1 Reve A̱sulazuva a yuwan adanshi na̱ Musa u damma, 2 <<Tara Haruna oɓolo no olobo a̱ yi na̱ a̱tugu a tsuganu tse le, na̱ mani'in mo utsusun no oogono a nan a̱ kucci vu unusu na̱ a̱giri'i e re na aasaka o opopofu a na a̱ ri na̱ wolilo shi. 3 Reve vu ɓoloto ama suru o una̱ntsu wo Oogodo o Uga'asusan.>> 4 Reve Musa yuwan cine A̱sulazuva a zuwa niyi u yuwan. Reve ama o ɓoloto o una̱ntsu wo Oogodo o Uga'asusa'an.

5 Ɗaɗa Musa dammai ama'a, <<A̱yi nda a̱yi ɗa ili i na A̱sulazuva a zuwai a yuwan.>> 6 Reve wu uta̱a̱ Haruna no olobo a̱ yi elime, a̱vu u sumba̱ le na̱ mini. 7 Reve wo oto Haruna utugu wu uga'an, reve wu nla̱a̱ yi gbakala e ikyun. A̱vu wo oto yi utugu, na̱ ma̱tugu ma̱ epo. Reve wu nla̱a̱ yi gbakala vu uɗavu wu ukere ulinga wu ɗavi adama u guza̱ yi ulobonu. 8 Reve u sa̱ga̱da̱wa̱ yi oosonu a̱ ma̱ka̱ka̱n, reve u zuwa Urim na̱ Tumim pe. 9 Reve u katala yi ookokolo a tsuganu a aaci. Reve u zuwa ɗe ma̱pa̱ta̱ta̱ ma zinariya ma̱ cin o ookokolo'o, ookokolo a akiza, cine A̱sulazuva a zuwai.

10 Reve Musa tara mani'in mo utsusun reve u tsun a̱a̱'isa̱ ni ili i na i ri pe suru, a̱vu u tawa le oo o'wo na akiza. 11 Reve wu kyo'onu masa'a mani'in toto ucindere. A̱vu u tsuwa̱n masa'a ni itana i na i ri pe suru na aasa'atsu nu ukuruwa̱ta̱ wa̱ yi adama u tawa le oo o'wo na akiza. 12 Reve u tsuwa̱n Haruna mani'in a aaci adama a tawa yi na akiza. 13 Reve Musa ta̱wa̱ no olobo a Haruna a̱vu wo oto le a̱tugu, reve wu nla̱a̱ le igbakala a̱ nkyun n le. Reve wo oto le okokolo a tsuganu, cine A̱sulazuva a zuwai Musa.

14 Reve u ta̱wa̱ no oogono a nan a̱ kucci vu unusu. Reve Haruna no olobo a̱ yi a̱ kuru ekere e le a aaci a na'an. 15 A̱vu Musa paɗa yi, a̱vu kene mpasa, reve u daɓa mpasa'a na aakatsu a̱ yi u putala yi a avana a masa'a'a adama wo o'woto yi na akiza. Reve u tsun akapi a mpasa'a e ikyun i masa'a'a, a̱vu u tawa yi na akiza adama a matara mo ume mo unusu. 16 A̱vu Musa foɗo abaji a mani'in ma na ma palai iliya̱tsuma̱ suru nu upasu wa assuvu u na u la'ai ulobonu na a'ilu e re na̱ mani'in me ele, reve u kula̱to le a masa'a'a. 17 Amma a̱vu u kula̱to oogono a na'an nu ukwan wa̱ yi ni inama ya̱ yi na̱ a̱ya̱n a̱ yi o ucina̱ wu uva̱la̱ta̱'a̱, cine A̱sulazuva a zuwa niyi u yuwan.

18 Reve u ta̱wa̱a̱ na̱ a̱a̱giri'i a̱ kucci vu ukula̱tosu. A̱vu Haruna no olobo a̱ yi a̱ kuru ekere e le a aaci a̱ a̱a̱giri'i'i. 19 Ɗaɗa Musa paɗa niyi, reve u kyo'onu mpasa'a e eɓele a masa'a'a suru a̱ ka̱nda̱ruwa̱. 20 Reve wu paɗa a̱a̱giri'i'i mupaɗi mupaɗi, a̱vu u kula̱to aaci oɓolo na̱ mupaɗi'i na̱ mani'in. 21 Reve wu za̱'wa̱ iliya̱tsuma̱ na ana na̱ mini. Reve u kula̱to a̱a̱giri'i'i suru a masa'a'a, kucci vu ukula̱tosu, ili i ma̱guru mo uyo'o, kucci na a yuwayin A̱sulazuva va akina, cine A̱sulazuva a zuwai Musa.

