49
Yakop ivotia mbeb to muri pale ivot pa ndinatu
Yakop isavsaav toman Yosep le isob, ghoro ipoi ndinatu pida tinim, ve isaav padi ighaze: “Anim agharau ghou. Leso navotia mbeb to muri pale ivot payam.
Yam Yakop ndinatu, tamamim Israel to you.
Anim alup gham ila matag, ve alooŋ saveeŋ tiou.
Ruben, yom natug aidaba.
Sawa to paghug ve tapirig inepneep, you napoop ghom muuŋ.
Tauto tapirig iza tiom, ve izam ve tapirim ilib pa nditazim.
 
Eemoghon yom irau uŋgin taum maau. Yom unumale yawaaŋa to ivot toman tapiri tiina.
Yom uroron pa tamam maau, ve upamayaŋin ghou. Pasa, uzala inag to ghenooŋ, ve umogheer pa azuwag.
Tovenen izam irau imuuŋ pa nditazim muul maau. Mbnp 35:22
Simeon yesuru tazi Levi, ŋgar todi raraate.
Yesuru ndiran to mbutuuŋ sorokin tamtoghon pa buza todi. Mbnp 34:25
 
Tovenen lolog pa ŋgar todi maau, ve lolog pa lupuuŋ toman di maau.
Pasa, yesuru atedi tuku, ve tirabrab sorokin tamtoghon timatmaat.
Ve ŋgai paam, tiwaghamun di sorok.
 
Maaron tau pale ighur pataŋani iŋarua di.
Pasa, malmaliiŋ todi, tiina kat.
Irau lolodi isamin tamtoghon rita maau.
Tovenen you pale nareu di toman papaghu todi le timbiriis tila tineep ila toŋvetaz todi lolodi.
Yuda, nditogham ve nditazim pale tipait izam.
Pasa, yom pale ukis koiamŋa luadi.
Tovenen nditogham ve nditazim pale tiput aghedi payom, ve tipait ghom.
 
Yuda, yom unumale laion paghu to tapiri tiina ve tamtoghon timatughez pani.
Yom unum laion to ighan ŋgai sagsag pida le isob, ve izi igheen.
Sei irau imatughez maau ve imogheer pani? Maau. Syg 5:5
 
10 Yuda toman papaghu toni pale tikis titi to kinik,
ve tighamgham pooz ila le irau titi tonowen tamtoghona kat inim ivot.
Ghoro ye tau ikisi, ve ndug ndug tineep ila samba. Mbo 2:9, 110:2; Mt 2:6
 
11-12 Yuda papaghu toni pale tineep pooi izi taan todi, ve tirau aniiŋ ve vaen, ve titub le naghodi popoia. Irau timbool pa mbeb eta maau.
13 Zebulun papaghu toni pale tineep tigharau te, ve ledi soso poia pa waaŋ tilooŋ tila.
Taan todi pale ila imuul izi ndug Sidon.
14-15 Isakar papaghu toni pale tinim esele to bide tapiri.
Eemoghon ye igheen sorok ila bodbodaaŋ to nakaral to aniiŋ ineep ila.
Pale tighita tighaze taan todi, nene poia pa tineep pani ve tigham uraat.
Tovenen yes pale tigham uraat tiina.
Ve tamtoghon todi pida pale tinim mbesooŋa sorok, ve tigham uraat pataŋani.
16-17 Dan papaghu toni pale tinim rumai kainaŋen eez to yes Israela,
ve tigham uraat pa gharatooŋ pataŋani to tamtoghon.
Yes ival maau. Eemoghon pale tiwaghamun koiadi tinimale moot samia to ineep ataam dige ve isasaŋan.
Ighaze tamtoghon eta ilaan toman hos toni inim,
nene pale rikia moghon iŋaaŋ hos aghe, ve ŋgeu to ineep izala hos pogho, itap izi taan.
18 O Yoova, you nasaŋan ghom pa ugham mulin ghou.
19 Gat papaghu toni koiadi pale tinim pa tireu di.
Eemoghon yes pale tiparab ariaŋa, ve tinaan di tighau tila.
20 Taan to Aser pale ŋgoreeŋa tiina, ve aniiŋ popoia naol to kinik lolodi pani, titub ila.
21 Naptali, papaghu tiom pale tinim mekmek sagsag to tilaghlaagh sorok titaghon taudi lolodi,
ve tipopoop ndinatudi to paghunadi kat.
22 Yosep papaghu toni pale tinimale ai vaen to iyoon igharau ya,
ve boga titub tila saguan le tilib pa sirsiir,
ve ighur anoŋa popoia katindi tivot. Mbo 1:3
 
23 Yosep koia tipamundigin malmal pani, ve tinaana tighaze tivanegi imaat.
Eemoghon tiraua maau.
 
24 Pasa, Maaron ariaŋa to Yakop, ye ŋginiiŋ to yes Israela, ve inim inadi ariaŋa to yoŋgaaŋ.
Tauto Yosep nima tuŋia pa pane toni, ve ivaneg rikrikia.
 
25 Yosep, Maaron to tamam pale iuul ghom.
Maaron Ariaŋa To Ilib pa Ndimaronŋa Tisob Ne, pale ighur poia toni iza tiom toman papaghu tiom,
ve igham uman to sambam izi payam, ve igham ya to taan lolo iza payam paam.
Ve ighur poia toni iza to ndiliva tiam, leso tipoop ndinatumim katindi.
 
26 Yom tamam you. Poia to Maaron ighuri iza tiou, nene tiina kat.
Itatab lolooz tintina to tiyondyood irau sawa isob.
Ilib pa poia toni to muuŋ iza to nditimbug.
Poia tovene pale iza to Yosep toman papaghu toni, ve ipambood di inimale moghar to ineep izala dabadi.
Pasa, ye inim daba pa nditogha.
27 Benyamin, ye inimale ŋgavuun sagsag to pitoola ve ilaghlaagh.
Mboŋmaagh to naol ne, ighanghan mbeb to ye irabrab di.
Ve rabrab to naol, ivavalag mbeb to ye igham di, ve ireirei di pa ndita.”
28 Nenen yes Israela rumai todi saaŋgul ve ru. Sawa to tamandi Yakop ighaze imaat, ye ighur poia to Maaron iza todi. Ve saveeŋ to ye isavia pa ndinatu, nene: deŋia pa yes eŋaeŋa.
Olman Yakop imaat
29-30 Yakop ighur poia to Maaron iza to ndinatu le isob, ghoro avo iyaryaaŋ padi ighaze: “You naghaze napul gham tonene, ve nala naneep toman siŋ tiou pida to timaat wa. Sawa to namaat, yam agham ghou nala, ve aghur ghou nalooŋ nala yaam saambu to ineep izi taan Makpela. Leso nagheen toman tamaŋ ve timbug. Yaam saambu tonowen, muuŋ timbug Abaram igholi ila to Epron, ye Hit taamdi. Ineep igharau ndug Mamre to Kanaan we. Mbnp 23:16-19
31 Pasa, yaam saambu tonowen, to tighur Abaram yesuru azuwa Sara, ve Isak yesuru azuwa Rebeka tilooŋ tila. Ve you naghur azuwag Lea ana ilooŋ ila paam. 32 Tovenen yaam saambu to Abaram igholi ila to yes Hita, you naghaze aghur ghou nalooŋ nala nagheen tonowe paam.”
33 Olman Yakop ighur saveeŋ izi to ndinatu le isob, ghoro iyoot aghe izala ina to ghenooŋ, iyavan, ve imaat.