1 A̱sulazuva a yuwan ta̱ adanshi na̱ Musa cina olobo e re a Haruna a̱ kuwa̱ ɗe, ana a̱ ta̱wa̱i a̱ ma̱ka̱ka̱n ma̱ A̱sulazuva na akina a na a ntsayi shi, a̱vu gba a̱ kuwa̱. 2 Reve A̱sulazuva a damma Musa, <<Damma mawun ma̱ a̱na̱wu ma̱ wu Haruna, she u uwa Upasu wa Akiza o ucina̱ wu umuna elime e ikpa̱ta̱tsu ya Akpati mantsa ma na u cigai biti wan, ta̱wa̱ u kuwa̱ wan. Adama a na n ta̱ ta̱wa̱ e eleshe e ikpa̱ta̱tsu ya Akpati'i. 3 Apa nda cine Haruna aa uwa Upasu wa Akiza: u ta uwa na̱ moggono ma nan ma̱ kucci vu unusu na̱ a̱a̱giri'i a̱ kucci vu ukula̱tosu. 4 U to oto a̱tugu a akiza o okoro na̱ mokoɗi ma aacaka a̱ lipu va̱ yi. Reve wu nla̱ gbakala vu umuna e ikyun ya̱ yi, a̱vu wo oto ookokolo o okoro. A̱tugu a akiza a ɗa adama o ndolo u ta̱ sumba̱ kafu wo oto le. 5 U ta̱ ushi nga̱ji n re e ekere a ama a Isra'ila adama a̱ kucci vu unusu, na̱ a̱a̱giri'i a̱ ta̱ adama a̱ kucci vu ukula̱tosu.

6 <<Haruna ta ca nan kucci vu unusu adama a aciya̱yi, u yuwan kucci matara mo ume mo unusu wa̱ yi na adama o u'wa wa̱ yi. 7 Reve u tara nga̱ji n re'e, a̱vu u ta̱wa̱ ne ele a̱ ma̱ka̱ka̱n ma̱ A̱sulazuva o una̱ntsu wo Oogodo o Uga'asusan. 8 Reve u zuwa agita e mgbele n re'e, za ta̱ adama a̱ A̱sulazuva za ta̱ adama a Azaze*16:8 Azaze a̱yi ɗa nama na vaa tara unusu o una̱ u vuma. 9 Reve Haruna ta̱wa̱ na̱ za na agita a̱ riya̱yi adama a̱ A̱sulazuva u yuwan kucci vu unusu na̱ a̱yi. 10 Amma za na agita a̱ riya̱yi adama a Azaze a̱ ta̱ ta̱wa̱ na̱ a̱yi wuma a̱ ma̱ka̱ka̱n ma̱ A̱sulazuva a yuwan ili i na a tsu yuwan i matara mo ume mo unusu. A̱ gba̱ra̱ yi a̱ tyo a̱tsumona tsa̱ a̱gba̱ri a Azaze.

11 <<Haruna ta̱ ta̱wa̱a̱ no ogono a nan kucci vu unusu wa̱ yi. Reve u yuwan kucci matara mo ume mo unusu adama a aciya̱yi na adama o u'wa wa̱ yi. U ta paɗa na'an kucci vu unusu va aciya̱yi. 12 Reve u tara aayimba tapu na akinkina a na a̱ ri na akina diga a masa'a a̱ ma̱ka̱ka̱n ma̱ A̱sulazuva. Reve u shiton ukere u re ni ili i ma̱guru u uwa ne ele a̱tsuma̱ o umuna. 13 Reve u tsun ili i ma̱guru'u a akina'a a̱ ma̱ka̱ka̱n ma̱ A̱sulazuva adama mikyon ma a̱tsuka̱'a̱ m ɓa̱ru ikpa̱ta̱tsu ya akpati'i, uba̱ta̱ u matara mo ume mo unusu, ta̱wa̱ u kuwa̱ wan. 14 Reve u kene mpasa mo ogono a na'an reve wu kyo'onu yi na aakatsu a̱ yi elime e ikpa̱ta̱tsu ya akpati a matara mu ume mo unusu upasu wa asana. Reve waru wu kyo'onu akapi na aakatsu a̱ yi toto ucindere elime e ikpa̱ta̱tsu ya akpati'i.

15 <<Reve u paɗa megbele ma̱ kucci vu unusu'u adama a ama. Reve u ta̱wa̱ na̱ mpasa'a o ucina̱ wu umuna'a, a̱vu u yuwan na̱ a̱yi cine u yuwain na̱ mpasa mu na'an. Wu kyo'onu yi zuva vi ikpa̱ta̱tsu va akpati'i na̱ a̱ ma̱ka̱ka̱n ma̱ yi. 16 Ne ɗa waa yuwan kucci matara mo ume mo unusu adama o Upasu u na u La'ai Akiza, adama e idaba ya aza a Isra'ila na adama a aciyogbamu u le, ko cu'un vu unusu ne a yuwain. Ne ɗa waa yuwaan fo Oogodo o Uga'asusan a na a̱ ri uba̱ta̱ u le, e memere me idaba i le. 17 Ko za da̱na̱ pe o Oogodo o Uga'asusan wan a̱ mantsa ma na Haruna ganu aa uwa u yuwan kucci matara mo ume mo unusu Upasu u na u La'ai Akiza, hali she na̱ wu uta̱ nu u koto mayan ma̱ kucci matara mo ume mo unusu adama a aciya̱yi nu u'wa wa̱ yi na adama a ama a Isra'ila suru. 18 Reve wu uta̱ a̱ 'ya̱wa̱ uba̱ta̱ u masa'a ma na ma̱ ri a̱ ma̱ka̱ka̱n ma̱ A̱sulazuva u yuwan kucci matara mo ume mo unusu adama a̱ yi. Reve u kene mpasa mo ogono a na'an na̱ mpasa m megbele'e u putala yi a avana a masa'a'a. 19 U to kyo'onuwo yi mpasa'a na aakatsu a̱ yi toto ucindere, adama wo o'woto yi cece, waru u lapula yi e ekere e idaba ya aza a Isra'ila.

