Rau Ite Imin Ru Tau Paulus Iboode Pa Yes Korin
2 Korin—2 Corinthians
1
1 Yau Paulus. Maaron itaghon tauu loolo ve ighur ghau namin mbaŋooŋa to Yesu Krisi. Yeiru toŋvetaz toit Timoti, nibood rau tane ilat pa lupuuŋ to Maaron tau aleep izi nugh Korin na. Ve yam mon mako. Rau tane ilup gham tomania Maaron tamtamon tooni patabuyaaŋa tisov tau tileep irau taan sirivu to Akaia na paam.
2 Poia to Tamaan Maaron ve Tiina toit Yesu Krisi aat izaa tsiam, ve tiŋgin gham aleep poia toman lolomim luuma. Onoon.
Maaron iuluul ghiit pa pataŋani toit, leso tauul zetaanŋa pa pataŋani toozi
3 Loloon poia pa Tiina toit Yesu Krisi Taama Maaron, ve tapaiti pa poia tooni. Pasaa, i loolo isasaghatin ghiit ve iuluul ghiit. I Maaron tau iravrav ateen ve ipapalot ghiit irau saawe. *Ep 1:3; 1Pe 1:3
4 Saawe isov tau iit taleep ila pataŋani loolo, i iravrav ateen ve ipapalot ghiit. Leso anaan tapalot zetaanŋa siriv tau tileep ila pataŋani loolo na, ve tarav atezi. Pasaa, uleeŋ tau taghamghamu ila tooni, ene ipapalot ghiit. Tauta iit irau tarav zetaanŋa atezi ve tapalot zi. *Ro 15:5; 2Kor 7:6
5 Onoon, iit tau tataghon Krisi ne, tabadbaad pataŋani naol imin i tauu. Eemon isaav ighe tabaad pataŋani tintiina, ene pale i tauu irav ateen, ve tagham palotiiŋ tiina ila tooni. *Mbo 94:19; 2Kor 4:10; Kol 1:24
6 Saawe tau yei nibaad pataŋani, ene to iuul gham, leso ayooz ariaaŋ pa taghoniiŋ eez to Maaron, ve i igham mulin gham. Pa ighe Maaron ipalot ghei gha niyooz ariaaŋ, ene pale ŋgar tau yei nighamu ne, ipalot gham paam ve ayooz ariaaŋ pa badooŋ pataŋani imin yei. *2Tim 2:10
7 Tauvene yei nighur ila ariaaŋ nighe: Yam pale ayooz ariaaŋ. Pasaa, yei niwatagh: Isaav ighe itiŋa talup ghiit pa badooŋ pataŋani, ene pale Maaron irav ateen ve itiŋa tagham palotiiŋ ila tooni. *Ro 8:17
Paulus ipaesia pataŋani tau ivot pani izi taan sirivu to Asia
8 Yam toŋvetaz, yei nighe yam awatagh pataŋani tau ivot payei izi taan sirivu to Asia. Pataŋani tau ivot payei na, tiina kat. Irau nibaado mako. Tauvene saawe tana, nigham ŋgar nighe irau nileep mako, pale nimaat. *Mbaŋ 19:23+; 1Kor 15:32
9 Onoon kat. Saawe tana, nighita nighe lemai eez eta muul mako. Yei nimin ŋeer tau tigabiiz saveeŋ tooni ve tighe i aat imaat. Eemon pataŋani tawe ivot payei, leso ninumeer taumai sov, ve ninumeer Maaron. Pasaa, i mon ta irau ipaburigin yes mateegha. *Yo 5:21
10 Tauvene pataŋani tiina tau ivot payei na, ene imin ta yei nileep ila naal aavo. Eemon Maaron igham mulin ghei pa pataŋani tawe. Tauta yei nighur ila ariaaŋ nighe murei, isaav ighe pataŋani ivot payei muul, i pale igham mulin ghei. *Ro 8:35+ 11 Eemon yam aat auul ghei ve aghur ghei ila suŋuuŋ tsiam. I pale ilooŋ suŋuuŋ tsiam, ve iuul ghei itaghon tauu poia tooni. Leso yamŋa eval tiina lolomim poia pani, ve apakuru. *Ro 15:30+; 2Kor 4:15; Pil 1:19
Paulus ipaesia puughu tau itoor ŋgar tooni ve ila Korin mako
