6
1-2 Sawa to talooŋ saveeŋ to Krisi inim paghu, tipatoot ghiit pa ŋgar rauraua muuŋ. Ŋgar tovene: Ŋgar to pale igham ghiit tamaat ve talaleed, iit irau tapuli ineeple, tatoor ŋgar toit, ve taghur ila to Krisi. Ve tipatoot ghiit pa ŋgar naol to ghamuuŋ ya,* Muuŋ, tamtoghon tigham ya pa pughu naol. Ighaze tamtoghon eta to Yuda maau ne, ighaze itoor ŋgar toni ve itaghon yes Yuda pa suŋuuŋ todi, ye igham ya. Ve ighaze tamtoghon eta ighaze itaghon ŋgar to Yoan ŋgeu rughuzaaŋa, nene ye paam igham ya. Yes Yuda timenmen nimadi ve titaghon ataam naol pa ririwaaŋ, leso tiŋgalaaŋ ila Maaron mata. Ve Krisi tamtoghon toni tigham ya, leso tila toman Krisi pa mateeŋ toni, ve yesŋa Krisi tilup di tinim ee moghon.
ve ŋgar to ghuruuŋ nimaad izala tamtoghon poghodi pa tapalot di, ve mundigiiŋ to yes mateeŋa. Ve tipatoot ghiit tighaze Maaron pale iŋgabiiz ghiit ve ighur atia pait. Ve atia tonowen pale ineep le alok. Ŋgar tovene to tipatoot ghiit pani muuŋ, ghoro tisavia ŋgar pida. Nene poia. Eemoghon ighaze tasasavia ŋgar tovene moghon, nene inimale iit taghelia gungun moghon, ve tarei ruum anoŋa maau. Tovenen iit irau tazuaria ghiit le taghazooŋ pa ŋgar pida paam, leso ŋgar toit imatu pa Maaron saveeŋ toni. 3 Ve ighaze Maaron iyok pait, nene pale tagham tovene.
Yes to tighur muridi pa Krisi, ledi ataam muul maau
4 Aghita. Ighaze tamtoghon eta ipul muri pa Krisi, nene pale iit leed ataam eta pa taghami itoor ŋgar toni imuul ila pa Krisi ne maau. Tamtoghon pida, Maaron ipaghazoŋan di ve ŋgar todi ighazooŋ wa. Ve Maaron Avuvu igham uraat padi, ve poia toni to ineep sambam ve izi inim, yes tiyamaana wa. 5 Yes tigham saveeŋ to Maaron, ve tiyamaana tighaze poia. Ve Maaron tapiri naol to muri pale tivot tighazooŋ, yes tiyamaan di ris wa. Mbo 34:8
6 Tamtoghon tovene, ighaze tighur muridi pa Krisi, yes ledi ataam pa titoor ŋgar todi ve timuul tila toni ne maau. Pasa, ŋgar to tighami, nene inimale tirab Maaron Natu izala ai pambarooŋ muul, ve tipamayaŋini ila ival tiina matadi. Hib 10:26+; 2Pe 2:20+; 1Yo 5:16
7 Taan to ighaze uman izizi pani ve aniiŋ popoia titubtub ila, nene iuul yes to tighanghan ila taan tonenen. Taan tovene, poia to Maaron pale ineep ila. 8 Eemoghon taan to kikiliiŋ samsamia toman waar mata mata moghon titubtub ila, nene taan poia maau. Taan tovene ipatumi. Pasa, ighaze inepneep tovene itaghoni ila, nene pale mala maau ve Maaron iwaghamuni, ve yab ighani. Mt 3:10, 7:19; Lu 13:6+
9 Yam ndiran tiei, lolomai payam kat. Onoon, saveeŋ to aazne nisavia payam ne, ariaŋa ris. Eemoghon yei nighur ila ariaŋa nighaze yam animale taan samia maau. Yam animale taan poia. Tovenen Maaron pale igham mulin gham ve aneep pooi. 10 Pasa, ye itaghon ŋgar deŋia moghon. Irau igham ŋgar samia eta maau. Tovenen ye irau lolo imaagh pa uraat tiam popoia ve ulaaŋ to yam aghamgham pa tamtoghon toni ne maau. Aazne paam, yam auluul di. Ŋgar tonanan ipatooŋ gham ighaze lolomim ineep toni kat. Mt 10:40+, 25:40; 1Kor 15:58
