1-2 Kabo Yeoba iwalo Mosese koina iba, “Tobagubaguna tatao meuloili kwayakasisi-yagili koliyau kaiwena komiu Isileli kami tobagubaguna yo ami ebaebai tobagubaguna meuloili yau yagu gogo yo kaiwegu.”

3 Mosese iwalo tomo kolili iba, “Kaliyate bwaite kwanuwatu-kalatan, kaiwena kaliyate bwaite koina ami kaba kamkamna yanuwana kwalogabaen. Kaliyate bwaite koina Yeoba ana kaiwe mena ikalaimiu kwayawatagili. Kabo pwalawa me yistina siebweli kwayakasisi-yan. 4 Kaliyate bwaite kwalowasi waikena bagubagunana esana Abib kalona mena.*Isileli ali kalenda koina siwaloba waikena Abib, bwaite ala kalenda koina iyatubu Mati 14 na ilaoma Eipulu 14 5 Yeoba iwaloyameli tubumiyao kolili yakato Kenani, Iti, Amoli, Ivi, yo Yebusi ali yanuwa kani iyeyawa kolimiu. Saugana ibaguna-yagimiu kwalusae yanuwa masumasulina koina, yisti kana yakasisi soinane waginauli bolime kaigeda kaigeda kana waikena bagubagunana koina. 6-7 Pwalawa nige me yistina siebweli koina wakekakekan kaliyate seben. Kabo kaliyate mwawamwawasina koina kwasoi Yeoba kaiwena. Tabu yistimo o yisti me pwalawana ami yanuwa mena imiyamiya kaliyate sebenne kalona mena, pwalawa bwagabwaga koina wakekan. 8 Sauga muli mena soi kana sauga koina kani kwawalo natumiyao kolili, ‘Taginauli besiele kaiwena Yeoba tanuwatu-kalatan tawae iginauli kaiwela saugana tayawatagili Itipita koina.’ 9 Na tem ginauli yabo nuwanuwamiu kwanuwatu-kalatan mumugamiu bwaite besiele, kilakilala yabo kwapei nimamiu mena o nuwana lamwamiu mena, mumugane ilaomaya tubumiyao kolili. Mwa soi bwaite ami kaba nuwatu-kalatan besiele kilakilala yabo. Iyanuwatu-kalatagimiu yo Yeoba ana loina kwayawasa kaiwena Yeoba ana kaiwe mena ikalaimiu kwayawatagilima Itipita koina. 10 Bolime kaigeda kaigeda soi bwaite waginauli-kalatan kana sauga yawasosi koina.”

11-13 “Yeoba kani ibaguna-yagimiu kwalusae Kenani ali yanuwa mena kaiwena iwaloyameliyako kolimiu yo tubumiyao kolili. Saugana iyeyawa kolimiu, kabo tobagubaguna tatao meuloili kwatalamwagili Yeoba koina. Natumiyao tobagubaguna meuloili kani nige kwapwapwaoli-yagili na kwayamiyalaeli sipi natuliyao kolili. Kamwasane koina natumiyao tobagubaguna kwayamaisa-yavivilayoili. Besiele ebaebai kali tobagubaguna tatao meuloili kwatalamwagili yo kwapwaoli-yagili Yeoba koina kaiwena siya tabe Yeoba ana gogo. Na donki natuna tobagubaguna kwayamiyalae sipi natuna koina. Tem nige nuwanuwamiu waginauli besiele donki natunane galokomna wakopwai. 14 Sauga muli mena tem natumiyao sineli siba, ‘Mwa mumuga bwaite yaina gubesi?’ Kwawaloba, ‘Bwaite ala kaba nuwatu-kalatan Yeoba ana kaiwe mena ikalaila tayawatagilima ala kamkamna yanuwana koina. 15 Itipita ali kin katena ikololo iyakasisi-yagila yakato tabu talolowasi kabo Yeoba Itipita tomo yo ebaebai kali tobagubaguna meuloili iunuili siboita. Bwaite kaiwena ebaebai kali tobagubaguna tatao meuloili taolena Yeoba koina yo natulao tobagubaguna tayamaisa-yavivilali. 16 Mumuga bwaite ala kaba nuwatu-kalatan besiele kilakilala tapei nimala mena o nuwana lamwala mena. Iyanuwatu-kalatagila Yeoba ana kaiwe mena ikalaila tayawatagilima Itipita koina.’ ”

17 Saugana Itipita ali kin tomo italamwagili silowasi, Yaubada nige ibabagunayagili silolo-utusi kamwasa kubwakubwana mena kaiwena kamwasane bwaine kali tokalomagigili tomo Pilistiya ali dedei. Yaubada iwaloba, “Kisi tomo Isileli bwaite sauga kaleya silobai kabo ali nuwatu sibuiyoi yo sivivila Itipita.” 18 Na Yaubada iyoganli sitakikili dekawa bwagabwaga mena ule mena Kalita Balabalagiyana kana kamwasa koina. Tomo Isileli Itipita dedeina silogabaen yo ali kaba kaleya sikatububu-nonowaili. 19 Mosese Yosepa tuwatuwana ikalaili kaiwena tauna kona Yosepa iwalo tubunao kolili iwaloba, “Sauga muli mena kani Yaubada ileboimiu kabo tuwatuwagu wakalaili mekamikava saugana yanuwane bwaite Itipita kwalogabaen.” 20 Boda Isileli Sakot silogabaen na sigogoya Etama ule dekawa bwagabwaga salina mena. 21 Kaliyate koina Yeoba ibagunayagili yaloyaloi malamalawena mayamayalena koina na kamwasa iyakenayagili. Na boniyai koina ibagunayagili mayau mayalena koina. Kabo sowasowali kaliyate yo boniyai silaulau. 22 Sauga meuloina kaliyate koina yaloyaloine itotolo tomo manli mena, besiele boniyai mayaune itotolo tomo manli mena.