12 Gabua tiina ee tau yei nipakur ghei pani, ene vene: Niyamaan ila lolomai nighe: Ŋgar tau nighamghamu irau nugh nugh ne, nitaghon ŋgar tau tamtamon to taan tipaiti ne mako. Poia to Maaron, tauta ipapaburigin ghei gha nibesbees pani toman lolomai eemon, ve nighamgham ŋgar tau iŋgalaaŋ ila i maata. Ve ŋgar tane, yei nitotoi katini payam. *1Kor 1:17, 2:4, 13; 2Kor 2:17; 1Tes 2:10
13-14 Ve saveeŋ tau niboode payam na, puughu eta iyooŋ mako. Saveeŋ tsiei isov, ŋgara igheen ghazooŋa. Irau awaato mon ve aghazooŋ pani. Onoon, saawe tane, yam siriv aat aghazooŋ payei geeg soone. Eemon naghe le ŋgar tsiam ivot ve aghazooŋ kat payei. Leso saawe to Tiina toit Yesu imuul ilam, yam tintinmim payei, imin yei tintinmim payam. *2Kor 5:12; Pil 2:16; 1Tes 2:19
15-16 Muuŋ, yau naghe yam tintinmim payau ve uraat tsiau. Tauta saawe tana, matag iŋgal naghe nalat naghit gham imin maata. Le isov, o nala taan sirivu to Masedonia. Ve saawe tau napul Masedonia, mako namuul nalat naghit gham muul, ve yam aghur ghau gha malmalig nala pa Yudea. Leso Maaron ipalot gham pai ru itaghon laghooŋ ru tau naghamu na. *Mbaŋ 19:21; 1Kor 16:5+
17 Eemon ŋgar tsiau tana ighur mako. Onoon, imin maata, yau nasaav payam naghe: “Yau pale nalat.” Eemon murei, natoor aliŋag naghe irau nalat mako. Ve yam aghit ghau mindai? Aghe yau nagharaat poghania ŋgar tsiau mako, tauta natortoor aliŋag? Ma aghe nagham karom ve nambu sorokin saveeŋ imin yes to titaghon ŋgar to taan, tauta saveeŋ ru, “Vee” ve “Mako” ivotvot ila avog, ne? 18 Alooŋ. Maaron toit, i isasavia saveeŋ onoon mon, ve itataghon saveeŋ tooni. Ve yei tauvene paam. Irau nitortoor aliŋamai mako. *1Kor 1:9; 1Tes 5:24
19 Pasaa, Maaron Naatu Yesu Krisi tau yau gha Silas ve Timoti nivotia vaaru payam na, i itortoor aliiŋa mako. Isaav ighe i imbu saveeŋ pa gabua eta ighe: “Vee, yau aat naghamu,” ene irau itoor aliiŋa muul mako. Saawe isov, i itataghon saveeŋ tooni. Ve ila uraat tooni, Maaron isaav: “Vee” pa saveeŋ mbuaaŋ tooni ta naol ne. *Mbaŋ 18:5
20 Pasaa, saa saveeŋ tau Maaron imbua, ene Krisi ta igham uratoini gha anooŋa ivot. Tauta monmon isaav ighe tapait Maaron eeza pa tapiri ve poia tooni, iit tasavsaav taghe: “Onoon” ila Yesu Krisi eeza. *Ro 15:8+; Syg 3:14
21-22 Maaron tauu ipapalot ghei tomani gham. Tauta iit tasov taleep tuŋia ila to Krisi. I isiigh ghiit tamin le, ve ighur Avuvu Patabuyaaŋ ila loloon wa. Avuvu tane imin ilaal pait ighe iit tamtamon to Maaron. Ve imin puughu pa gabua naol tau pale Maaron igham pait. Tauvene iit tawatagh: Saa gabua tau Maaron imbu saveeŋ pani na, i pale igham pait. *Ro 8:16+; 2Kor 5:5; Ep 1:13+; Syg 7:3+
23 Saveeŋ tau naghe nasavia ne, ene onoon. Maaron iwataghi. Puughu ta nalat mako, ene vene: Yau lolog pa nasavia saveeŋ ariaaŋa payam, ve nagham gham lolomim isaghat sov. 24 Alooŋ. Yei nighe nitatan gham azi, ve niŋgin ghuruuŋ ila tsiam ne mako. Pasaa, yei niwatagh: Yam ayooz ariaaŋ pa ghuruuŋ ila tsiam wa. Yei nighe itiŋa talup ghiit ve tagham uraat. Leso niuul gham ve aleep toman lolomim poia. *1Pe 5:3