18
A̱ lungusa̱ ta̱ Babila
1 Ana alavu alavu a na me enei ka na kumbai a̱a̱dodo o ndolo a̱ ka̱ra̱i, ɗaɗa me enei malingata ma̱ A̱sula̱ mo ro a̱ ma̱cipa̱ diga zuva. U ta̱ nu ucira lon, a̱vu ekan a gbain o uta̱ diga ya̱ꞌa̱ yi, reve wi ikana uvaɗi. 2 Reve u saala nu ucira:
“A̱ba̱jini a̱ lyuci va Babila a̱ la̱nga̱ ta̱ suru suru.
Ama a buwa pe shi,
otoni a̱ lima̱ icuꞌun icuꞌun i ɗa i ri pe na̱ nden.
Waru nnunu mi idaba icuꞌun icuꞌun i ɗa i ri pe na̱ nden.
3 Iɗa suru o oꞌwo ta̱ ososowi a̱ ma̱ra̱ ma̱ yi,
a̱yi ɗa maluwa ma̱ tsipere tsa̱ yi.
Ngono mu uvaɗi suru n yuwan ta̱ tsipere na̱ a̱yi,
waru aza a awina a̱ tsu tsura̱ ta̱ ikebe ya̱ a̱bunda̱
adama a na u cigai ili i saꞌani ya̱ a̱bunda̱.”
4 A̱vu mu uwwisa uɗyo u ro diga zuva adansa:
“Ama a̱ va̱, uta̱i a̱tsuma̱ a̱ lyuci gbain ndolo,
tsa̱ra̱ i yuwan unusu cine a̱yi u yuwain wan,
tsa̱ra̱ waru i tsura̱ oforo cine a̱yi wa̱a̱ tsura̱ wan.
5 Nusu va̱ yi rawa ta̱ aaganga o oɓolo a na a rawai ɗe zuva,
waru koto A̱sula̱ e icina ni iwuya i na u yuwusain shi.
6 I ciga i ꞌyuwan i yuwaan yi cuꞌun vi ili i na u yuwain
cine u yuwain a̱ tyo e ekere a akapi.
Amayun, i tsupa yi toto ure na̱ cuꞌun vu unusu u na u yuwain.
I ciga i ꞌyuwan i tsun ma̱ra̱
ma na ma̱ ri nu ucira toto ure o mokoto ma̱ yi,
cine u foɓoyi akapi.
7 U ca ta̱ aciya̱yi tsugbain lon,
a̱vu waru u tsura̱ ili i na u cigai suru.
I ca yi a̱tsuma̱lima̱ na̱ a̱tsumola̱ngu lon.
U ta yuwusaan aciya̱yi uvaɗu, a̱vu u damma,
‘Apa mu nden,
a̱mu ka ɗa na n ri a yuwusan tsugono.
N ri na̱ vali na a̱a̱ kuwa̱ mu shi,
adama o ndolo ma̱a̱ shon adama a̱ yi shi.’
8 Adama a na Babila ka ꞌya̱sa̱in avangaci tsundolo,
waa jima shi,
a̱vu A̱sula̱ a ca yi a̱tsuma̱lima̱ nu ubanakun,
a̱vu waru ama a̱ yi a̱ kuwa̱,
waru u ta yuwan ambulu.
Akina a̱ ta̱ kula̱to yi,
adama a na A̱sula̱ a na ee geꞌeto yi,
a̱ ta̱ nu ucira.”
9 Ngono mu uvaɗi n na n yuwain tsipere na̱ a̱yi reve a lyuwa a̱tsuma̱ o utsuru wa̱ yi, e te ene mikyon m ma̱gugwa̱ ma akina za na aa lyuwa yi, a̱ ta̱ shon reve a yuwan a̱tsumola̱ngu adama o ndolo. 10 E isawan ta̱ alanga, adama a na o to wovon a na o to sowo a̱tsuma̱lima̱ cine woo sowuso. A ta damma,
“A̱tsuma̱lima̱!
Cine wa̱a̱ da̱na̱ wu na̱ a̱tsuma̱lima̱,
a̱ba̱jini a̱ lyuci na̱ lyuci vu ucira Babila,
adama a na a̱tsuma̱ a̱ rumu ta̱ oforo a̱ ta̱wa̱ wu ta̱!”
11 Waru aza a awina a̱tsuma̱ o uvaɗi a̱ ta̱ shon waru a yuwan a̱tsumola̱ngu adama a̱ yi, adama a na babu za na aa tsula itana i na aa winasa. 12 Apa iliꞌi: zinariya, na̱ azurufa, na atali a madala e ikebe,† ni iyeɗi yi ikebe,† ni itana i na i laꞌai aza a na a yuwain na̱ tsikilu, ni itana i na i ri sawun da̱a̱n-da̱a̱n, ni itana yu ulobonu i na i ri saan, na̱ ɗanga icuꞌun icuꞌun i na i ri na̱ ma̱guru mo uyoꞌo lon, na akapi e ili i na a yuwayin na anga a agiwa na̱ ɗanga vi ikebe, na̱ rumushili, ni irumu, na atali e ikebe o usaa, 13 ni ili i ma̱guru† i na a̱ tsu ɗe furenkisen† na̱ mur† adama o usaꞌan, waru adama a masaꞌa, waru adama o usukumu a̱ lipu, na̱ masayan ma inabi, na̱ maniꞌin, na̱ yira, ni ishina, ni inan, ni ikyon, ni ido, oɓolo ni ikeke yi ido i na a tanusu itana, oɓolo na agbashi, na ama a na e remei uba̱ta̱ o uvon.*A̱tsuma̱ e ili i ma̱guru o ɓolo ta̱ na̱ mur na̱ furenkisen, ili i ta̱ i ɗa na aza a na a̱za̱ o urevu a̱ ta̱wa̱yi Yesu uneꞌe.
