1 Daɣ adi as nǝgraw taqqat dat Mǝššina s ǝzǝgzan-nana, wǝdi nǝgrâw alxer gar-enaɣ ǝd Mǝššina ǝs tarrayt n Ǝmǝli-nana Ɣaysa Ǝlmǝsix. 2 Tarrayt n Ǝlmǝsix as nǝgraw arraxmat [s ǝssǝbab n ǝzǝgzan-nana]. Arraxmat en ǝnta fella-nana. Nǝddǝwat amaran attama wa nǝga daɣ tanaya ǝn Mǝššina, ǝnta a imosan abarag-nana. 3 Dǝnnǝg awen fadda, nǝsabarag kudde nǝha tǝssust, fǝlas nǝssân as tǝssust ǝnta a du-tǝtawayat zǝmmerat. 4 Zǝmmerat ten amaran ǝnta a dana-tǝhakkit tišit n aytedan ǝlânen almaɣna, amaran as nǝqqal aytedan ǝlânen almaɣna wǝr za nammazzay d igi n attama daɣ Mǝššina.

5 Mǝššina amaran wǝr isǝrmig i daɣ-as igân attama, id tara-net a tǝdnayat iwallan-nana ǝs tarrayt n Infas wa Zǝddigan wa danaɣ-itawakfan. 6 Fǝlas harwa danaɣ-wǝr-tǝqqel alfaydat waliyyat ad immut Ǝlmǝsix fǝl ǝddǝlil n aytedan wǝr nǝzǝgzan ǝs Mǝššina daɣ alwaq wa iskat Mǝššina y awen. 7 Izzǝwat i zʼiqbǝlan ad t-iba kuddeɣ fǝl ǝddǝlil n awedan oɣadan. Mijas ifrâg awedan ad iqbǝl tǝmattant fǝl awedan olaɣan. 8 Mišan ǝmmǝk da was danaɣ-issǝkna Mǝššina tara ta danaɣ-iga: Harwada nǝmos inasbakkadan ad aba Ǝlmǝsix fǝl ǝddǝlil-nana.

9 Dad zamas ǝmǝrǝdda nǝgraw taqqat ǝs tarrayt n ǝzni n Ǝlmǝsix, manǝmmǝk as danaɣ wǝr zʼassafsu daɣ alham ǝn Mǝššina? 10 Fǝlas, dad zamas harwa nǝmos izǝnga ǝn Mǝššina da nǝga dǝr-ǝs alxer ǝs tarrayt ǝn tǝmattant ǝn Barar-net, manǝmmǝk as wǝr za nǝgrǝw efsan s ǝssǝbab ǝn tǝmǝddurt ǝn Barar-net ǝmǝrǝdda a dǝr-ǝs nǝga alxer. 11 Amaran iyyan arat as Mǝššina a fǝl nǝsaffalla ǝs tarrayt n Ǝmǝli-nana Ɣaysa Ǝlmǝsix s ǝnta a danaɣ-igan ǝmǝrǝdda alxer ǝd Mǝššina. Ǝnta den daɣ abarag-nana.

12 Ma tǝssoka za batu ten? Adi za as tarrayt n awedan iyyanda as d-iggaz abakkad ǝddǝnet, abakkad amaran ǝnta a d-ewayan tǝmattant. Ǝmmǝk en daɣ as tǝmattant tǝll-ay y aytedan kul fǝlas ketnasan ǝgân ibakkadan. 13 Ǝnta abakkad ill-ay harwa da wǝr d-izazzabbat Mǝššina ǝššǝriɣa-net fǝl ǝnnǝbi Musa, amaran abakkad wǝr ixǝssǝb, as tu-wǝr-illa ǝššǝriɣa. 14 Dǝr iga awen da ya tǝmattant tǝll-ay tǝxkâm daɣ ǝddǝnet a d-obazan ɣur Adǝm har Musa. Tǝll-ay harkid y aytedan win wǝr nǝga abakkad olân ǝd wa n Adǝm s ǝnta a ihan ǝlmital ǝn wa du-z-asin.

15 Mišan tǝmazrǝyt n Adǝm wǝr tola ǝd tǝhǝkkut ta danaɣ-iga Mǝššina s arraxmat-net. Tidǝt as aytedan aggotnen aba-tan fǝl ǝddǝlil ǝn tǝmazrǝyt n awedan iyyanda a t-imosan Adǝm. Ma dǝr ogda igǝt n arraxmat ǝn Mǝššina, tǝmosat tǝhǝkkut-net ta du-tosat ǝs tarrayt n awedan iyyanda a t-imosan Ɣaysa Ǝlmǝsix? Arraxmat ten ǝd tǝhǝkkut ten wǝr ǝlenat ǝddukad, amaran ewâdnat-in aytedan ǝknânen igǝt. 16 Awa du-tǝtaway tǝhǝkkut ǝn Mǝššina wǝr ola d awa d-eway abakkad n awedan iyyanda. Dǝffǝr abakkad wa iga Adǝm, Mǝššina iwwiddab s ǝššǝriɣa-net aytedan kul. Tǝhǝkkut amaran ta d-iga Mǝššina taqqat as tǝtaway aytedan, amaran tosâ-du dǝffǝr as ǝgân aytedan tǝmazrǝyt tǝgget. 17 Illikan as tǝmazrǝyt n awedan iyyanda a du-tewayat as tǝxkam tǝmattant ǝddǝnet ǝs tarrayt n awedan iyyanda wen. Mišan ǝs tarrayt ǝn Ɣaysa Ǝlmǝsix ɣas-net, ǝgrâwan aytedan a ogaran awen wǝllen. Aytedan win ǝgrawnen arraxmat wǝr nǝla ǝddukad ǝd tǝhǝkkut-net tǝhakkit taqqat, win di ad ǝddǝran ǝxkǝman deɣ ǝs tarrayt n awedan iyyanda a t-imosan Ɣaysa Ǝlmǝsix.

18 Daɣ adi, kud tǝmazrǝyt n awedan iyyanda teway-du attadib s aytedan kul, wǝdi aytedan kul ad ǝgrǝwan taqqat tǝhakkit tǝmǝddurt ǝs tarrayt n ǝmazal oɣadan n awedan iyyanda. Ǝmazal wen tamattant ǝn Ɣaysa Ǝlmǝsix a t-imosan. 19 Zund ǝmmǝk as tǝmazrǝyt n awedan iyyanda teway-du as ǝqqalan aytedan aggotnen inasbakkadan, ǝmmǝk en daɣ as ǝbǝrdǝg n awedan iyyanda a du-z-awǝyan s aytedan aggotnen ad ǝgrǝwan taqqat dat Mǝššina.

20 Ǝššǝriɣa amaran osâ-du fǝl ad tǝttǝy tǝmazrǝyt wǝllen. Mišan ibakkadan as ǝggǝtan daɣ adag a dǝnnǝg-san du-tǝssǝfǝl arraxmat ǝn Mǝššina. 21 Daɣ adi dad zamas abakkad ixkâm fǝl ǝddǝnet iddew ǝd tǝmattant, wǝdi arraxmat ǝn Mǝššina da ad tǝxkam tidaw ǝd taqqat fǝl a danaɣ-takfu tǝmǝddurt ta tǝɣlalat ǝs tarrayt n Ǝmǝli-nana Ɣaysa Ǝlmǝsix.