19
Yes Israela tila tivot loloz Sinai puughu
1-2 Yes Israela tiburig muul gha tipul nugh Repidim, ve tilaagh tila tivot nugh ŋginaaŋa Sinai. Laghooŋ toozi tau tipul Isip ve tilam na, igham kaiyo ru wa. Ve ite imin tol pani, mbooŋi imin maata, ra tila tivot loloz Sinai puughu, ve timariau izi ta sewe.
3 Mose ipul zi tileep, ve izala pa loloz, leso yesuru Maaron tisavsaav. Yoova ileep loloz daaba, ve iboob izila pani ighe: “Usaav pa yes Israela tau paaghu to Yakop na tauvene: *Mbaŋ 7:38
4 ‘Ŋgar tau yau nagham pa yes Isipa na, yam Israela aghita pa taumim matamim wa. Yam awatagh: Yau nabaad gham imin manbog ibaad natŋa izala baage, ve nagham gham alam avot tsiau izi ta sene. 5-6 Aazne, isaav ighe yam alooŋ aliŋag, ve matamim iŋgal saveeŋ mbuaaŋ tsiau, ve ataghon duduŋai ŋgara, ene pale amin leg kat, ve itiŋa tavalupu ghiit tamin eemon. Onoon, taan isov tomania tamtamona, ene yau tsiau mon. Ve yam o, taug nasiigh gham, ve nagham gham amin leg motot. Yau naghe yam asov aleep ila pooz tsiau saamba, ve abees payau imin zeran to watooŋrau. Leso amin tamtamon tsiau patabuyaaŋa.’ ” *Tit 2:14; 1Pe 2:9; Syg 5:10
7 Yoova isavsaav le isov, ra Mose imuul izila to yes Israela. Ila ivot toozi, ve ipoi zolmana toozi tilam tilup zi, ve ipaesia Yoova aliiŋa isov tana pazi. 8 Yes tilooŋ saveeŋ tooni, ve tisov tilup avozi tighe: “Poia, saveeŋ isov tau Yoova isavia na, yei aat nitaghoni.”
Tauvene Mose imuul izala to Yoova, ve ipaesia yokiiŋ toozi pani. *Igham 24:3
9 Yoova isaav pani ighe: “Ulooŋ! Yau aat naleep ila taitai gabgabuai loolo ve nalat tsio, ve nasavsaav tomani ghom ve eval tiina tilooŋa. Leso tighur ila saveeŋ tsio ve titaghoni irau saawe.”
10-11 Mose ipaesia yes Israela aliŋazi pa Yoova le isov, ve Yoova isaav pani ighe: “Umuul uzila, ve usaav pazi tauvene: Aazne ve bogzo, yes aat timin oliŋazi, ve tigharaat zi gha leso tiŋgalaaŋ ila yau Yoova matag, ve tisaŋan. Pa ezau, mako yes Israela tisov tighit ghau nazilam ve naleep izala loloz Sinai daaba.
12 “Tauvene ughur bubuaaŋ ilivutin loloz puughu, leso tamtamon tileep soghan. Ve usaav ariaaŋ pazi leso tizala loloz sov, ve titut loloz puughu rigta sov. Isaav ighe tamtamon eta ilaagh ila le ivaghaaz loloz puughu, na aravu imaat. 13 Ve eez to ravuuŋ, ene aravu pa nimamim sov. Aleep soghan, ve aravu pa maet, ma avaneghi. Tauvene isaav ighe tamtamon eta, ma ŋgai eta itut loloz puughu, ene irau ileep mako. Yam aat aravu imaat. Saveeŋ tane pale iyooz tauvene le irau alooŋ tavuur itaŋ le malau, mako yam irau azala loloz.” *Hib 12:20
14 Yoova isavsaav le isov, ra Mose ipul loloz daaba, ve imuul izila to yes Israela, ve isaav pazi ighe timin nonoghiiŋa toozi ve tigharaat tauzi poi, gha leso tiŋgalaaŋ ila Yoova maata, ve tisaŋan. 15 Ve ipaes pazi ighe: “Aazne ve bogzo, yam aat agharaat taumim ve asaŋan. Agheen tomania zilivaa sov. Pa ezau, mako Yoova izilam.”
Maaron ivot to yes Israela
16 Tilepleep le mboŋ ru isov, ve mboŋoozo, ra taitai gabgabuai ilam itav loloz daaba. Ve nugh ighani milmilia, ve lalaav guruŋguruŋia. Ve gabua ee itaŋ imin tavuur, eemon luutu tiina kat. Tauvene yes Israela tisov tiroi le tapirizi isov. 17 Mose igham zi tipul nugh toozi to lepoogh, ve tila tiyooz tigharau loloz puughu, leso yesŋa Maaron tilup zi.
18-19 Ra Yoova izilam tomania yav tiina izala loloz Sinai daaba, ve mbuas tiina ikau loloz le tighita muul mako. Ve yogyoog tiina itok le loloz ilala ilamlam. Ve gabua tau itaŋtaŋ imin tavuur na, itaŋtaŋ ve izurzuur ilam ilam le luutu ivot imin tiina kat.
Ra Mose isavsaav tomania Maaron. Ve saawe tau Maaron iyol saveeŋ tooni, aliiŋa imin lalaav luutu. *Mbo 29:3+; Hib 12:18+
20 Tauvene Yoova izilam ileep izala loloz Sinai daaba, ve ipoi Mose ighe izala tooni ta sewe. 21 Tauvene Mose izala tooni, ve Yoova isaav pani ighe: “Umuul uzila, ve uveveen eval tiina tawe tauvene: Tizoornugh to tizalam tighit ghau sov. Pa ighe tizalam, ene pale tamtamon katini timatmaat. 22 Yes zeran to watooŋrau paam. Isaav ighe lolozi tighe tilam tigharau ghau, ene yes aat tigharaat tauzi le tiŋgalaaŋ kat. Le isov o, tilam tivot tsiau. Ighe tigharaat tauzi poi mako, ene pale ateg yavyav pazi, ve narav zi tilalez.”
23 Mose isaav pa Yoova ighe: “Tamtamon eta irau izalam loloz tane mako. Pasaa, yo taum usaav ariaaŋ payei ughe nighur bubuaaŋ ilivutin loloz puughu, leso tamtamon tighita loloz tane imin nugh patabuaaŋ ve tiroron pani.”
24 Yoova isaav pani muul ighe: “Poia. Umuul uzila ugham togham Aron, ve yamru mon azalam. Eemon yes zeran to watooŋrau tomania eval tiina to Israel tizoornugh to tizalam tighit ghau sov. Ighe tizalam, ene pale ateg yavyav pazi, ve narav zi tilalez.”
25 Yoova isavsaav le isov, ra Mose imuul izila, ve ipaesia aliiŋa pa yes Israela.