20 <<Nu u koto mayan ma̱ kucci matara mo ume mo unusu adama o Upasu u na u La'ai Akiza'a no Oogodo o Uga'asusan na̱ masa'a, reve u ta̱wa̱a̱ na̱ megbele ma wuma'a. 21 Reve Haruna kuru ekere a̱ yi ra a aaci a megbele ma wuma'a reve u damma iwuya na aciyogbamu nu unusu wa aza a Isra'ila suru. U zuwa le suru a aaci e megbele'e reve u gba̱ra̱ yi a̱ tyo a̱tsumona e ekere a vuma na a zuwai ulinga u ndolo. 22 Megbele'e ma ta tanu unusu wa ama'a suru a̱ tyo uba̱ta̱ u na za ri shi, reve vuma'a u lyawa yi a̱ a̱tsumona.

23 <<Reve Haruna uwa a̱tsuma̱ o Oogodo o Uga'asusa'an, reve u foɗo a̱tugu o okoro a na u shi wo otoi kafu u uwa Upasu u na u La'ai Akiza'a reve u lyawa le pe. 24 Reve u sumba̱ lipu va̱ yi na̱ mini uba̱ta̱ wa akiza, a̱vu wo oto a̱tugu a̱ yi. A̱vu wu uta̱ u ca kucci vu ukula̱tosu va̱ yi na̱ kucci vu ukula̱tosu va ama, u yuwan kucci matara mo ume mo unusu wa̱ yi na̱ za va ama'a. 25 Agba u ta̱ kula̱to abaji a mani'in ma̱ kucci vu unusu a masa'a. 26 Vuma na lyawai megbele Azaze ma̱ ka̱ra̱ a̱gba̱ri, u ta̱ za̱'wa̱ a̱tugu a̱ yi, reve u sumba̱ na̱ mini. Na a yuwan u ta gura uwa o uva̱la̱ta̱. 27 Agba nan na̱ megbele ma na a yuwayin kucci vu unusu'u aza a na a̱ ta̱wa̱i na̱ mpasa n le Upasu u na u La'ai Akiza adama a̱ kucci matara mo ume mo unusu a ta tara le a̱ tyo o ucina̱ wu uva̱la̱ta̱ a̱ kula̱to le. A̱vu a̱ kula̱to kwan le ni iliya̱tsuma̱ i le na̱ a̱ya̱n e le. 28 Vuma na kula̱to nle'e u ta̱ za̱'wa̱ a̱tugu a̱ yi, reve u sumba̱ na̱ mini. Na a yuwan ne u ta gura uwa o uva̱la̱ta̱.

29 <<A̱yi nda u to o'wo ili i na i ri n yuwusan kukuci: o urana wa kupa u woto we cindere, yaa lyuwa shi waru yaa yuwan ulinga shi, umatsun u lyuci ko omocin a na ri o limocin a̱tsuma̱ a̱ ɗu. 30 Adama a na o urana u nda u ɗa aa yuwan kucci matara mo ume mo unusu adama a̱ ɗu, adama a̱ ka̱mba̱to ɗu cece. I to o'wo cece a̱ ma̱ka̱ka̱n ma̱ A̱sulazuva diga a̱ nusu ɗu suru. 31 Ashibi a̱ wivuwun a ɗa la̱nga̱ e ekere a̱ ɗu, yaa lyuwa gba ili shi. A̱yi nda ili i na ya̱a̱ da̱na̱ a yuwusan ɗa kukuci. 32 Ganu na a̱ tsuyin mani'in a tawa niyi wo o'wo ganu o una̱ wa dada va̱ yi ɗa aa ca kucci matara mo ume mo unusu, wotowu na̱ a̱tugu a akiza o okoro. 33 Reve u yuwan kucci matara mo ume mo unusu adama o Upasu u na u La'ai Akiza. Reve u ca kucci matara mo ume mo unusu adama o Oogodo o Uga'asusa'an na adama a masa'a na adama a nan ganu na adama o oɓolo a ama'a suru.

34 <<A̱yi nda u to o'wo ili i na i ri n yuwusan kukuci. A̱ ta̱ a̱ ri n yuwusan kucci matara mo ume mo unusu adama o unusu wa ama a Isra'ila suru u ta̱ a aa'wan.>> Reve Musa yuwan cine A̱sulazuva a damma niyi.