1 Daɣ adi arat da wa daɣ-wan gammaya, nak imosan amaskasaw fǝl as ǝɣbadaɣ Ǝmǝli: Kawanay a iɣra Mǝššina, agiwat alxal inihaggan d ǝtǝwǝɣra wa tǝtǝwaggam den. 2 Ǝqqǝlat faw aytedan wǝr nǝdkel iman-nasan, tilmadam, tǝqqǝlam imǝzǝzzǝydar. Nǝmǝqbǝlat gar-ewwan ǝs tara. 3 Ǝdgǝzat faw daɣ agamay ǝn tartǝyt ta ihakku Infas wa Zǝddigan ǝs tassaq n alxer ta tǝllat gar-ewwan. 4 Taɣǝssa iyyadda a tu-tǝllat, d Infas iyyanda. Ǝmmǝk en daɣ as Mǝššina iɣr-iwan-du s ad tagim attama iyyanda, a t-imosan was du-tǝtawaɣram. 5 Ǝmǝli iyyanda a t-illan, ill-ay ǝzǝgzan iyyanda, d alamaɣ daɣ aman iyyanda, 6 Mǝššina deɣ iyyanda a imos, imos abba n awedan kul, ixkâm fǝl i t-illân kul, itaggu igitan-net ǝs tarrayt n id t-illa iyyan, irtây deɣ d id t-illa iyyan.

7 Dǝr iga awen da ya, akkiyyan daɣ-na igrâw arraxmat ǝn Mǝššina, ewâl awen s adagar wa t-ikfa Ǝlmǝsix daɣ ǝššǝɣǝl-net. 8 Awen daɣ a fǝl ǝnnan Ǝlkǝttaban: «Iggǝzzay ǝs daggan win ǝdkalnen, ewây win ǝhanen tǝla, tǝzzar iga šihǝkkuten y aytedan.» 9 Ma imos almaɣna ǝn batu ta n «iggǝzzay»? Wǝrgeɣ almaɣna n awen as iras har imal daw amaḍal? 10 Wa d-izzǝbben, ǝnta a iggǝzzayan imal dǝnnǝg jǝnnawan kul fǝl ad idnǝy edag kul d arat kul.

11 Amaran Ǝlmǝsix, ǝnta a igan aytedan wiyyad inǝmmuzal, iga wiyyad ǝnnǝbitan, iga wiyyad imaggan ǝn salan n Ǝlinjil, iga wiyyad imadanan ǝd mǝssǝsǝɣra. 12 Šihǝkkuten šin den ig-enat Ǝlmǝsix fǝl ǝsǝssuhi d ǝsǝkmǝl ǝn mǝzzǝgzan, fǝl ad ǝfǝrgan ǝššǝɣǝl was tawaɣran, y ad taknu tǝɣǝssa n Ǝlmǝsix assahat. 13 Ǝmmǝk en daɣ as ketnanaɣ as za nawǝd ǝnǝmǝnnǝk daɣ ǝzǝgzan, iga awen daɣ tǝmǝzdǝyt ǝn Barar ǝn Mǝššina. Tǝsǝlkamt n awen as ad nǝqqǝl imǝzzǝgzan ǝkmâlnen, tǝnifalal daɣ-na tišit tǝkmâlat n Ǝlmǝsix. 14 Ǝddi ad zʼibʼas nǝmos bararan madrornen, ǝddagnen sa ǝd sa ǝbbatan-tan ǝzzǝnǝfan ǝn sǝssǝɣritan taggin nǝsbuha ǝn mǝkkǝrras saxraknen aytedan. 15 Kalar ǝddi ad za nǝmmal tidǝt, nag-as emel igân ǝs tara, nǝttǝy daɣ ǝkkulluk n anamod daɣ tarrayt ǝn wa imosan eɣaf-nana, almaɣna Ǝlmǝsix. 16 Ǝnta en daɣ a isadwalan taɣǝssa ketnet, ǝnta deɣ a ɣur du-tǝgarraw tǝɣǝssa assahat-net, iga awen daɣ tara. Ǝnta deɣ a isannamannakan taɣǝssa tǝnamattaf ǝs sǝmmǝɣras ǝssohatnen fǝl ad tǝfrǝg tǝslǝt kul igi n ǝššǝɣǝl-net.

