1 Reve A̱sulazuva a yuwan adanshi na̱ Musa, 2 <<Vu zuwa ama a Isra'ila a̱ ta̱wa̱a̱ wu na̱ mani'in ma̱ Zetun can adama a fitila tsa̱ra̱ a zuwa fitila'a u da̱na̱ a madala. 3 Haruna ta zuwa fitila'a elime o umuna u gbain u na u palai Oogodo o Uga'asusan. U ta̱ da̱na̱ a lapulusa ifitila'a diga ulivu a̱ tyo usana a̱ 'ya̱wa̱. Wila̱ u ɗa u na woo koto shi diga gogo hali a̱ tyo a̱ muwun mu ugundo n ɗu. 4 A̱yi ɗa wa̱a̱ da̱na̱ a̱ ka̱lyuwusa̱ ifitila'a a wisawatan u zinariya can a̱ ma̱ka̱ka̱n ma̱ A̱sulazuva kuci.

5 <<I kene yira i lashi reve i yuwaan opopofu kupa ne ejere na̱ a̱yi. Opopofu suru u lyuwa yira i na i ri ume u makundatsu u re u efa u yira i lashi a̱tsuma̱ a kupa. 6 Reve vu gere le udaru u re, o udaru suru vu zuwa a̱kutsu a̱ ta̱li zuva va apada a zinariya can na ri a̱ ma̱ka̱ka̱n ma̱ A̱sulazuva. 7 Reve vu tsun ili i ma̱guru o udaru suru adama wo o'wo kucci vu ucuwusan o una̱ wo opopofu'u, waru wo o'wo kucci na a cayi A̱sulazuva va akina. 8 O urana wa Ashibi suru Haruna gere le a̱ ma̱ka̱ka̱n ma̱ A̱sulazuva o una̱ wa aza a Isra'ila, akucunu a aza a Isra'ila a na a̱ ri n koto shi. 9 Opopofu'u o to o'wo aza a Haruna no olobo a̱ yi, waru a ta tama le pe uba̱ta̱ wa akiza adama a na akunda e le ɗa a na a la'ai akiza a̱tsuma̱ a̱ kucci va akina a na a cayi A̱sulazuva.>>

10 Urana u ro a̱vu ulobo wu ka va Isra'ila za na dada va̱ yi za vi iɗa va Masar ɗa, u ka̱ra̱ o uta̱ oɓolo na ama a Isra'ila. Reve ulobo'o na̱ vuma va Isra'ila'a a yuwan nla̱ngi o uva̱la̱ta̱ wa ama a Isra'ila. 11 A̱vu ulobo wu ka va Isra'ila'a u yuwan unusu u gbain na Ala a̱ A̱sulazuva. Reve a̱ ta̱wa̱to yi uba̱ta̱ wa Musa. (Aala a mma va̱ yi a ɗa Shelomi usheli wa Dibiri o ugundo wa Dan.) 12 Reve a̱ ɓa̱ru yi uba̱ta̱ u ro, hali she ne ee reve ili i na A̱sulazuva aa damma a alanga eteshe. 13 Reve A̱sulazuva a yuwan adanshi na̱ Musa u damma: 14 <<Vu uta̱a̱ na̱ vuma na yuwain unusu u gbai'in diga o uva̱la̱ta̱ u ɗu. Reve vu zuwa ama suru a na a uwwai ili i na u dammai a̱ kuruwa̱ yi ekere a aaci. Reve a zuwa ama'a suru a vara yi na atali. 15 Reve vu damma ama a Isra'ila a na: Vuma na suru yuwain adanshi isulai A̱sula̱ a̱ yi, u ta tara ume wu unusu wa̱ yi. 16 Vuma na yuwain unusu u gbain na ala A̱sulazuva suru amayun a̱ to una yi. Oɓolo a ama a ta vuvara yi na atali ko na̱ mocin ɗa ko umatsun wi iɗa nu u yuwaan Ala'a unusu u gbain na amayun a̱ to una yi.

17 <<Waru za na unai vuma suru, na amayun a̱yi fo a̱ to una yi. 18 Za na waru suru unai iliyamunga yi za ro, u ta̱ ka̱mbuwa̱ iliyamunga, wuma o una̱ u wuma. 19 Vuma na waru amaton yi moron ma̱ nden ma̱ yi suru, cine u yuwaan niyi ne ɗa fo a yuwaan yi. 20 Nu u kuɗa yi ta̱ eetele, a̱yi fo a ta kuɗa yi eetele. Nnu u foɗo yi lyusu, a̱yi fo o to foɗo yi lyusu. Nnu u mula̱ yi anga, a̱yi fo a̱ ta̱ mula̱ yi anga. Cine wa amaton niyi, ne ɗa fo aa amaton yi. 21 Za na unai iliyamunga suru, u ta̱ ka̱mbuwa̱ za ro. Waru za na unai vuma suru, a̱yi fo a̱ to una yi. 22 Wila̱ꞌa̱ u te reme mocin nu umatsun wi iɗa'a, a̱mu ɗa A̱sulazuva A̱sula̱ a̱ ɗu.>>

23 Reve Musa yuwan adanshi na ama a Isra'ila. A̱vu o uta̱a̱ vuma na yuwain adanshi o unusu u gbain o uva̱la̱ta̱'a̱, reve a vara yi na atali. Ama a Isra'ila a yuwan ta̱ cine A̱sulazuva a dammai Musa.