1 A̱mu ɗa Bulu aagbashi a̱ A̱sula̱, waru a̱mu aajiya e Yesu Kristi Zamawawa ɗa. A̱sula̱ a̱ lyungu mu ta̱ tsa̱ra̱ n ta̱wa̱a̱ nu ucawu wo okolo e ekere a aza a na u ɗangwai. Waru u lyungu mu ta̱ tsa̱ra̱ n rito le e reve amayun a na oo rocosu le ununa aa yuwan nden n saꞌani nu ununa A̱sula̱ aa yuwan ma̱za̱nga̱ ne ele. 2 Amayun a nda a ta ca le uzuwu wo okolo a wuma u babu ukotu, za na A̱sula̱ a yuwaan nle nzuwulai kafu u yuwan uvaɗi, waru waa yuwan epen shi. 3 Gogo mantsa ma na ma ntsayi ma ɗa, u rocoi Alabari a Saꞌaniꞌi, waru tsu damma ta̱ za suru. Nu udammu wa̱ A̱sula̱ Za vi Iwawi i tsu i ɗa a zuwa numu n yuwaan yi ulinga u nda.

4 N ta ɗanasaa wu mepepelime ma nda, Titu, mawun ma amayun ma̱ va̱ a̱tsuma̱ o ucawu wo okolo a na tsu ri na̱ a̱yi. Lyawa A̱sula̱ Dada na̱ Yesu Zamawawa tsu ca wu isaꞌani na asuvu nden.

5 N lyawa wu ta̱ a̱tsuma̱ e iɗa ya Karita,† tsa̱ra̱ vu koso ulinga u tsu u na u ri ɗe, waru tsa̱ra̱ vu ɗangula azagbain† a̱tsuma̱ a̱ a̱ꞌisa̱ a̱ a̱za̱ e Itoni a̱tsuma̱ e ilyuci suru ununa n damma nuwu. 6 Zagbain suru u ciga u ꞌyuwan wo oꞌwo vuma na ama a yuwan majiyan ma saꞌani a aci a̱ yi adama a na u yuwain nden n saꞌani. U ciga u ꞌyuwan u da̱na̱ vali vu ka ta̱. Waru muwun ma̱ yi moo oꞌwo a̱za̱ e Itoni a̱ a̱ɓula̱, aza a na aa yuwusan nden mu uwuyanu shi, waru aza a na a̱ ri na aciyogbamu shi. 7 Ne ɗa waru zagbain u ciga u ꞌyuwan u yuwan wuma u saꞌani adama o ulinga wa̱ A̱sula̱ u na waa yuwusan. U da̱na̱ za vu ugbawu wan, waru u da̱na̱ za vu upan babu usa̱n wan. U ciga u ꞌyuwan u da̱na̱ ososowi wan.*A mantsa ma̱ ndeɗe aza a Israꞌila o tsu sowo ta̱ ma̱ra̱ gashi a̱guma̱ a ɗa, na̱ a̱ ri ubanakun. Waru, o tsu sowo ta̱ waꞌa na aa lyuwusa ilyalya. Amma a mantsa ma̱ tsu tsaa gura sowo waꞌa a̱vu tsu lyawa shi, adama o ndolo u ta laꞌa ulobonu tsu rito sowo ma̱ra̱ wan, ko keꞌen. She u da̱na̱ za vu ulungusu wan. She wo oꞌwo za vi icigi yi ikebe lon wan. 8 U ciga u ꞌyuwan u ka̱lyuwa̱ omocin a na a̱a̱ ta̱wusa̱ o uꞌwa wa̱ yi ulobonu, u ciga ili i na i ri ulobonu suru. U ciga u ꞌyuwan u da̱na̱ nu ugbozu, waru u da̱na̱ za va̱ a̱ɓula̱. Wuma wa̱ yi u da̱na̱ cece a na woo yoꞌonoto A̱sula̱ okolo, waru u gura guza̱ aciya̱yi ulobonu. 9 U ciga u ꞌyuwan u guza̱ uritosu wa adanshi a amayun. Reve u yuwan ulinga nu uritosuꞌu u kamba ama, waru u lapula aza a na a yuwusan mawasan na adanshi a̱ A̱sula̱.

10 Ne ɗa wa̱a̱ da̱na̱ adama a na ama o ro o ta̱ lo aza a na a yuwusan mawasan nu uritosu wa amayun. Ama a nda a tsu yuwusan ta̱ adanshi a vama, reve waru a̱ lulumusa̱ ama. A̱tsuma̱ a̱ munlu n ndolo ozo o ro na̱ a̱bunda̱ a̱ ta̱ pe a̱tsuma̱ a aza a na a dammai she na a paɗa vuma suru uryumbu. Ama a nda ele ɗa a laꞌai adanshi a vanvama. 11 I ciga i ꞌyuwan i ɓara ama o ndolo na̱ cuꞌun va adanshi o ndolo. A vadala ta̱ ɗe ꞌwa diga o uritosu wa amayun na̱ cuꞌun vu uritosu u vama u ndolo. A yuwan ta̱ ili i ndolo suru tsa̱ra̱ a̱ tsura̱ ikebe o ure u vama. 12 Hali vuma ta̱ a̱tsuma̱ a aza a Karita za na ri za yindi yuwan ta̱ adanshi adama e icuꞌun ya ama o ndolo, u damma, “Ama a Karita suru a̱za̱ e epen a ɗa, na̱ nlyayi, orogo, na aliwi.” 13 Amayun a ɗa. I ɓara le nu ucira tsa̱ra̱ a zuwa le a yuwan ucira a̱tsuma̱ e Itoni. 14 Waru a ꞌyuwan a ciga a lyawa mazuwa ma atsuvu a alabari a aza a Israꞌila, waru she a zuwa atsuvu e le a adanshi a ama a na a lyawai amayun wan.

15 Ili suru e ekere a aza a na okolo e le a̱ ri cece a̱ ta̱ cece. Agba e ekere a aza a na a̱ ri no okolo e iwuya, ili suru ili yi idaba i ɗa ni ili i na a̱a̱ usu shi, adama a na okolo e le na asuvu e le a buwa ulobonu shi. 16 Icuꞌun ya ama o ndolo a̱ ta̱ ka̱lyuwusa̱ gashi e reve ta̱ A̱sula̱, agba a wasan yi ta̱ ununa aa yuwusan wuma u le. Aza a tsu uwwa adanshi shi ɗa, waru a tsu yuwan ili ya̱ a̱ɓula̱ shi. Ama suru a suma le ta̱ adama e ili yi idaba i na aa yuwusan.