17 Daɣ adi ǝggǝyyeɣ ǝsilakanaɣ-awan s esǝm n Ǝmǝli as: Wǝr immǝkkan ad tǝlǝsam igi ǝn mazalan win taggin aytedan win wǝr nǝmos Kǝl-Ǝlyǝhud, a wǝr nǝlkem ar i tayttay-nasan tǝmosat šibǝnnan. 18 Tayttay-nasan wǝr tat-iha ǝnnur, ǝmosan inaftaɣan i tǝmǝddurt ta tǝssǝɣmarat Mǝššina s ǝssǝbab n ǝljǝhǝl-nasan a sǝr-san du-tewây taɣart ǝn wallan-nasan. 19 Ab-as ǝssanan awa olaɣan wala awa wǝr noleɣ. Ǝššokalan daɣ tǝmazrǝyt, taggin imazalan zizallatnen aggadǝm, d iba n tǝla n igda daɣ ǝzzǝnǝfan kul ǝn mazalan samadasnen, ǝknân tara n ǝddǝnet.

20 Mišan kawanay wǝrgeɣ ǝmmǝk wen as tǝssanam awa imos Ǝlmǝsix. 21 Dad zamas tǝgrâwam isalan n Ǝlmǝsix, tǝtawasasaɣram daɣ tǝrtǝyt dǝr-ǝs, wǝdi tǝtiwasâsanam tidǝt ta tǝhât Ɣaysa. 22 Almaɣna n awen ad tammazzayam d alxal-nawan wa irǝwan, a t-imosan alxal n aggadǝm was kala a tu-tǝmosam, tâwayan arak deranan-net s ǝxruk. 23 Ǝqqǝlat aytedan išišanay Infas wa Zǝddigan isimattay taytwen-nawan. 24 Zund ǝmmǝk as ilassu awedan tabdoq, tǝqqǝlet tǝbdoq-nawan alxal aynayan wa d-iga Mǝššina. Alxal wen, itinǝfilil daɣ taqqat ǝd tazdak šin tǝhakku tidǝt.

25 Awen daɣ a fǝlas mazzayat d igi ǝn bahu. «Akkiyyan daɣ-wan iššiwǝlet tidǝt ɣas y ǝšǝqqaɣ-net», id akkiyyan daɣ-na taslǝt a imos ǝn win hadatnen. 26 «As kawan-iggaz alham, ad wǝr tagim abakkad.» Ad wǝr tudu tǝfuk ih-iwan alham. 27 Ad wǝr talǝmam y Iblis tarrayt as d-iggaz. 28 Wa imosan abaydag ammazzayet ǝd šikra, iššǝšɣǝlet šiɣurad-net, išɣǝlet ǝs fassan-net fǝl ad igrǝw tǝnfa a za uzan i maddararan.

29 A du-wǝr-tǝgmǝd batu waliyyat labasat imawan-nawan. Kalar ad wǝr tǝtaggim ar batuten hossaynen a za tǝggǝz tǝnfa, as tǝga addararat s awen, ǝqqǝlnat deɣ arraxmat i wa dasnat-islan. 30 Ad wǝr tǝzǝzzǝkǝnzǝram Infas wa Zǝddigan ǝn Mǝššina, fǝlas tarrayt n Infas wa Zǝddigan en as kawan-issǝwar Mǝššina ejwal-net y ǝzǝl wa n tǝdarfit ta n tǝzǝrǝst. 31 Tǝgmǝdet-kawan i tu-tǝlla tǝssǝmǝmt, d ǝɣǝšǝši, d alham, ǝd tǝhǝrǝššet, d ǝrrǝbdan, d a iqqal aššar. 32 Tinǝmǝggiwat awa olaɣan gar-ewwan, akkiyyan iqqǝl awedan tǝha tǝhanint, lǝmmid i midiwan-net. Akkiyyan daɣ-wan isurǝfet i win hadatnen zund ǝmmǝk as dawan-isoraf Mǝššina ǝs tarrayt n Ǝlmǝsix.