11 Yei nighaze yam asob azuaria gham le ataghon katin ŋgar to Krisi. Tovenen lolomim ru malep. Akis ghurla tiam tuŋia le irau agham nepooŋ poia to aghurghur matamim pani ne. 12 Tovenen amalai malep. Matamim iyaryaar, ve ataghon ŋgar to yes to tighur ila to Maaron, tiyoon ariaŋa pa badooŋ pataŋani, ve tisasaŋan le tighita saveeŋ mbuaaŋ toni anoŋa. Hib 10:36, 12:1; Yems 1:3+
Lolood ru pa saveeŋ mbuaaŋ to Maaron malep
13 Sawa to Maaron imbua saveeŋ toman Abaram, ye iwaat tau iza pa saveeŋ mbuaaŋ toni leso ipariaaŋa. Pasa, tamtoghon eta iza ilib pa Maaron maau. Tauto iwaat tau iza pa saveeŋ tonowen, leso ipariaaŋa le iyaryaaŋ kat ighaze:
14 “Onoon kat. You taug pale naghur poia tiou tiina iza tiom, ve nagham papaghu tiom timasa tinim naol.” Mbnp 22:16+
15 Abaram ighur ila saveeŋ mbuaaŋ tonene. Tauto ate izi, ve inamnaam ila le ighita anoŋa.
16 Iit tamtoghon gabuaad tovene: Ighaze itiŋa ndiran pida tawazoran ghiit pa mbeb eta, nene pale tawaat tamtoghon eta to iza tiina ilib pait. Leso iza tonowen ipariaaŋ saveeŋ toit, ve ipoon ndiran tonenen avodi. Igham 22:10+
17 Maaron tovene paam. Ŋgar toni iyaryaaŋ kat ighaze igham poian Abaram toman papaghu toni. Irau itoor ŋgar toni muul maau. Tauto iwaat tau iza pa saveeŋ mbuaaŋ toni, ve ipariaaŋa le iyaryaaŋ kat. Leso iit tamtoghon to izaad pa mbeb to ye imbua saveeŋ pani ne, lolood ru pani sob. 18 Tovenen iit to tayooŋ ila to Maaron, leed mbeb ru to tipariaaŋ ghiit pa taghur ila toni. Eez, nene saveeŋ mbuaaŋ toni. Ve ite, nene ye tau iza to iwaata pa ipariaaŋ saveeŋ toni. Mbeb ru tonene, Maaron irau itoor ŋgar toni, ma itombaan ghiit pani ne maau. Mbeb ru tonene tipariaaŋ ghiit kat, leso takis ghurla toit tuŋia, ve taghur mataad pa nepooŋ poia to Maaron pale igham pait. Tit 1:2
19-20 Nepooŋ poia to taghurghur mataad pani ne, nene ikis ghiit tuŋia, inimale badewaaŋ to ikis waaŋ. Pasa, Ŋgeu to inim ataam pait pa tagham nepooŋ tonenen, ye imuuŋ pait, ve ilooŋ ila rumai to ndug sambam wa. Nene Krisi. Ve uli to ipoon rumai lolo to patabuaŋ le patabuaŋ kat, ye ila ilib pani, le ila peria to Maaron. Pasa, Krisi, ye inim daba tau to watooŋrau inimale Melkizedek. Tovenen ye pale iyoon bodbodaaŋ pa Maaron ve iit tamtoghon, ve uraat toni tonowen iseeŋga itaghoni taghoni gha ila. Mbo 110:4; Hib 4:14, 5:6, 9:24
*6:1-2: Muuŋ, tamtoghon tigham ya pa pughu naol. Ighaze tamtoghon eta to Yuda maau ne, ighaze itoor ŋgar toni ve itaghon yes Yuda pa suŋuuŋ todi, ye igham ya. Ve ighaze tamtoghon eta ighaze itaghon ŋgar to Yoan ŋgeu rughuzaaŋa, nene ye paam igham ya. Yes Yuda timenmen nimadi ve titaghon ataam naol pa ririwaaŋ, leso tiŋgalaaŋ ila Maaron mata. Ve Krisi tamtoghon toni tigham ya, leso tila toman Krisi pa mateeŋ toni, ve yesŋa Krisi tilup di tinim ee moghon.