1 Reve A̱sulazuva a yuwan adanshi na̱ Musa, u damma, 2 <<Vu yuwan adanshi na ama a Isra'ila vu damma le, nna̱ vuma yuwan akucunu la̱nga̱ a na waa ca A̱sulazuva vuma u ta gura tsupaa vuma'a ni ikebe o una̱ u vuma'a, 3 apa cine o rito ikebe i vuma'a o una̱ u makundatsu ma̱ a̱a̱'isa̱ a akiza. Vali na ri na a'wan ushin a̱ tyo kupota̱li, a ta tsupa azurufa kupoton. 4 Agba na̱ ka ɗa, a ta tsupa azurufa mata'atsu. 5 Ulobo u na u ri a'wan o ton a̱ tyo a'wan ushin, a ta tsupa azurufa ushin. Usheli u na u ri na a'wan o ndolo a ta tsupa azurufa kupa. 6 Mawun mo ulobo ma na ma̱ ri na̱ woto u ta̱ a̱ tyo a'wan o ton, a ta tsupa azurufa ton. Usheli gba na u ri na a'wa'an, a ta tsupa azurufa ta'atsu. 7 Vuma na gba ri na a'wan kupota̱li a gawan, a ta tsupa azurufa kupa no ozo o ton o una̱ u vali. O una̱ wu ka gba, a ta tsupa azurufa kupa. 8 Nna̱ vuma ciga yuwan cu'un va akucunu a nda agba alambi a ɗa na waa gura tsupa ili i na a paɗaa niyi shi, to, u 'ya̱wa̱ na̱ vuma'a uba̱ta̱ wa ganu, adama ganu paɗa ili i na i lobonoi na vuma'a waa gura tsupa.

9 <<Nna̱ akucunu'u e reme ta̱ a na waa ca iliyamunga i na yi ntsayi a ca A̱sulazuva a ɗa, to iliyamunga i ndolo wo o'wo ta̱ ili ya akiza. 10 Nu u 'yuwan u ciga u kita'wan iliyamunga'a wan, waru she u vadala za vu ulobonu na̱ za babu ulobonu wan, ko za babu ulobonu na̱ za vu ulobonu wan. Na̱ waa kita'wan iliyamunga ni iliyamunga, a̱yi na̱ za na a kita'wai'in ele ra o to o'wo ili ya akiza. 11 Agba nni ili i na a yuwain nzuwulai iliyamunga yi idaba i ɗa i na yi ntsayi a ca A̱sulazuva shi, to, vuma'a u 'ya̱wa̱a̱ ni iliyamunga'a ya ganu. 12 Ganu gba u ta̱ ka̱lyuwa̱ ulobonu wi iliyamunga'a ko u tu ulobonu ko u ri ulobonu shi, cine ganu paɗaa niyi ne ɗaɗa wa̱a̱ da̱na̱. 13 Amma nna̱ za vi ili'i u ciga ta̱ u ka̱mba̱ u tsupisa iliyamunga'a, to, u ta̱ da̱shi za ta̱ a̱tsuma̱ o ozo o ton a aci e ili i na a paɗai.

14 <<Nna̱ vuma ca u'wa wa̱ yi wo o'wo ili ya akiza e ekere a̱ A̱sulazuva, to ganu ka̱lyuwa̱ ulobonu wu u'wa'a. U ka̱lyuwa̱ ko u'wa'a u tu ulobonu ko u ri ulobonu shi. Ili i na ganu paɗai suru, ne ɗaɗa wa̱a̱ da̱na̱. 15 Nna̱ za na cayi u'wa'a u ciga u ka̱mba̱ u tsupisa u'wa'a, to u ta̱ da̱shi za ta̱ a̱tsuma̱ o ozo o ton a aci e ili i na a paɗayi u'wa'a, reve u'wa'a wo o'wiso za va̱ yi.

