40
Suŋuuŋ to tamtoghon to ipait Maaron pa ulaaŋ toni
Mbouŋ to David
Sawa to pataŋani igham ghou, ateg izi ve nasaŋan Yoova.
Ve ye ighur taliŋa pa taŋiiz tiou, ve iuul ghou.
 
Muuŋ, nepooŋ tiou inimale you naneep izila saambu to yes mateeŋa.
Eemoghon Yoova indae ghou naza.
Agheg putukia ila karoos tiina, ve naghaze pale nandal nazila.
Eemoghon ye ipas ghou naza, ve ighur ghou nayoon ila taan ariaŋa. Mbo 27:5, 31:8, 69:14
 
Ve ipamundigin ghou ve nambou mbouŋ paghu.
Nene mbouŋ to tapait Maaron toit iza.
Ŋgar to Yoova igham payou, pale igham ival tiina tighilaal. Tovenen yes pale timatughez, ve tighur ila toni. Mbo 96:1; Syg 5:9
Tamtoghon to ighaze inumeer Yoova, nene pale tini iza, ve poia to Yoova iza toni.
Tamtoghon tovene, ye ilup toman yes to tipait taudi izadi ne maau.
Ve yes to tipul ataam to Maaron, ve timbesmbees pa maaron kaaromŋa, ye ineep saguan padi. Mbo 1:1, 84:12; 2Kor 6:14+
Yoova, yom Maaron tiou. Eta irau ghom maau.
Pasa, yom ughamgham uraat gharatooŋadi naol pa uul ghei. Uraat tonanan, ite kat.
Ve lolom ighur pa ŋgar popoia naol to ughaze ugham payei.
Ighaze natoova pa nanin di tisob ve nasavia di, nene pale naraua maau.
Ŋgar to rabuuŋ mbeb inim watooŋrau payom, toman ŋgar to nigham aniiŋ payom pa nipait ghom, nene yom lolom pani maau.
Ve ŋgar to ghuruuŋ mbeb izala artaal leso yab ighan suvuni, toman ŋgar to rabuuŋ mbeb pa rewaaŋ sosor to tamtoghon, nene paam, yom ughur matam pani maau. Yom ukaak taliŋag, leso nataghon aliŋam. Mbo 51:16-19; Hib 10:5+
 
Tauto nasaav payom naghaze: “Maaron, taug nene.
Nataghon saveeŋ to timbooda iŋarua ghou ila rau tiom, tauto nanim.” Yo 5:39,46; Hib 10:7
 
Maaron tiou, ighaze nataghon katin lolom, nene igham lolog poia kat.
Pasa, tutuuŋ to yom ugham payei, nene ineep ariaŋa ila lolog. Yer 31:33; Mt 26:39; Ro 7:22
Yoova, yom uwatag: Ulaaŋ to ugham payei, you neneeŋag pani maau.
Sawa to ival tiina tilup di pa suŋuuŋ, you nasasavia varum padi. Mbo 22:22,25
 
10 Onoon kat, ulaaŋ ve ŋgar deŋia to upatooŋa payou, you naŋgooza ineep to taug moghon maau.
Ve gabuam to lolom ineep tuŋia ila to tamtoghon tiom ve uluul di, nene paam, naŋgooza pa tamtoghon tiom maau. Sawa to tilup di pa suŋuuŋ, you nasasavia gabuam tonenen padi.
Ŋgar tiom to uluul tamtoghon itaghon saveeŋ mbuaaŋ tiom, nene navovotia padi.
11 Yoova, matam kisin sosor tiou malep. Lolom isamin ghou ve upul sosor tiou.
Ŋgar tiom to lolom ineep tuŋia ila to tamtoghon tiom, ve utataghon saveeŋ mbuaaŋ tiom, nene pale inim sigeu payou.
12 Ughita. Aazne, pataŋani naol tiluvut ghou. Irau nanin di maau.
Ŋgar tiou samsamia atia, tauto iŋarua ghou.
Tovenen naghita naghaze leg ataam eta muul maau.
Sosor tiou, katindi kat. Tilib pa dabag raua.
Tovenen namatughez, ve tapirig isob kat.
 
13 O Yoova, lolom isamin ghou, ve ugham mulin ghou pa pataŋani tonene!
Unum rikia moghon ve uul ghou!
 
14 Yes to tikalkaal ataam pa tirab ghou namaat, utatan di, ve ugham ŋgar todi iwaghamgham, leso mayadi.
Ve yes to tighita pataŋani tiou tonene ve tinidi iza pani ne paam. Upamuul di tila toman mayadi.
 
15 Ve yes to tisavsaav payou tighaze: “Aa, ughita wa? Ŋgar to nighaze ivot payom, tauto ivot wa!”
Ndiran tovene, utatan di, ve ugham di tiwaghamgham. Leso mayadi pa ŋgar to tighami.
16 Eemoghon tamtoghon tisob to tizuaria di tighaze le tiwatag katin ghom, yes pale lolodi poia ve tinidi iza payom.
Ve yes to lolodi pa ulaaŋ tiom, nene pale lolodi poia kat, ve moghon moghon tisavsaav tighaze: “Tapait Yoova. Pasa, ye iza tiina kat.”
17 Yoova, matam inim payou lak!
Pasa, pataŋani tonene itatan ghou le tapirig isob. Narau mbeb eta muul maau.
Yom moghon to irau uul ghou ve ugham mulin ghou.
Maaron tiou, uzuar malep. Unum rikia moghon ve uul ghou!