16
Agar ipoop Ismael
1 Abram azaawa Sarai, i ipoop Abram le naatu eta soone. Eemon i le besooŋa livaa ee to Isip, eeza Agar. 2 Saawe ee, Sarai isaav pa Abram ighe: “Ulooŋ. Yoova ipoon ghau, tauta napoop mako. Tauvene yo ula to besooŋa tsiau livaa Agar, ve yamru agheen. Ighe ugham tauvene, ene aat imin eez to nagham natugŋa tivot ila tooni.” Abram ilooŋ Sarai aliiŋa ve itaghoni.
3 Tauvene Sarai igham besooŋa tooni livaa tau Isip tinazi na, ve ighuru ila to Abram imin azaawa zazagheeŋ. Saawe tana, Abram ileep izi Kanaan irau ndaman saŋavul wa. 4 Abram yesuru Agar tigheen le Agar aapo.
Saawe tau iwatagh ighe i aapo, ipakur tauu ve maata tatanin tiina tooni Sarai. 5 Tauvene Sarai izi ve isuk saveeŋ pa Abram ighe: “Pataŋani tau aazne izaa tsiau, ene yo umin puughu pani! Onoon, yau taug naghur besooŋa tsiau livaa ilat tsio. Eemon saawe tau iwatagh ighe i aapo, maata tatanin ghau kat. Maaron tauu pale igabiiz ghiit, ve ighur atuya iŋarui sei tau igham sosor!”
6 Abram iyol aliiŋa ighe: “Ughita. Besooŋa tsio livaa tawe, i ileep ila taum nimam. Saa ŋgar tau yo ughe ugham pani, na ughamu mon.” Tauvene Sarai igham saghatin Agar, le Agar iburig gha ighau.
7 Agar ilaagh ila pa nugh ŋginaaŋa le ivot izi yaa ee, tau bolokbolokia izazaa igharau eez tau ila pa taan sirivu to Sur. I ila ivot ta sewe, ve Mbaŋooŋa to Yoova *Mbaŋooŋa to Yoova igham Yoova naagho ve ivotvot to tamtamon. Tok Pisin Baibol iwaato ighe ‘ensel bilong Bikpela’, ve English Baibol iwaato ighe ‘Angel of the LORD.’ Saveeŋ to mbaŋooŋa tana, ene imin Yoova tauu isavsaav. Tauvene ŋgara siriv matazi iŋgal tighe mbaŋooŋa tawe, ene Krisi.
ivot tooni, ve ighasoni ighe: 8 “Agar, besooŋa livaa to Sarai, yo uleep sindei ta ulam? Ve ughe ula sindei?”
Agar iyol aliiŋa ighe: “Yau naghau pa tiina tsiau Sarai.”
9 Mbaŋooŋa to Yoova isaav pani muul ighe: “Umuul ula pa tiina tsio Sarai, ve uleep ila i saamba. 10 Yau pale nagham paaghu tsio timasa timin naol. Irau to tinin zi mako.” 11 Ve Mbaŋooŋa to Yoova isaav pani muul ighe:
“Yo apom. Ve pale upoop natum tamoot.
Yo aat uwaat eeza Ismael.
Pa Maaron ilooŋ taŋiiz tsio wa.
12 Natum tana pale ivalaghlaagh imin ŋgai sagsag,
ve ighur koi pa tamtamon tisov.
Ve tamtamon tisov pale tighur koi pani paam.
Tauvene i tomania toŋvetaz tooni, koi pale isap sosozi, ve tileep soghan soghan.”
13 Yoova isavsaav tomania Agar le isov, ra Agar igham ŋgar pa gabua tau ivot pani na, ve isaav ighe: “I tau ighitghit ghau irau saawe, tauta yau naghita izi sene.” Tauvene iwaat Yoova eeza ighe ‘El-Roi.’ Saveeŋ tane, puughu tauvene: ‘Maaron tau ighitghit ghau.’ 14 Tauta tiwaat yaa naliu to nugh tawe tighe: ‘Yaa bolokbolokia to Maaron maata yaryaare tau ighitghit ghau.’ †Ila saveeŋ Hibru, tiwaat yaa tawe eeza ‘Beer Lai Roi’.
Yaa tawe igheen bodbodaaŋ pa nugh Kades ve nugh Bered.
15-16 Abram ndaman tooni 86, ve Agar ipoop Abram le naatu tamoot. Ve Abram iwaat eeza Ismael. *Ga 4:22
*16:7: Mbaŋooŋa to Yoova igham Yoova naagho ve ivotvot to tamtamon. Tok Pisin Baibol iwaato ighe ‘ensel bilong Bikpela’, ve English Baibol iwaato ighe ‘Angel of the LORD.’ Saveeŋ to mbaŋooŋa tana, ene imin Yoova tauu isavsaav. Tauvene ŋgara siriv matazi iŋgal tighe mbaŋooŋa tawe, ene Krisi.
†16:14: Ila saveeŋ Hibru, tiwaat yaa tawe eeza ‘Beer Lai Roi’.