14 Aza a awina a ta damma yi,
“Ili i saꞌani i na vaa zuwusaa okolo suru o koto ta̱,
waru ili i na yaa zuwusa wu vo oꞌwo ulobonu a̱ puwa̱n ta̱,
va̱a̱ da̱shi tsura̱ le waru shi!”
15 Aza a awina, aza a na a̱ tsura̱i utsuru adama a na a winaa niyi itanaꞌa, e te isawan alanga na̱ a̱yi, adama a na a̱ ri e ilaɗi i na oo sowo a̱tsuma̱lima̱ cine a̱yi woo sowuso. A̱ ta̱ shon a̱vu waru a yuwan a̱tsumola̱ngu. 16 A ta damma:
“A̱tsuma̱lima̱!
A̱tsuma̱lima̱ a ta cina wu a̱vu a̱ba̱jini a̱ lyuci a nda!
U da̱na̱ ta̱ o otosu itana yi ikebe,
ni itana i sawun da̱a̱n-da̱a̱n, ni itana i na i ri saan lon.
U oto ta̱ waru ili i na a yuwain na̱ zinariya,
na atali a madala e ikebe† icuꞌun icuꞌun!
17 A̱tsuma̱ a̱ rumu ta̱ a̱vu a̱ lungusa̱ utsuru wa̱ yi suru!”
Zagbain vu uluwu u wantsun u gbain suru na alingi a̱ yi a̱ te isawan alanga na̱ a̱yi. Waru aza a na a yuwusan mmalu a̱tsuma̱ a antsun a mala a̱ te isawan alanga na̱ a̱yi, ne ɗa fo aza a na a yuwusan pe awina e itana i na a̱ ta̱wa̱yi a̱tsuma̱ a antsun. 18 A ta saala lon ne e ene mikyon ma akina ma na maa lyuwa yi, “Koto a yuwan cuꞌun va̱ a̱ba̱jini a̱ lyuci vu mgbain nu ucira tsunda shi!”
19 A̱ ta̱ tsun ma̱bula̱ a aci e le tsa̱ra̱ o roco a̱ ta̱ na̱ a̱tsumola̱ngu. Waru a ta damma:
“A̱tsuma̱lima̱,
A̱tsuma̱lima̱ a ta cina wu a̱vu a̱ba̱jini a̱ lyuci!
A̱ba̱jini o utsuru a̱ yi a zuwa tsu ta̱ suru ntsu
tso oꞌwo nu utsuru.
Gogo a̱tsuma̱ a̱ rumu ta̱ o koto ta̱ suru.”
20 A̱ɗu aza a na i ri zuva,
i yuwan mere,
adama a na A̱sula̱ a̱ lungusa̱ ta̱ ɗe Babila.
A̱ɗu ama a̱ A̱sula̱,
oɓolo na ajiya na aza a na a dansa ikaka ya̱ A̱sula̱ i za̱nga̱na̱.
Adama a na A̱sula̱ e geꞌeto yi ta̱
adama e ili i babu ulobonu i na u yuwaan nɗu.
21 Reve malingata mo ucira ma tara aatali a gbain, gashi aatali a yira, a̱vu u vari yi a̱tsuma̱ a mala reve u saala:
“Babila, a̱vu lyuci gbain,
cine n variyi aatali a nda,
ne ɗa A̱sula̱ a̱a̱ lungusa̱ wu nu ucira u gbain!
Ama a̱a̱ da̱shi ene lyuci nda waru shi.
22 Ko za a̱a̱ da̱shi uwwa ama a waꞌasa ikumburu shi,
ko ndobiya shi,
ko ama e ivulusa̱ papin ko avana shi.
Ko za a̱a̱ da̱shi yuwan ulinga a̱tsuma̱ a̱ wu shi.
Waru ko za a̱a̱ da̱shi uwwa ilama i yira shi.
23 Ko za a̱a̱ da̱shi ene ekan e ifitila a̱ wu shi.
Waru ko za a̱a̱ da̱shi uwwa uɗyo u vali ko ka a yuwusan lolo shi.
Aza a awina e itana a̱ shi ta̱ a laꞌa ama o uvaɗi suru ucira.
Tsuboci tsa̱ wu tsa̱ pusa̱a̱n ta̱ ama o uvaɗi suru ugbozu.
24 A̱sula̱ a ca ta̱ Babila a̱tsuma̱lima̱
adama a na wu unai ama̱sula̱,
na ama a̱ A̱sula̱ suru.
Ee, Babila una ta̱ akapi a ama a̱tsuma̱ o uvaɗi suru.”
*18:13 A̱tsuma̱ e ili i ma̱guru o ɓolo ta̱ na̱ mur na̱ furenkisen, ili i ta̱ i ɗa na aza a na a̱za̱ o urevu a̱ ta̱wa̱yi Yesu uneꞌe.