Mepepelime me Ire ma̱
Bituru
Ucuɗuwu wa aatagada a nda
A̱yi nda a̱yi ɗa mepepelime me ire ma na mo uta̱i e ekere a̱ Bituru a̱ tyo a̱za̱ e Itoni a na a̱ ri ubazu ba̱ta̱ suru.
A̱tsuma̱ e mepepelime ma nda Bituru damma ta̱ aza a na e ɗesununa̱ a̱tsuma̱ a̱ yi a na A̱sula̱ o rono ta̱ aɗanga a ama a na a ɗanai Adanshi a̱ A̱sula̱ a nda, adama o ndolo za vi Itoni suru u reve Adanshi a̱ A̱sula̱ ulobonu lon. Waru u cuɗuwa ta̱ a na munlu me epen n ri lo, waru u roco ta̱ cine ee reve ili ye epen ni ili ya amayun. O ukosu, u damma ta̱ a̱ da̱na̱ nu uzuwu wo okolo o urana u na Yesu Zamawawa a̱a̱ ka̱mba̱.
Anaꞌan munlu me epen n ta̱ lo na̱ a̱bunda̱ waru uritosu we epen o ta̱ lo na̱ a̱bunda̱. Adama o ndolo, u ta̱ da̱na̱ ulobonu a̱za̱ e Itoni anaꞌan e reve Adanshi a̱ A̱sula̱ ulobonu lon. Na̱ tsu ka̱lyuwa̱ Adanshi a̱ A̱sula̱ tsu te ene Zagbain Yesu ta̱ lo a̱ ka̱mba̱ a̱tsuma̱ o uvaɗi u nda, a̱yi ɗa i zuwai tsu ri nu uzuwu wo okolo u na nanza aa usa yi e ekere a̱ tsu shi.
Ili i na i ri pe a̱tsuma̱ a aatagada a nda
1. Ica̱su na avasa (1:1-2)
2. Cine wu ntsayi a̱za̱ e Itoni yi Zagbain a yuwan wuma (1:3-15)
3. Tsugbain tsu Zamawawa (1:16-21)
4. Ama̱sula̱ e epen na̱ munlu me epen (2:1-22)
5. Uka̱mbu wu Zagbain a̱tsuma̱ o uvaɗi amayun a ɗa (3:1-18)
1
Ucuɗuwu
1 A̱mu ɗa Simo Bituru. A̱mu aagbashi e Yesu Zamawawa ɗa waru oɓolo na aajiya a̱ yi. N ɗana ta̱ mepepelime ma nda a̱ tyo ya̱ꞌa̱ ɗu suru aza a na a̱ ri na̱ cuꞌun vu ucawu wo okolo a na tsu ri na̱ a̱yi. Ucawu wo okolo o ndolo u tu ulobonu waru Yesu Zamawawa ɗa ca ntsu a̱yi. A̱yi ɗa A̱sula̱ na̱ Zamawawa tsu, waru u ka̱mba̱to tsu ta̱ veɗe na̱ A̱sula̱.
2 N ciga ta̱ A̱sula̱ o roco ɗu isaꞌani na asuvu nden a̱ yi a̱ a̱bunda̱ a na yaa lyuwa elime na̱ mereve me Yesu kuci adama a na a̱yi ɗa A̱sula̱ na̱ Zagbain tsu.
Ili i na i zuwai tsu ri nu uzuwu wo okolo
3 Ana wo oꞌwoi tsu reve ta̱ Yesu mejege, u ta yuwusan ulinga nu ucira wa zuva wa̱ yi, u ca tsu ta̱ ili suru i na tsu cigai adama tsu yuwain wuma u na waa zuwa A̱sula̱ ma̱za̱nga̱. U ɗe tsu ta̱ tsu ushi tsugbain ni isaꞌani ya̱ yi! 4 Waru nu ucira u ɗaɗa, u ca ntsu ili i gbagbain na̱ nzuwulai n saꞌani. U yuwan ta̱ nzuwulai n na ya̱a̱ fa̱tsa̱ e ili yi idaba i na i ri uka̱nda̱ruwu na̱ a̱ɗu suru. Ili i ndolo ele ɗa ili i na icigi i lipu i tsu zuwa. Waru u yuwan ta̱ nzuwulai n na yoo oꞌwo vadamma A̱sula̱.