22 Reve u ta̱wa̱ na̱ a̱a̱giri'i e ire, za vu ukatalasa u tsuganu. Reve Haruna no olobo a̱ yi a̱ kuru ekere e le a aaci a̱ a̱a̱giri'i'i. 23 Reve Musa paɗa yi. A̱vu u kene mpasa'a a̱vu u daɓa e lege vu utsuvu vu usa'ani wa Haruna na a aakatsu a gbain o ukere u sa'ani wa̱ yi na a aakatsu a gbain a anana o usa'ani wa̱ yi. 24 Reve u ta̱wa̱ no olobo a Haruna, reve u daɓa mpasa e nlege ma atsuvu o usa'ani e le na a akatsu a gbagbain e ekere a sa'ani e le na a akatsu a gbagbain a ana a sa'ani e le. A̱vu Musa kyo'onu mpasa n na m buwai e eɓele a masa'a'a suru a̱ ka̱nda̱ruwa̱. 25 Reve u tara mani'i'in na̱ wizan u mani'in na abaji a mani'in ma na ma palai iliya̱tsuma̱ suru, nu upasu wa assuvu u na u la'ai ulobonu, na a'ilu e re'e oɓolo na̱ mani'in me le, oɓolo na aagutsu o usa'ani. 26 Diga pe a aasaka o opopofu a na a̱ ri na̱ wolilo shi za na ri a̱ ma̱ka̱ka̱n ma̱ A̱sulazuva, u tara ta̱ oopopofu a̱ ta̱ na̱ za na a yuwain na̱ mani'in ne emeshen. Reve u kuru le a mani'i'in na a aagutsu o usa'ani'i. 27 Reve u zuwa le suru e ekere a Haruna no olobo a̱ yi. Reve a̱ 'ya̱sa̱n le a̱ ma̱ka̱ka̱n ma̱ A̱sulazuva kucci vu u'ya̱susa̱n. 28 Reve Musa tawa le e ekere e le, reve u kula̱to le a masa'a zuva kucci vu ukula̱tosu vu ukatalasa wa tsuganu, ili i ma̱guru mo uyo'o, kucci na a yuwayin A̱sulazuva va akina. 29 Reve Musa tara ma̱ka̱ka̱'a̱n reve u 'ya̱sa̱n yi kucci vu u'ya̱susa̱n e ekere a̱ A̱sulazuva. A̱yi ɗa akunda a Musa a̱ a̱a̱giri'i o ukatalasa wa ganu cine A̱sulazuva a zuwai Musa yuwan.

30 Reve Musa kene mani'in mo utsusun na̱ mpasa n na n ri a masa'a, reve wu kyo'onuwo Haruna na̱ a̱tugu a̱ yi, no olobo a̱ yi waru na̱ a̱ a̱tugu e le. Ne ɗa u tawai Haruna na̱ a̱tugu a̱ yi na akiza oɓolo no olobo a̱ yi na̱ a̱tugu e le.

31 Reve Musa damma Haruna no olobo a̱ yi, <<Su'wain inama'a o una̱ntsu wo Oogodo o Uga'asusan, reve i tama le lo oɓolo no opopofu a na a̱ ri a aasaka a̱ kucci vu ukatalasa cine a̱mu A̱sulazuva n zuwai, a na,<Haruna no olobo a̱ yi a ɗa aa tama le.> 32 Agba ili i na i pasai yi inama no opopofu'u, i kula̱to le. 33 Agba she yu uta̱ o una̱ntsu wo Oogodo o Uga'asusa'an wan rana cindere, hali she na̱ rana vu ukatalasa ɗu koto adama a na rana vu ukatalasa ɗu ta yuwan rana cindere. 34 Ili i na a yuwain ana'an, A̱sulazuva a zuwa yi ta̱ adama a matara mo ume mo unusu ma̱ ɗu. 35 I ta̱ da̱na̱ o una̱ntsu wo Oogodo o Uga'asusan ayin nu usana hali ayin e cindere, a yuwusan ili i na A̱sulazuva a zuwai, adama i kuwa̱ wan. A̱yi ɗa ili i na A̱sulazuva a zuwai.>> 36 Reve Haruna no olobo a̱ yi a yuwan ili i na A̱sulazuva a zuwa nle a yuwan suru cine a uwwai o una̱ wa Musa.