14
Zeran kankanooŋa tau lolozi iveegh pa Maaron
Mbouŋ to David
1 Yes kankanooŋa tau lolozi iveegh pa Maaron na, tigham ŋgar ila lolozi tighe: “Maaron eta ileep mako.”
Zeran tauvene, Maaron loolo pazi mako kat. Pasaa, Ŋgar toozi isaghat wa. Tauta tighamgham ŋgar sasaghati naol.
Eta igham ŋgar poia mako. *Mbo 10:4, 53:1+; Ro 3:10+
2 Yoova ileep izi sambam, ve maata izizi pa tamtamon to taan.
I ighe ighita: Toozi eta pale ighilaalo, ma mako?
Ve eta izuari ghi leso iwatagh Maaron? Mako. *Gnp 18:21
3 Tisov tipul eez tooni ve tisaghat wa.
Eta igham ŋgar poia mako. Mako le mako kat. *Gnp 6:5; Ep 2:3
4 Tauvene Yoova igham ŋgar naol ighe: “Yes tau tinoknok ghamuuŋ ŋgar sasaghati na, lezi ghilalooŋ, ma mako? Ŋeez o ŋgar toozi ivot?
Saawe isov, yes titombaan tamtamon tsiau ve tipasov gabua toozi le isov kat, imin yes tau tighan aniiŋ popoia, ve tipasovu.
Matazi iŋgal ghau ve tisuŋ payau mako.” *Yems 5:4
5 Eemon murei, roiŋ tiina kat pale igham zi.
Pasaa, Maaron pale ivool to tamtamon duduŋazi tau titaghon eez tooni.
6 Yes mbolaaŋa tau tirau gabua eta mako na, yam zeran sasaghati aponpoon eez pazi. Tauta ŋgar toozi le anooŋa mako.
Eemon Yoova tauu pale imin lezi niazi to yoŋgaaŋ.
7 Oyai, Maaron tau ileep izi nugh Zion na iuul yes Israela, ve ipas zi tivot pa pataŋani toozi, o poi!
Isaav ighe Yoova iuul tamtamon tooni ve tileep poia muul, ene pale tintinizi.
Onoon kat, Yakop paaghu tooni pale lolozi poia le poia kat. *Mbo 53:6, 126:1