ku ca ta̱ usuwu wa amayun a̱ yi adanshi A̱sulazuva a̱tsuma̱ e ishipa yi ica ya̱ A̱sula̱.
Ili i na i ri pe:
Adanshawuya a Haba̱ku nu usuwu wa adanshi A̱sulazuva 1:1-2:4
Uge'etosu wa̱ a̱za̱ o ulambu wa̱ a̱ɓula̱ 2:5-20
Avasa Haba̱ku 3:1-19
1
1 Apa ikaka i na Haba̱ku vumava̱sula̱ e enei a̱tsuma̱ alavu alavu.
Mesun ma Haba̱ku
2 A̱sulazuva, hali mantsa ma̱ ne ma ɗa,
mee showen wu adama e ikambishi,
agba vaa zuwaa mu atsuvu shi?
N yuwusan ta̱ mesun kuci
adama o u'ya̱susa̱n wu ugbozu,
agba vu wawa shi?
3 Nye i zuwai vu lyawa numu
eneshe ulambu wa̱ a̱ɓula̱?
Nye i zuwai vu ri a̱ a̱ka̱nla̱ e iwuya?
Ukototosu nu u'ya̱susa̱n wu ugbozu n ta̱ elime a̱ va̱.
Mawasan na̱ nronuloi n 'yon ta̱.
4 Adama o ndolo wila̱ u ri nu ucira shi,
waru amayun a buwa o ulinga shi.
A̱za̱ e iwuya a̱ ka̱nda̱ruwa̱ ta̱ a̱za̱ a̱ a̱ɓula̱,
adama a vadala amayun.
U'ususu wa̱ A̱sulazuva
5 Reve A̱sulazuva a damma,<<Ka̱lyuwa̱ nɗa vee e ene,
vu ta yuwan asalama lon,
adama a na n ta yuwan ili i ro
a rana wuma wa̱ wu,
zana ko na̱ shi a damma wu
va̱a̱ usu shi.1:5 Ajy 13:41.
6 N ta̱ 'ya̱susa̱n aza a Babila,
iɗa yu usuɗuwu nu ujaru fo,
aza a na a̱ ri a mmalu
uba̱ta̱ suru a̱tsuma̱ o uvaɗi
a ususa ba̱ta̱ vu nden n na ri a̱za̱ e le shi.1:6 2 Ngo 24:2.
7 Ele ili i wovon i ɗa ni ili yi ilaɗi,
a ta yuwusaan aciyele uge'etosu cine a cigai.
8 Ido i le i la'a ta̱ ta̱su ilaɗi,
asuvu usuɗuwu u le u la'a ta̱ nkerenkesu n na n ri na ambulu,
akumbi e ido e le a̱ tsu ta̱wa̱ ta̱ na afalu.
Akumbi e ido e le a̱ tsu ta̱wa̱ ta̱ diga uba̱ta̱ wa alanga,
a̱ tsu zura̱ ta̱ tsa̱ a̱a̱kuru a na a cigai a̱ ka̱ɗa̱.
9 Suru nle a̱ tsu ta̱wa̱ ta̱ adama o u'ya̱susa̱n wu ugbozu.
A ta uwwusa wovon u le babu na a rawai.
O tsu ɓoloto ta̱ agbashi cine vu revei wuyun.
10 A tsu lamaa ta̱ ngono,
reve o zo'oso azagbain.
O tsu zo'oso ta̱ fo
ilyuci i na i ri nu ukari wu ucira suru,
a tsu ɓoloto ta̱ ma̱bula̱ reve a kumba a lyuwa yi.
11 A̱ tsu ka̱ra̱ ta̱ tsu upepu,
a lyuwa elime,
ozo o unusu a ɗa,
aza a na ma̱sula̱ ma̱ le a̱yi ɗa ucira u le.>>
Haba̱ku da̱shi ta̱ showen A̱sulazuva
12 A̱sulazuva, a̱vu ɗaɗa vu ri hali hali!
A̱sula̱ a̱ va̱, za va akiza, tsa̱ kuwa̱ shi.
A̱sulazuva,
a̱vu ɗa vu zuwa nle e ge'etosu.
A̱vu Aatali, a̱vu ɗa vu zuwa nle a ca tsu a̱tsuma̱lima̱.
13 Esu a̱ wu a̱ ta̱ na akiza lon
vaa gura ka̱lyuwa̱ iwuya shi,
vu tsu ciga vu ka̱lyuwa̱ unusu shi.
Cine tsa ɗa va̱a̱ ka̱lyuwusa̱ aza a na aa yuwusan iwuya?
Cine tsa ɗa vu rungwa̱i a̱za̱ e iwuya kpaku
o soɗusu aza a na a la'a nle a̱ɓula̱?
14 Vu yuwan ta̱ ama
tsa mugula a̱tsuma̱ a mala,
tsi ili i wuma i mala
i na i ri na̱ zagbain shi.
15 N'yuwatan n tsu reme le ta̱ na̱ gon,
reve o uta̱a̱ le alanga ni igolo,
o tsu ɓoloto le ta̱ a̱ agaso e le,
a̱vu a yuwan mere na̱ ma̱za̱nga̱.
16 Adama o ndolo a tsu yuwaan ta̱ igolo i le kucci,
reve a yuwaan agaso e le a̱tsuka̱ a̱ ma̱guru.
Adama a na e le ɗa a̱ ta̱wa̱a̱ nle nu utsuru
ni ilyalya ya̱ a̱bunda̱.
17 A ta lyuwa elime a̱ za̱la̱sa̱ igolo i le?
O kototosu nɗa babu ene iliyali hali hali?