Mepepelime me Ire ma̱ Bulu a̱ tyo ya
Aza a Tasalonika
Ucuɗuwu wa aatagada a nda
Bulu ɗanaa ta̱ a̱za̱ e Itoni a na a̱ ri pe a̱tsuma̱ a Tasalonika. A̱yi ɗa mepepelime me ire ma na u ɗanayi a̱za̱ e Itoni a̱tsuma̱ a̱ lyuci na ri na̱ a̱ba̱jini e eden a na a̱ ri a̱ ngeꞌen m mala. U ɗana ta̱ mepepelime ma nda adama a na ama o ro aa yuwusan uritosu u saꞌani shi adama o urana u na Yesu Zamawawa a̱a̱ ka̱mba̱. Ozo o ro e le a damma ta̱ a na a̱ tsura̱ ta̱ mepepelime diga ya̱ Bulu agba epen a ɗa le.
A̱tsuma̱ e mepepelime ma nda Bulu ɗana ta̱ amayun e ili i na yaa fara a̱ ma̱ka̱mba̱a̱ ma̱ Yesu. U da̱shi ta̱ damma ili i na u dammai ɗe adama a adanshi a nda. Bulu yuwan ta̱ adanshi e ili i taꞌatsu i na i laꞌai ulobonu a̱tsuma̱ e mepepelime ma nda. U damma le ta̱ adama aɗa a mantsa ma na Yesu a̱a̱ ka̱mba̱. Waru u dammisa le ta̱ a̱tsuma̱lima̱ a na o sowuso uba̱ta̱ wa̱ A̱sula̱ a ɗa wo utusa̱ shi. A̱tsuma̱lima̱ a nda o to koto urana u ro reve a̱ tsura̱ wivuwun. A̱ tyo o ukosu, u damma le ta̱ a yuwan ulinga na̱ a̱tyo o ucira u na a̱ ri na̱ a̱yi kafu Yesu ka̱mba̱.
Ili i nda suru amayun a ɗa hali a̱ tyo anaꞌan, cine a̱ da̱na̱i a mantsa ma ama a Tasalonika a na Bulu ɗanaa nle mepepelime ma nda.
Ili i na i ri pe a̱tsuma̱ a aatagada a nda
1. Ica̱su (1:1-2)
2. Uka̱mbu wu Zagbain amayun a ɗa (1:3-12)
3. Koto Zagbain ka̱mba̱ shi (2:1-12)
4. Vu yuwan nden ma̱ a̱ɓula̱ (2:13-17)
5. Vu yuwan avasa waru vu yuwan ulinga (3:1-15)
6. Avasa o ukosu (3:16-18)
1
1 A̱mu Bulu, na̱ Sila na̱ Timoti, a̱tsu ɗa tsaa ɗanasa mepepelime ma nda e tewee a̱za̱ e Itoni ya Tasalonika ama a̱ A̱sula̱ Dada tsu aza a na a̱ ri a̱tsuma̱ e itoni yi Zagbain Yesu Kristi Zamawawa.
2 M pati ta̱ Dada A̱sula̱ na̱ Yesu Zamawawa Zagbain u roco ɗu isaꞌani waru u ca ɗu abaꞌun na asuvu nden!
Avasa o ugodyusho
3 Ama a̱ va̱, u lobono ta̱ tsu godyoo A̱sula̱ adama a̱ ɗu kuci, tsu ta yuwusan ma̱za̱nga̱ adama a na ucawu wo okolo a̱ ɗu a ta kungusa a̱tsuma̱ e itoni nu ucira, waru suru nɗu i ta̱ da̱shishi ncigalai. 4 Na̱ tsaa yuwusan adanshi a̱ ɗu na̱ a̱za̱ e Itoni ya̱ A̱sula̱ ba̱ta̱ ro, a̱tsu tsu yuwan ta̱ ma̱za̱nga̱ a na yaa kaɓusa asuvu, a̱vu i buwa nu ucawu wo okolo ko na yoo sowuso a̱tsuma̱lima̱ a̱ ma̱lyungwa̱ na awuya.
5 A̱tsuma̱lima̱ a nda o to rocosu A̱sula̱ e te geꞌeto koyan mejege. Ne ɗa A̱sula̱ ee kece ɗu a̱tsuma̱ a aza a na aa uwa o tsugono tsa̱ yi, agba gogo adama o tsugono tso ndolo tsa ɗa yoo sowuso a̱tsuma̱lima̱ꞌa̱. 6 A̱sula̱ a ta yuwusan ili i na i ri ulobonu kuci. U ta ca aza a na a̱ ta̱wusa̱a̱ ɗu na addama a̱tsuma̱lima̱. Waru u ta̱ ta̱wa̱a̱ ɗu na̱ wivuwun a̱tsuma̱ a̱ a̱tsuma̱lima̱ a̱ ɗu. 7-8 A mantsa ma na Yesu Zamawawa Zagbain a̱a̱ ta̱wa̱ diga zuva na̱ nlingata ma̱ A̱sula̱ mu ucira ma̱ yi oɓolo na akina a̱ ma̱kula̱ u ta ca tsu wivuwun fo.
Zagbain tsu Yesu ta ca aza a na e revei A̱sula̱ shi a̱tsuma̱lima̱ na aza a na a ꞌyuwain a yuwan tsutoni na Alabari a Saꞌani a Zagbain tsu Yesu. 9 A̱tsuma̱lima̱ a na oo sowo a̱yi ɗa ulungusu suru suru. A ta kasa le na̱ Zagbain waru nu ucira u tsugbain tsa̱ yi suru suru. 10 Ili i nda i ta fara o urana u ndolo a mantsa ma na Zagbain a̱a̱ ka̱mba̱ adama u ushi ica na̱ tsugbain e ekere a aza a na a ca niyi okolo suru waru a̱ ri a̱za̱ a̱ yi. Iliꞌi oɓolo na̱ a̱ɗu ɗa, adama a na i usu ta̱ ili i na tsu dammai.
11 A̱sula̱ a ɗangwa ɗu ta̱, waru tsu ta avasa a na A̱sula̱ a̱a̱ usu ɗu yi ntsaa yoo oꞌwo ama a̱ yi. Tsu ta avasa a na ucira wa̱ A̱sula̱ waa kamba ɗu i yuwan ili i saꞌani i na yaa ciga i yuwan suru. Ucawu wo okolo a̱ ɗu a ɗa waa zuwusa ɗu i ciga mayan me ili i nda. 12 Ne ɗa za suru aa ca ala a Zagbain tsu tsugbain adama a̱ ɗu, a̱vu a ca ɗu tsugbain oɓolo na̱ a̱yi. A̱yi nda ili i mayuwaan i ɗa e ekere a̱ A̱sula̱ a̱ tsu ne ekere e Yesu Zamawawa Zagbain adama e isaꞌani i le.