5
1 Gogo, vu ɓoloto a̱ a̱soja a̱ wu
adama a na a̱ ka̱nda̱ruwa̱ tsu ta̱ nu uvon.
Waru a ta faba mogono ma Isra'ila
na aaɗanga o ugbaguzu.
A̱sula̱ a yuwan ta̱ nzuwulai mu za tsugono diga Batalami
2 A̱vu A̱sulazuva a damma,
<<A̱vu lyuci va Batalami va Efarata,
a̱tsuma̱ o ugundo wa Yahuda wa'a ɗa vu ri,
agba a̱tsuma̱ a̱ wu n ta̱ o uta̱a̱ vuma
na a yuwan tsugono tsa Isra'ila,
za na ri nu ugundo ɗe ɗe,
za na ri ɗe ɗe a̱ ta̱wa̱.>>
3 Adama o ndolo A̱sulazuva
a̱ ta̱ uta̱ aɗa a ama a̱ yi,
hali she na a matsan za tsugono'o,
waru she na ama a 'wa va̱ yi
a̱ ka̱mba̱ a̱tsuma̱ a Isra'ila.
4 Tsa za va aguɓa,
u ta̱ e idana ama a̱ yi,
nu ucira u na wu uta̱i
diga uba̱ta̱ wa̱ A̱sulazuva,
a̱tsuma̱ a tsugbain tsa̱ aala A̱sulazuva A̱sula̱ a̱ yi.
Ama a̱ yi a̱ ta̱ da̱nu gbaga,
adama a na a̱ ta̱ reve nu ucira wa aala a̱ yi
a̱tsuma̱ o uvaɗi suru.
5 Waru u to o'wo asuvu nden n tsu,
a mantsa ma na ama a Asuriya
a̱ riya̱a̱ iɗa i tsu nu uvon,
hali a̱ ba̱ma̱ kari tsu,
tsu ta zuwa a̱za̱ o uka̱lyusa̱ e cindere,
oɓolo na azagbain kunla̱ a yuwan uvon ne le,
6 na a yuwan tsugono
tsa Asuriya na̱ matsun me pe'eni.
Nimro waru na̱ matsun mepe'eni ma na a talai.
Waru u ta wawa tsu diga e ekere aza a Asuriya,
a mantsa ma na a̱ ta̱wa̱yi
iɗa i tsu nu uvon,
ko na̱ shi a uwa o tyo wi iɗa i tsu.
7 Akapi o ugundo wa Yakubu na la'ai
o to o'wo a̱tsuma̱ a ama na̱ a̱bunda̱,
tsa a'iza na a̱ ta̱wusa̱ diga uba̱ta̱ wa̱ A̱sulazuva,
tsa̱ yiji'in a anlya,
za na tsu puro za shi
ko u zuwa ucira uba̱ta̱ wu vaɗilima̱ shi.
8 Akapi o ugundo wa Yakubu na la'ai
o to o'wo a̱tsuma̱ a ama na̱ a̱bunda̱,
tsa a kamu e memere me inama yu una yo ogozo,
tsa kamu vu ucira e memere mo oɓolo e ikyon,
za na nu wu 'yawan a̱vu u riya̱a̱ le,
waru za lo na wawa le shi.
9 Ukere wa̱ wu u ta la'a ucira wu n'yuwatan ma̱ wu,
waru a̱ ta̱ kototo n'yuwatan ma̱ wu!
10 Reve A̱sulazuva a damma,
<<O urana u ndolo u ɗa mo una ido i ɗu
waru n kototo ikeke yi ido i ɗu.
11 N ta̱ kototo ilyuci yi iɗa i ɗu
waru mu ɓoso pa'atan vu ucira ɗu.
12 N ta̱ gba o kototo a̱za̱ a̱ nkunu a̱ ɗu,
waru ya̱ da̱shi tsura̱ boci shi.
13 N ta̱ fo o kototo a̱ma̱li a̱ ɗu
na atali a̱ga̱nda̱ a na a̱ ri a̱tsuma̱ a̱ ɗu.
Ya̱ da̱shi ka̱ɗa̱towa̱a̱ ili i na
i yuwain ne e ekere a̱ ɗu shi.
14 N ta̱ mumula̱ a̱ma̱li a ka Ashera
na a̱ ri a̱tsuma̱ a̱ ɗu
a mantsa ma na n kototoi ilyuci i ɗu.
15 Na asuvu usuɗu u ɗa ma tsupa nɗa
n na n 'yuwain a yuwan tsutoni na̱ a̱mu.>>