1 Bararan, bardagat i marwan-nawan [zun as tǝbbirdagam y Ǝmǝli], fǝlas awen daɣ a oɣadan. 2 Alwajib wa azzaran as iga Mǝššina arkawal n as ad ilu arozan, a inna: «Sǝɣmǝr abba-nak d anna-nak, 3 fǝl ad tǝgrǝwaɣ tǝfalawist, tileɣ taɣrǝst tagget daɣ ǝddǝnet.»

4 Kawanay amaran abbatan, ad wǝr tǝšiɣǝšǝšem bararan-nawan, kalar sassaɣriwat-tan, tagim-tan daɣ tarrayt tǝmǝlam-asan awa fǝl irɣam Ǝmǝli.

5 Eklan, bardagat i mǝssawwan win ǝddǝnet ǝs saɣmar ǝd tǝksǝda. Agiwat awen s ǝwǝl iyyanda, zun âs Ǝlmǝsix as tǝbbǝrdagam. 6 A dasan-wǝr-tǝtaggim ǝššǝɣǝl olâɣan fǝl as kawan-ewalan, zun as wǝr tagǝmmǝyam ar awa igrazan y aggadǝm. Kalar agiwat y ǝššǝɣǝl wa igi n âs eklan n Ǝlmǝsix a tǝmosam. As tu-tǝtaggim tǝgammayam s ǝwǝl iyyanda a du-tǝssǝxsǝlam tara ǝn Mǝššina. 7 Agiwat-asan ǝššǝɣǝl igân ǝs man ǝrdânen, zun as Ǝmǝli as tǝšɣalam, wǝrgeɣ aggadǝm. 8 Tǝssanam as: Arat kul olaɣan wa iga awedan, ad igrǝw maruzat-net ɣur Ǝmǝli, gǝr imos awedan wen akli wala ǝllǝlli.

9 Kawanay deɣ mǝssawǝs n eklan, agiwat aqqad en da y eklan-nawan. Ayyiwat-tan šihǝrǝšša, id tǝssânam as Ǝmǝli a ihan ijǝnnawan ǝnta a imosan mǝššikkawan kawanay dǝr-san. Ǝmǝli amaran wǝr fall-as t-illa igi ǝn tǝmǝrit.

10 Xasil, a obazan ɣur ǝmǝrǝdda, ǝgmǝyat daɣ Ǝmǝli ad isǝssuhǝt tartǝyt-nawan d Ǝlmǝsix ǝs tarna-net wǝr nǝla ǝddukad. 11 Ǝttǝfat tǝzoli n ǝmǝgǝr ta n Mǝššina fǝl ad tǝzmǝram i tǝmǝrkas n Iblis, 12 id tǝbǝllant ta nǝga, wǝrgeɣ aytedan a dǝr tat-nǝga ǝmosnen taɣǝssa d ǝzni, kalar taɣmaren, d ǝlxǝkuman, ǝd muzaran ǝlanen tarna ǝd fǝrregat a tan-imosan taɣmaren šin ǝxkamnen daɣ šiyyay ǝd kǝl ǝtǝnkul win ǝhanen ijǝnnawan tawayan-du tǝkma a dǝr nǝmmǝgar. 13 Awen daɣ a fǝlas ǝttǝfat tǝzoli n ǝmǝgǝr ta n Mǝššina fǝl ad tǝfrǝgam zǝmmerat y ark ǝzǝl, taqqamim da wǝr tǝqqelam dǝffǝr-wan daɣ tǝbǝllant ta tǝgam dǝffǝr as du-tǝssifalam dǝnnǝg aratan win den.

14 Xasil zǝzzǝwǝtat daɣ ǝzǝgzan-nawan, almaɣna n awen âs: Tǝqqǝlet tidǝt ǝsatǝb was totabam; tǝqqǝl taqqat asalsaw n ǝmǝgǝr wa tǝzlagam. 15 Sǝmmutǝgat i tǝbǝllant ta dǝr d-osa Ǝlinjil n alxer wa nǝzzǝgzan, iqqǝl Ǝlinjil en zun iɣateman-nawan. 16 Dǝnnǝg adi kul, iqqǝlet ǝzǝgzan aɣǝr-nawan. Ǝnta a kawan-z-akfin fǝrregat n ad tanɣim abalagleg kul wa zʼintǝs Iblis. 17 Sǝwǝrat tǝkǝbbut ta n ǝlɣillas, tǝzlǝgam takoba ta n Infas wa Zǝddigan a tat-imosan Awal ǝn Mǝššina.

18 Tattarat faw da ǝs tilalt n Infas wa Zǝddigan, ad tǝtaggim ǝzzǝnǝfan kul ǝn tǝwatriwen, ǝd mansayan ǝn Mǝššina. Ǝglǝyat daɣ awen, a tu-tǝtaggim ǝs zǝmmerat, ad tǝtaggim deɣ šiwatriwen i mǝzzǝgzan di ǝn mizdagan ketnasan; 19 a di-tanat-tǝtaggim nak da fǝl ad ǝgrǝwaɣ masnat n awal, ǝššiwǝlaɣ s ikus n aššak, agaɣ isalan n ǝssir n Ǝlinjil ǝs tanaya. 20 Ǝlinjil en daɣ as ǝmosaɣ almawakkil-net daɣ ǝddǝnet, amaran ǝddǝlil-net a fǝl aheɣ iɣunan. Tattarat-in fǝl ad t-ǝmmala y aytedan s ikus n aššak, s ǝmmǝk was ihor a sǝr-ǝs ǝššiwǝla.

21 Amadray-nana Tišik wa n ǝmǝri-nin imosan amaššaɣal iɣdâlan n Ǝmǝli, a dawan-agu kawanay da isalan-in kul, fǝl ad tǝssǝnam alxalat ta aheɣ d awa tagga. 22 Ǝgmâyaɣ-in ǝsuki wa dawan-t-in-z-aga, fǝl a dawan-agu isalan-nana, alǝm-awan fǝl man.

23 Onsaya Mǝššina di n Abba d Ǝmǝli Ɣaysa Ǝlmǝsix ad akfu imǝdrayan-nana kul alxer ǝd tara daɣ ǝttâfan ǝzǝgzan-nasan. 24 Ya Mǝššina tǝgeɣ arraxmat-nak y aytedan kul win ǝranen Ǝmǝli-nana Ɣaysa Ǝlmǝsix, ǝgân-as tara wǝr nǝtǝmǝttǝy.