33
Yakop yesuru Esau tivandeŋai zi
1 Yakop ilaagh ila, ve maata ila le ighita toogha Esau ilam tomania tamtamon tooni 400. Tauvene Yakop ivalagh natŋa to Lea, Rael, ve besooŋa tooni zilivaa ru. 2 I ighur besooŋa tooni zilivaa ru tomania natuzŋa timuuŋ, ve Lea tomania natŋa titaghon zi, ve Rael yesuru naatu Yosep tilaagh murei kat. 3-4 Ve Yakop tauu imuuŋ pazi, ve iŋarui toogha Esau ila. Ilaghlaagh ve iputput aaghe pani irau pai liim ve ru. I ighamgham tauvene, ve toogha ilaan ilam gha isaghavu ve yesuru titaŋ. 5-6 Ra Esau maata ila le ighita yes zilivaa tomania natuzŋa. Tauvene ighason Yakop ighe: “Ewe savunugha tau yamŋa alam ne?”
Yakop iyol aliiŋa ighe: “Tiina tsiau, ewe yau besooŋa tsio natugŋa. Maaron igham zi payau itaghon poia tooni.” I isavsaav, ve besooŋa tooni zilivaa ru tomania natuzŋa tilam tivot, ve tiput aghezi pa Esau. 7 Ve Lea tomania natŋa tilam ve tiput aghezi pani. Ra Yosep yesuru tiina Rael tilaagh murei tilam, ve yes paam tiput aghezi pani.
8 Esau ighason Yakop muul ighe: “Laak, yes eval tau tilaagh tomania ŋgai ila ŋgun ŋgun gha tilam tivot tsiau ne, puughu mindai?”
Yakop iyol aliiŋa ighe: “Tiina tsiau, yau nagham zi payo, leso ugham ghau toman lolom poia.”
9 Eemon Esau isaav pani ighe: “Wai tazig, yau narao pa gabua ta naol ne. Gabua tsio igheen pa taum.”
10 Eemon Yakop izoornugh ighe: “Ee-e toghag, isaav ighe lolom poia payau, na ughamuur gabua isov tau yau nagham zi payo na. Pasaa, yo utotoi ŋgar to Maaron payau, ve lolom isaghatin ghau ve ugham ghau toman lolom poia. Tauta naghita naghom, ene imin naghita Maaron naagho. 11 Tauvene ugham gabua tau nagham zi payo na. Pa Maaron igham poghani ghau ve igham leg gabua katini.”
Yakop izoornugh, tauta Esau iyok pa ŋgar tooni, ve igham gabua tawe. 12 Ra Esau isaav ighe: “Poia, aburig gha itiŋa tala.”
13 Eemon Yakop isaav pani ighe: “Mako. Tiina tsiau, yo umuuŋ. Ughita. Geegeu tane, tapirizi irau tilaagh rekia mako. Ve sipsip ve mekmek tane tighunghun tuz soone, ve tikaria laghooŋ wa. Tapasul zi sov. Isaav ighe tagham zi tilaagh malau pa aaz eemon, ene aat tisov timatmaat. 14 Tauvene tiina tsiau, yo umuuŋ, ve yau tomania yes geegeu ve ŋgai pale nitaghon ghom. Pale nilaghlaagh poi taghon geegeu ve ŋgai tapirizi, le nilat peria tsio izi nugh Seir.” 15 Tauvene Esau iyok pa Yakop saveeŋ tooni ighe: “Poia. Ighe tauvene, yau aat napul tamtamon tsiau siriv tileep tomani ghom. Leso tiŋgin gham ve yamŋa alam.”
Eemon Yakop iyol aliiŋa ighe: “Tiina tsiau, aliŋam poia. Eemon yo utotoi ŋgar popoia naol payau wa. Ugham ŋgar naol sov. Tamtamon tsiau tilepleep.”
16 Tauvene aaz eemon tana, Esau imuul ila pa Seir. 17 Eemon Yakop ila Seir mako. Ilaagh ila pa nugh ite, eeza Sukot. Ila ivot ta sewe, ve ipayooz le ruum ee, ve igharaat dur siriv pa ŋgai tooni paam. Tauta tiwaat nugh tawe eeza Sukot. *Sukot puughu tauvene: ‘dur’.
18 Saawe tau Yakop ipul taan sirivu to Mesopotamia, ve imuul ilam taan to Kanaan, i ighur niia to lepoogh igharau nugh Sekem. 19 Ve ighol taan tau i ilepleep pani na ila to yes ziiri waaro to Amor pa maet milmilia ndiŋndiŋ ee (100). (Amor, i Sekem taama). *Yo 4:5
20 Ve Yakop igharaat artaal ee izi ta sewe, ve iwaat eeza ighe El Eloe Israel. †‘El Eloe Israel’, puughu tauvene: ‘Maaron, i Maaron to Israel’.