16 <<Na̱ vuma ca A̱sulazuva upasu u na wi iɗa wa agadu a̱ yi, to, a paɗaa iɗa'a ikebe a̱bunda̱ o una̱ wi icu'un i na a̱a̱ cu'wa̱n pe. Shekel azurufa kupoton o una̱ u makundatsu ushin vi icu'un. 17 Nu u ca ta̱ uɗuma̱ wa̱ yi a̱tsuma̱ a Aa'wan a̱ A̱buki o uka̱mbusa̱ fa̱a̱n, ikebe i na a paɗayi uɗuma̱'a̱ ya aa'wan i ɗaɗa wee reme. 18 Amma nnu u ca ta̱ uɗuma̱'a̱ cina Aa'wan a̱ A̱buki'i a̱ ka̱ra̱, to, ganu paɗaa uɗuma̱'a̱ ikebe o una̱ wa a'wan a na a buwai Aa'wan a̱ A̱buki'i a̱a̱ ka̱nda̱ruwisa̱. Waru a ta jiba a̱bunda̱ e ikebe i na a paɗai. 19 Agba na̱ vuma na cayi uɗuma̱'a̱ u ciga u ka̱mba̱ u tsupisa yi, to u ta̱ da̱shi za ta̱ a̱tsuma̱ o ozo o ton e ikebe yu uɗuma̱'a̱. Reve uɗuma̱'a̱ wo o'wiso za va̱ yi. 20 Agba nu u ciga u tsupisa uɗuma̱'a̱ shi, ko u shi ta̱ ɗe u winaa za ro uɗuma̱'a̱, to u ri n yuwan u ka̱mba̱ u tsupisa uɗuma̱'a̱ shi. 21 Na a ca uɗuma̱ a̱tsuma̱ a aa'wan a̱ A̱buki'i, uɗuma̱'a̱ u to o'wo ili ya akiza tsu uɗuma̱ u na a tawayi A̱sulazuva. U to o'wo uɗuma̱ u nan ganu.

22 <<Na̱ vuma ca uɗuma̱ u na u tsulai, uɗuma̱ u na u ri pe a̱tsuma̱ e iɗa ya agadu shi, 23 ganu ta paɗaa uɗuma̱'a̱ ikebe i na wu ntsayi hali a̱ tyo a a'wan a na a buwai a cina Aa'wan a̱ A̱buki'i. Vuma'a u ta tsupa ikebeꞌe o una̱ wi ikebe i na a paɗai o urana'a, ili ya akiza i ɗa e ekere a̱ A̱sulazuva. 24 A Aa'wan a̱ A̱buki'i uɗuma̱'a̱ u ta̱ ka̱mba̱ e ekere a za na tsula niyi, za na uɗuma̱'a̱ u shi za va̱ yi. 25 A ta paɗa ili i na yi ntsayi a tsupa suru o una̱ u makundatsu ma̱ a̱a̱'isa̱ a akiza.

26 <<Agba ko za aa ca umatsun wu ufaru wi iliyamunga shi, a na wo o'woi umatsun wu ufaru wi iliyamunga suru za va̱ A̱sulazuva ɗa, ko nan ko kyon, za va̱ A̱sulazuva ɗa. 27 Amma ni iliyamunga'a za vi idaba ɗa, a ta gura ka̱mba̱ a tsupisa yi o una̱ wi ikebe i na ganu paɗaa niyi oɓolo na̱ za ta̱ a̱tsuma̱ o ozo o ton. Nna̱ gba aa tsupisa yi shi, a wina yi o una̱ wi ikebe i na a paɗa niyi.

28 <<Agba ili yi lo a̱tsuma̱ e ili i na vuma ri na̱ a̱yi, na a cayi A̱sulazuva, ko vuma, ko iliyamunga, ko iɗa ya agadu, na aa gura wina ko a tsupa shi. Ili i na a tawai suru ili ya akiza i ɗa e ekere a̱ A̱sulazuva. 29 Babu vuma na a cayi adama o ukototosu na a tsupisa adama a̱ yi. Na a 'yuwan a ciga o una yi.

30 <<Za ta̱ a̱tsuma̱ a kupa suru vi ili yi iɗa'a, ko vi ishina, ko vu matsun vu ɗanga, a̱za̱ a̱ A̱sulazuva a ɗa. Ili ya akiza i ɗa e ekere a̱ A̱sulazuva. 31 Na̱ vuma ciga u tsupisa za ta̱ a̱tsuma̱ a kupa suru na u cayi, u da̱shi za ta̱ a̱tsuma̱ o ozo o ton a aci e ili'i. 32 Za ta̱ a̱tsuma̱ a kupa vi iliyamunga suru, ko vi inan, ko vi ikyon, ko vu mgbele, za va kupa suru na va̱a̱ ka̱ra̱ za̱la̱ va aaɗanga a za va aaguɓa, u to o'wo ili ya akiza e ekere a̱ A̱sulazuva. 33 Waa ɗangula iliyamunga i kupa o una̱ wu ulobonu wa̱ yi shi ko o ulambu wu ulobonu wa̱ yi shi. Agba waru waa kita'wa yi shi. Na a kita'wa yi, iliyamunga'a na̱ za na a kita'wai o to o'wo na akiza. A̱ ri na aa gura tsupisa le shi.>> 34 Ele nda, ele ɗa wila̱ u na A̱sulazuva a cayi Musa a Masasan ma Sinai adama a ama a Isra'ila.