5 Adama o ndolo i yuwan ukadu i da̱shi isaꞌani o ucawu wo okolo a̱ ɗu. Wuma wi isaꞌani u tsu zuwa ɗu ta̱ i reve A̱sula̱ lon. 6 Urevu wa̱ A̱sula̱ u tsu zuwa ɗu ta̱ i gura guza̱ aciya̱ɗu. Uguzu wa aci u tsu zuwa ɗu ta̱ i kaɓa asuvu, waru makaɓa ma asuvu ma tsu zuwa ɗu ta̱ i yuwan wuma suru suru adama a̱ A̱sula̱. 7 Ni i yuwan wuma tsundolo, i ta ciga a̱za̱ a̱ ɗu, o ukosu i ta ciga vuma suru ni icigi ya amayun. 8 Ni i lyuwa elime nu uda̱shishi wi ili i saꞌani i nda, a̱ ta̱ geshe ɗu a̱tsuma̱ a mayan me ili ye pere, reve a zuwa ɗu i yuwan ili ya̱ a̱bunda̱ adama o urevu wu Zagbain tsu Yesu Zamawawa. 9 Amma aza a na a ꞌyuwain a yuwan ili i ndolo nrumba̱ n ɗa waru e tse ene mejege shi. E icina ta̱ ɗe a na A̱sula̱ a̱ ka̱mba̱to nle cece diga a akuci o ure a wuma u le vu unusu.
10 Ama a̱ va̱, adama o ndolo i lyuwa elime nu ukadu tsa̱ra̱ i roco ama a na A̱sula̱ e ɗe nɗu, waru i roco le a na a ɗangwa nɗu yoo oꞌwo ama a̱ yi. Ni i yuwan ne ya̱a̱ ta̱ɗa̱tsa̱ shi waru ya̱a̱ puwa̱a̱n shi. 11 Ne ɗa A̱sula̱ a̱a̱ ushi ɗu ulobonu a̱tsuma̱ o tsugono tsa Zagbain tsu na̱ Zamawawa Yesu.
I poloo ikaka ya̱ A̱sula̱ atsuvu
12 I reve ta̱ ɗe ili i nda suru, waru i ta̱ mishin nu ucira a̱tsuma̱ a amayun. Suru na̱ ne n ciga ta̱ n da̱na̱ a cuwusaan ɗu ni ili i nda suru. 13 U lobono ta̱ n da̱na̱ a cuwusaan ɗu adama e ili i nda hali she na̱ n kuwa̱. 14 Waru Zagbain Yesu Zamawawa roco mu ta̱ na maa jima shi n ta̱ kuwa̱. 15 Adama o ndolo n ta yuwan ulinga babu uro tsa̱ra̱ n lyawa ɗu i reve ili i nda ulobonu. N ciga ɗu ta̱ i da̱na̱ a cuwusan ne ele a mantsa na̱ a̱bunda̱ a̱ca̱pa̱ a̱ va̱.
16 Ana tsu damma nɗu cine Zagbain Yesu Zamawawa a̱a̱ ka̱mba̱ nu ucira, yitele yu ugbozu i na za ro dammai ɗa tsu da̱na̱i a dansaa ɗu shi. Ne ɗa u ri shi! Amma tse ene ta̱ tsugbain tsa amayun tsa̱ yi ne esu a̱ tsu. 17 A̱sula̱ Dada ɗa ca niyi tsugbain nu ucira ana u ɗeyi nu uɗyo wu ucira u Tsugbain tsa̱ A̱bunda̱ tsa̱ yi adansa, “A̱yi nda macigata ma Mawun ma̱ va̱ ma ɗa, waru n ta̱ ma̱za̱nga̱ na̱ a̱yi.” 18 Waru a̱tsu na aciya̱tsu tsu da̱na̱ ta̱ oɓolo na̱ Yesu a masasan ma akiza, waru tsu uwwa ta̱ uɗyo u nda a yuwusan adanshi diga ɗe zuva.
19 Ili i nda suru i zuwa tsu ta̱ tsu reve ili i na ama̱sula̱ a dammai amayun a ɗa. Adama o ndolo i ka̱mbuwa̱ ugbozu e ikaka i le, cine yaa yuwan na̱ fitila na a daɓai a̱tsuma̱ e irumbu. I lyuwa elime na̱ mayan me ili i nda, hali she urana u na Zamawawa ta̱wa̱i a̱vu ekan a akina a̱ yi e ikana a̱tsuma̱ o okolo a̱ ɗu.*Ele idanshi i Tsuheleni pa nda ele ɗa “she nu urana u koto reve talyoꞌo vu usana ꞌyon pe a̱tsuma̱ o okolo a̱ ɗu.” 20 Ili i na i laꞌai suru a̱yi ɗa, i ciga i ꞌyuwan i reve adanshi a na ama̱sula̱ a dammai a majiyan me le ma ɗa wu uta̱i shi. 21 Ama̱sula̱ꞌa̱ a yuwan adanshi adama a na ele aciyele a cigai a yuwan adanshi a ɗa shi. Oꞌo, ne ɗa u ri shi! Ruhu va Akiza ɗa zuwa nle a yuwan adanshi e ikaka ya̱ A̱sula̱.†Ure u ro u na aa gura tsura̱ urevu wi idanshi i Tsuheleni pa nda a̱yi ɗa “Ciga ꞌyuwan vu reve babu vuma na aa gura tsura̱ urevu wi ikaka ya ama̱sula̱ na aciya̱yi goon.”